Kansi weyala nakutala antu anakwiñila Mwitala daWanta

MALWIHU EHULAÑAWU ATWANSI

Twayilañadi Nakupompa Hetala daWanta?

A Yinsahu jaYehova apompaña kayedi mumulungu hamaluña akudifukwila atenañawu nawu Matala aWanta. Yumanyi yamwekanaña nawa munateli kudiluñisha ñahi neyi muya nakupompa?

Yumanyi yamwekanaña Hetala daWanta?

Hetala daWanta diheluña hadizishilañawu nsañu yamuBayibolu yinateli kutukwasha. Yuma yitwadizaña hakupompa yinateli kuyikwasha:

kumwiluka Nzambi.
kwiluka muloña waweni yuma chiyinakumwekena makonu.
kwikala muntu wambukaku.
kwikala nawamabwambu amawahi.

Komana mweluka? Heluña hapompelañawu aYinsahu jaYehova atenañahu nawu Hetala daWanta muloña dihadizilañawu nsañu yahosha haWanta waNzambi.—Matewu 6:9, 10; 24:14; Luka 4:43.

Muloñadi chimwatela kuyila nakupompa?

Nsañu yinateli kuyikwasha. Yishina yamuBayibolu yadizañawu hakupompa kwawaYinsahu jaYehova yinateli kuyikwasha ‘kwikala namaana.’ (Yishimu 4:5) Chikufumamu, Bayibolu yikuyikwasha kufuukula chiwahi muchihandilu chenu. Yinateli kuyikwasha cheñi kwiluka ñakwilu yamalwihu alema, adi neyi:

Muloñadi chatuleñeleliwu?
Twatela kumwinka Nzambi muloña hamakabi itunakumona?
Chumanyi chamwekanaña neyi muntu nafwi?

Nyitu yinalondelihu hijimpanji jahanañawu hakupompa kwakunsa yamulungu:

Muloñadi Chitwatela Kwitejela Bayibolu Kutulombola?
Kudihi Kumunateli Kuwana Wukwashu Mumpinji Yakukala?
Yumanyi yinakutwilila Wanta waNzambi Makonu?

“Mukwetu mutwatañilileña wenjili nakupompa ifuku dimu. Twashakamini hamu, nawa twazatishili nyikanda hamu. Chitwamanishili, wanlejeli nindi wazañaleli nañakwili yahanineñawu antu hakupompa mujimpanji jakuhanjeka. Nawa wahosheli nindi kuchechi yawu hiyekala nanyikanda yakudizamu neyi chitwekala etuku.”—Brenda.

Komana mweluka? Hetala daWanta hekala yitwamu yayivulu nawa afweteshaña wanyi.

Anateli kuyikolesha chikupu. Bayibolu yashimuna nawu akwaKristu atela kupompa hamu kulonda ‘adikolesheña wumu namukwawu.’ (Aheberu 10:24, 25) Twatiyaña kuwaha kwikala nawamabwambu amawahi amukeña Nzambi niakwawu mukaanu kaayi mudi antu asweja kudikeña aweni.

“Mpinji yikwawu naneñaña nawa nazeyaña nakashi, ilaña neyi niya nakupompa antu inawanaña Hetala daWanta ankoleshaña. Hanyima yakupompa, nekalaña namuzañalu chikupu nawa nekalaña nañovu yakuzata nyidimu yikwawu.”—Elisa.

Komana mweluka? Mukaayi kejima mudi yipompelu yawaYinsahu jaYehova kubadika ha 120,000, nawa adi namaluña akupompela kubadika ha 60,000. Chaaka nichaaka, atuñaña Matala aWanta kwakwihi na 1,500 kulonda kwikali maluña akupompela antu anakuvulilaku.a

Yuma yahoshañawu akwenu atwansi

“Hinadiña kushikola, mpinji yikwawu twayileña namukwetu mutwatañilileña kukupompa, nawa watiyili kuwaha hakumona atudizi aBayibolu adi neyi yena anakudizila hamu. Cheñi katataka, mukulumpi wamudimu niyena wenjili nakupompa, nawa watiyili kuwaha hakumona chitwazatisha Bayibolu. Ichi chuma chamwekeni, chankolesheli chikupu ninami!”—Jessica.

“Kupompa kwankwashaña kubula kusweja kwakama hayuma yidi yejima. Twadizaña chakwikala nachihandilu chawahi, chakwikala antu ambukaku niyuma yikwawu. Mpinji yejima neyi inakufuma Hetala daWanta ankoleshaña nawa nekalaña namuzañalu.”—Timothy.

“Iyala wumu wunatambikili kukupompa wahosheli nindi: ‘Nenjili hohu kulonda niluki chikupu nami yuma yimwakuhwelela yakutwamba. Ilaña hanyima yakupompa nelukili nami yuma yinakuhwelela ami diyakutwamba!’ Watiyili kuwaha hakumona aYinsahu jaYehova chadikeñawu. Wahosheli nindi: ‘Hela chakwila dikadiña katachi kudimona nenu, mwamwekesheleli kukeña neyi kwiji mwañilukili dehi!’”—Jacob.

“Mpinji yikwawu natoñojokeleña nami, ‘chitwamanisha hohu kupompa nikunyamuka nakufunta kwitala.’ Ilaña neyi tunakupompa, iyi yitoñojoka yenjileñamu niwanyi. Neyi tunamanishi kupompa, twahanjekeleña nawakwetu nawa nelukileña niwanyi chuma chaletesha nitoñojoki muyina njila. Neyi nabulileña kuya nakupompa, hinadi kwikala nawamabwambu amawahi neyi inikweti chayinu mpinjiku.”—Madison.

a Hakwila muwani iluña dakupompela, yenu hanasonekiwu nawu “Kupompa kwawaYinsahu jaYehova kwamuChipompelu” nawa chintenu hanasonekiwu nawu “Wanenu Iluña Didi Kwakwihi naKumwashakamaña.”