Chazatikaña Yawaana Yimwahanaña
Yuma Yinasompokihu Kuyibombela haYuma Yantesha
OCTOBER 1, 2020
A Yinsahu jaYehova azataña mudimu walema wakukwasha antu mumatuña kubadika ha 200. Ilaña matuña 35 hohu diwu atambwilaña yawaana yayivulu yakulandamu yuma yinakukeñawu. Indi mumatuña mwatambwilañawu yawaana yantesha?
Izanvu Dalombolaña datalaña yuma yinakukeñawu aYinsahu jaYehova hakwila adifukuleña kudi Yehova nawa ashimwineña nsañu yayiwahi. Mali ayizatishaña chiwahi. Neyi kasanji kanatambwili mali amavulu kubadika mali anakukeñeka, enkañahu matuña amakwawu adi namali antesha. Elaña neyi chelileñawu akwaKristu akusambila adikwashileña wumu namukwawu kulonda ‘esekani.’ (2 Akorinda 8:14) Azatishileña yuma yawu yasompokeleñahu kulonda ayishilihu akwawu akwaKristu adiña nayuma yantesha.
Amanakwetu atambwilaña yawaana yashalañahu kufuma kutusanji tukwawu atiyaña ñahi? Chakutalilahu, muTanzania, mwekala antu amavulu azatishaña mali akushika ku K40.1688 hefuku, awa mali ayizatishili kuwahisha nachu Itala daWanta dazatishaña Chipompelu chaMafinga. Chipompelu chasonekeli nawu: “Kufuma tuhu hawahishiliwu Itala detu daWanta tunavuliliku nankashi! Tunakusakilila kuloñesha kwaYehova niamanakwetu mukaayi kejima hayawaana yawu, yinatukwashi etu kwikala netala dakudifukwilamu dadiwahi.”
Amanakwetu amakwawu muSri Lanka yakuda yinayikehi muloña wamusoñu waCOVID-19. Hakachi kanawa amanakwetu hadi nimuhela Imara Fernando nimwanindi weyala Enosh. Hela chochu, muloña wayawaana yafumaña kumatuña amakwawu, yinayikwashi. Asonekeli nawu: “Tunayisakilili amanakwetu atumwekesheleli kukeña muniyi mpinji yakala. Tukweti muzañalu hakwikala munichi chisaka, nawa tunakulomba netu Yehova yayikwashi amanakwetu ejima munanu mafuku akukuminina.”
Muhela Imara niEnosh Fernando
Amanakwetu niahela enkañahu akwawu yuma yikwetiwu, hichikweti muloña nakwashakamañawuku. Chakutalilahu, Enosh wadiña nakachikasha kanyanya mwahembeleleñayi mali akukwasha nachu yisaka yinakankili. Guadalupe Álvarez niyena welili chuma chochimu. Washakamaña muMexico mwiluña mwavula kutambulawu kawufwetu kantesha. Ilaña wahanaña yinateli kutweshayi. Wasonekeli nindi: “Innakumusakilila Yehova hakuwaha kwindi nihakukeña kwindi. Neluki nami yawaana yami akuyibombela hayawaana yikwawu nawa akuyizatisha hakukwasha amanakwetu anakankili.”
Tusanji twatemeshaña mali kunawa maluña kudi kukankila, twatiyaña kuwaha kwila mwenimu. Manakwetu Anthony Carvalho, wamukometi yamutayi yamuBrazil, wahosheli nindi: “Hadi yaaka yayivulu, twakeñeleña wukwashu wamali kufuma kumatuña amakwawu hakwila nawu mudimu wuzatiki chiwahi mwituña detu.” “Muloña waniwu wukwashu, yuma yawahili chikupu. Chayinu mpinji, kukala kwamali kunamani nawa tukweti kukooleka kwakukwashaku amakwawu. Amanakwetu muBrazil, alemesha mudimu wakushimwina mukaayi kejima nawa amonaña yuma yatela kwilawu hakwila akwashi iwu mudimu.”
A Yinsahu jaYehova anateli kukwasha ñahi amanakwawu niahela anakankili? Hiyatela kutemesha mali kukasanji kadi mwituña dacheñiku, ilaña atela kuhana yawaana kumudimu wamukaayi kejima. Anateli kumbila mukachikasha kadi muchipompelu kasonekawu nawu “Mudimu waMukaayi Kejima” hela hanasonekiwu nawu yawaana ha jw.org. Twasakililaña nankashi haniyi yawaana yejima.