Yeremiya
37 Nawa Mwanta Zedekiya+ mwana kaYosiya watachikili kuyuula muchifulu chaKoniya*+ mwana kaYehoyakimi, muloña Mwanta Nebukaneza* wakuBabiloni wamutondeli kwikala mwanta mwituña daYuda.+ 2 Ilaña yena niambuñindi niantu amwituña hiyatiyilili kumazu aYehova ahosheliyi kuhitila mudi kaprofwetu Yeremiyaku.
3 Dichi Mwanta Zedekiya watemesheli Yehukali+ mwana kaShelemiya niZefwaniya+ mwana kakapristu Mayaseya kudi kaprofwetu Yeremiya, nindi: “Mwani tulombeliku kudi Yehova Nzambi yetu.” 4 Yeremiya wendeleña wakasunuka mukachi kawantu, muloña adiña kanda amushi mukaleya.+ 5 Amashidika aFwaru ayitemesheli kufuma kuEjipitu,+ nawa aKalideya akuchikileña Yerusalema atiyili nawu anakwinza. Dichi alekeli kumulukuka Yerusalema nakufunta.+ 6 Kuhiñahu, izu daYehova denjili kudi kaprofwetu Yeremiya, nawu: 7 “Yehova Nzambi yaIsarela nahoshi nindi, ‘Mwanta waYuda, wayitemesha kwinza nakuñihula, mumuleji nenu: “Tiyaña! Amashidika aFwaru anakwinza nakuyikwashaku akufunta kwituña dawu daEjipitu.+ 8 Nawa aKalideya akufunta nakuzuña naniwu musumba, akuwutambula nawa akuwocha nakesi.”+ 9 Yehova nahoshi nindi, “Bayi mudidimba enu aweni* nakuhosha nenu, ‘Hela chikali ñahi aKalideya akutwamuka,’ ilaña hiyakuyamukaku. 10 Hela chakwila mutapa amashidika ejima awaKalideya anakuyizuñisha nawa hashala hohu antu jawu imunakatishi, hohamu akunyamuka mumatenti awu nakwocha iwu musumba nakesi.”’”+
11 Chelili amashidika awaKalideya achiini kulukuka Yerusalema muloña wamashidika aFwaru,+ 12 Yeremiya wafumini kuYerusalema nakuya kwituña daBenjamini+ nakutambula iseka dindi kwenoku hadi antu jindi. 13 Ilaña chashikiliyi kuChiisu chaBenjamini, mukulumpi wawanhembi, wejina daIriya mwana kaShelemiya, Shelemiya mwana kaHananiya, wamukwatili kaprofwetu Yeremiya nakumwila nindi: “Eyi wunakudibomba nawaKalideya!” 14 Ilaña Yeremiya wahosheli nindi: “Diimu wanyi! Ami hinnakudibomba nawaKalideyaku.” Ilaña hamutiyililiku. Dichi Iriya wamukasili Yeremiya nakumutwala kudi ayilolu. 15 Ayilolu amuhililili Yeremiya,+ amweteli nawa amukasilili*+ mwitala dansoneki Yehonatani, dabalumwiniwu kwikala kaleya. 16 Yeremiya amushili mukaleya kaheseki,* mutupeka twaheseki, nawa washakamini mwenomu mafuku amavulu.
17 Kuhiñahu, Mwanta Zedekiya watemesheli antu kuya nakumuleta, nawa mwanta wamwihujoleli mukuswamujoka mwitala* dindi.+ Wamwihwili nindi, “Kudihu izu dinafumi kudi Yehova?” Yeremiya waakwili nindi, “Didi kwoku!” nawa watwalekelihu nindi, “Akakuhana muchikasa chamwanta waBabiloni!”+
18 Yeremiya wamwilili cheñi Mwanta Zedekiya nindi: “Nshidinyi yinnakoñi kudi eyi niambuñeyi niantu jeyi, mwaka muñushi mukaleya? 19 Indi atuprofwetu tweyi adi kudihi akuprofweteleli nawu, ‘Mwanta waBabiloni hakenza nakulukuka eyi ninidi ituñaku’?+ 20 Dichi mwani, tiyaku eyi nkaaka yami mwanta. Mwani, tiyaku kulomba kwami kwakuntiyila luwi. Bayi wunfutisha kwitala dansoneki Yehonataniku,+ neyi nehi nakenda kafwila kwenoku.”+ 21 Kufumahu, Mwanta Zedekiya wahanini lushimbi nindi Yeremiya amukwati nakumusha muLubanza lwawaNhembi,+ nawa amwinkeleña dinkendi danjiñumuki hefuku-hefuku kufuma kumukwakwa wawakakwocha mankendi+ ninochu chamanini mankendi ejima mumusumba.+ Nawa Yeremiya watwalekelihu kushakama muLubanza lwawaNhembi.