Maku
4 Yesu watachikili cheñi kutañisha kuchikumu chakaluñalwiji nawa izaza deneni dawantu deneni dapompeli kwakwihi nayena. Dichi wakandamini muwatu wadiña hahalehi nachikumu nakushakama mwenomu, ilaña izaza dawantu dadiña kwakwihi nachikumu chakaluñalwiji. 2 Watachikili kuyitañisha yuma yayivulu nayakutalilahu, chayitañishileñayi wayilejeli nindi: 3 “Tiyenu. Mukwakukuwa wayili nakukuwa mbutu. 4 Chakuwileñayi, mbutu jimu jaholokeleli kunsa yanjila, kuhiñahu atuda enjili nakujiida. 5 Mbutu jikwawu jaholokeleli heseki damalola nawa jashikeneni dakumena muloña hadiña maseki antesha. 6 Ilaña itena* chidashikili mwiwulu, mbutu jababikili nawa jomini muloña hijadiña nanyijiku. 7 Mbutu jikwawu jaholokeleli munyiña, nyiña chiyakulili yakañesheli mbutu kukula nawa hijasoñeli nyikabuku. 8 Ilaña mbutu jikwawu jaholokeleli hamaseki amawahi nawa jakulili nakuvula, jatachikili kusoña nyikabu, iji 30, jikwawu 60, jikwawu 100.” 9 Wabombelelihu cheñi nindi: “Dichi muntu wukweti matu akutiya, yatiyi.”
10 Chelili izaza dawantu dinayi dehi, atumbanji twindi kubombelahu niapostolu 12 atachikili kumwihula hayakutalilahu. 11 Wayilejeli nindi: “Enu anayinki kashinshi kakwiluka yuma yajila yakujinda yaWanta waNzambi, ilaña antu abula kwikala atumbanji, yuma yejima ayidizaña nayakutalilahu, 12 chakwila, kutala atalaña, ilaña hiyamonañaku, kutiya atiyaña, ilaña hiyelukaña muchatalisha hela kubalumuka munyichima yawu kulonda ayanakeni nshidiku.” 13 Cheñi, wayilejeli nindi: “Chineli himweluka mwatalisha ichi chakutalilahuku, hanu dinu mwakeluka ñahi yakutalilahu yikwawu?
14 “Mukwakukuwa wakuwaña mazu. 15 Mbutu jaholokelaña kunsa yanjila, diwu antu elaña chatiyawu mazu; hohenohu Satana wenzaña nakufumishamu owu mazu akuwiliwu mudi wena. 16 Chochimu nimbutu jaholokelaña heseki damalola; diwu antu elaña chatiyawu mazu, hohenohu ayitambwila namuzañalu. 17 Hela chochu hiyakweti nyijiku, atwalekañahu hakapinji kantesha, ilaña chamonawu lukadi hela ikabisha hamuloña wamazu, ashikenaña dakuhukana. 18 Kudi cheñi mbutu jikwawu jaholokelaña munyiña. Diwu antu atiyaña mazu, 19 ilaña kwakama kwanshakaminu yamakonu* niñovu yakudimbana kwamaheta nikufwila kwayuma yikwawu kweñilaña munyichima yawu nakukañesha mazu nawa alekaña kusoña nyikabu. 20 Nkumininaku, mbutu jaholokelaña hamaseki amawahi, diwu antu atiyaña mazu nakuyitambwila chiwahi nikusoña nyikabu, iwu 30, mukwawu 60 mukwawu 100.”
21 Wayilejeli cheñi nindi: “Inoñu hiyadibutilaña mwibañu* hela kuditenteka mwishina dakadidiku, netu? Komana hiyaditentekaña hatentekañawu inoñuku? 22 Muloña kwosi chuma chaswama chikabula kumonawuku; nawa kwosi chuma chaswekawu chikupu chikabula kumwekeshawu hatookaku. 23 Dichi muntu wukweti matu akutiya, yatiyi.”
24 Wayilejeli cheñi nindi: “Babalenu nansañu yimunakutiya. Muloña chesekelu chimunakwesekelaku nachu akwenu, dichi chakayesekelawu nachu ninenu nawa, eña akayinkelahu nijikwawu. 25 Muloña muntu wejima wukweti akamwinkelahu jikwawu, hakwila muntu wejima wunabuli, nichuma chikwetiyi akamutambulachu.”
26 Dichi watwalekelihu nakuhosha nindi: “Wanta waNzambi wudi neyi muntu wunakuwi mbutu heseki. 27 Wakaamaña nawufuku nakuhinduka nantetemena, mbutu yamenaña nakukula chakwila wakañanyaña kwiluka chiyakulaña. 28 Iseki nkawadu dasoñaña nyikabu chovu-chovu, kwatachikilaña kumena nsaachi, kuhiñahu mutu, nkumininaku nchacha hiyikumena mumutu. 29 Ilaña mbutu chiyashika hachilaaka chakwaañula, watachikaña kuyañula nachikwakwa, muloña mpinji yakwañula yinashiki dehi.”
30 Watwalekelihu cheñi nakuyileja nindi: “Wanta waNzambi tunateli kuwesekeja nachumanyi hela tunateli kuwulumbulula nachakutalilahu chamuchidinyi? 31 Wudi neyi luchacha lwamositadi,* lwakehelamu hanchacha jejima jahanu hamaseki lwatumbiliwu heseki. 32 Ilaña neyi alutumba, lwakulaña nawa lwatohaña nakwikala mutondu nakubadika nyitondu yatumbañawu yamafu ejima adañawu, lwekalaña nanyitayi yamaneni chakwila atuda amuluzwizu enzaña nakushakama muwulelu windi.”
33 Wayilejeleña mazu aNzambi nayakutalilahu yayivulu yamuchidiwu, kwesekeja nahakuminini ñovu jawu jakutiya. 34 Mwamweni, hahosheleña nawu chakadi chakutalilahuku, ilaña atumbanji twindi wayilumbulwilileña yuma yejima kwakankawawu.
35 Chikwelili melela hadodenodu ifuku, wayilejeli nindi: “Tuzambukilenu kuchikumu chakwishinadi.” 36 Chelili analeji dehi izaza dawantu nawu ayi kwawu, amusendeli muwatu chakadi kudiloñesha nawa kwadiña nimaatu amakwawu amulondeleleña. 37 Dichi kwenjili mpepela yeneni, mankanda atachikili kwinzesha watu namenji nawa watu washalili kwanti nakwinzala. 38 Ilaña yena wadiña kuntoñi yawatu yakunyima iku nakaami hamushachilu.* Amuhindwishili nakumuleja nawu: “Ntañishi, wunakwakama wanyi neyi keña tufwi tahindi?” 39 Yena chachitiyiliyi, wahindukili nakuzuwila mpepela nikuleja kaluñalwiji nindi: “Mwena! Wundaku nzo-o!” Nimpepela yalekeli nawa hawundili chikupu. 40 Dichi wayihwili nindi: “Muloñadi chimunatiyili woma?* Komana enu nihanu kanda mwiikali nachikuhwelelu?” 41 Ilaña wena atiyili woma nankashi nakudihoshesha mulwawu nawu: “Indi iwu muntu hinyi anakwovwahilawu nikudi mpepela nikaluñalwiji?”