Maku

5 Kuhiñahu, azambukilili kwishinadi dikwawu dakaluñalwiji mwiluña dawaGerasa. 2 Yesu chafuminiyi muwatu, hohenohu wadibulakeni neyala wafumineña kumajamu* wadiña nandemoni. 3 Washakamineña kumajamu nawa hikwadiña muntu wadiña nañovu yakutwesha kumukasa chiwahi hela neleñiku.* 4 Kakavulu amuhatileña mumpompa nikumukasa maleñi, ilaña ­waketolileña ­maleñi* nikukotola mpompa; nawa hikwadiña muntu wadiña nañovu yakumufwomonaku. 5 Watwalekelihu nakubilela kumajamu nikumapidi mwaana niwufuku nakuditapola namalola. 6 Ilaña chamumweniyi Yesu hahalehi chanti, wayili lufuchi ­nakumufukamina. 7 Kuhiñahu wabidikili nezu datiyakana nindi: “Yesu, Mwana kaNzambi Mukwakubadika Chikupu, chumanyi chiwunakukeña kudi ami? Inakukusanyikisha mwijina daNzambi nami bayi wunkabishaku.” 8 Muloña Yesu wamulejeleña owu ndemoni nindi: “Eyi ndemoni, fumaku mudi owu muntu.” 9 Ilaña Yesu wamwihwili nindi: “Indi ijina deyi yeyinyi? Yena wamwakwili nindi: “Yami Izaza,* muloña tudi amavulu.” 10 Nawa watwalekelihu nakumulembelela Yesu nindi bayi yayihañamu andemoni munodu ituñaku.

11 Kwenoku kwadiña mukanka wawangulu* wadiña kumpidi nakuda. 12 Dichi andemoni amulembeleli nawu: “Tutemeshi twiñili mudi angulu.”* 13 Nawa wayitejeli. Hohenohu andemoni afumini nakwiñila mudi angulu,* owu mukanka wawangulu wadiña kwakwihi na 2,000, watakumukilili kuchikumu kwakunkumuka nankashi nimukaluñalwiji chu-u nawa afwili mukaluñalwiji. 14 Ilaña atubiña anowu angulu* atemukili nakuya nakushimuna mumusumba nimumaluña amukamwihi, dichi antu enjili nakutala chuma chamwekeni. 15 Kuhiñahu enjili kudi Yesu, amweni iyala wadiña Nezaza dawandemoni hatachi nashakami navwali chachiwahi nawa nakoli, owu antu atiyili woma nankashi. 16 Cheñi, antu amweni chuma chamwekeni alejeliku akwawu yuma yamumwekeneni owu iyala wadiña nawandemoni niangulu.* 17 Dichi antu atachikili kumulembelela Yesu nawu yafumi mwiluña dawu.

18 Chakandamineñayi muwatu, owu iyala wadiña nawandemoni wamulembeleli nindi yayi nindi. 19 Hakwila yena wakaanini, ilaña wamulejeli nindi: “Yaña kwitala kudi antaña jeyi wuyileji yuma yejima yinakwililiyi Yehova niluwi lunakumwekesheliyi.” 20 Owu iyala wayili, watachikili kushimuna muDekapoli* yuma yejima yamwilililiwu kudi Yesu nawa antu ejima ahayamini.

21 Chelili Yesu nazambukili dehi cheñi kuchikumu chakwishinadi dakaluñalwiji, izaza deneni dawantu dapompeli kudi yena henohu wudi kwakwihi nakaluñalwiji. 22 Ntwamina wasinagogi wumu wejina daJayirusa wenjili, chamumweniyi Yesu, wadinatili kunyendu yindi. 23 Wamulembeleli mapampa kakavulu nindi: “Mwanami wanyanya wamumbanda wakata nankashi.* Nalembi, tuyi wakamunañiki makasa eyi kulonda yakoli nawa yatwalekihu kuhanda.” 24 Hohenohu Yesu wayili hamu nindi niizaza deneni dawantu damulondeleleña nikumuwuña.

25 Hadiña mumbanda wadiña namusoñu wakupweka mashi hadi yaaka 12. 26 Wakabakeni nankashi* kudi ayimbuki nawa wahanini yuma yindi yejima yadiñayi nayu, wakoleli wanyi, ilaña musoñu waswejeleliku. 27 Chatiyiliyi mpuhu yaYesu, wahitili mwizaza nakwinza kunyima yindi nakukwata kuchakuvwala chindi chahewulu, 28 muloña wahosheleña nindi: “Neyi nikwata hohu kuchakuvwala chindi chahewulu, nukukola.” 29 Hohenohu mashi alekeli kupweka nawa welukili nindi anamuuki musoñu wamukabishileña nankashi.

30 Yesu washikeneni kwiluka nindi ñovu yinamumani, dichi wabalumukili nakutala izaza dawantu nakuyihula nindi: “Hinyi wunakwati kuchakuvwala chami chahewulu?” 31 Ilaña atumbanji twindi amwilili nawu: “Wunakumona izaza dawantu chidinakukuhwila, ilaña wihuleña neyi, ‘Hinyi wunankwati?’” 32 Hela chochu, Yesu wadiña nakutalatala kulonda yamoni muntu wamukwata. 33 Owu mumbanda watiyili woma nawa wazaalileña, chelukiliyi chuma chamumwekeneni, wenjili nakudibuka heseki kudi Yesu nakumuleja yuma yejima. 34 Wamulejeli owu mumbanda nindi: “Mwanami, chikuhwelelu cheyi chinakukoleshi. Yaña mukuwunda nawa musoñu weyi wumani.”

35 Iku wuchidi kuhosha, kwenjili amayala afumini kwitala dantwamina wasinagogi nakumuleja nawu: “Mwaneyi wamumbanda nafwi dehi! Muloñadi chiwunakumukabishila Ntañishi?” 36 Ilaña Yesu chatiyiliyi mazu ahosheleñawu, wamulejeli ntwamina wasinagogi nindi: “Bayi wutiya womaku,* ikalaku hohu nachikuhwelelu.” 37 Yesu hetejeli antu amakwawu kumulondelaku, chiña hohu Petulu niYakoba niYowanu mana kwaYakoba.

38 Dichi ashikili kwitala dantwamina wasinagogi, awanini kudi ipumba niantu adilileña niatwileña makumbu. 39 Cheñililiyi mwitala, wayilili antu nindi: “Munakudiladi nikuleta ipumba? Iwu mwana nafwi wanyi, wudi mutulu.” 40 Chatiyiliwu awa mazu, atachikili kumuseha nakumusupisha. Ilaña chelili nayifumishimu dehi mwitala, wasendeli tata yanowu mwana nimama yindi niatumbanji amulondeleleña nakwiñila mwadiñayi owu mwana. 41 Kuhiñahu, wakwatili kuchikasa chanowu mwana nakumwila nindi: “Talita kumi,” awa mazu neyi ayibalumuna, aya mukwila nawu: “Eyi kansi wamumbanda, nakuleji nami, hindukaku!” 42 Hohenohu owu kansi wamumbanda wahindukili nakutachika kwenda. (Wadiña nayaaka 12.) Anvwali jindi chamweniwu chumichi, azañaleli nankashi. 43 Hela chochu, wayikonkomweneni chikupu nindi bayi alejaku muntuku, ilaña wayilejeli nindi amwinki owu kansi wamumbanda yakuda yadi.