Maku
13 Chafumineñayi mutembeli, kambanji kindi wumu wamulejeli nindi: “Ntañishi, talaña! awa malola nimatala okuwaha!” 2 Hela chochu, Yesu wamwihwili nindi: “Awa matala amaneni wunayimoni? Awa malola adi hanu, hosi ilola nidimu dakashala hewulu delola dikwawu dakabula kwalumunawuku.”
3 Chashakaminiyi haMpidi yaMaolivi heluña datalañana natembeli, Petulu, Yakoba, Yowanu niAnderi amwihwili kwakankawawu nawu: 4 “Tuleji, mpinjinyi yakamwekana yumiyi, nawa chinjikijilwinyi chikamwekesha nawu yuma yejimiyi katataka yikumi?” 5 Dichi Yesu watachikili kuyileja nindi: “Babalenu kulonda abuli kuyiluwañesha kudi muntu hela wumu. 6 Antu amavulu akenjila mwijina dami, nakuhosha nawu, ‘Diyi ami,’ nawa akadimba antu amavulu. 7 Cheñi, chimwakatiya nsañu jamajita mukamwihi nikwakulehi, bayi mwakatiya womaku; yumiyi yatela kumwekana henohu kukuma kuchidi kanda kwinzi.
8 “Muloña muza wakanyamuka nakuzuña namuza wukwawu, wanta niwena wakanyamuka nakuzuña nawanta wukwawu; kwakekala nyitentanshi kweñi-nakweñi; kwakekala ninzala yakapwelendendi. Yumiyi yakekala dikutachika kwayihuñu.*
9 “Ilaña enu, babalenu. Antu akayiholokela kuyota yanyiloña yanyanya nawa akayetela mumasinagogi nikuyimika kumesu awanguvulu niawanyanta kukoola ami kulonda wakekali wunsahu kudi wena. 10 Cheñi, nsañu yayiwahi atela kusambila kuyishimwina kunyuza yejima. 11 Nawa neyi hiyakuyitwala nakuyiholokela kuchota chanyiloña, bayi mwakakama yuma yimwakahoshaku; ilaña chejima chikayilejawu hanoyu mpinji, dichimwakahosha, muloña hiyenu mwakahoshañaku, ilaña spiritu yajila diyakahoshaña. 12 Cheñi, muntu wakahana manakwindi kulonda akamujahi, tata yawantu wakahana mwanindi nawa anyana akadikaña nawanvwali jawu nakuyihana kulonda ayijahi. 13 Akayihela kudi antu ejima kukoola ijina dami. Ilaña muntu wakomika* kushika nikunsa, diyi akamwinawu.
14 “Hela chochu, chimwakamona chuma chawuzondu chakisañanaña yuma chinemani mwiluña muchatela kubula kwimana (muntu wunakutaña watela kuzatisha kashinshi kulonda yatiyishishi munatalishi iyi nsañu), dichi antu akekala muYudeya akatachiki kutemukila kumapidi. 15 Muntu wakekala hewulu detala, bayi yakasuluka hela kwiñila mwitala dindi nakusenda chumaku; 16 nawa muntu wakekala mwiha, bayi yakafunta kuyuma yakashiyayi nakunona chakuvwala chindi chahewuluku. 17 Oyihuñu yakamonawu ambanda akekala namavumu niambanda akekala nawanyana anyanya mumafuku wenowu! 18 Dichi, lombenuña kulonda chumichi chikabuli kwikalaku mumpinji yamashika; 19 muloña hamafuku owu, kwakekala lukadi lwakwila kanda lwikaleñaku dehi kufuma hatachikiliyi Nzambi kuleña yuma kushika nikulelu nawa hilwamba kamwekanahu cheñiku. 20 Kafwampi, neyi Yehova kuyihihisha owu mafuku nehi, kwosi muntu niwumu akamwinawuku. Ilaña wakayihihisha owu mafuku muloña wawantu atondewa anatondiyi.
21 “Cheñi nawa, neyi muntu yayileja nindi, ‘Talenu! Kristu iwu,’ hela nindi, ‘Talenu! Ona hana,’ bayi mwaketejiku. 22 Muloña kwakekala aKristu akutwamba niatuprofwetu akutwamba nawa akakoñaña yinjikijilu niyuma yakuhayamisha yakuluwañesha nachu, kulonda neyi chinatwesheki akaluwañeshi atondewa. 23 Dichi enu, babalenu. Ami nayilejeli chadimu yuma yejima.
24 “Ilaña mumafuku wenowu, chilwakamana olu lukadi, itena* dakeyila bwi-i, kakweji kakatoñeka wanyi, 25 tutumbwa twakaholokaña kufuma mwiwulu nawa yuma yasweja ñovu yamwiwulu yakakanka. 26 Kuhiñahu, akamona Mwana kamuntu nakwinza mumavu nañovu yasweja nikulema. 27 Cheñi nawa, wakatemesha añelu nawa akapompesha hamu antu indi atondewa kufuma kuyibalu yiwana,* kufumisha kunsa yeseki ndo-o kushika nikunsa yewulu.
28 “Ichi dinu dizilenu kunichi chakutalilahu chamutondu wachikuyu: Neyi tunyitayi tutachika kumena nimafu atachika kusapuka, mwelukaña nenu mayinza adi kwakwihi. 29 Ninenu nawa, neyi mumona yuma yejimiyi hiyikumwekana, mwakeluki nenu wudi kwakwihi, wudi kuyiisu. 30 Inakuyileja chalala nami, idi ikiñu dikahita wanyi, sampu yuma yejimiyi yinamwekani dehi. 31 Iwulu niiseki jakahita, ilaña mazu ami hiyamba kahitaku.
32 “Kutalisha hanodu ifuku hela ora, hikudi muntu niwumu welukaku, chili añelu adi mwiwulu hela Mwana, chiña Tata. 33 Babalenu, tonenuña, muloña himuneluki mpinji yatoñolawuku. 34 Chidi neyi muntu wayili kwituña dacheñi washiyili itala dindi nakuyinka anduñu jindi wuswa, wenkeli muntu-himuntu mudimu windi nawa walejeli mukwakuhemba chiisu nindi yatoneña. 35 Dichi tonenuña, muloña enu himuneluki mpinji yakenzayi mwini italaku, kwiji namelela, indi kwiji hakachi kawufuku, indi kwiji kumacha,* indi kwiji nabudidi nankashi, 36 kulonda chakenzayi mukukashimwisha, yakabuli kuyiwana enu mudi mutulu. 37 Ilaña yuma yinayilejaña enu, nalejaña niantu ejima nami: Tonenuña.”