Maku
1 Chatachikili nsañu yayiwahi yaYesu Kristu, Mwana kaNzambi: 2 Neyi chochasonekayi kaprofwetu Isaya nindi: “(Tiyaña! Ami nukutemeshañahu dehi ntemesha yami kuwunakuya,* wakakuloñeshelañahu dehi njila yeyi.) 3 Kudi muntu wunakubidika mwisaña nindi: ‘Loñeshenu njila yaYehova! Ololenu njila jindi.’” 4 Yowanu Mupapatishi wadiña mwisaña, nakushimwina kudi antu nindi atela kupapatishewa hakwila amwekeshi nawu anabalumuki munyichima kulonda ayanakeni nshidi jawu. 5 Dichi antu ejima amumaluña amuYudeya niamuYerusalema ejima ayileña kudi yena, wayipapatishileña* muKaloña Yodana nawa adiña nakushimuna nshidi jawu hatooka. 6 Yowanu wavwalileña yakuvwala yamavuji angameli nimushipi wachitembi mumbunda yindi nawa wadiileña tubola niwuchi wamwisaña. 7 Wadiña nakushimwina nindi: “Muntu wambadika ñovu nakwinza hanyima yami nawa hinukutwesha kubandama nakukasununa nyiya yankwabilu jindiku. 8 Ami nayipapatishili mumenji, ilaña yena wakayipapatisha naspiritu yajila.”
9 Munowu mafuku, Yesu wenjili kufuma kuNazareta yamuÑaliliya nawa amupapatishili kudi Yowanu muYodana. 10 Chafuminiyi mumenji, hohenohu wamweni iwulu dinakwenzunuka nawa spiritu yajila yamwekeneña neyi kapompa* yenjileña nakuwila hadi yena. 11 Mwiwulu mwafumini izu nadu: “Yeyi Mwanami, inakeña; inatiyaña kuwaha.”
12 Hohenohu spiritu yamutwalili mwisaña. 13 Dichi washakamini mwisaña hadi mafuku 40, nakumweseka kudi Satana. Washakamineña nawanyama amwisaña, ilaña añelu adiña nakumukalakela.
14 Chamukasiliwu Yowanu, Yesu wayili muÑaliliya nakushimwina nsañu yayiwahi yaNzambi 15 nakuhosha nindi: “Mpinji yatoñolawu yinashiki dehi niWanta waNzambi wunaswini dehi kwakwihi. Dichi balumukenu munyichima nawa kuhwelelenu nsañu yayiwahi.”
16 Hampinji yendeleñayi kuchikumu chaKaluñalwiji kaÑaliliya, wamweni Shimona nimanakwindi Anderi anakulalumwina tuleñi twawu mukaluñalwiji, muloña adiña ayibinda janshi. 17 Dichi Yesu wayilili nindi: “Nlondelenuña, nukuyibalumuna mwiikali ayibinda awantu.” 18 Nawa hohenohu ashiyili tuleñi twawu nakumulondela. 19 Chaswininiyi hambidi chanti, wamweni Yakoba mwana kaZebedewu nimanakwindi Yowanu adi muwatu wawu nakutuñulula tuleñi twawu, 20 hohenohu wayitambikili. Dichi ashiyili tata yawu Zebedewu muwatu nawakwakukalakala indi hiyakumulondela nikumulondela. 21 Ayili kuKaperinamu.
Ifuku daSabata chidashikili, Yesu wayili musinagogi nawa watachikili kutañisha. 22 Antu ahayamini chikupu nantañishilu yindi, muloña wayitañishileña neyi muntu wukweti wuswa, bayi neyi ansonekiku. 23 Hayoyenoyu mpinji musinagogi yawu mwadiña muntu wadiña nandemoni nawa wabidikili nindi: 24 “Muloñadi chiwunakutukabishila eyi Yesu wakuNazareta? Wunenzi nakutujilumuna tahindi? Nakwiluka chiwahi, yeyi Wajila Wambala waNzambi!” 25 Ilaña Yesu wamuzuwilili owu ndemoni nindi: “Mwena, fumaku mudi owu muntu!” 26 Owu ndemoni chelili namukonyeshi dehi owu muntu, wabidikili nezu dahewulu nawa wafuminimu mudi yena. 27 Dichi antu ejima ahayamini nankashi chakwila atachikili kudihoshesha mulwawu nawu: “Chumanyi chenichi? Iyi hintañishilu yayiha! Wukweti ñovu yakuleja andemoni nawa niwena anakumwovwahila.” 28 Hohenohu mpuhu yindi yatiyakeni mumaluña ejima amuÑaliliya.
29 Hohenohu afumini musinagogi hamu naYakoba niYowanu nakuya kwitala daShimona niAnderi. 30 Muku waShimona wamumbanda wakaamini muloña wakatili mashika nawa amulejelimu chikatu chakatiliyi owu mumbanda. 31 Dichi chayiliyi kwadiña owu mumbanda, wamukwatili kuchikasa nakumuhindwisha. Mashika amumanini nawa watachikili kuyiloñeshela yakuda.
32 Chikwelili melela, henohu itena* dinahumi dehi, antu atachikili kumuletela antu ejima adiña akata niantu akabakeneña nawandemoni; 33 nawa antu ejima amumusumba apompeli hachiisu. 34 Dichi wokili antu amavulu adiña nayikatu yeñi-nayeñi, wafumishili andemoni amavulu nawa hetejeli owu andemoni kuhoshaku, muloña amwilukili nawu hiKristu.*
35 Hankunku yakucha, henohu hachidi heyila, wahindukili nakuya hanji nawa wayili kwakankawindi, kwenoku watachikili kulomba. 36 Ilaña Shimona ninowu adiñayi nawu atachikili kumukeñakeña, 37 amuwanini nakumwila nawu: “Antu ejima anakukukeña.” 38 Ilaña yena wayilili nindi: “Tuyenu kwacheñi, munyikala yidi mukamwihi kulonda nikwena nishimwiniku, muloña dichuma chinenjilili.” 39 Dichi wayili mwahita Ñaliliya mwejima nakushimwina mumasinagogi awu* nikufumisha andemoni.
40 Kudi yena kwenjili cheñi muntu wadiña nambumba, wamulembeleli nakumufukamina nindi: “Neyi wunakeñi, wunateli kuntookesha.”* 41 Dichi wamutiyilili owu muntu wushona nawa wolweli chikasa chindi, wamukwatili nakuhosha nindi: “Nakeñi! Tookaku.” 42 Hohenohu mbumba yamufumini nawa watookeli. 43 Henohu owu muntu kanda yayi, wamukonkomweneni chikupu, 44 nakumuleja nindi: “Kulejaku muntu nehi, ilaña yaña wakadimwekeshi kudi kapristu nawa wulambuli mulambu muloña wakutookeshewa kweyi neyi chayilejeliyi Mosi kulonda wukayilili wunsahu kudi wena.” 45 Ilaña owu muntu chayiliyi, watachikili kuleja antu nawa iyi nsañu yatiyakeni kwejima chakwila Yesu wakañenyi kwiñila mumusumba muloña wachumichi, dichi washakamini hanji yamusumba kwabulili antu. Hela chochu, antu enjileña kudi yena kufuma kumaluña ashiyashana.