Mwatoñojokahu dehi kutaña Bayibolu, ilaña muleka muloña wayuma yidi neyi yinashimuniwu hewulu? Antu amavulu, atiyaña woma kutaña Bayibolu. Mukwila ñahi neyi mwiluka nenu Bayibolu yinateli kuyikwasha kwikala namuzañalu nichihandilu chachiwahi? Nawa mukwila ñahi neyi mwiluka nenu kudi njila jajiwahi jikuyikwasha kudiluñisha kutaña Bayibolu? Komana mukukeña kwiluka yuma yimunateli kuhetela muBayibolu?

Shinshikenu hamazu antesha ahosheluwu antu aheteleli mukutaña Bayibolu.

Ezekiel, wudi muyaaka yamuma 20 wahosheli nindi: “Kunyima, nadiña tuhu neyi muntu wunakwendesha motoka wunabuli kwiluka kunakuyayi. Ilaña kutaña Bayibolu kunankwashi kwikala nachihandilu chachiwahi. Mudi kufumba kwakuwahi kunatela kuzatisha mpinji yejima.”

Frieda, niyena wudi muyaaka yamuma 20, walumbulwili nindi: “Nadiña nakuhila swayi. Hamuloña wakutaña Bayibolu, neluki chakudiyuula ami aweni. Chumichi chinanleñeli kutachika kuhanjeka nawakwetu, dichi chayinu mpinji nikweti amabwambu amavulu chikupu.”

Mumbanda wejina daEunice wudi muyaaka yamuma 50, wahosheli kutalisha haBayibolu nindi, “Yinakunkwasha kwikala muntu wamuwahi, nikuhimpa yilwilu yami yatama.”

Neyi chinadiziwu awa antañi niantu amakwawu amavulu, kutaña Bayibolu kunateli kuyikwasha kwikala nachihandilu chachiwahi. (Isaya 48:17, 18) Bayibolu yinateli cheñi kuyikwasha (1) kufuukulahu chiwahi, (2) kutonda amabwambu amawahi, (3) chakuumika makabi ni (4) chuma chabadika kulema, mukudiza chalala hadi Nzambi. Kufumba kwekala muBayibolu kwafumaña kudi Nzambi, dichi mwakafuma yuma yayiwahi. Nzambi hahanaña kufumba kwatamaku.

Chuma chalema hikutachika kutaña. Yumanyi yinateli kuyileñela mutachiki kutaña swayi-swayi nawa mudiluñisheña?

Yumanyi yinateli kuyikwasha kudiluñisha kutaña Bayibolu nikutiyisha yikuma yayeni? Londelenu njila jitanu jinakwashi antu amavulu.

Keñenu iluña dadiwahi. Yenu kwiluña damwena. Tondolwelenu yuma yikuyiluwañesha kulonda mushi maana kuyuma yimunakutaña. Kutañila mwiluña dadiwahi nawa mudi mpepela yayiwahi kunateli kuyikwasha kwiluka yuma yayivulu.

Diloñeshenu muyitoñojoka. Chineli Bayibolu yafuma kudi Tata yetu wamwiwulu, munateli kudiza yuma yayivulu neyi mwikala nayilwilu neyi yamwana wanyanya wunakukeña kudizila kudi nvwali wukweti kukeña. Neyi mukweti yitoñojoka yaluwa kutalisha haBayibolu, yifumishenu mumuchima wenu kulonda Nzambi yayidizishi—Masamu 25:4.

Lombenu henohu kanda mutachiki kutaña. MuBayibolu mwekala yitoñojoka yaNzambi, dichi twatela kulomba wukwashu neyi tunakukeña kuyitiyishisha. Nzambi wakana nindi wukuyinka “antu amulombaña spiritu yajila.” (Luka 11:13) Spiritu yajila yinateli kuyikwasha kutiyishisha chatoñojokañayi Nzambi. Mukuhita kwampinji, yinateli kwenzununa yitoñojoka yenu nakutiyishisha “yuma yakunama yaNzambi.”—1 Akorinda 2:10.

Tañenuña nakutiyisha yuma yimunakutaña. Bayi mufwilaña hohu kutaña nakumanisha nsañu swayi-swayiku. Toñojokenuña hayuma yimunakutaña. Dihulenu awa malwihu: ‘Iwu muntu inakudizahu wukweti yilwilwinyi? Nateli kuzatisha ñahi iyi nsañu muchihandilu chami?’

Fwilenu kudizamu yuma yimu. Hakwila mwiluki yuma yayivulu mukutaña Bayibolu, ikalenu nachikonkwanyi chikuyikwasha kwikala nachihandilu chachiwahi. Munateli kwimika yikonkwanyi yidi neyi iyi: ‘Inakukeña kudiza jajivulu hadi Nzambi.’ ‘Inakukeña kwikala muntu wamuwahi, iyala wamuwahi hela mumbanda wamuwahi.’ Dichi tondenu yibalu yamuBayibolu yikuyikwasha kushikija iyi yikonkwanyi.a

Iji njila jitanu jikuyikwasha kutachika kutaña Bayibolu. Hanu dinu munateli kudiluñisha ñahi nsañu yimunakutaña? Chibaaba chinalondelihu chikushimuna njila jikwawu

Kutiya wudi? Hela kudiluñisha? Njila yimu yidihi yimukutañilañamu Bayibolu? Yuma yayivulu yikushindamena hanjila yimukutañilañamu. Tushinshikenu hayuma yimwatela kwila hakwila nawu mwikali nampwila yakutaña nikudiluñisha chikupu.

Zatishenu Bayibolu yayeni nawa yabalumunawu chiwahi. Neyi munakutaña nsañu yakala kutiyishisha hela mudi mazu alekawu dehi antu kuyizatisha, dikwila nawu himukudiluñishaña kutañaku. Dichi keñenu Bayibolu mudi mazu apela nawa aswayi kutiya akuyishika hamuchima. Nawa cheñi yatela kwikala Bayibolu yabalumunawu chiwahi.a

Zatishenu yozelu yidiku makonu. Makonu Bayibolu yidi munyitapu yashiyashana, yakupulinta niyakutañila haintaneti. MaBayibolu amakwawu munateli kuyitañila haintaneti hela kuyiloñolwela hakompyuta, hatabuleti hela hafoni. MaBayibolu amakwawu akweti tuyuma tukuyikwasha kutala mavasi amakwawu amuBayibolu anakuhosha hansañu yoyimu hela kwesekeja maBayibolu amakwawu abalumunawu. Neyi munakukeña kutiyilila kunsañu yamuBayibolu yakwatawu dehi mumazu chatela mutañeña, Bayibolu yakukwata mazu yidi dehi kwoku. Antu amavulu atiyaña kuwaha kuyitiyilila kumazu amuBayibolu akukwata neyi adi halwendu, anakukosa hela neyi anakuzata nyidimu yikwawu. Kwila mutondahu njila yimu yimunamoni nenu yayiwahi nehi?

Zatishenu yuma yikuyikwasha kudiza Bayibolu. Kuzatisha yuma yikuyikwasha kudiza Bayibolu kunateli kuyikwasha kuhetela muyuma yimunakutaña. MuBayibolu mudi mamapu amaluña, akuyikwasha kwiluka maluña imukuwana hampinji yimukutañaña nikufwikija yuma yamwekeni. Yibaaba, yekala mumagazini hela “Yuma Yatañishaña Bayibolu” yidi hawebusayiti ya jw.org, yinateli kuyikwasha kutiyishisha mwatalisha yibalu yayivulu yamuBayibolu.

Zatishenu njila jashiyashana. Neyi chinakuyikalila kutaña Bayibolu kufuma kunsa nakunsa, kwila mufuukulahu kutachi nachibalu chimunamoni nenu chikuyizañalesha nehi? Neyi munakukeña kwiluka antu atiyakana ashimunawu muBayibolu, munateli kutachika kutaña hadi muntu wumu. Muchikasha chinalondeluhu anashimu chakutalilahu chikuyikwasha chinakwila nawu, “Keñakeñenu muBayibolu Kulonda Mwiluki Antu Ekalamu.” Indi kwiji munakukeña kutaña Bayibolu kwesekeja nanyitu yansañu hela mundonda yayuma yamwekeni. Kwila mutachika kutaña hadi muntu wumu hanawa antu nehi?

Bayibolu himukanda wawukuluku. Mwekala nshimbi yafumaña kudi Nleñi. (2 Timotewu 3:16) Mazu ekalamu akuyikwasha chikupu. Kafwampi, Bayibolu yahosha nawu: “Mazu aNzambi amomi, akweti ñovu.” (Aheberu 4:12) Yikweti ñovu yakuhimpa chihandilu chetu munjila jiyedi, yatulombolaña muyuma yitwelaña mafuku ejima makonu nawa yatukwashaña kumwiluka Nzambi niyikaninu yindi.—1 Timotewu 4:8; Yakoba 4:8.

Yikuyikwasha muchihandilu chenu makonu. Bayibolu yinateli kumukwasha muntu nakukala kukwetiyi. Yahanaña kufumba kwakuwahi kutalisha hayuma yinalondeluhu.

• Hakwikala nawubwambu nawantu amakwawu—Aefwesesa 4:31, 32; 5:22, 25, 28, 33.

• Hachineñi nikukola kwakumujimba—Masamu 37:8; Yishimu 17:22.

• Hakwikala nayilwilu yayiwahi.—1 Akorinda 6:9, 10.

• Hakuhemba mali.—Yishimu 10:4; 28:19; Aefwesesa 4:28.a

Kufumba kwekala muBayibolu kwayikwashili chikupu, adisumbula atwansi amuAsia. Neyi chochichekala kudi antu amavulu anadisumbuli katataka, chayikalilaña hakwila nawu adiluki muyilwilu nikutiyañana chiwahi. Ilaña atachikili kuzatisha yuma yatañileñawu muBayibolu. Yumanyi yafuminimu? Iyala wejina daVicent, wahosheli nindi: “Yuma yinatañileña muBayibolu yankwashili kumanisha kukala kutwamweneña mumaluwi etu munjila yakukeña. Kuzatisha nshimbi yamuBayibolu kunatukwashi kwikala namuzañalu.” Ñodindi, Annalou, wetejeli nindi: “Kudiza hayakutalilahu yawantu ashimunawu muBayibolu kunatukwashi. Nidi wamuzañalu nawa natiyaña kuwaha nayuma yitukweti mumawulu etu kushilahu niyikonkwanyi yitwemika.”

Kumwiluka Nzambi. Kwambukaku namazu ahosheliyi kutalisha hamaluwi, Vicent wahosheli cheñi nindi: “Kuhitila mukutaña Bayibolu, nakundami kwakwihi chikupu naYehova kubadika hatachi.” Yuma yamweniyi Vicent yashindameneni hachikuma chalema, chakwila nawu Bayibolu yikuyikwasha kumwiluka Nzambi chikupu. Himunateli kuhetela hohu mukufumba kwindiku, ilaña munateli cheñi kwiluka nenu mukumwiluka Nzambi neyi hibwambu denu. Nawa mukwiluka nenu washimuna nsañu yayivulu yahosha hachihandilu chakumbidi, hampinji yimwakadiluñisha “wumi walala chikupu,” wakushakama haya nyaaka. (1 Timotewu 6:19) Chuma chimunateli kubula kuwana mumukanda wudi wejima.

Neyi mufuukulahu kutaña Bayibolu, twalekenuhu nawa munateli kuhetelamu, munateli kuwahisha chihandilu chenu nikumwiluka Nzambi chikupu. Hela chochu, hampinji yimukutañaña Bayibolu mukwikala namalwihu amavulu. Nawa neyi mutachika kudihula, anukenu chakutalilahu chakalama wakuEtiyopiya wadiñaku yaaka 2,000 yinahitihu. Wadiña namalwihu amuBayibolu amavulu. Chiyamwihwiliwu neyi chakwila yuma yinakutañayi yinamulumbulukili, wakwili nindi: “Chikunlumbulukila ñahi chakadi muntu kunleja?”b Wetejeli kumukwasha kudi muntu wadiña weluka dehi yuma yamuBayibolu, Fwilipu, wadiña kambanji kaYesu. (Yililu 8:30, 31, 34) Munjila yoyimu, neyi munakukeña kwiluka nsañu yayivulu yamuBayibolu, tunayikoleshi kusonekela haintaneti ya www.pr418.com hela sonekelenu hamakeyala, anashimuniwu muyinu magazini. Munateli cheñi kuya nakuyiwana aYinsahu jaYehova amwiluña denu hela yenu Kwitala daWanta didi kwakwihi nanenu. Kwila mutachika kutaña Bayibolu dalelu nehi kulonda yiyikwashi kwikala nachihandilu chachiwahi?