1 Muloñadi Chitwatelela Kulomba?

KULOMBA. MuBayibolu mwekala nsañu yantesha yakeñeshawu antu nawa yafwilañawu kwiluka. Shinshikenu hamalwihu atanu nayedi avula kwihulawu antu kutalisha hakulomba; nawa tukudiza Bayibolu chiyakulaña awa malwihu. Iyi yibaaba anayisoneki kulonda yiyikwashi mwiluki chakulomba, mutachiki kulomba hela mulombeña chachiwahi.

ANTU muyisemwa yejima nimunsakililu yamukaayi alombaña. Alombaña kwakankawawu; nimumazanvu. Alombelaña mumachaachi, mumatembeli, mumasinagogi, mumamosque awaMoslemu nikunyiyombu. Anateli kuzatisha mahina, wusaña, tufumbu, yifwikija, nyikanda mwasonekawu kulomba, hela mazu asonekawu habodi yakukudika hambañu.

Kulomba dikwaleñelaña antu kwikala ambukaku kuyuma yejima yikweti wumi heseki. Hela chochu, kudi yuma yitwakeñaña yadifwana nayakeñañawu atunyama. Twakeñaña yakudya, mpepela nimenji, neyi chochakeñañawu atunyama. Kufwana atunyama, ninetu twavwalikaña, twahandaña nawa twafwaña. (Mukwakutaŋisha 3:19) Ilaña antu hohu diwu alombaña. Muloñadi?

Muloña tukweti mpwila yakulomba. Antu atoñojokaña nawu kulomba hinjila yaleteshaña kushika kwajila hela kwahaya nyaka. Bayibolu yashimuna nawu atuleña nampwila yakulomba. (Mukwakutaŋisha 3:11) Yesu Kristu wahosheli nindi: ‘Akaankila kuspiritu anakooleki.’—Matewu 5:3.

‘Kukaankila kuspiritu’ dikwaleteshaña akwansakililu atuñeña matala akudifukwilamu niyifwikija, nikulomba mpinji yeneni. Antu amakwawu adishindamenaña hela kushindamena akwawu antu nawu diwu atela kuyinka yuma yakaankilañawu kuspiritu. Komana mweluka nenu antu hiyakweti wuswa wakukwasha akwawu antuku? Twekala azeya chikupu, wumi wetu wakampinji kantesha nawa hitwelukaña yuma yakumbiduku. Muntu wasweja maana, wukweti ñovu yabadika, washakamaña haya nyaka diyi watela kutwinka yuma yitwakaankilaña kuspiritu. Hiyumanyi yeniyi yakuspiritu yitwakaankilaña yatwileñelaña tulombeña?

Toñojokenu hayumiyi: Komana mwakeñaña wunlomboli, maana hela ñakwilu yamalwihu akañanyaña kwakulawu antu? Komana kudihu ifuku dimwakabakeni nawa mwakeñeleña kuyikundeja, nikuyikwasha hampinji yimwafuukwileña hachuma chakala, hela himwakeñeleña kuyanakena?

Kwesekeja nachahosha Bayibolu iyi diyuma yalema yitwatelela kulomba. Bayibolu dimukanda watela kutukwasha kutalisha hansañu yakulomba, nawa mwekala kulomba kwakuvulu kwalombeluwu ambanda niamayala ashinshika. Alombeli kulonda ayikundeji, ayilomboli, ayanakeni, nikwakula malwihu akala nankashi.—Masamu 23:3; 71:21; Danyeli 9:4, 5, 19; Habakuki 1:3.

Kulomba kwawu hela kwadiña kwashiyashana, ilaña mukulomba kwawu mudi chuma chadifwana. Muntu wejima walombeleña welukili chuma chalema chakeñekaña hakulomba, chabulaña kulondelawu hela chadiwulañawu antu mukaayi makonu. Elukili kwatela kulombawu.

2 Twatela Kulomba Kudinyi?

KOMANA Nzambi watiyaña kulomba kwejima, hela chakwila hakulomba atenaña ijina danzambi wacheñi? Makonu antu atoñojokaña nawu Nzambi watiyaña kulomba kwejima. Antu amavulu akeña kudibomba nansakililu jikwawu diwu atoñojokaña mwenimu nawa akeñaña nawu antu akuhweleleña nsakililu yidi yejima, hela chakwila yashiyashana. Komana iyi yitoñojoka yalala?

Bayibolu yatañishaña nawu kakavulu antu hiyalombaña kudi Nzambi walalaku. Kushankulu hampinji yasonekeluwu Bayibolu, antu amavulu alombeleña kudi ankishi akusoña. Hela chochu, Nzambi wayisoñamishileña antu hiyililu yawu. Chakutalilahu, mukanda waMasamu 115:4-6 wahosha hadi ankishi nawu: “Akweti matu, hiyatiyañaku.” Bayibolu yinalumbululi chikupu. Muloñadi chimukulombela kudi nzambi wukubula kuyitiya?

Nsañu yamuBayibolu yalumbulula chikupu ichi chikuma. Kaprofwetu walala Elija walejeli atuprofwetu twaBayali nindi alombi kudi nzambi yawu, niyena yalombi kudi Nzambi yindi. Elija wahosheli nindi Nzambi walala wukwakula kulomba ilaña nzambi wakutwamba hakwakulaku. Atuprofwetu twaBayali etejeli mwayilejeluwu nawa alombeli nankashi hampinji yayilehi, elili bilele-e, ilaña kwosi wayitiyili. Bayibolu yahosha nawu: “Hikwadiñi hela izu hela wakwakula hela wakutala kwokuku.” (1 Anyanta 18:29) Chumanyi chamwekeni hampinji yalombeliyi Elija?

Chalombeliyi Elija, Nzambi yindi washikeneni dakwakula, watemesheli kesi kufuma mwiwulu nakwocha mulambu waloñesheliyi Elija. Chambwinyi chadiñahu? Elija wateneni chuma chalema mukulomba kwindi kwasonekawu ha 1 Anyanta 18:36, 37. Kulomba kweniku kwakwihi nankashi nawa kwesekeja nachiHeberu chacheni mwekala hohu mazu 30. Munawa mazu antesha, Elija wamuteneni Nzambi kapampa kasatu nejina dindi daYehova.

Ijina daBayali, dalumbuluka nawu “yamweni” hela “mwanta” wadiña nzambi wawaKenani nawa mumaluña amavulu iwu nzambi amuteneneña nankumbu jashiyashana. Hela chochu, ijina daYehova dadimena, hiijina dindi hohu nkawindi mukuleña kwejima. Nzambi wayilejeli antu jindi nindi: “Yami Yehova; didu ijina dami; kulema kwami hinukwinka wacheñuku.”—Isaya 42:8.

Komana kulomba kwalombeliyi Elija nikwawatuprofwetu twaBayali akwitiyili kudi Nzambi? Kudifukula kudi Bayali kwaletesheleña antu kudiñija muyaaku yakwila wuvumbi nikuhana nyilambu yawantu. Kwambukaku, Yehova wayilejeli antu jindi aIsarela, kudifukula kudi yena munjila yakalemesha. Toñojokenu: Neyi mutemesha mukanda kudi ibwambu denu imwalemesha nankashi, komana munateli kukuhwelela nenu mukanda wukushikena kudi muntu wukweti ijina dacheñi nawa wukweti yililu yatama yambuka nayebwambu denu? Inehi.

Neyi mulomba kudi Yehova, dikwila nawu munakulomba kudi Nleñi, Tata yawantu.a Kaprofwetu Isaya walombeli nindi: “Yehova yeyi tata yetu.” (Isaya 63:16) Iwu Nzambi, diyi wateneniyi Yesu Kristu hampinji yayilejeliyi atumbanji twindi nindi: “Hinukukandama kudi Tata yami ninenu Tata yenu, kudi Nzambi yami ninenu Nzambi yenu.” (Yowanu 20:17) Yehova diyi Tata yaYesu. Diyi Nzambi walombeleñayi Yesu nawa walejeli atumbanji twindi kulomba kudi Nzambi.—Matewu 6:9.

Komana Bayibolu yatulejaña nawu tulombeña kudi Yesu, Mariya, indi kwiji kudi antu amonañawu nawu ajila hela añelu? Inehi, chiña kudi Yehova hohu. Shinshikenu yuma yiyedi yitwatela kulombela kudi Yehova. Chatachi, kulomba hikudifukula, nawa Bayibolu yahosha nawu twatela kudifukula kudi Yehova nkawindi hohu. (Kwidika 20:5) Chamuchiyedi, Bayibolu yahosha nawu wukweti nkumbu yakwila nawu, “Watiyaña mwalombañawu antu.” (Masamu 65:2) Hela chakwila Yehova wayinka antu nyidimu yayivulu, mudimu wakutiyilila mwalombañawu antu hawuhana kudi muntu wacheñuku. Nzambi watukana kutiya kulomba kwetu hamuntu hamuntu.

Neyi munakukeña Nzambi yatiyeña kulomba kwenu, mwatela kwanuka iku kukonkomwena kwamuNsona kwakwila nawu: ‘Muntu wejima wukutambika ijina daYehova wakapuluka.’ (Yililu 2:21) Komana ichi chinayi mukwila nawu Yehova watiyaña kulomba kwejima? Tahindi kudi yuma yikwawu yitwatela kwiluka neyi tunakukeña kulomba kwetu akwitiyi kudi Yehova?

[Tumazu twaheshina]

[Mwevulu wudi hefu 5]

Mazu ayilejeliyi Elija atuprofwetu twaBayali amwekeshaña nawu Nzambi hatiyaña kulomba kwejimaku

3 Twatela Kulomba Munjilanyi?

HANSAÑU yakulomba, nsakililu yayivulu yatañishaña hayuma yatela kwilayi muntu neyi nakulomba yidi neyi, chakushakama hela kwimana, mazu akuhoshayi niyaaku yikwawu. Hela chochu, Bayibolu hiyatulejaña nawu hitwatela kusweja kusha maana hayuma yamuchidiwuku, ilaña yatulejaña kusha maana halwihu lwakwila nawu, “Twatela kulomba munjilanyi?”

Bayibolu yashimuna ambuña jaNzambi ashinshika alombeleña kumaluña amavulu nawa mujila jashiyashana. Alombeleña wushinshi hela kulomba nezu datiyakana kwesekeja nakwiluña kudiwu. Mpinji yikwawu alombeleña iku anakutala mwiwulu hela ananoñami. Chatela azatisheña yifwikija, wusaña, hela nyikanda mwasonekawu mazu akulomba, kulonda yiyikwashi hakulomba, alombeleña chakufuma kunyichima mumazu awu. Chumanyi chaletesheli Nzambi yatiyi kulomba kwawu?

Neyi chalumbululawu muchibaaba chinafumiku, alombeleña hohu kudi Nzambi wumu, Yehova. Kudi chuma chikwawu chalema chaletesheli Yehova yatiyi kulomba kwawu. Hamukanda wa 1 Yowanu 5:14 twatañañahu nawu: ‘Dichi chitukubula kumutiya woma, tukwiluka netu neyi tukulomba chuma chamwaya muchima windi, wukututiya.’ Kulomba kwetu kwatela kwesekana namwaya muchima waNzambi. Chumichi chaya mudihi?

Hakwila nawu tulombi kwesekana namwaya muchima waNzambi, twatela kwiluka mwaya muchima windi. Dichi, kudiza Bayibolu, kwalema muloña kwatukwashaña kwiluka chakulomba. Komana ichi chinayi mukwila nawu Nzambi hanateli kutiya kulomba kwetuku chiña neyi twikala antu adiza nsañu yamuBayibolu? Inehi, ilaña Nzambi wakeñaña nindi tudizi mwaya muchima windi, nikufwila kwiluka chiwekala nikulondela mwaya muchima windi. (Matewu 7:21-23) Twatela kulomba kwesekeja nayuma yitwadizaña.

Chitukudizaña hadi Yehova nimwaya muchima windi, chikuhwelelu chetu chikukolelaku, ichi hichuma chikwawu chalema chakeñekaña mukulomba. Yesu wahosheli nindi: ‘Yuma yejima yimukulomba nachikuhwelelu mukuyitambula.’ (Matewu 21:22) Kwikala nachikuhwelelu hikwatalisha mukwila nawu muntu yakumini dakukuhwelela hohuku. Ilaña, chatalisha mukukuhwelela yuma yakadi kumona, nawa chakoleshewaña nawunsahu walala. (Aheberu 11:1) MuBayibolu mwekala wunsahu wawuvulu wamwekeshaña nawu Yehova itwabulaña kumona wekala kwoku, twatela kushindamena hadi yena, nawa wakeñaña kwakula kulomba kwawantu amukuhwelela. Kubombelahu, tunateli kumulomba Yehova mpinji yejima kulonda yatuvulishili chikuhwelelu, nawa Yehova wakeñaña kutwinka yuma yitwakankilaña.—Luka 17:5; Yakoba 1:17.

Iyi diyi njila yikwawu yalema yitwatela kuzatisha hakulomba. Yesu wahosheli nindi: “Kwosi muntu niwumu wukwinza kudi Tata chiña hadami.” (Yowanu 14:6) Dichi twalombaña kudi Tata yetu, Yehova kuhitila mudi Yesu. Dichi, Yesu wayilejeli atumbanji twindi kulomba mwijina dindi. (Yowanu 14:13; 15:16) Ichi hichaya mukwila nawu twatela kulomba kudi Yesuku. Ilaña, twatela kulomba mwijina daYesu, nakwanuka netu Yesu diyi watwenzulwila njila yakulomba kudi Tata yetu waloña nawa wajila.

Mpinji yimu atumbanji twaYesu akeñeliyi nankashi amwihwili nawu: ‘Mwanta, tutañishi chakulomba.’ (Luka 11:1) Chakadi kujina, hiyamwihwili hanjila jitunahanjekuhuku. Akeñeleña kwiluka mwatalisha nsañu yakulomba, kafwampi enhwili nawu, ‘Yumanyi yitwatela kulomba?’

[Mazu ekoku adi hefu 6]

Nzambi watiyaña kulomba kwesekana namwaya muchima windi, kulomba nachikuhwelelu nawa kuhitila mwijina daYesu

4 Yumanyi Yitwatela Kulomba?

KULOMBA kwaYesu kwakutalilahu, dikulomba kwaswejawu kufuntila funtilahu nawa kwilukawu nankashi akwaKristu ejima. Hela neyi iyi nsañu yalala indi kwiji yakutwamba, kulomba kwaYesu kwakutalilahu kwatenañawu mpinji yikwawu nawu Kulomba kwaMwanta hela nawu kulomba kwaTata Yetu, antu amavulu eluka wanyi mukwatalisha. Antu amavulu adizaña awa mazu kuhitila mukufuntila funtilahu mafuku ejima nawa avula kwila mwenimu mpinji yamwana. Ilaña Yesu hakeñeleña nindi tulombeña muniyi njilaku. Tuneluki ñahi mwenimu?

Henohu kanda yashimuni kulomba kwakutalilahu, Yesu wahosheli nindi: ‘Chimukulombaña, bayi muhituluka nakutenatena mwamukunkulwayiku.’ (Matewu 6:7) Komana Yesu wadiña nakuditadikisha yomweni hampinji yashimwiniyi mazu itwatela kuhembela kumutu nikuyifuntila funtilañahu mukulomba? Inehi. Ilaña, Yesu wadiñi nakutudizisha yuma yitwatela kulomba nawa watulejeli yuma yitwatela kusambila kwanuka hakulomba. Tushinshikenu chikupu hayuma yahosheliyi. Iku kulomba akwisoneka hamukanda waMatewu 6:9-13.

“Tata Yetu wekala mwiwulu, ijina deyi dijili.”

Dichi Yesu wayanukishili atumbanji twindi nindi atela kulomba kudi Tata yindi, Yehova. Komana mweluka muloña walemena ijina daNzambi nimuloña wuyatelela kudijilika?

Kufuma tuhu kukutachika kwachihandilu chawantu, ijina daNzambi dajila adisawula. Mukwankunyi naNzambi, Satana, wamuteneni Yehova nindi watwambaña, nawa hiNyuuli walwisu, hakweti ñovu yakuyuula yileñaleña Yindi chiwahuku. (Kutachika 3:1-6) Antu amavulu adibombaña naSatana, atañishaña nawu Nzambi hasha maana kudantuku wawukatu, wayandishaña antu nawa amukaanaña nawu hidiyi Nleñuku. Amakwawu akaana nijina dindi dadeni, afumisha ijina daYehova mumaBayibolu abalumunawu nikukaanisha antu kudizatisha.

Bayibolu yashimuna nawu Nzambi wukafumishahu kutama kwejimiku. (Ezekeli 39:7) Chakafumishahu kutama, wukayinka yuma yejima yimwakankilaña nawa wukamanisha kukala kwenu kwejima. Wakela ñahi mwenimu? Mazu analondeluhu ekala mukulomba kwaYesu akwakula ilu lwihu.

“Wanta weyi winzi.”

Makonu, antañishi amunsakililu akañanyaña kwiluka chekala Wanta waNzambi. Ilaña antiyilili jaYesu elukili nawu, atuprofwetu twaNzambi ashimwineñahu dehi nawu Mesiya, Nkuli atondawu kudi Nzambi, wakayuula Wanta wakafumishahu yuma yatama hamaseki. (Isaya 9:6, 7; Danyeli 2:44) Wakajilika ijina daNzambi nakumumwekesha Satana nawu hisakutwamba nakumujilumwina hamu nanyidimu yindi yejima. Wanta waNzambi wakamanisha njita, yikatu, nzala nikufwa. (Masamu 46:9; 72:12-16; Isaya 25:8; 33:24) Neyi munakulomba nenu Wanta waNzambi winza, dikwila nawu munakulomba nenu yikaninu yejimiyi yishikijewi.

“Muchima weyi awili hamaseki neyi chawilañawu mwiwulu.”

Mazu aYesu amwekeshaña nawu Nzambi wamba kela mwaya muchima windi hamaseki neyi chawilañawu mwiwulu, mwashakamayi Nzambi. Kwosi wakañeshaña kwila mwaya muchima waNzambi mwiwulu; nawa Mwana kaNzambi wasili njita naSatana nialunda nindi, wayinatilili hamaseki. (Chimwekeshu 12:9-12) Kufwana nyikuku yamazu yiyedi yatachi, iwu mukuku wamazu wamuchisatu wakulomba kwakutalilahu, watukwashaña kushinshika chuma chalema chakwila mwaya muchima waNzambi, bayi yuma yitwafwilañaku. Mpinji yejima Nzambi wakeñaña kwilila yileñaleña yindi yejima yuma yayiwahi. Dihafumini Yesu muntu wawanina kuhosha naTata yindi nindi: “Ilaña bayi ela munakeñamuku, chiña muwunakeñeyi.”—Luka 22:42.

“Twinki kudya kwetu kutukukeña lelu.”

Yesu washimwini cheñi nindi twatela kulomba yuma yitwakankilaña. Chatama wanyi kulomba kudi Nzambi yuma yitwakeñaña mafuku ejima. Kafwampi kwila mwenimu kwatwanukishaña nawu Yehova diyi “wenkaña antu wumi nimuuya niyuma yejima.” (Yililu 17:25) Bayibolu yatulejaña nawu hinvwali wukweti kukeña watiyaña kuwaha kwinka anyanindi yuma yakankilañawu. Kufwana nvwali wamuwahi, wayinkaña yuma yayizañaleshaña.

“Twanakeni nyikudi yetu.”

Komana chalala mukweti mukudi kudi Nzambi? Mwakeñaña Nzambi yayanakeni? Antu amavulu makonu hiyeluka chekala nshiduku nawa eluka wanyi nawu nshidi yatama. Ilaña Bayibolu yatañishaña nawu nshidi diyaletaña kukala kutwamonaña, muloña diyakojejaña antu kufwa. Chineli twavwalikaña akwanshidi, twavulumunaña kakavulu, hakwila nawu twakatambuli wumi wahaya nyaka kumbidi chiña Nzambi yatwanakena. (Aroma 3:23; 5:12; 6:23) Twazañalala hakudiza nsañu yamuBayibolu yahosha nawu: ‘Eyi Yehova wumuwahi waanakenaña.’—Masamu 86:5.

‘Twamwini kudi watama.’

Komana mweluka nenu mwakeñaña Nzambi yanyakali kuyikiña? Antu amavulu akaanaña nawu Satana ‘watama,’ hekala kwokuku. Ilaña Yesu watañishili nindi Satana wekala kwoku, nawa wamuteneni nindi, ‘nyuuli wampata yamunu mwishina.’ (Yowanu 12:31; 16:11) Satana naluwañeshi kanu kaayi kayuulañayi, nawa wafwilaña kuyiluwañesha ninenu kulonda mubuli kwikala nawulunda chikupu naTata yenu Yehova. (1 Petulu 5:8) Hela chochu, Yehova wukweti ñovu kubadika Satana nawa wakeñaña kukiña antu amukeña Yena.

Iyi yikuma yamaneni yantesha yitunahanjekuhu, yekala mukulomba kwaYesu kwakutalilahu hiyashimuna yuma yejima yitwatela kulombaku. Anukenu nenu mukanda wa 1 Yowanu 5:14 watulejaña hadi Nzambi nawu: ‘Tukwiluka netu neyi tukulomba chuma chamwaya muchima windi, wukututiya.’ Bayi mutoñojoka nenu kukala kwenu kwanyanya dichi himwatela kulomba kudi Nzambuku.—1 Petulu 5:7.

Indi mpinji niluña? Komana twatela kulombela kwiluña kudi kwejima nawa mpinji yidi yejima?

5 Twatela Kulombela Kudihi Nawa Mpinjinyi?

CHAKADI kujina mwamonaña akwansakililu amavulu akonkomwenaña hakulombela mumatala amaneni nikushimuna mpinji yatela kulombawu hanodu ifuku. Komana Bayibolu yashimuna iluña nimpinji yitwatela kulomba?

Bayibolu yashimuna nawu kwekala mpinji yayiwahi yitwatela kulomba. Chakutalilahu, henohu kanda yatachiki kudya nawatumbanji twindi, Yesu wamusakililili Nzambi mukulomba. (Luka 22:17) Hampinji yapompeluwu atumbanji twindi nakudifukula, alombeli. Dichi atwalekeluhu nachaaku chelileñawu hayaaka yayivulu mumasinagogi awaYudeya nihatembeli muYerusalema. Nzambi wakeñeli nindi tembeli yikali “itala dakulombela nyuza yejima.”—Maku 11:17.

Neyi ambuña aNzambi apompa hamu nakulomba, Nzambi nateli kutiya kulembelela kwawu. Neyi izanvu dawantu dikala danuñañana muyitoñojoka nawa muntu wunakuyimenaku mukulomba yalondela nshimbi jamuNsona, Nzambi watiyaña kuwaha. Kulomba kweniku kukumuleñela kwila chuma chabula kukeña kwilayi. (Aheberu 13:18, 19) A Yinsahu jaYehova alombaña mpinji yejima hakupompa. Mwani tunayitambiki mwakenzi Kwitala daWanta dekala kwakwihi nakumwashakamaña kulonda mwakaditiyili enu awani chalombañawu.

Hela chochu, Bayibolu hiyashimuna mpinji hela iluña dimwatela kulombelaku. MuBayibolu twatañañamu nsañu yawambuña aNzambi alombeleña mpinji yidi yejima, kwiluña kwejima kwaduwu. Yesu wahosheli nindi: “Eyi chiwukulomba, iñilaku mwitala deyi damukachi, wenzeluku, wulombi kudi Tata yeyi wudi kumbadi, niTata yeyi wamonaña kumbadi wakakwinka wufwetu weyi.”—Matewu 6:6.

Iwu mutambi wawuwahi hama, hidimuku? Munateli kulomba kudi Mwanta wakuleña kwejima hadi mpinji yidi yejima, kwakankawenu nawa mwatela kukuhwelela nenu wukuyitiya. Dichaleñeleleña Yesu yavuleña kwikala kwakankawindi nakulomba. Mpinji yimu, wachiishili nakulomba kudi Nzambi wufuku wejima, wakeñeleña amukwashi kufuukula chachiwahi hachuma chalema.—Luka 6:12, 13.

Amayala niambanda amakwawu asonekawu muBayibolu alombeleña hampinji yakeñeleñawu kufuukulahu yuma yakala hela hampinji yadiñawu mukukala. Mpinji yikwawu alombeleña chatiyakana nawa mpinji yikwawu alombeleña wumweneni, mumazanvu hela kwakankawawu. Ilaña chuma chalema awa amayala niambanda alombeleña. Nzambi walejaña ambuñindi nindi: “Bayi muleka kulombaku.” (1 Atesalonika 5:17) Wakeñaña kutiyilila kulomba kwawantu elaña mwaya muchima windi. Iwu mutambi wawuwahi wamwekeshaña kukeña kwaYehova.

Kafwampi, mukaayi kamakonu mwasweja lwisu, antu amavulu ajinokaña nawu kulomba hikunateli kuyikwashaku. Munateli kudihula nenu, ‘Komana chalala kulomba kunateli kunkwasha?’

[Mazu ekoku adi hefu 9]

Tunateli kulomba mpinji yidi yejima nawa kwiluña kudi kwejima

6 Komana Kulomba Kunateli Kutukwasha?

KOMANA kulomba kwatukwashaña? Bayibolu yahoshaña nawu, kulomba kwawambuña aNzambi ashinshika kwayikwashaña chikupu. (Luka 22:40; Yakoba 5:13) Kafwampi kulomba kunateli kutukwasha kwikala nawubwambu wawuwahi naNzambi, kunateli cheñi kutukwasha muyitoñojoka nikumujimba. Munjilanyi?

Twili netu, mwanenu natambwili chawaana. Komana munateli kumukaanisha nenu kunahu dinu wunasweji kuzañalala? Tahindi mukumuleja chatela kusakililayi? Neyi tuhosha yuma yalema yitunakutoñojokahu, chikutuleñela kuyilemesha nikukolelamu. Komana dichimwatiyaña hakuhosha naNzambi? Eña. Shinshikenu yakutalilahu yikwawu.

Kulomba kwakusakilila. Neyi tumusakililaña Tata yetu hayuma yayiwahi yitwatambwilaña, tukushinshikaña hankisu yitukweti. Chikufumamu, tukusakililaña, tukuzañalala, nikutoñojoka hayuma yayiwahi.—Afwilipi 4:6.

Chakutalilahu: Yesu wamusakililili Tata yindi hampinji yatiyiliyi nikwakula kulomba kwindi.—Yowanu 11:41.

Kulomba kwakwanakena. Neyi tulomba kwanakena kudi Nzambi, twakoleshaña chinleji chetu chamuchima, nikubalumuka mumuchima chikupu, nikwiluka netu kwila nshidi kwatama. Nawa hitukusweja kuneña hamuloña wayuma yatama yitwakoñeluku.

Chakutalilahu: Davidi walombeli kulonda yamwekeshi nindi nabalumuki mumuchima nawa waneñeli hayuma yakoñeliyi.—Masamu 51.

Kulomba wunlomboli nimaana. Kulomba Yehova netu yatulomboli hela yatwinki maana itwakeñaña kulonda tufuukuluhu chachiwahi kunateli kutukwasha kwikala adikehesha. Tukwiluka cheñi netu hitwawaninaku nawa tukumukuhwelela Tata yetu wamwiwulu.—Yishimu 3:5, 6.

Chakutalilahu: Solomoni walombeli wunlomboli nimaana kulonda yayuuli aIsarela.—1 Anyanta 3:5-12.

Kulomba hampinji yitudi nachineñi. Neyi tulomba kudi Yehova namuchima wetu wejima hampinji yitudi nachineñi, muchima wetu wukuwunda nawa tukumukuhwelela Yehova kubadika kudishindamena etu aweni.—Masamu 62:8.

Chakutalilahu: Mwanta Asa walombeli hampinji yayileñayi nakulwa nachilumbu chindi.—2 Kushindulula 14:11.

Kulombelaku amakwawu anakaankili. Kulomba kwamuchidiwu kunateli kutukwasha kubula kwikala nalwisu nawa kukutuleñela kwikala nawushona niluwi.

Chakutalilahu: Yesu wayilombeleluku atumbanji twindi.—Yowanu 17:9-17.

Kulomba kwakushimeka. Neyi tumushimeka Yehova hanyidimu yindi yakuhayamisha niyililu yindi, tukuswejaña kumulemesha nikumusakilila. Kulomba kwamuchidiku kukutukwasha kukundama kwakwihi naNzambi yetu nawa Tata.

Chakutalilahu: Davidi wamuhamekeli Nzambi chikupu hayuma yaleñayi.—Masamu 8.

Nkisu yikwawu yafumaña mukulomba, ‘hikuwunda kwaNzambi kwabadika maana ejima.’ (Afwilipi 4:7) Kwikala nayitoñojoka yawunda mukanu kaayi kamakabi hinkisu yayeni. Kwatukwashaña cheñi kumujimba. (Yishimu 14:30) Komana tunateli kwikala nayitoñojoka yakuwunda muñovu jetwetu aweni? Tahindi kudi chuma chalema chatukwashaña?

[Mazu ekoku adi hefu 10]

Kulomba kwatukwashaña muyuma yayivulu, kumujimba, muyitoñojoka, sweje-e dinu kuspiritu

7 Komana Nzambi Watiyaña niKwakula Kulomba Kwetu?

ILU lwihu lwatuzañaleshaña chikupu nawa lwatuleñelaña kufwila kwilukilahu yuma yikwawu. Bayibolu yashimunaña nawu Yehova watiyaña kulomba kwawantu makonu. Yuma yitwelaña diyaleteshaña Yehova yatiyi kulomba kwetu hela nehi.

Yesu wahishili anlomboli jansakililu amumafuku indi alombelaña muwunfwikiji; akeñeleña ayimoneña kudi antu nawu aloña. Wahosheli nindi antu wenawa “anatambuli dehi wufwetu wawu,” dikwila nawu atambwilili chuma chaswejeluwu kukeña, kuyimona kudi antu, bayi neyi chatoñojokeleñawu nawu Nzambi wukutiya kulomba kwawuku. (Matewu 6:5) Nimakonu, antu amavulu alombaña kwesekeja namwaya kufwila kwawu bayi mwaya muchima waNzambuku. Hamuloña wakudiwula yishina yamuBayibolu yitunahanjekuhu, Nzambi hatiyaña kulomba kwawuku.

Indochu enu? Komana Nzambi wukutiya nikwakula kulomba kwenu? Nzambi hatalaña hekowa, munza hela chifulu chimukwetuku. Bayibolu yashimuna nawu: “Nzambi haakaminaña antu kumesuku; hakwila munyuza yejima, muntu wamwakamaña yena, welaña mwaloña, amutiyaña kudi Nzambi kuwaha.” (Yililu 10:34, 35) Komana awa mazu anayikundami? Neyi mwamwakamaña Nzambi, dikwila nawu mwamulemesha chikupu nawa himwakeñaña kumuneñeshaku. Neyi mwelaña mwaloña, dikwila nawu mwafwilaña kulondela yuma yashimunayi Nzambi nindi yaloña kubadika kulondela yuma yimunakukeña hela yafwilañawu akwenu antu. Komana mwakeñaña Nzambi yatiyeña kulomba kwenu? Bayibolu yayilejaña chimwatela kulomba hakwila nawu Nzambi yatiyi kulomba kwenu.a

Kafwampi, antu amavulu akeñaña nawu Nzambi yakuli kulomba kwawu muchihayamisha. Hela mpinji yakunyima, Nzambi havulileña kuzatisha yihayamishaku. Mpinji yikwawu mwahitileña yaaka yayivulu hakwila nawu chihayamisha chikwawu chikamwekani. Kubombelahu, Bayibolu yatulejaña nawu chafwiluwu apostolu yihayamisha yalekeli kumwekana. (1 Akorinda 13:8-10) Komana ichi chinayi mukwila nawu, makonu Nzambi hakulaña kulombaku? Inehi. Talenu kulomba kwakulañayi.

Nzambi wahanaña maana. Yehova diyi Nsulu yamaana alala ejima. Wahanaña maana kudi antu akeñaña wunlomboli windi nawa afwilaña kuwuzatisha muchihandilu chawu.—Yakoba 1:5.

Nzambi wahanaña spiritu yajila niyuma yejima yatukwashaña spiritu yajila. Spiritu yajila hiñovu yaNzambi yazatikaña. Hikwekala ñovu yabadika spiritu yajilaku. Yinateli kutukwasha kuumika kweseka. Yinateli kutuletela kuwunda neyi tudi mukukala. Yinateli kutukwasha kwikala nayililu yikwawu yasweja kuwaha. (Aŋalija 5:22, 23) Yesu wayilejeli atumbanji twindi nindi Nzambi wahanaña chikupu ichi chawaana.—Luka 11:13.

Antu amukeñakeñaña Nzambi namuchima wumu wayinkaña maana. (Yililu 17:26, 27) Kudi antu anakukeña chalala chikupu, mukaayi kejima. Anakukeña kumwiluka Nzambi, ijina dindi, kwiluka yuma yafuukwilayi iseki niantu, nichiyatela kukundamawu kwakwihi nayena. (Yakoba 4:8) Kakavulu aYinsahu jaYehova awanaña antu amuchidiwu nawa afwilaña kuyileja chahosha Bayibolu haniyi nsañu.

Komana dichinaleñeli mutambuli iyi magazini? Munakukeña kumwiluka Nzambi? Hadaha iyi diyi njila munakwakwilayi kulomba kwenu.

[Tumazu twaheshina]