Enu Akulumpi​—Dizilenu Kudi Gidiyoni

1. Kwesekeja na 1 Petulu 5:2, mudimwinyi walema wukwetiwu akulumpi?

AKULUMPI akaKristu ayinka mudimu wakwakamena nyikoku yaYehova. Awa amayala adihana alemesha mudimu wawu wakukalakela amanakwawu niahela, nawa azataña nañovu kwikala ‘atubiña . . . abiñaña chachiwahi.’ (Yere. 23:4; tañenu 1 Petulu 5:2.) Twasakililaña chikupu hakwikala nanawa amayala muyipompelu yetu!

2. Kwesekanyi kunateli kumonawu akulumpi amakwawu?

² Hampinji yinakuzatawu nyidimu yawu, akulumpi amonaña kukala kwakuvulu. Chakutalilahu, akulumpi atela kuzata nañovu hakwila akameneña chipompelu. Manakwetu Tony, mukulumpi wakuUnited States, wateleleli kwikala wadikehesha chikupu kutalisha hakuvula kwanyidimu yatela kutambwilayi. Walumbulwili nindi: “Kumatachikilu chipupu chaCOVID-19, natambwilili nyidimu yayivulu yakuloñesha kupompa nikushimwina. Ilaña hela chakwila nazatileña nañovu chamuchidinyi, nyidimu yavulilileñaku hohu. Nkumininaku, natachikili kukilokela kutaña Bayibolu, kudiza kwakankawami nikulomba.” Manakwetu Ilir, mukulumpi kuKosovo, wamweni kukala kwambukaku. Hadiñayi mwiluña mwadiña njita, chamukalilileña kulondela nshimbi yamukuloñesha. Wahosheli nindi: “Kuhamuka kwami kwadiña mukweseka hampinji yanyinkeliwu mudimu kudi kasanji kamutayi wakuya nakukwasha amanakwetu niahela adiña mwiluña mwadiña wubanji. Natiyili woma, nawa nshimbi yanlejeliwu yamwekeneña neyi yikuzatika wanyi.” Manakwetu Tim, mishonali wakuAsia, chamukalilileña kwila yuma yateleleli kwilayi hefuku-hefuku. Wahosheli nindi: “Mpinji jikwawu, nazeyeleña nankashi muyitoñojoka.” Yumanyi yinateli kuyikwasha akulumpi anakuhita mukukala kudi neyi iku?

3. Kuhanjeka hachakutalilahu chaNsompeshi Gidiyoni chinateli kukwasha ñahi ejima?

³ Akulumpi anateli kudizila kudi Nsompeshi Gidiyoni. (Heb. 6:12; 11:32) Wadiña nakukiña nikuyibiña antu jaYehova. (Anso. 2:16; 1 Kushi. 17:6) Kufwana Gidiyoni, akulumpi ayitonda kulonda akameneña antu jaNzambi mumpinji jakala. (Yilw. 20:28; 2 Tim. 3:1) Tunateli kudizila kudi Gidiyoni chadiñayi wadikehesha, wadizoza nawa wovwahila. Kuumika kwindi kwadiña mukweseka hampinji yazatileñayi nyidimu yamwinkeliwu. Chili tudi akulumpi hela nehi, twatela kudiza chakumwekesha kusakilila kudi akulumpi. Tunateli kukwasha awa amayala adikita.—Heb. 13:17.

NEYI CHINAYIKALILI KWIKALA ADIKEHESHA NAWA ADIZOZA

4. Gidiyoni wamwekesheli ñahi nindi wadikehesha nawa wadizoza?

⁴ Gidiyoni wadiña iyala wadikehesha nawa wadizoza.b Kañelu kaYehova chamulejeliyi Gidiyoni nindi anamutondi kulonda amwini aIsarela kudi aMidiyani añovu, iwu iyala wadizoza waakwili nindi: “Mutaña wami diwakuminamu mudi Manasi, nawa yami wabula kulema nankashi mwitala datata yami.” (Anso. 6:15) Wamweneña nindi washikilamu wanyi kuzata iwu mudimu, ilaña Yehova welukili nindi wukutwesha. Nawukwashu waYehova, Gidiyoni watwesheli kumanisha mudimu wamwinkeliwu.

5. Mpinjinyi yinateli kumukalila mukulumpi kwikala wadikehesha nawa wadizoza?

⁵ Akulumpi azataña nañovu kwikala adikehesha nikudizoza muyuma yejima. (Mika 6:8; Yilw. 20:18, 19) Hiyaditiyaña hayuma yinateli kuzatawu niyazatawuku; nawa hiyatoñojokaña nawu amukunkulwayi muloña watuyiluwa twakoñañawuku. Hela chochu, mpinji jikwawu chinateli kumukalila mukulumpi kwikala wadikehesha nawa wadizoza. Chakutalilahu, mukulumpi nateli kwiteja nyidimu yayivulu, kuhiñahu akañanya kuyizata yejima. Hadaha anateli kumuhoshola chazatayi mudimu wumu indi kwiji kumuhameka chazatayi mudimu wukwawu. Yumanyi yinateli kudizilawu akulumpi kudi Gidiyoni yinateli kuyikwasha muniku kukala?

6. Yumanyi yinateli kudizilawu akulumpi kudi Gidiyoni kutalisha hakudizoza? (Talenu cheñi mwevulu.)

⁶ Lombenuña wukwashu. Muntu wadikehesha weluka yuma yatela kubula kutwesha kuzatayi. Gidiyoni wamwekesheli nindi wadiña wadizoza chalombeleñayi wukwashu kudi akwawu. (Anso. 6:27, 35; 7:24) Akulumpi akweti maana niwena dichelañawu. Manakwetu Tony, ashimunawu hakusambila, walumbulwili nindi: “Muloña wankulilu yami, netejeleña nyidimu yayivulu kubadika yinatela kutwesha kuzata. Dichi nafuukwilihu kuleta mutu wahosheleña hachilwilu chakudizoza hakudifukula kwachisaka nawa namwihwili ñodami chinakutoñojokayi haniyi nsañu. Cheñi natalili ha jw.org vidiyo yadiña namutu nawu Dizishenu, Kuhwelelenu Nawa Inkenu Akwenu Ñovu, Neyi Chelañayi Yesu.” Manakwetu Tony watachikili kwinkaku akwawu nyidimu. Chumanyi chafuminimu? Manakwetu Tony wahosheli nindi: “Ichi nyidimu yamuchipompelu yinakwenda chiwahi, nawa nidi nampinji yeneni yakukolesha wubwambu wami naYehova.”

7. Akulumpi anateli kumwimbujola ñahi Gidiyoni neyi anakuyihoshola? (Yakoba 3:13)

⁷ Akulenuña munjila yayiwahi neyi anakuyihoshola. Akulumpi cheñi ekalaña mukweseka neyi anakuyihoshola. Chakutalilahu chaGidiyoni cheñi chinateli kuyikwasha. Chakadi nikujina, chineli welukili nindi niyena waluwañesheleña, waakwili munjila yayiwahi hamuhosholeleñawu kudi aEfuremu. (Anso. 8:1-3) Gidiyoni hakwili nakuzuwaku. Wamwekesheli nindi wadiña wadizoza kuhitila mukutiyila kuyuma yayakamishileña, nawa wamanishili iku kukala mukubabala. Akulumpi akweti maana amwimbujolaña Gidiyoni kuhitila mukutiyilila nakanañachima nikwakula munjila yayiwahi neyi anakuyihoshola. (Tañenu Yakoba 3:13.) Neyi ela mwenimu, aletaña kuwunda muchipompelu.

8. Chumanyi chatela kwilawu amayala atondewa neyi ayihameka? Hanenu chakutalilahu.

⁸ Hanenuña kalemesha kejima kudi Yehova. Gidiyoni chamuhamekeliwu hakushinda aMidiyani, wahanini kalemesha kejima kudi Yehova. (Anso. 8:22, 23) Amayala atondewa anateli kumwimbujola ñahi Gidiyoni? Atela kumuhameka Yehova hayuma yejima yinazatiwu. (1 Kor. 4:6, 7) Chakutalilahu, neyi mukulumpi anamuhameki nawu watañishaña chiwahi, watela kulemesha kwafumaña yuma yatañishañayi, dikwila nawu Izu daNzambi, hela yuma yamudizishañawu mukuloñesha kwaYehova. Mpinji jikwawu akulumpi atela kutoñojoka neyi chakwila yuma yatañishañawu yamulemeshaña Nzambi tahindi akeñaña hohu kutiyisha akwawu kuwaha. Talenu chuma chamwekeni kudi mukulumpi wumu wejina daTimothy. Hamutondeliwu, manakwetu Timothy wakeñeli nankashi kuhana mpanji jawantu amavulu. Wahosheli nindi: “Natachikileña namazu amavulu niyakutalilahu yayilehi. Kakavulu yumiyi yaletesheleña antu kunhameka. Chawushona, antu atachikili kusha maana nankashi hadi ami chatela asheña maana hayuma yamuBayibolu hela hadi Yehova.” Mukuhita kwampinji, manakwetu Timothy wamweni nindi watela kuhimpaku njila mwatañishilañayi kulonda antu abuleña kusha maana nankashi hadi yena. (Yish. 27:21) Yumanyi yafuminimu? Walumbulwili nindi: “Antu ashiyashana anlejaña mpanji jami chijayikwashaña kumanisha kukala, kuumika hampinji yahitañawu mukweseka nichijayikwashaña kuswina kwakwihi naYehova. Nekalaña namuzañalu chikupu chinatiya awa mazu kubadika chinatiyileña hanhamekeleñawu yaaka yinahitihu.”

NEYI CHINATUKALILI KWOVWAHILA HELA KUMWEKESHA KUHAMUKA

9. Chumanyi chaletesheli chimukalili Gidiyoni kumwovwahila Yehova nikwikala wahamuka? (Talenu mwevulu wudi hakava.)

⁹ Hampinji yamutondeliwu Gidiyoni kwikala nsompeshi, wakeñekeleña kwikala wovwahila nawa wahamuka. Amwinkeli mudimu wakala chikupu wakukisañana kameña kaBayali katuñiliwu kudi tata yindi. (Anso. 6:25, 26) Chimwahitili mpinji, hanyima yakwila napompeshi dehi amashidika, Gidiyoni amulejeli kapampa kayedi kufumishahu amashidika amakwawu. (Anso. 7:2-7) Nkumininaku, amulejeli kuya nakulukuka chilombu chawayilumbu hakachi kawufuku.—Anso. 7:9-11.

10. Mpinjinyi hichinateli kumukalila mukulumpi kwovwahila?

¹⁰ Akulumpi atela kwikala “anyakalaña kwovwahila.” (Yak. 3:17) Mukulumpi wovwahila wanyakalaña kwovwahila chahosha Nsona ninshimbi jamukuloñesha kwaNzambi. Dichi wekalaña chakutalilahu chachiwahi kudi antu. Hela chochu, mpinji yikwawu chinateli kumukalila kwovwahila. Chakutalilahu, hadaha chinateli kumukalila kwovwahila nshimbi jinatambwiliyi. Mpinji jikwawu, nateli kujinoka neyi chakwila iji nshimbi jinateli kuzatika hela nehi. Hadaha anateli kumwinka mudimu wukuletesha amukasi. Akulumpi anateli kumwimbujola ñahi Gidiyoni kwikala ovwahila neyi adi muniku kukala?

11. Yumanyi yinateli kukwasha akulumpi kwikala ovwahila?

¹¹ Tiyililenuña nakanañachima kunshimbi nawa yizatishenuña. Nzambi wamulejeli Gidiyoni chakukisañana kameña katata yindi, hakutuñila kameña kakaha kaYehova niayimuna atela kulambulawu. Gidiyoni hadiwili nshimbi yamulejeliwuku, ilaña wayilondeleli. Makonu, akulumpi atambwilaña nshimbi mukuloñesha kwaYehova kuhitila munyikanda, yakubidika ninshimbi jatukwashaña kwikala akiñewa kuspiritu nikumujimba. Twayikeña akulumpi muloña alondelaña nshimbi jamukuloñesha mpinji yejima. Chipompelu chejima chahetelañamu.—Mas. 119:112.

12. Akulumpi anateli kuzatisha ñahi AHeberu 13:17 neyi kudi nshimbi yinahimpiki mukuloñesha?

¹² Nyakalenuña kuhimpa. Anukenu nenu Yehova wamulejeli Gidiyoni kufuntisha mashidika kwakwihi naejima kwitala. (Anso. 7:8) Hadaha watoñojokeli nindi, ‘Komana chumichi mwamweni chinakukeñeka? Komana chumichi chikuzatika?’ Hela chochu, Gidiyoni wovwahilili. Akulumpi makonu amwimbujolaña Gidiyoni kuhitila mukwovwahila nshimbi yinahimpiki mukuloñesha. (Tañenu AHeberu 13:17.) Chakutalilahu, mu 2014 Izanvu Dalombolaña dahimpili njila yakuhaninamu yawaana yakutuña nachu Matala aWanta niakupompelamu Kupompa Kwamaneni. (2 Kor. 8:12-14) Yipompelu hiyateleleli cheñi kufweta mukudi wunayituñiliwu Itala daWantaku. Ilaña ichi, kuloñesha kwazatishaña yawaana yafumaña muyipompelu yamukaayi kejima kutuña nachu Matala aWanta nimatala akupompelamu Kupompa Kwamaneni kwejima kwakeñekeleñawu, hela chakwila chipompelu chamunodu iluña chidi hohu namali antesha akuhanaku. Manakwetu José chelukiliyi iku kuhimpika, wajinokeli neyi chakwila kwakazatika, nakutoñojoka nindi: ‘Kwosi Itala daWanta nidimu dakatuñawuku. Ichi hidichazatikaña yuma mukanu kaayiku.’ Chumanyi chamukwashili manakwetu José kulondela iyi nshimbi? Wahosheli nindi: “Mazu ekala haYishimu 3:5, 6 añanukishili nawu natela kumukuhwelela Yehova. Nawa munafumi yuma yayiwahi chikupu! Hitunakukumina hohu dakutuña Matala aWanta amavuluku, ilaña tunadizi cheñi chakuhana yawaana munjila jashiyashana kulonda ejima aheteleñamu.”

13. (a) Gidiyoni wakuhweleleli nindidi? (b) Akulumpi anateli kumwimbujola ñahi Gidiyoni? (Talenu cheñi mwevulu.)

¹³ Ikalenu ahamuka nakwila nkeñelu yaYehova. Gidiyoni wamwovwahilili Yehova hela chakwila wadiña nakutiya woma nawu wumi windi wadiña muwubanji. (Anso. 9:17) Hanyima yakumukolesha kudi Yehova, Gidiyoni wakuhweleleli chikupu nindi Nzambi wukumukwashaña hampinji yinakukiñayi antu jaNzambi. Akulumpi ashakamaña mwiluña mwakaanishawu mudimu wetu amwimbujolaña Gidiyoni. Ahamukaña nakulombola kupompa nimudimu wakushimwina hela chakwila anakuyichiinisha nawu akuyikasa, kuyihujola, kuyilekesha nyidimu, hela kuyichiinisha namadombu.c Hampinji yalukadi lwasweja, akulumpi akakeñekaña kwikala ahamuka hakwila akwovwahileña nshimbi jakatambwilañawu hela chakwila jakaletesha wumi wawu kwikala muwubanji. Muniji nshimbi munateli kubombela nshimbi kutalisha hakushimuna nsañu yanvula yamalola yachifwikija nichitwatela kupuluka kulukuka kwaGogi wakuMagogi.—Ezek. 38:18; Chim. 16:21.

NEYI CHINAYIKALILI KUUMIKA

14. Muloñadi chichamukalilili Gidiyoni kuumika?

¹⁴ Gidiyoni wateleleli kuzata nañovu mumudimu windi wawunsompeshi. AMidiyani chatemukiliwu kunjita hakachi kawufuku, Gidiyoni wayikumpishili kufuma kuChinekineki chaYazeri nakushika kuKaloña Yodana, iluña mwadiña mavunda nankashi. (Anso. 7:22) Komana Gidiyoni wakuminini kuYodani? Inehi! Hela chakwila azeyeli, yena niamayala 300 adiñayi nawu azambukili kaloña nakutwalekahu kuyikumpisha. Nkumininaku, ayiwanini aMidiyani nawa ayishindili.—Anso. 8:4-12.

15. Mpinjinyi yinateli kuyikalila akulumpi kuumika?

¹⁵ Mpinji yikwawu mukulumpi nateli kuzeya kumujimba hela muyitoñojoka muloña wakwakamena chipompelu nichisaka chindi. Neyi ekala mukukala kwamuchidiwu, akulumpi anateli kumwimbujola ñahi Gidiyoni?

16-17. Chumanyi chamukwashili Gidiyoni kuumika, nawa akulumpi atela kukuhwelela nawudi? (Isaya 40:28-31) (Talenu cheñi mwevulu.)

¹⁶ Kuhwelelenu nenu Yehova wukuyikolesha. Gidiyoni wakuhweleleli nindi Yehova wukumukolesha, nawa wamukolesheli. (Anso. 6:14, 34) Mpinji yimu, Gidiyoni niamayala adiñayi nawu adiña nakuyikumpisha anyanta ayedi awaMidiyani hamaseki iku awa anyanta adi hajingameli. (Anso. 8:12, 21) Hela chochu, nawukwashu waNzambi, aIsarela ashindili. Munjila yoyimu, akulumpi niwena atela kumushindamena Yehova, owu wabulaña ‘kuzeya hela kumana ñovu.’ Wakayinka ñovu yakuumika neyi adi mukukala.—Tañenu Isaya 40:28-31.

¹⁷ Talenu chuma chamwekeni kudi manakwetu Matthew, wamuKometi Yatiyañanaña naYipateli. Chumanyi chamukwashili kuumika? Manakwetu Matthew wahosheli nindi: “Namoni chazatikaña nsona yaAFwilipi 4:13. Mpinji yikwawu neyi nazeyi chikupu nikutiya nami nikutwesha kutwalekahu wanyi, nalombeleña chikupu nakumulembelela Nzambi nami anyinki ñovu yakumujimba niyamuyitoñojoka kulonda nikwashi amanakwami. Mumpinji jamuchidiwu, namonaña spiritu yaYehova chiyanyinkaña ñovu nikunkwasha kuumika.” Kufwana Gidiyoni, akulumpi adikita anateli kumona kukala hampinji yinakubiñawu nyikoku. Hela chochu, atela kudizoza nakwiluka nawu kudi yuma yikwawu yinateli kukañanyawu kwila. Ilaña atela kukuhwelela nawu Yehova wukutiyaña kulomba kwawu kwakulomba wukwashu nawa wukuyikoleshaña kulonda atwesheña kuumika.—Mas. 116:1; Fwili. 2:13.

18. Neyi chitunahanjekihu, akulumpi anateli kumwimbujola ñahi Gidiyoni?

¹⁸ Kudi yuma yayivulu yatela kudizilawu akulumpi kudi Gidiyoni. Akulumpi atela kwikala adikehesha nawa adizoza kutalisha hanyidimu yatambwilañawu nichelañawu neyi anayihosholi hela kuyihameki. Atela kumwekesha chilwilu chakwovwahila nikuhamuka, sweje-e chitunakuswina kwakwihi nakukuma kwanshakaminu yamakonu. Nawa atela kukuhwelela nawu hela chakwila akuhita mukukala kwamuchidinyi, Nzambi wukuyikoleshaña. Chakadi nikujina, twayisakililaña awa atubiña adikita “[nikuyilemesha] chikupu antu adi neyi awa.”—Fwili. 2:29.