-
‘Wamutiyishileña Nzambi Kuwaha’Kaposhi Kakutalila (kawantu Amavulu)—2017 | Na. 1
-
-
“AMUTUNTULWILI KULONDA ABULI KUMONA KUFWA”
Enoki wafwili ñahi? Wafwila munjila yachihayamisha nawa yakubula kwiluka. Mukanda waKutachika washimuna nawu: ‘Enoki watwalekelihu kwenda naNzambi walala, kumukasumuka hikwosi, Nzambi diyi wamutambwili.’ (Kutachika 5:24) Munjilanyi Nzambi mwamuhukwiliyi Enoki? Kapostolu Pawulu walumbulwili nindi: “Nakukuhwelela amutuntulwili Enoki kulonda abuli kumona kufwa; hiyamumwenuku muloña amutuntulwili kudi Nzambi. Helili kanda amutuntululi amushimwini wunsahu nawu wamutiyishilaña Nzambi kuwaha.” (Aheberu 11:5) Pawulu watalishili mudihi hakuhosha nindi “amutuntulwili Enoki kulonda abuli kumona kufwa”? Akwakubalumuna Bayibolu amakwawu ahosha nawu Nzambi wamusendeli Enoki mwiwulu. Ilaña hidimuku. Bayibolu yashimuna nawu Yesu hohu diyi muntu watachi asañwiluwu nakuya mwiwulu.—Yowanu 3:13.
Munjilanyi ‘mwamutuntulwiluwu’ Enoki kulonda yabuli “kumona kufwa”? Yehova wamutuntulwili Enoki munjila yayiwahi kuhitila mukufumisha wumi nawa wafwili, kulonda yabuli kumona yihuñu yakufwa. Chatachi Enoki watambwilili “wunsahu nawu wamutiyishilaña Nzambi kuwaha.” Munjilanyi? Henohu kanda yafwi, hadaha Enoki amumwekesheleli chimwenu kudi Nzambi nakumuleja paradisa haseki. Hanyima yakumumwekeshela chimwenu chachiwahi kudi Yehova, Enoki wafwili. Hakusoneka hadi Enoki niamayala nawambanda amakwawu ashinshika, kapostolu Pawulu wahosheli nindi: “Wenawa ejima afwili mukukuhwelela.” (Aheberu 11:13) Kuhiñahu, ayilumbu jindi akeñakeñeli mujimba windi, ilaña “hiyamumwenuku,” hadaha Yehova wadiña wawukisañana dehi, kuchinisha kuwuzatisha mukudifukula kwakutwamba.b
Neyi chinashimuni muniyi nsona, ichi dinu tushinshikenu kulonda tumoni chafwiliyi Enoki. Fwikijenu nawa ilukenu nenu kwadiña hohu njila yimu yakupulukilamu. Enoki wadiña nakutemuka nawa wazeyeli chikupu. Ayilumbu jindi amuhañileña, iku anahili chikupu nansañu yawunsompeshi yayishimwininiyi. Enoki wawanini iluña mwakuswama nawa wanookeli chanti, ilaña welukili nindi hakutwesha kuswama hadi mpinji yayilehiku. Kufwa hikukukeña kumumwekena munjila yatama. Hampinji yanookeliyi, walombeli kudi Nzambi yindi. Yitoñojoka yakuwunda yenjili mudi yena. Enoki wamweni chimwenu chamwekesheleña yuma yayiwahi nawa wamweni neyi dimu mwadiyi.
Enoki akeñeleña kumujaha munjila yatama hamutuntulwiliwu kudi Yehova
Fwikijenu chamweniyi iyi yuma yamwekesheleña kaayi kejima kambukiliku nakaayi mwashakamineñayi. Wamweneña kaayi kakawahi neyi chochadiña itempa daEdeni, ilaña himwadiña akerubi ahembeleña kulonda kukañesha antuku. Mwadiña amayala nawambanda akola kumujimba nawa akweti nyijimba neyi yawatwansi. Adiña mukuwunda. Himwadiña kudihela hela kudikabisha muloña wakwitiya neyi chamweniyi Enokiku. Enoki yomweni wadimweneni kushiika kwaYehova, kukeña nichakanayi. Wamweni nindi imu dimu mwatela kushakamayi; nawa watela kwikala mukala windi. Chatiyiliyi nindi wudi mukuwunda chikupu, Enoki walezumukilili mutulu twakadi kulota.
Wuchidi mutulu twakufwa kushika niyinu mpinji, nawa Yehova Nzambi wamwanukaña muyitoñojoka yindi yabulaña kukuma! Neyi chakaniniyi Yesu nindi, mpinji yinakwinza hakela antu ejima anukañayi Nzambi akatiya izu daKristu nawa akedika mumajamu, akamona ituña dadiha dadiwahi nawa dawunda.—Yowanu 5:28, 29.
-
-
‘Wamutiyishileña Nzambi Kuwaha’Kaposhi Kakutalila (kawantu Amavulu)—2017 | Na. 1
-
-
b Munjila yoyimu, Nzambi welukili chikupu nindi mujimba waMosi niwaYesu hiyateli kuyizatisha munjila yatamaku.—Kuhituluka 34:5, 6; Luka 24:3-6; Yuda 9.
-