¹² Bayibolu hiyashimuna jiika chaletesheli Hezekiya kudinka wantaku. Tahindi muloña wakwila washindili aSiriya indi kwiji chochamukiliwu kudi Nzambi muchihayamisha? Indi kwiji muloña “waswejeli maheta nikulema”? Tuneluki wanyi, ilaña muloña wakwila Hezekiya wadinkeli wanta, ‘wasakililili wanyi hayuma yayiwahi yamwilililiwu.’ Chatama! Hela chakwila wamudililili Nzambi nindi wamukalakeleli namuchima wejima, mpinji yimu Hezekiya wamuneñesheli Yehova. Hela chochu, ‘Hezekiya wadizozeli,’ dichi Nzambi wamujilumwini wanyi yena niantu jindi.—2 Kushi. 32:25-27; Mas. 138:6.

¹⁴ Neyi anatuhameki, tukwila chiwahi neyi tulondela mazu aYesu akwila nawu: “Neyi muzata nyidimu yinayinkiwu, hoshenu nenu: ‘Tudi hohu anduñu amukunkulwayi. Yuma yitunakoñi diyi yitwatela kwila.’” (Luka 17:10) Tunateli kudizilaku cheñi chikuma chikwawu kudi Hezekiya. Chilwilu chakudinka wanta chamwekesheli nawu ‘wasakililili wanyi hayuma yayiwahi yamwilililiwu.’ Neyi tutoñojokañahu chikupu hayuma yinatwililiyi Nzambi chikutukwasha kutondolwela yilwilu yahelayi Yehova. Tunateli kumusakilila Yehova. Watwinka Nyikanda Yajila nawa nispiritu yindi yajila yatukwashaña.