Chiwunateli Kwikala naMuzañalu
NEYI chochakamenaña anvwali anyanawu kulonda azañalaleña, chochimu niTata yetu wamwiwulu watwakamenaña nawa wakeñaña nindi twikaleña amuzañalu. Hakumwekesha chakamenañayi, watwinka nsañu yayivulu yahosha hakutwesha nikukañanya. Mwalala, neyi Bayibolu hiyikuhosha hansañu yamuntu washaña kashinshi kuyuma yahoshañayi Nzambi, yahoshaña chikupu nawu: “Yejima yakwilayi yikulumbuluka hohu.”—Masamu 1:3.
Hela chochu, neyi chalala muntu welaña yuma yahoshayi Nzambi, muloñadi antu amavulu chakañenyañawu kutiyishisha hansañu yakwikala nanshakaminu yayiwahi, yamuzañalu nawa yakutiyisha kuwaha? Kushinshika chikupu hanidi isamu dikutwinka ñakwilu nawa dikutwileja chitunateli kwikala namuzañalu.
“Mpuña yaWatama”
Ñimbi yamasamu wasoñamishili hakufwana kwekala mukwenda “mwaya mpuña yawatama.” (Masamu 1:1) Satana Diyabolu diyi mukulumpi ‘wawatama.’ (Matewu 6:13) Nsona yatulejaña nawu diyi “mwanta wampata yamunu mwishina” cheñi nawu “mpata yamunu mwishina yashakama mudi owu watama.” (Yowanu 16:11; 1 Yowanu 5:19) Dichi hichakuhayamisha hakuwana neyi kufumba kwekala mukaayi kwamwekeshaña yitoñojoka yawatamaku.
Kufumba kwamuchidinyi kwahanaña antu atama? Kakavulu muntu watama wamusekeshaña Nzambi. (Masamu 10:13) Kufumba kwawu kwakudiwula hela kwakumusekesha Nzambi kunatandi kudi kwejima. Antu amakonu akoleshaña “kufwila kwachisemwa chaheseki, nikufwila kwamesu, nikudisamba kwamukunkulwayi kwawumi wunu.” (1 Yowanu 2:16) Akwayikunzulemba niakwakusoneka yipapilu yansañu atwimwekeshelaña yuma yakumujimba namaana akufwila kwikala nayuma yayivulu muchihandilu. Mukaayi kejima, makampani azatishaña kubadika ha 500 biliyoni dola mali aku (U.S.) hachaaka nichaaka nakumwekesha yuma yikwetuwu hatooka kulonda kukanjikija antu kulanda yuma yawu—hela akwakulanda anakuyikeña hela nehi. Nawa iku kumwekesha yuma hatooka hikunahimpi yaaku yawantu yakulandilamu hohuku, ilaña kunaluwañeshi yitoñojoka yawantu yakwikala namuzañalu.
Chinafumimu, hela chakwila antu amavulu akweti yuma yadiña nakutoñojokawu hohu hamafuku akunyima, achidi nampwila yakabulaña kumana yakwikala nayuma yayivulu. Yitoñojoka yidi yakwila nawu neyi hiwukweti yumiyuku, hiwunatweshi kwikala namuzañalu hela walumbulukaku. Iyi yitoñojoka yamakudi, nawa “hiyakudi Tataku, yamumpata yamunu mwishina.”—1 Yowanu 2:16.
Nleñi yetu weluka yuma yinateli kutwiletela muzañalu chikupu. Kufumba kwindi kwambukaku ‘nampuña yawatama.’ Dichi, neyi tukufwila kuheta wuselewa waNzambi henohu tunakwendela munjila yamukaayi kulonda kwikala namuzañalu chidi neyi kufwila kwenda mujinjila jiyedi hampinji yoyimu. Hichikutweshekaku. Dimuloña waweni wababeshelaña Bayibolu nawu: ‘Bayi mulondeja yipimu yahanji yakanu kaayuku’!—Aroma 12:2.
Bayi Witeja Kaayi Kukuluwañeshaku
Kaayi kanakuyulewa naSatana kamwekanaña neyi kakawahi munshakaminu yetu. Hela chochu, twatela kubabala. Anukenu nenu Satana hamuloña walwisu lwindi wamudimbili mumbanda watachi Evu, kulonda kumukalakela. Kufumahu wamuzatishili Evu kumuluwañesha Adama kulonda yavulumuni. Makonu Satana wazatishaña cheñi antu kulonda kuhana kufumba kwindi kwatama.
Chakutalilahu, David yatenawu muchibaba chinafumuhu, wateleleli kuzata maora amakwawu nikwenda jinjila jajivulu hamudimu. David wahosheli nindi, “Nanyamukileña haChimu nabudidi nakufunta haChiwana namelela.” Hakwiluka nawu kudihana kwamuchidiwu kwakeñekaña kulonda kwikala namuzañalu mukaayi, amabwambu alala, amuchisaka niakwawu hanyidimu amulejeleña David nawu: “Hembaku iwu mudimu kulonda wukwashileñamu chisaka cheyi.” Amulejeli nawu wakatwalekahu naniyi progiramu hadi yaaka yantesha kushika tuhu nimpinji yakekalayi nachihandilu chachiwahi. David walumbulwili nindi: “Adiña nakuhosha nawu ichi chikuwahila chisaka chami muloña nikuletaña mali amavulu hetala—nikwikala namuzañalu chikupu. Hela chakwila hinadiña hamu nachisaka chamuku, amabwambu jami anshinjilili nawu mwalala chisaka chami nachinkaña yuma yayivulu.” Kufwana David, amavulu anakuzata nañovu kulonda kwinka yisaka yawu yuma yejima yatoñojokañawu nawu ayikeñaña. Komana kulondeja kufumba kwamuchidiwu kwalombolaña kumuzañalu? Chumanyi chacheni chakeñaña chisaka?
David welukili chuma chakeñeleña chisaka chindi hampinji yadiñayi halwendu lwahamudimu. David wahosheli nindi, “Nadiña nakuhanjika hanshiña namwanami wamumbanda Angelica, wahosheli nindi: ‘Tata, muloñadi chimwabulilaña kushakama hamu nanetu hetala?’ Channeñesheli.” Chuma chahosheliyi mwanindi wamumbanda chakolesheli nkeñelu yindi yakusoneka mukanda wakuleka mudimu. David wafuukwiluhu kwinka chisaka chindi chuma chiyakeñeleñawu—mpinji yindi niyomweni nikuyakamena.
Kuzatisha Nshimbi yaNzambi Kwaletaña Muzañalu
Wunatweshi kukañesha ñahi nsañu yaluwañeshaña yinatandi mukanu kaayi? Ñimbi yamasamu watuleja nindi muntu walumbuluka nawa wamuzañalu ona “watiyaña kuwaha nanshimbi jaYehova; nshimbi jindi watoñojokañamu nimwaana niwufuku.”—Masamu 1:2.
Hampinji yamutondeluwu Yoshuwa kudi Nzambi hamu neyi nyuli wamuza waIsarela, amulejeli nawu: ‘Wakatañeñamu nakutoñojoka Mwizu daNzambi nimwaana niwufuku.’ Dimu, kutaña nikutoñojoka Hezu daNzambi chadiña chuma chalema, ilaña Yoshuwa wateleli cheñi ‘kushaku muchima wakwila mwejima mwasonekeluwu Izu daNzambi.’ Hela chochu, kutaña Bayibolu bayi neyi kunateli kuleta muzañalu muchihayamishaku. Watela kuzatishaña yuma yiwunakutaña. Yoshuwa amulejeli nawu: ‘Dichi wakakooleka munjila yeyi, nawa wakamona kuwaha.’—Yoshuwa 1:8.
Toñojokenu neyi chakwila mwana wunakumwemweta nashakami hanyendu yanvwali wukweti kukeña, anakutañila hamu nsañu yakeñeshawu. Hela chakwila ayitaña mapampa kakavulu, ekala alemesha iyi mpinji yayiwahi. Chochimu, muntu wamukeña Nzambi wamonaña kutaña Bayibolu mafuku ejima neyi hichuma chelukayi chaletaña muzañalu—himpinji yatiyañayi kuwaha hamu naTata yindi wamwiwulu. Kuhitila mukulondela kufumba niwunlomboli waYehova, muntu wamuchidiwu wekalaña ‘neyi mutondu wakutumba kutupila twamenji, wasoñaña nyikabu yindi hachilaaka chindi, mafu indi hiyalepukañaku; yejima yakwilayi yikulumbuluka hohu.’—Masamu 1:3.
Mutondu wunalumbululuwu kudi ñimbi yamasamu hiwakulaña wawenawuku. Awitumbaña chiwahi kwiluña kudi menji nawa awakamenaña kudi ndimi. Munjila yoyimu, Tata yetu wamwiwulu wahimpaña nikuwahisha yitoñojoka yetu kuhitila mukufumba kwawanewaña muNsona. Chafumañamu, twamwekeshaña yililu yendelaña hamu nakufumba kwaNzambi.
Hela chochu, “atama hiyekala chochichuku.” Dimu, atela kumwekana neyi anakwila chiwahi hampinji yantesha, ilaña mukuhita kwampinji ekalaña nayakufumamu yatama. “Hiyakemana mwifuku dakusompaku.” Hela chochu, “njila yawatama yakajimbala.”—Masamu 1:4-6.
Dichi bayi witeja kaayi kakuluwañesheli yikonkwanyi yeyi niyuma yiwalemeshaku. Hadaha wunateli kwilukisha mudimu nawa nikwikala nawuswa wakwikala namuzañalu mukanu kaayi, watela kubabala chakuzatisha yuma yiweluka hela chiwunateli kwiteja kaayi kuyizatisha. Kufwila maheta akumujimba amukunkulwayi kunateli kuletesha muntu ‘kuzeya.’ Munjila yikwawu, kwikala nawubwambu wawuwahi naNzambi kwaletaña muzañalu waweni.
Chiwunateli Kwikala naMuzañalu
Muloñadi neyi muntu yalondela kufumba kwaNzambi yuma yejima yakwilayi yakalumbuluka hohu? Ñimbi yamasamu hahosheleña hamuzañalu wekala mukanu kaayuku. Muzañalu watiyaña muntu wakamenaña nshimbi yaNzambi anawesekeji hamu nakwila nkeñelu yindi kudi Nzambi—nawa nkeñelu yaNzambi yekala yalumbuluka mpinji yejima. Lekenu tutali kuzatisha nshimbi yamuBayibolu chikunateli kuyiletela muzañalu.
Chisaka: Nsona yakonkomwena anfumu jawantu nawu “akeñi añodi jawu aweni neyi chakeñawu nyijimba yawu,” nawa mumbanda wawiniKristu anamuleji ‘kwakamena nfumwindi.’ (Aefwesesa 5:28, 33) Anvwali anayikoleshi kuwanewa hamu nawanyanawu, nikusehaña nawu, nikuyidizisha yuma yalema yakeñekaña muchihandilu. (Kuhituluka 6:6, 7; Mukwakutaŋisha 3:4) Izu daNzambi dafumbaña cheñi anvwali nawu: “Bayi muvulokaña anyanenu azuwuku.” Neyi iku kufumba akwizatisha, chikuyipelela anyana ‘kwovwahila anvwali jawu nikulemesha atata jawu niamama jawu.’ (Aefwesesa 6:1-4) Kulondela iku kufumba kwaNzambi kunateli kulombola chisaka kwikala chamuzañalu.
Amabwambu: Antu amavulu akeña amabwambu. Twekala nawuswa niyitoñojoka yakumwekesha kukeña nikufwila kutukeña. Yesu walejeli atumbanji twindi nindi atela ‘kukeñañana.’ (Yowanu 13:34, 35) Hakachi kawu twawanañahu amabwambu yitunateli kukeña nikuyikuhwelela—hela tuhu kuyikuhwelela nayitoñojoka yetu yejima. (Yishimu 18:24) Chuma chalema, kuhitila mukuzatisha nshimbi jamuBayibolu, tunateli ‘kukundama kwakwihi naNzambi’ nawa kufwana Abarahama anateli kutwitena nawu “ibwambu daNzambi.”—Yakoba 2:23; 4:8.
Wumi Wukweti Nkeñelu: Chatela kwikala nawumi wakadi nkeñelu, antu ekala namuzañalu chikupu akweti wumi walema nawa wukweti nkeñelu. Wumi wawu hiwashindamena hanshakaminu yahimpikaña yamukanu kaayuku. Yikonkwanyi yawu yalombolaña kumuzañalu walala nawa wahaya nyaka, chineli ashindamena hankeñelu yayeni yamuwumi. Chumanyi chaleñelaña muntu kwikala nawumi wukweti nkeñelu? “Mutiyi Nzambi [walala] woma, hembaku kuleja kwindi; chuma chatelela muntu chochenichi hohu.”—Mukwakutaŋisha 12:13.
Kuchiñeja: Kumwilisha Nzambi hamu neyi Ibwambu detu nikwena kwatwinkaña kuchiñeja kwakumbidi. Kapostolu Pawulu wakonkomweneni eniKristu nindi “bayi mukuhwelela maheta abulaña kushakamaku; chiña kusha muchima kudi Nzambi.” Muniyi njila akutwesha ‘kudilumbikila yakutuña nachu kunyaka yakenza, kulonda akakwati kuwumi, wowu wumi walala chikupu.’ (1 Timotewu 6:17-19) Iwu wumi walala wunakwinza katataka chikela Wanta waNzambi wamwiwulu wunaleti dehi Paradisa hamaseki.—Luka 23:43.
Hela chakwila wunateli kuzatisha nshimbi jamuBayibolu, hiwunateli kwamuka kukukalaku, ilaña wukutwesha kutondolwela lukadi nichineñi chadiletelañawu antu atama. David yatenawu hakusambila, niyihita yawantu yikwawu yafwana yena anadizi kulema kwakuzatisha nshimbi jamuBayibolu muwumi wawu. Hanyima yakuwana mudimu wukweti ndandanda yayiwahi, David wahosheli nindi: “Nakusakilila hawulunda wami nañodami nianyanami hamu tuhu nikukooleka kwakumuzatila Yehova Nzambi hamu neyi eluda muchipompelu.” Dimuloña waweni wahoshela isamu hadi muntu wataña maana kunshimbi yaNzambi nawu: “Yejima yakwilayi yikulumbuluka hohu”!
[Chati yidi hefu 6]
YIKUMA YITANU YALOMBOLAÑA HAKWIKALA NAMUZAÑALU
1 Kanaku kuluwañeshewa nayuma yalemeshawu mukanu kaayi.
2 Kutaña nikutoñojoka Hezu daNzambi mafuku ejima.
3 Zatishaku nshimbi yamuBayibolu muwumi weyi.
4 Mwilishi Nzambi kwikala ibwambu deyi.
5 Mutiyi Nzambi walala woma, nikuhemba kuleja kwindi.
[Nyevulu yidi hefu 7]
Komana wunakulondela yikuma yalombolaña kumuzañalu?