Mukudiza Bayibolu mwafumaña yuma yayiwahi nankashi. Hela chochu, mpinji yikwawu chinateli kwikala chaswayi wanyi. Mpinji yikwawu, munateli kujinoka neyi chakwila mwatela kutwalekahu kudiza Bayibolu. Chalemenadi kuzata nañovu kulonda mutwalekihu kudiza? Yumanyi yikuyikwasha kutwalekahu kudiza hela munakumona kukala?

1. Kudiza Bayibolu kwalemenadi?

“Izu daNzambi dadumi nawa dikweti ñovu chikupu.” (AHeberu 4:12) Bayibolu yalema muloña yatulejaña chatoñojokañayi Nzambi nichatiyañayi hadi enu. Yikuyikwasha kwiluka yuma, kwikala namaana alala nikuchiñeja. Chasweja kulema, yikuyikwasha kwikala ibwambu daYehova. Chimukudizaña Bayibolu, ñovu yayu yikuyikwasha kuhimpa chihandilu chenu.

2. Kwiluka kulema kwachalala chamuBayibolu kukutukwasha ñahi?

Chalala chamuBayibolu chidi neyi maheta alema. Dichaletesha Bayibolu yitulejeña nawu “landaku chalala nawa bayi wuchilandishaku.” (Yishimu 23:23) Neyi twiluka kulema kwachalala chamuBayibolu, tukutwalekahu kudiza hela chakwila tunakumona kukala.—Tañenu Yishimu 2:4, 5.

3. Yehova nateli kuyikwasha ñahi kutwalekahu kudiza?

Chineli Yehova diyi Nleñi yenu wañovu jejima nawa Ibwambu denu, nakukeña nindi mumwiluki. Wukuyinka “muchima wakufwila kukoña yuma niñovu yakwilamu.” (Tañenu AFwilipi 2:13.) Dichi, mpinji yikwawu neyi munakukeña kusweja kwikala nampwila yakudiza hela kuzatisha yuma yimunakudiza, wukuyikwasha. Neyi munakukeña ñovu yakuumika kukala hela ikañesha, wukuyinka. Mulombenuña Yehova mpinji yejima ayikwashi kutwalekahu kudiza Bayibolu.—1 ATesalonika 5:17.

SANDUJOLENU CHIKUPU

4. Lemeshenu nankashi kudiza Bayibolu

Mpinji yikwawu, twakasikaña nanyidimu yayivulu chakwila tukumonaña netu tudana mpinji yakudiza Bayibolu. Yumanyi yinateli kutukwasha? Tañenu AFwilipi 1:10, kuhiñahu hanjekenu hanawa malwihu:

• Munakutoñojoka nenu yumanyi ‘yalema nankashi muchihandilu’?

• Munateli kulemesha ñahi kudiza Bayibolu?

1. Neyi musambila kushamu wusekulula mumbeketi kuhiñahu mushamu malola, malola akushikilamu wanyi

2. Neyi musambila kushamu malola kuhiñahu dinu mushamu wusekulula mukwikala neluña deneni. Munjila yoyimu, neyi musambila kukeña “yuma yalema nankashi” muchihandilu chenu, mukutwesha kuyizata nawa mukwikala ninampinji yakwililamu yuma yikwawu

Kudiza Bayibolu kwatukwashaña kupama kuspiritu, dikwila nawu tukumwiluka Nzambi nawa tukudifukulaña kudi yena. Tañenu Matewu 5:3, kuhiñahu hanjekenu hanilu lwihu:

• Yumanyi yayiwahi yafumañamu neyi tulemesha nankashi kudiza Bayibolu?

5. Twalekenuhu hela chakwila anakuyikañesha

VIDIYO: Yuma Yayiwahi Yafumini Mukutwalekahu (5:22)

• Muniyi vidiyo, amabwambu jaFrancesco nichisaka chindi elili ñahi chayilejeliyi yuma yadizileñayi?

• Yumanyi yayiwahi yafuminimu chelili atwalekihu kudiza?

Tañenu 2 Timotewu 2:24, 25, kuhiñahu hanjekenu hanawa malwihu:

• Chisaka chenu niamabwambu jenu anakutiya ñahi nayuma yimunakudiza?

• Kwesekeja nanawa mavasi, mukwila ñahi neyi muntu natiyi kutama chimunakudiza Bayibolu? Muloñadi?

6. Mushindamenenu Yehova kulonda ayikwashi

VIDIYO: Yehova Watukwashaña Kuhimpa (3:56)

• Muniyi vidiyo, aJim ahimpili ñahi hakwila amuzañaleshi Yehova?

• Yumanyi yinayitiyishi kuwaha nayuma yeliliwu?

Tañenu AHeberu 11:6, kuhiñahu hanjekenu hanawa malwihu:

• Yehova wakayililadi “antu amukeñakeñaña chikupu,” dikwila nawu antu azataña nañovu kulonda amwiluki nawa amutiyisheña kuwaha?

• Chumichi chinakumwekesha nawu Yehova watiyaña ñahi neyi ayimona munakuzata nañovu kudiza Bayibolu?

YUMA YIMUNADIZI

Hela chakwila mpinji yikwawu chaswayi wanyi, kudiza Bayibolu kunateli kuyikwasha kwikala namuzañalu haya nyaaka. Twalekenuhu kumushindamena Yehova nawa wakayisomwena.

Kuhitulukamu

• Chalala chamuBayibolu chalemenadi kudi enu?

• Munateli kwiluka ñahi “yuma yalema nankashi”?

• Mukulombeladi kudi Yehova nenu ayikwashi kutwalekahu kudiza Bayibolu?

ILUKILENUHU NSAÑU YIKWAWU

Talenu yuma yiwana yinakwashi antu amavulu kuzatisha chiwahi mpinji yawu.

“Ifya Kubomfya Bwino Inshita” (Loleni!, March-April 2014)

Talenu Yehova chakwashiliyi mumbanda wumu wadiña nanfumwindi wabulili kwiluka nindi ñodindi wazatileña nañovu kulonda amuzañaleshi Nzambi.

Yehova Watukoleshaña Kusenda Yiteli Yetu (5:05)

Talenu yuma yayiwahi yamumwekeneni iwu iyala muloña wakuumika kwañodindi.

Nesekeli Chalala (6:30)

Mpinji yikwawu aYinsahu jaYehova ayinkaña nyiloña nawu ambulaña yisaka yawantu. Komana diimu?

“Komana aYinsahu jaYehova Ambulaña Yisaka Tahindi Ayinuñañeshaña Hamu?” (Chibaaba chahaIntaneti)

Wejima wetu kudi yuma yitwafuukulaña. Yuma yitwafuukulaña mwafumaña yuma yayiwahi hela yatama nawa yinateli kuluwañesha wubwambu wetu naYehova hela nehi. Chakutalilahu, tunateli kufuukulahu kwakushakama, chakuwana mali hela kwiñila muwulu. Neyi tufuukula chiwahi tukwikala namuzañalu nawa tukumutiyisha Yehova kuwaha.

1. Munateli kuzatisha ñahi Bayibolu kulonda mufuukuli chiwahi?

Henohu kanda mufuukuli, lombenu wukwashu kudi Yehova nawa sandujolenu muBayibolu kulonda mwiluki chamonañayi yuma hanoyu nsañu. (Tañenu Yishimu 2:3-6.) Munsañu jikwawu, Yehova wahana nshimbi jakulondela. Neyi hadi nshimbi, kwovwahila olu lushimbi dichuma chachiwahi chimwatela kwila.

Mukwila ñahi neyi kwosi lushimbi lwamuBayibolu lunakushimuna chimwatela kwila? Yehova wukuyilombola “munjila yimwatela kwenda.” (Isaya 48:17) Munjilanyi? Kunateli kwikala yishina yinateli kuyikwasha. Yishina yamuBayibolu hichalala chamwekeshaña chatoñojokañayi Nzambi nichatiyañayi. Kakavulu, twelukaña chatiyañayi Nzambi hanoyu nsañu neyi tutaña nsañu yamuBayibolu. Neyi twiluka chatiyañayi Yehova, tukufuukula yuma yikumutiyisha kuwaha.

2. Yumanyi yimwatela kutoñojokahu henohu kanda mufuukuli?

Bayibolu yahoshaña nawu: “Muntu wababala watoñojokaña hachuma chejima chinakukeña kwilayi.” (Yishimu 14:15) Ichi chinayi mukwila nawu henohu kanda tufuukuli, twatela kwikala nampinji yakutoñojoka hayuma yitunakufuukula. Chimukushinshikaña hachuma chejima chimunakufuukula, dihulenu nenu: ‘Yishinanyi yamuBayibolu yahosha haniyi nsañu? Chuma chidihi chinukutondahu chikunkwasha kwikala nakuwunda kwamuyitoñojoka? Chuma chinukufuukula chikuneñesha akwetu tahindi nehi? Sweje-e dinu, komana chikumutiyisha Yehova kuwaha?’—Kuhituluka 32:29.

Yehova wudi nawuswa wakutuleja yuma yayiwahi niyatama. Neyi twiluka nshimbi niyishina yindi nawa tuyizatishaña, tukwikala nachinleji chamuchima chachiwahi. Chinleji chamuchima dichatukwashaña kwaambula yayiwahi niyatama. (ARoma 2:14, 15) Chinleji chadizishewa chiwahi chinateli kutukwasha kufuukula chiwahi.

SANDUJOLENU CHIKUPU

3. Itejenu Bayibolu yiyilomboleña

VIDIYO: Itejenu Yishina yamuBayibolu Yiyilomboleña (5:54)

• Wuswa wakudifuukwila hichumanyi?

• Muloñadi Yehova chatwinkeleliyi wuswa wakudifuukwila?

• Yumanyi yatwinkayi yatukwashaña kuzatisha wuswa wetu wakudifuukwila munjila yayiwahi?

Hakwila mwiluki chekala yishina yamuBayibolu, tañenu AEfwesesa 5:15, 16. Kuhiñahu hanjekenu hachimunateli “[kuzatisha] chiwahi mpinji yenu” kulonda . . .

• mutañeña Bayibolu mpinji yejima.

• mushakameña chiwahi namwinikwenu, mwiikali nvwali wamuwahi hela mwana wamuwahi.

• mupompeña mpinji yejima.

4. Dizishenu chinleji chenu chamuchima kulonda mufuukuleña chiwahi

VIDIYO: “Ikalenuña naChinleji chaMuchima Chachiwahi” (5:13)

• Muniyi vidiyo, yumanyi yelayi muhela hakwila adizishi chinleji chindi chamuchima nikufuukula chuma chikumutiyisha Yehova kuwaha?

Muloñadi chitukubulila kuleja akwetu kutufuukwila yuma yitwatela kufuukula? Tañenu AHeberu 5:14, kuhiñahu hanjekenu hanawa malwihu:

• Hela chakwila chinateli kumwekana neyi chaswayi kuleja akwetu netu atufuukwili, yumanyi yitwatela kwaambula etu aweni?

• Yumanyi yinateli kutukwasha kudizisha chinleji chetu chamuchima kulonda tufuukuleña chiwahi?

5. Lemeshenuña yinleji yamuchima yawakwenu

Antu ejima hiyanateli kufuukula mwomumuku. Tunateli kumwekesha ñahi netu twalemesha yinleji yawakwetu? Talenu iyi yakutalilahu yiyedi:

Chakutalilahu chatachi: Muhela wakeña jakudipentapenta nabuukili muchipompelu mudi ahela abula kukeña jakudipentapenta.

Tañenu ARoma 15:1 ni 1 AKorinda 10:23, 24, kuhiñahu hanjekenu hanawa malwihu:

• Kushindamena hanawa mavasi, chumanyi chatela kwilayi iwu muhela? Munateli kwila ñahi neyi mudi namuntu wudi nachinleji chamuchima chamukaanishaña kwila yuma yetejaña chinleji chenu kwila?

Chakutalilahu chamuchiyedi: Manakwetu weluka nindi Bayibolu hiyakaanisha kunwa walwa wamwesekaku, ilaña wafuukulahu kubula kunwa walwa. Anamutambiki kuchawija nawa namoni amanakwetu anakunwa walwa.

Tañenu Mukwakutañisha 7:16 niARoma 14:1, 10, kuhiñahu hanjekenu hanawa malwihu:

• Kushindamena hanawa mavasi, chumanyi chatela kwilayi iwu manakwetu? Munateli kwila ñahi neyi mumona muntu nakwila yuma yakaanisha chinleji chenu chamuchima kwila?

Yumanyi yinateli kuyikwasha kufuukula chiwahi?

1. Mulombenu Yehova ayikwashi kufuukula yuma yimwatela kwila.—Yakoba 1:5.

2. Sandujolenu muBayibolu nimunyikanda yashindamena haBayibolu kulonda muwani yishina yinateli kuyikwasha. Munatali cheñi kwihula akaKristu apama.

3. Toñojokenu hayuma yikufuma mukufuukula kwenu neyi yikuneñesha chinleji chenu chamuchima niyinleji yawakwenu hela nehi.

YUMA YIMUNADIZI

Twafuukulaña chiwahi neyi twiluka Yehova chatiyañayi hanoyu nsañu nikutoñojoka hayuma yitukwila neyi yikukwasha akwetu hela nehi.

Kuhitulukamu

• Munateli kufuukula ñahi yuma yikumutiyisha Yehova kuwaha?

• Munateli kudizisha ñahi chinleji chenu chamuchima?

• Munateli kulemesha ñahi yinleji yawakwenu?

ILUKILENUHU NSAÑU YIKWAWU

Munateli kufuukula ñahi yuma yikukolesha wubwambu wenu naNzambi?

“Fuukulenuhu Yuma Yamulemeshaña Nzambi” (Kaposhi Kakutalila, April 15, 2011)

Ilukenu chikupu chatukwashañayi Yehova.

Yehova Walombolaña Antu Jindi (9:50)

Talenu yuma yamukwashili iyala wumu kufuukula chiwahi.

Yehova Wahanaña Yuma Yayiwahi (5:46)

Ilukenu chimunateli kumutiyisha Yehova kuwaha neyi hanoyu nsañu yimunakukeña kufuukula hashimunahu nshimbi jakulondelaku.

“Komana Mpinji Yejima Mwakeñaña Hohu Nenu Hekali Lushimbi lwamuBayibolu?” (Kaposhi Kakutalila, December 1, 2003)