Nsañu yasweja kulema yekala muBayibolu hinsañu yahosha haWanta waNzambi. Yehova wakazatisha iwu Wanta kushikija mwafuukwililiyi iseki hatachi. Wanta hichumanyi? Tuneluki ñahi netu wunakuyuula chayinu mpinji? Yumanyi yiwuneli dehi? Nawa yumanyi yiwukela kumbidi? Iku kudiza nikudiza kuyedi kunalondelihu kwakakula awa malwihu.

1. Wanta waNzambi hichumanyi, nawa Mwanta waniwu Wanta hinyi?

Wanta hinfulumendi yashaku Yehova Nzambi. Mwanta waniwu Wanta hiYesu Kristu, wayuulilaña mwiwulu. (Matewu 4:17; Yowanu 18:36) Bayibolu yahosha nawu Yesu: “Wakayuula neyi Mwanta haya nyaaka.” (Luka 1:32, 33) Chineli hiMwanta waWanta waNzambi, Yesu wakayuula antu ejima hamaseki.

2. Anyi akayuula naYesu?

Yesu hayuulaña nkawindiku. Antu “kufuma munyichidi yejima, mumadimi ejima, mudi antu ejima nimunyuza yejima . . . akayuula neyi anyanta hamaseki hejima.” (Chimwekeshu 5:9, 10) Antu añahi akayuula naKristu? Kufuma tuhu hampinji yenjiliyi Yesu hanu hamaseki, akaKristu amavulu anekali akakumulondela. Ilaña antu akushika ku 144,000 hohu diwu ayaña mwiwulu nakuyuula hamu naYesu. (Tañenu Chimwekeshu 14:1-4.) AkaKristu amakwawu hanu hamaseki akekala enimbu aWanta waNzambi.—Masamu 37:29.

3. Wanta waNzambi wabadika ñahi nfulumendi jawantu?

Hela chakwila anyuuli awantu akweseka nawu eli yuma yayiwahi, hiyakweti ñovu yakwila yuma yejima yinakeñiwuku. Mukuhita kwampiji, ayifumishañahu nakusinsishahu anyuuli amakwawu anateli kubula kwikala namuchima wakukwasha antu jawu. Ilaña Nyuuli waWanta waNzambi, Yesu, hiyakamusinsa kudi muntu wacheñiku. Nzambi “[nashiku] wanta wakabula kujilumunawu.” (Danyeli 2:44) Yesu wakayuula iseki dejima nawa hakekala nachaambuku. Wukweti kukeña, luwi niwuñanji nawa wakadizisha antu akamwekesheleña akwawu yilwilu yoyimu, yidi neyi kukeña, luwi niwuñanji.—Tañenu Isaya 11:9.

4. Nfulumendi yañovu yakayuula iseki dejima

Yesu Kristu wukweti ñovu chikupu yakuyuula kubadika anyuuli ejima. Tañenu Matewu 28:18, kuhiñahu hanjekenu hanilu lwihu:

• Indi ñovu yikwetiyi Yesu Kristu yakuyuula yinabadiki ñahi yawanyuuli awantu?

Kakavulu nfulumendi jawantu jahimpikaña nawa nyuuli-hinyuuli wayuulaña hohu chibalu chimu cheseki. Indi Wanta waNzambi? Tañenu Danyeli 7:14, kuhiñahu hanjekenu hanawa malwihu:

• Tukuhosheladi netu chikawaha nankashi chineli Wanta waNzambi “hiyakawujilumunaku”?

• Munakutoñojoka nenu yumanyi yitwakadiluñisha chineli iwu Wanta wakayuulaña iseki dejima?

5. Chiyuulu chawantu akachisinsa

Muloñadi Wanta waNzambi chiwakasinsila nfulumendi jawantu? Vumishenu VIDIYO, kuhiñahu hanjekenu halwihu lunalondelihu.

VIDIYO: Wanta waNzambi Hichumanyi?—Kachibalu (1:41)

• Yumanyi yinafumi muchiyuulu chawantu?

Tañenu Mukwakutañisha 8:9, kuhiñahu hanjekenu hanawa malwihu:

• Munakutoñojoka nenu Wanta waNzambi watela kusinsa nfulumendi jawantu? Muloñadi?

6. Wanta waNzambi wukweti anyuuli atwiluka chiwahi

Chineli Mwanta wetu Yesu wahandilihu neyi muntu, nateli “kutiyisha kuzeyazeya kwetu.” (AHeberu 4:15) A 144,000, amayala niambanda ashinshika akayuula hamu naYesu ayitonda kudi Yehova kufuma “munyichidi yejima, mumadimi ejima, mudi antu ejima nimunyuza yejima.”—Chimwekeshu 5:9.

• Munatiyi ñahi hakwiluka nenu Yesu niejima akayuulaña hamu nindi eluka chekala chihandilu chawantu? Muloñadi?

7. Wanta waNzambi wukweti nshimbi jabadika

Nfulumendi jatuñaña nshimbi jatoñojokañawu nawu jikukwasha nikukiña antu jawu. Wanta waNzambi niwena wukweti nshimbi jatela kulondelawu antu jawu. Tañenu 1 AKorinda 6:9-11, kuhiñahu hanjekenu hanawa malwihu:

• Munakutoñojoka nenu yuma yakekala ñahi mukaayi neyi antu ejima atachika kulondela nshimbi jaNzambi?a

• Munakutoñojoka nenu Yehova wukweti wuswa wakuleja antu amuniwu Wanta kwovwahila nshimbi? Muloñadi?

• Chumanyi chinakumwekesha nawu antu abulaña kwovwahila iji nshimbi anateli kuhimpa?—Talenu vasi 11.

YUMA YIMUNADIZI

Wanta waNzambi hinfulumendi yalala yekala mwiwulu yakayuula iseki dejima.

Kuhitulukamu

• Anyi anyuuli aWanta waNzambi?

• Wanta waNzambi wunabadiki ñahi nfulumendi jawantu jejima?

• Yumanyi yakeñañayi Yehova nindi antu amuniwu Wanta eleña?

ILUKILENUHU NSAÑU YIKWAWU

Talenu chashimwiniyi Yesu kwekala iwu Wanta.

“Komana Wanta waNzambi Wekala muMuchima Wenu?” (Chibaaba chahaIntaneti)

Muloñadi aYinsahu jaYehova chovwahilañawu nankashi Wanta waNzambi kubadika chiyuulu chawantu?

Adihanini Kwovwahila Wanta waNzambi (1:43)

Talenu Bayibolu chiyalumbulula hadi a 144,000 atondañayi Yehova kuyuula hamu naKristu.

“Anyi Ayaña Mwiwulu?” (Chibaaba chahaIntaneti)

Chumanyi chamukwashili mumbanda wadiña mukaleya kwiluka nindi Wanta waNzambi hohu diwakawahisha yuma mukaayi?

“Ifyo Cali pa Kuti Njishibe Icalenga mu Calo Mube Ulufyengo” (Loleni!, November 2011)

Wanta waNzambi watachika dehi kuyuula. Katataka wuhimpi yuma yayivulu hanu heseki. Tuhanjekenu hayuma yayiwahi yimukutalilaña yakekala muchiyuulu chaWanta waNzambi.

1. Wanta waNzambi wakafuntisha ñahi kuwunda niwuñanji hamaseki?

Yesu, Mwanta waWanta waNzambi wakajilumuna antu atama nijinfulumendi hanjita yaAmagedoni. (Chimwekeshu 16:14, 16) Hanoyu mpinji, ichi chikaninu chamuBayibolu chikashikijewa chikupu chahosha nawu: “Hakushimbula hohu chanti, antu atama hiyakekalaku nawa cheñiku.” (Masamu 37:10) Yesu wakazatisha iwu Wanta kulonda akaleti kuwunda nikwolola yuma heseki dejima.—Tañenu Isaya 11:4.

2. Antu akashakamaña ñahi neyi nkeñelu yaNzambi anayili dehi heseki?

Muchiyuulu chaWanta waNzambi, “aloña akaswana iseki, nawa akashakamahu haya nyaaka.” (Masamu 37:29) Fwikijenu munakushakama mukaayi mudi hohu antu aloña nawa amukeña Yehova niakwawu! Kwosi muntu wakakataña nawa antu ejima akashakamaña haya nyaaka.

3. Yumanyi yakela Wanta waNzambi neyi antu atama anayijilumuni dehi?

Neyi antu atama anayijilumuni dehi, Yesu wakayuula neyi Mwanta hadi yaaka 1,000. Munoyu mpinji, yena nia 144,000 akayuulaña hamu nindi akakwasha antu hamaseki akekali awanina nawa akadi nshidi. Hakumana kwanoyu mpinji, iseki akadibalumuna nakwikala paradisa yayiwahi nawa antu ejima akekala namuzañalu muloña akwovwahilaña nshimbi jaYehova. Kuhiñahu, Yesu wakafuntisha Wanta kudi Tata yindi, Yehova. Haniyi mpinji ‘ijina daYehova akadijilika chikupu.’ (Matewu 6:9, 10) Chumichi chakamwekesha nawu Yehova hinyuuli wamuwahi wakamenaña antu jindi. Nkumininaku, Yehova wakamujilumuna Satana, andemoni, niantu ejima akadikañaña nachiyuulu chindi. (Chimwekeshu 20:7-10) Yuma yayiwahi yakela Wanta waNzambi yakatwalekahu haya nyaaka.

SANDUJOLENU CHIKUPU

4. Wanta waNzambi wakafumishahu nfulumendi jawantu

‘Muntu nakuyuula mukwawu muntu kulonda amukatishi.’ (Mukwakutañisha 8:9) Yehova wakazatisha Wanta windi kulonda akafumishihu ichi chuma chatama.

Tañenu Daniel 2:44 ni 2 ATesalonika 1:6-8, kuhiñahu hanjekenu hanawa malwihu:

• Nfulumendi jawantu niantu ajikwashaña akayila ñahi kudi Yehova niMwanindi, Yesu?

• Yuma yimunadizi hadi Yehova niYesu yinayikwashi ñahi kukuhwelela nenu yuma yakelawu yakawaha nawa yakakwasha antu?

5. Yesu hiMwanta wamuwahi chikupu

Chineli Yesu hiMwanta waWanta waNzambi, wakela yuma yayivulu yakakwasha antu hamaseki. Vumishenu VIDIYO kulonda mumoni Yesu chinamwekeshiyi dehi nindi nakufwila nawa wukweti ñovu yamwinkawu kudi Nzambi yakukwasha antu.

Yesu Wamwekesheli Yuma Yakela Wanta (1:13)

Hampinji yadiñayi Yesu hamaseki, wamwekesheli yuma yakela Wanta. Yumanyi yayiwahi yinashimuniwu aha yimunakutalila? Tañenu iji nsona jatukwashaña kwiluka nsañu yayivulu haniyi yuma.

6. Wanta waNzambi wakaleta chihandilu chachiwahi

VIDIYO: Yuma Yantesha Yinakumwekesha Yuma Yayiwahi Yikekala Kumbidi (4:38)

Tañenu Masamu 145:16, kuhiñahu hanjekenu hanilu lwihu:

• Munatiyi ñahi chimuneluki nenu Yehova “wakekutisha yuma yejima yayumi nayuma yakeñañawu”?

YUMA YIMUNADIZI

Wanta waNzambi wakela yuma yakeñañayi Nzambi nindi wili. Wakabalumuna iseki dejima kwikala paradisa mwakekala antu amawahi akadifukulaña kudi Yehova haya nyaaka.

Kuhitulukamu

• Wanta waNzambi wakajilika ñahi ijina daYehova?

• Muloñadi chitwatela kukuhwelela netu Wanta waNzambi wakela yuma yakanawu muBayibolu?

• Hakachi kayuma yakakoña Wanta, yumanyi yimwatalilaña chikupu?

ILUKILENUHU NSAÑU YIKWAWU

Ilukenu mwatalisha Amagedoni.

“Njita yaAmagedoni hiChumanyi?” (Chibaaba chahaIntaneti)

Talenu yuma yikamwekana mumpinji yatenañawu nawu “lukadi lwasweja.”—Matewu 24:21.

“Lukadi Lwasweja hiChumanyi?” (Chibaaba chahaIntaneti)

Talenu yisaka chiyinateli kufwikija adi hamu muParadisa.

Difwijikenu Mudi muParadisa (1:50)

Muchibaaba chinakwila nawu “Nadiña Namalwihu Amavulu Inabulili Kwiluka Ñakwilu,” talenu muntu wadikañileña nanfulumendi chawaniniyi ñakwilu jakeñeleñayi.

“Bayibolu Yahimpaña Yihandilu yaWantu” (Kaposhi Kakutalila, January 1, 2012)