KUDIZA 09
Swinenu Kwakwihi naNzambi muKulomba
Komana mwatiyahu dehi nenu munakukeña wakuyilombola muchihandilu? Komana mudi namalwihu alema imunakukeña kwiluka ñakwilu? Komana munakukeña kuyikundeja hela kuyikolesha? Mukukeña kuswina kwakwihi naYehova? Kulomba kunateli kuyikwasha muyuma yejimiyi. Njilanyi yayiwahi yakulombelamu? Komana Nzambi watiyaña kulomba kwejima? Yumanyi yimwatela kwila hakwila atiyeña kulomba kwenu? Tuhanjekenuhu.
1. Twatela kulomba kudinyi nawa yumanyi yitwatela kulomba?
Yesu washimwini nindi twatela kulomba hohu kudi Tata yetu wamwiwulu. Yesu niyena walombeleña kudi Yehova. Wahosheli nindi: “Dichi mwatela kulomba nenu: ‘Tata yetu wekala mumawulu . . . ’” (Matewu 6:9) Neyi tulomba kudi Yehova, twakoleshaña wubwambu wetu nayena.
Twatela kulomba yuma yejima yitunakukeña. Ilaña, hakwila Nzambi akuli kulomba kwetu, twatela kulomba kwesekeja nankeñelu yindi. “Chuma chejima chitukulomba kwesekeja nankeñelu [yaNzambi], watutiyaña.” (1 Yowanu 5:14) Yesu washimwini yuma yitwatela kulomba. (Tañenu Matewu 6:9-13.) Twatela cheñi kumulomba Nzambi hayuma yinakutwakamisha, kushilahu nikumusakilila hayuma yayiwahi yinatwililiyi nikumulomba netu yakwashi antu amakwawu.
2. Twatela kulomba ñahi?
Bayibolu yatulejaña ‘kuhuñununa nyichima yetu kudi Nzambi.’ (Isamu 62:8) Dichi kulomba kwetu kwatela kwikala kwakufuma hamuchima. Tunateli kulomba nezu dahewulu hela mumuchima. Tunateli kulomba iku tunafukami, tunemani hela tunashakami chakala hohu tunakulomba kudi Yehova munjila yakalemesha. Tunateli kulomba mpinji yidi yejima nawa kwejima kutudi.
3. Nzambi wakulaña ñahi kulomba kwetu?
Wakulaña munjila jashiyashana. Yehova watwinka Izu dindi, Bayibolu, mutwawanaña ñakwilu yamalwihu etu. Kutaña Izu daNzambi “[kukumukwasha] muntu wabula maana kwikala namaana.” (Isamu 19:7; tañenu Yakoba 1:5.) Wukutwinka kuwunda kwamuyitoñojoka neyi tunakumona kukala. Nawa nateli kuzatisha ambuñindi kutukwasha neyi tunakukeña wukwashu.
SANDUJOLENU CHIKUPU
Talenu chimunateli kulomba chakufuma hamuchima munjila yikumutiyisha Nzambi kuwaha nawa ilukenu kulomba chikunateli kuyikwasha.
4. Chakeñañayi Nzambi nindi tulombeña
Yumanyi yikuletesha kulomba kwetu akwiteji kudi Nzambi hela nehi? Vimishenu VIDIYO.
Yehova wakeñaña nindi tulombeña kudi yena. Tañenu Masamu 65:2, kuhiñahu hanjekenu hanawa malwihu:
Munakutoñojoka nenu “Mukakutiya kulomba” nakukeña nindi mulombeña kudi yena? Muloñadi?
Neyi tunakukeña netu atiyeña kulomba kwetu twatela kwilaña yuma kwesekeja nanshimbi jaNzambi. Tañenu Mika 3:4 ni 1 Petulu 3:12, kuhiñahu hanjekenu hanilu lwihu:
Twatela kwiladi hakwila Yehova atiyi kulomba kwetu?
Mumpinji yanjita, mazanvu ejima ayedi anakulomba kulonda ashindi. Komana Nzambi nateli kwakula kulomba kwamuchidiwu?
5. Kulomba kwetu kwatela kwikala kwakufuma hamuchima
Antu amakwawu ayidizishaña nawu atela kufuntisha-funtishañahu mazu wowamu mukulomba. Komana dichakeñañayi Nzambi nindi tulombeña kudi yena? Tañenu Matewu 6:7, kuhiñahu hanjekenu hanilu lwihu:
Munateli kutondolwela ñahi ‘kufuntisha-funtishahu mazu wowamu’ mukulomba kwenu?
Ifuku niifuku, toñojokenuña hachuma chachiwahi chinayililiyi Yehova nawa musakililenu. Neyi mwilaña mwenimu hefuku-hefuku mumulungu, mukulombaña hayuma yashiyashana 7 chakadi kufuntisha-funtishahu.
Tata yawantu wamuwahi nakukeña mwanindi amuleji chakufuma hamuchima chinakutiyayi. Munjila yoyimu, Yehova nakukeña nindi tulombeña kudi yena chakufuma hamuchima
6. Kulomba hichawaana chatwinkayi Nzambi
Kulomba kunateli kutukwasha ñahi sweje-e mumpinji yakala? Vumishenu VIDIYO.
Bayibolu yatukana nawu kulomba kunateli kutukwasha kwikala nakuwunda kwamuyitoñojoka. Tañenu AFwilipi 4:6, 7, kuhiñahu hanjekenu hanawa malwihu:
Hela chakwila kulomba hikwamanishaña kukala kwetu mpinji yejimaku, hanu kwatukwashaña ñahi?
Yumanyi yimwatela kulomba?
Komana mweluka?
Izu dakwila nawu “ameni” datalisha mukwila nawu “chiikali momwenomu” hela “diimu.” Kufuma tuhu kunyima, “ameni” ayihoshaña kumakumishilu akulomba.—1 Kushindulula 16:36.
7. Ikalenuña nampinji yakulomba
Mpinji yikwawu tunateli kwikala nanyidimu yayivulu chakwila tujimbala nikulomba. Yesu wamwekesheli ñahi nindi walemesheli kulomba? Tañenu Matewu 14:23 niMaku 1:35, kuhiñahu hanjekenu hanawa malwihu:
Yesu welileña ñahi hakwila ekaleña nampinji yakulomba?
Mpinjinyi yimunateli kulomba?
AMAKWAWU AHOSHAÑA NAWU: “Kulomba hikumanisha hohu mpinji, muloña kwosi watiyaña.”
Indi enu mukuhoshahu nenudi?
YUMA YIMUNADIZI
Kulomba kwakufuma hamuchima kwatuswijaña kwakwihi naNzambi, kwatwinkaña kuwunda kwamuyitoñojoka nawa kwatwinkaña ñovu yitwakeñaña hakwila tumutiyisheña Yehova kuwaha.
Kuhitulukamu
Twatela kulomba kudinyi?
Twatela kulomba ñahi?
Kulomba kwatukwashaña ñahi?
ILUKILENUHU NSAÑU YIKWAWU
Wanenu ñakwilu yamalwihu avula kwihulawu antu kutalisha hakulomba.
“Yuma 7 Yimwatela Kwiluka Kutalisha haKulomba” (Kaposhi Kakutalila, January 1, 2011)
Ilukenu chalemena kulomba nichimunateli kuwahisha kulomba kwenu.
Talenu Bayibolu chiyashimuna muntu itwatela kulombaku.
“Komana Natela Kulomba Kudi Muntu Wafwa Dehi?” (Chibaaba chahaIntaneti)
Muniyi vidiyo yatumina, talenu chichalema kulomba mpinji yejima hela kwejima kutudi.