Malwihu Kufuma Kudi Antañi

Anyi adiña atupokola awaYudeya hatembeli? Nawa nyidimwinyi yazatileñawu?

Mudimu wumu weneni wazatileñawu abulili kwikala atuprisitu amumutaña waLevi wadiña wawukapokola. Iwu mudimu awilombweleña kudi kapitawu wahatembeli. Philo nsoneki kaYudeya walumbulwili nyidimu yazatileñawu atulama nindi: “Amakwawu [Alevi] emeneña hayiisu neyi atulama akuyiisu yahawiñililu, amakwawu mukachi [mwiluña damutembeli] kumbidi yamalaala indi kulonda akañeshi muntu wabula kutelela kwiñila, chili nachifukuli hela nehi. Amakwawu adiña nakunyeñumoka nakudihimpashana nawufuku nimwaana kuhitila mukutiyashana kulonda ahembe tembeli.”

Awa atupokola ayizatishileña nikudi akaSanihedilini. Idi izanvu dawatupokola dawaYudeya didetejeliwu hohu kwenda nayitwa kudi aRoma.

Joachim Jeremias muntu wadiza wahosheli nindi, “Mazu ahosheliyi Yesu hefuku damukwatiliwu nindi, hefuku-hefuku wadiña mutembeli nakutañisha nawa hiyamukwatiliku (Mat. 26:55), amwekeshaña nawu enjili nakumukwata adiña atupokola ahaTembeli.” Nsoneki yowumu welukili nindi ana atemesheliwu nakumukwata Yesu hatachi niwena adiña atupokola ahatembeli. (Yow. 7:32, 45, 46) Atulama niatupitawu twawu ayitemesheli kuya nakuleta atumbanji twaYesu kudi akwaSanihedilini, hadaha diwu amufumishili kapostolu Pawulu mutembeli cheñi.—Yilw. 4:1-3; 5:17-27; 21:27-30.