Enu Amayala, Komana Mwovwahilaña wuMutu waKristu?

‘Mutu weyala diyi Kristu.’—1 KOR. 11:3.

1. Chumanyi chamwekeshaña nawu Yehova hiNzambi wakuluwañeshaku?

MUKANDA waChimwekeshu 4:11 wahosha nawu, ‘Eyi Yehova, eyi Nzambi yetu, wunateli kutambula kulema nimpuhu niñovu, muloña yeyi waleñeli yuma yejima, nawa muloña wankeñelu yeyi dichi chiyekalilaku, dichayileñeleluwu.’ Hamuloña wakuleña yuma yejima, Yehova Nzambi diyi Wabadika Mukuleña kwejima nawa diyi wayulaña yileñaleña yindi yejima. Chineli Yehova “hiNzambi wakuluwañeshaku, hiNzambi wakuwunda,” iwu wunsahu wamwekenaña munjila yatanjikilamu chisaka chindi chawañelu.”—1 Kor. 14:33; Isa. 6:1-3; Heb. 12:22, 23.

2, 3. (a) Hinyi wasambililiyi Yehova kuleña? (b) Chifulu chamuchidinyi chikwetiyi Mwana wawedi kutalisha kudi Tata yindi?

² Henohu yuma yejima kanda ayileñi, Nzambi wadiña kwoku. Chileñaleña chasambililiyi kuleña chadiñi chakuspiritu chatenañawu nawu “Izu” muloña wadiña Mukwakumuhoshelaku Yehova. Iwu Izu diyi azatishiluwu hakuleña yuma yejima. Kufumahu, wenjili hamaseki neyi muntu wawanina nakwikala Yesu Kristu.—Tañenu Yowanu 1:1-3, 14.

³ Indi Nsona yahosha nawudi kutalisha hachifulu chaNzambi nichaMwanindi wawedi? Kapostolu Pawulu onenenuwu, wasonekeli nakutuleja nindi: “Nakeñi mwiluki, mutu weyala diyi Kristu; mutu wamumbanda diyi iyala; mutu waKristu diyi Nzambi.” (1 Kor. 11:3) Mutu waKristu hiTata yindi. Hakwila nawu yileñaleña yikweti maana yishakami chiwahi mukuwunda, chakeñekaña wumutu nikwovwahila. Hela tuhu yena “mwaleñeleluwu yuma yejima” niyena watela kwovwahila Nzambi, mutu windi.—Kol. 1:16.

4, 5. Indi Yesu wamweneña ñahi chifulu chamwinkeluwu kudi Yehova?

⁴ Indi Yesu wamweneña ñahi nsañu yakwovwahila mutu windi Yehova, nikwinza hanu hamaseki? Nsona yahosha nawu: “Kristu Yesu. . . . yena wekala mwomwekalilayi Nzambi, watoñojokeli nindi kubwambuka naNzambi hichuma chakuhukulaku, ilaña wadibalumwini kwikala wakadi kulema, hakwikala mwekalila nduñu, hakwikala chaduwu antu. Chamumwenuwu himuntu, hakudizoza, hakwovwahilaña ho-o, ndo nikukufwa, eña kwokufwa [kwahamutondu wakuyandishila].”—Fwi. 2:5-8.

⁵ Mpinji yejima, Yesu wovwahilileña mwaya muchima waTata yindi. Wahosheli nindi: ‘Ami hinukutwesha kwila chuma chakanka wami hela chimuku. . . . Kusompesha kwami kwaloña; muloña hinalondaña muchima wamami awenuku, chiña muchima waTata wantemesheli.’ (Yow. 5:30) Wahosheli cheñi nindi: “Nelaña yuma yamutiyishaña [Tata yami] kuwaha mafuku ejima.” (Yow. 8:29) Kukamwihi nakukumisha chihandilu chindi hamaseki, Yesu walombeli kudi Tata yindi nindi: “Ami nakulemeshi hamaseki, namanishi dehi mudimu wanyinkeli kwila.” (Yow. 17:4) Mwamweni, Yesu hamweneña kukala kumwovwahila Nzambi neyi mutu winduku.

Yesu Wahetelelumu muKumwovwahila Tata Yindi

6. Yililwinyi yayiwahi yamwekesheleñayi Yesu?

⁶ Hampinji yadiñayi hamaseki, Yesu wamwekesheli yililu yayiwahi. Hakachi kaniyi yililu, wamwekesheli chililu chakusweja kumukeña Tata yindi. Wahosheli nindi: ‘Namukeña Tata.’ (Yow. 14:31) Cheñi wakeñeli antu nankashi. (Tañenu Matewu 22:35-40.) Yesu wadiñi namuchima wawuwahi wakutoñojokelaku antu, hadiñi wazuwa nawa hatwikileña antu yisendaku. Wahosheli nindi: “Inzenu kudami enu ejima mudi nakukabakana, mwasenda yalema, ami nukuyinookesha. Ditwikenu mpanda yami, mudizili kudami muloña ami nawunda, nadizoza mumuchima, ninenu mukumona kunooka munyichima yenu. Muloña mpanda yami yaswayi, nichisenda chami chapepela.” (Mat. 11:28-30) Antu ejima amwovu, sweje-e ana akabishileñawu, aheteleli muyililu yamwekesheleñayi Yesu nimumazu amawahi ahosheleñayi.

7, 8. Kwesekeja naNshimbi, indi mumbanda wapwekeleña mashi amukaanishili kwiladi, ilaña Yesu wamukwashili ñahi?

⁷ Toñojokenu Yesu chadiña nakumonayi ambanda. Kufuma tuhu kushankulu, amayala amavulu akabishaña ambanda nankashi. Dichelileñawu anlomboli amuIsarela wakushankulu. Ilaña Yesu walemesheleña ambanda. Chumichi chamwekenaña munjila yakwashililiyi mumbanda wakatili musoñu wakupweka mashi hadi yaaka 12. ‘Wamweni kukala kwakuvulu’ kudi ayimbuki nawa wamanishili yuma yindi yejima to-o. Hela chakwila wazatili hakumina ñovu jindi, yikatu ‘yaswejeleluku.’ Kwesekeja nanshimbi, mumbanda yeniwu wadiñi wamajilu. Muntu wukumukunka niyena wukwikala wamajilu.—Lev. 15:19, 25.

⁸ Iwu mumbanda chatiyiliyi nawu Yesu nakuuka akata, wayili hezaza damunyeñumukili Yesu, nakuhosha nindi: “Neyi nukukumina dakukunka kumahinindi nukukola.” Wamukunkili Yesu nawa hohenohu yakola nikukola. Yesu welukili nindi ona mumbanda hateleleli kukunka kwihina dinduku. Hela chochu, hamuzuwililuku. Ilaña, wamutiyilili luwi. Welukili nindi wakabakeni nayikatu hadi yaaka yayivulu nawa wamweni nindi wakeñeleña muntu wakumukwasha. Yesu wamutiyilili luwi nakumuleja nindi: “Kukuhwelela kweyi kunakukoleshi dehi; yaña nakuwunda, musoñu weyi wukufumi.”—Maku 5:25-34.

9. Chiyesekeli atumbanji twaYesu kulekesha anyana anyanya kwinza kudi yena, wahosheli nindidi?

⁹ Anyana anyanya niwena adiña akasunuka kuya kudi Yesu. Mpinji yimu antu chamuleteleluwu Yesu anyana anyanya, atumbanji twindi ayihosholeli, muloña atoñojokeleña nawu Yesu hakeñeleña kumukabisha kudi anyana anyanyaku. Ilaña Yesu hatoñojokeleña mwenimuku. Nsona yatulejaña nawu: “Yesu chanachimoniyi hakutiya kutama nankashi, hakuyila [atumbanji twindi] nindi, Itejenu anyana anyanya kwinza kudami, bayi muyilekeshaku, muloña wanta waNzambi wawena adi chochichi.” Kuhiñahu, “hakuyakata mumakasindi, hakuyikiswila nkisu, hakuyinañika.” Yesu hayitejeli hohu anyana anyanyaku; cheñi wayikeñeli chikupu.—Maku 10:13-16.

10. Indi Yesu wekalili ñahi nayililu yamwekesheleñayi?

¹⁰ Indi Yesu wekalili ñahi nayililu yamwekesheleñayi hampinji yadiñayi hamaseki? Henohu Yesu kanda yenzi hamaseki, washakamini naTata yindi hadi mpinji yayilehi nawa wadizili yuma yayivulu kudi Tata yindi. (Tañenu Yishimu 8:22, 23, 30.) Chadiñayi mwiwulu, Yesu wamweneña Yehova chazatishileñayi wumutu windi munjila yayiwahi kuyileñaleña Yindi yejima nawa niyena welili momumu. Neyi Yesu hadiñi wovwahilaku, komana wadi kutwesha kwikala nayililu yeniyi? Watiyileña kuwaha kumwovwahila Tata yindi, nawa Yehova wazañaleli hakwikala naMwana wamuchidiwu. Hampinji yadiñayi Yesu hamaseki, wamwekesheli yililu yayiwahi yaTata yindi wamwiwulu. Kwenoku kukooleka kutukweti kwakumwovwahila Kristu, Nyuli yaWanta wamwiwulu atondawu kudi Nzambi!

Imbujolenu Yililu yaKristu

11. (a) Hinyi itwatela kufwila kwimbujola? (b) Muloñadi amayala muchipompelu chatela kufwilawu kumwimbujola Yesu?

¹¹ Antu ejima muchipompelu chawakwaKristu, sweje-e amayala, atela kutwalekahu kuzata nañovu kulonda embujoleña yililu yaKristu. Neyi chitunadizi, Bayibolu yahosha nawu: “Mutu weyala diyi Kristu.” Neyi Kristu chembujoleliyi Mutu windi, Nzambi walala, amayala akwaKristu niwena atela kuzata nañovu kulonda embujoleña mutu wawu, Kristu. Kapostolu Pawulu chekaliliyi mukwaKristu, wembujolileña Kristu. Wakolesheli akwawu akwaKristu nindi: “Ikalenu akwakuñimbujola ami, neyi chinelaña ami nawa nembujolaña Kristu.” (1 Kor. 11:1) Nawa kapostolu Petulu wahosheli nindi: “Dichi chayitambikililuwu, muloña Kristu niyena wayimweneni yihuñu, wayishiyilili chuma chakutalilahu, kulonda mwendi mumahaji indi.” (1 Pet. 2:21) Kudi chuma chikwawu chikuleñela amayala kukeña kwimbujola Kristu kwesekeja nakufumba kweniku. Muloña amayala diwu ekalaña aeluda niankoñi akuzatila. Neyi chazañaleliyi Yesu hakumwimbujola Yehova, amayala akwaKristu niwena atela kuzañalala hakumwimbujola Kristu niyililu yindi.

12, 13. Indi aeluda atela kwakamenaña ñahi nyikoku yayinkawu kuhemba?

¹² Aeluda muchipompelu chawakwaKristu ayikonkomwena kwikala neyi Kristu. Petulu wakolesheli akulumpi hela aeluda nindi: “Biñenu mukanka wanyikoku yaNzambi wudi mukachi kenu, nakuyitala; bayi chakukanjikijaku, chiña nakutiya kuwaha mwaya muchima waNzambi; bayi nakulonda kuheta kwatamaku, chiña namuchima wakukeñamu; bayi nakwikala anyanta anawa ayishililuwu kuhembaku, chiña nakwikala akutalilahu anyikoku.” (1 Pet. 5:1-3) Aeluda akwaKristu bayi ayandishaña nyikoku hela kubula kuyisha maanaku. Hakwimbujola chakutalilahu chaKristu, atela kumwekesha kukeña, kudikehesha, nikwikala naluwi hakwakamena anyikoku ayinkawu kuhemba.

¹³ Antu alombolaña muchipompelu hiyawaninaku, nawa mpinji yejima atela kwanukaña chumichi. (Rom. 3:23) Dichi atela kumwiluka Yesu chikupu nikwimbujola kukeña kwindi. Atela kutoñojoka chikupu hadi Nzambi niKristu chakamenañawu antu, nikufwila kuyimbujola. Petulu watukolesha nindi: “Wejima wenu dikumbakeshenu kudizoza, kulonda mukalakeli akwenu; muloña Nzambi wadikañaña nawakwakudinka wanta, hakwila akwakudizoza wayinkaña luwi.”—1 Pet. 5:5.

14. Aeluda atela kulemesha ñahi akwawu?

¹⁴ Amayala atondewa muchipompelu atela kumwekesha yililu yayiwahi hakwakamena nyikoku yaNzambi. Mukanda waAroma 12:10 wahosha nawu: “Keñañanenu nawana kwenu nawushona; itejenu mwinenu abadiki kulema.” Aeluda niankoñi akuzatila alemeshaña antu. Kufwana akwaKristu ejima, amayala wenawa ‘hiyatela kwila chuma chakuzuña hela chakudinka wantaku; chiña atoñojokaña yakudizoza, iwu atoñojoki mukwawu, nindi wambadikami kuwaha.’ (Fwi. 2:3) Antu alombolaña atela kumona akwawu nawu ayibadika. Neyi amayala atondewa akwilaña mwenimu, akulondelaña kufumba kwaPawulu kwakwila nawu: “Ichi dinu, etu twakola twadi kusenda kuzeyazeya kwawantu abula ñovu, bayi kuditiyisha etu aweni kuwahaku. Tutiyishenu akwetu kuwaha wejima wetu hamuntu hamuntu; tulondenu yuma yayiwahi yakukwasha akwetu. Muloña Kristu haditiyishili yomweni kuwahaku.”—Rom. 15:1-3.

‘Lemeshenuña Añodijenu’

15. Indi amayala atela kwakamena ñahi añodijawu?

¹⁵ Ichi dinu shinshikenu chafumbiliyi Petulu amayala asumbula. Wasonekeli nindi: “Mwomumu ninenu amayala, shakamenu nawañodi jenu mwaya maana, nakulemesha mumbanda nenu diyi wakuminamu ñovu.” (1 Pet. 3:7) Kulemesha muntu kwalumbuluka kumwinka kavumbi chikupu. Dikwila nawu, mukutiyililaña munakuhoshayi, nikumwinka yuma yinakaankiliyi niyinakukeñayi nawa mwatela kumwovwahila chiña hohu neyi kudi chuma cheneni chikuleñela mubuli kumwovwahila. Ichi dichatela kwilayi iyala nañodindi.

16. Indi Izu daNzambi dasoñamishaña ñahi amayala kutalisha hakulemesha añodijawu?

¹⁶ Hakuleja amayala kulemesha añodijawu, Petulu wayisoñamishili nindi: “Kulonda mubuli kukañesha kulomba kwenu.” (1 Pet. 3:7) Iyi nsañu yinamwekeshi chalemeshayi Yehova njila mwahembelañayi iyala ñodindi. Neyi yakañanya kulemesha ñodindi wukukañesha kulomba kwindi. Kubombelahu, ambanda azañalalaña chikupu neyi ayilemeshaña kudi amfumujawu.

17. Indi iyala watela kukeña iñodindi nakushika hadihi?

¹⁷ Hansañu yakukeña ñodenu, Izu daNzambi datufumbaña nawu: “Amayala niwena akeñi añodi jawu aweni neyi chakeñawu nyijimba yawu. . . . Muloña hikwekala muntu wakwatahu dehi nkunyi namujimba windi yomwenuku, wawudiishaña nikuwuhemba, chochelañayi Kristu nachipompelu nawa. . . . Keñenu añodi jenu, iwu nakukeña windi, iwu nakukeña windi, neyi chimwadikeñaña enu aweni.” (Efwes. 5:28, 29, 33) Indi amayala atela kukeña añodijawu kushika hadihi? Pawulu wasonekeli nindi: “Enu amayala, keñenu añodi jenu neyi chakeñeliyi Kristu chipompelu, hakudihanahu yomweni kuchikoola.” (Efwes. 5:25) Eñañi, iyala watela kuhana wumi windi kukoola ñodindi, neyi Kristu chahaniniyi wumi windi kukoola antu. Neyi iyala mukwaKristu wukuhembaña ñodindi chiwahi, nakumwakamena, nikumutoñojokelaku, nikutiya munakuhoshayi, namuchima wejima, chikumupelela ñodindi kwovwahila wumutu windi.

18. Wukwashinyi wukwetuwu amayala wukuyikwashaña kuzata nyidimu yawu yamumaluwi?

¹⁸ Neyi amayala alemeshaña añodijawu muniyi njila komana himudimu wasweja kutoha? Inehi, Yehova hanateli kuyinka mudimu wabadika muñovu jawuku. Kubombelahu, akwakudifukula aYehova akweti kukooleka kwakuzatisha ñovu yabadika muyuma yejima—spiritu yajila yaNzambi. Yesu wahosheli nindi: ‘Neyi enu atama muneluki kwinka anyanenu yamukunkulu yayiwahi, Tata yenu wamwiwulu wukubadika kuyinka awa akumulomba spiritu yajila.’ (Luka 11:13) Mukulomba kwawu, amayala atela kulomba nawu kuhitila mudi spiritu yindi, Yehova wukuyikwashaña kwakamena antu, kushilahu niañodijawu.—Tañenu Yililu 5:32.

19. Indi chibaaba chinalondeluhu chinakuhosha hachumanyi?

¹⁹ Mwamweni, amayala akweti mudimu weneni chikupu wakudiza chakwovwahila Kristu nikwimbujola wumutu windi. Indi ambanda, sweje-e asumbuka? Chibaaba chinahiñuhu chinakuhosha hadi ambanda chatela kumonawu mudimu wawu mukuloñesha kwaYehova.

Muloñadi Ambanda Chatela Kwovwahilawu wuMutu?

‘Mutu wamumbanda diyi iyala.’—1 KOR. 11:3.

1, 2. (a) Yumanyi yasonekeli kapostolu Pawulu kutalisha hakuloñesha kwaYehova kwawumutu nikwovwahila? (b) Malwihwinyi itukuhanjekahu muchinu chibaaba?

YEHOVA watanjika njila yayiwahi yateneniyi kapostolu Pawulu hasonekeliyi nindi “mutu weyala diyi Kristu” nawa “mutu waKristu diyi Nzambi.” (1 Kor. 11:3) Chibaaba chinafumuhu chahosha nawu Yesu wazañaleleña hakwovwahila Mutu windi, Yehova Nzambi, nawa nawu Kristu diyi mutu wawamayala akwaKristu. Kristu wadiña naluwi, wovwahila nawa hadiñi nachaambu nawantuku. Amayala muchipompelu atela kwikala nayililu yaKristu yakwakamena antu, sweje-e añodijawu.

² Indi ambanda atela kwikala nayililu yamuchidinyi? Indi mutu wawu hinyi? Pawulu wasonekeli nindi: “Mutu wamumbanda diyi iyala.” Indi ambanda atela kumona ñahi awa mazu onenewa? Komana ilu lushimbi lwakundama nikudi amayala abula kwitiya? Komana kwovwahila wumutu weyala chatalisha mukwila nawu mumbanda watela kwikala neyi kamama neyi kudi nsañu yinakufuukulawu mumaluwi? Chumanyi chatela kwilayi mumbanda hakwila nawu amuhameki?

“Nukumwilila Nkwashi”

3, 4. Muloñadi ntanjikilu yawumutu mumaluwi chiyawahila?

³ Nzambi diyi watondeli muntu watela kwikala mutu muchisaka. Chelili naleñi dehi Adama, Yehova Nzambi wahosheli nindi: “Hichinawahi iyala kushakama kanka winduku; nukumwilila nkwashi wamutelela.” Chamuleñeluwu Evu, Adama watiyili kuwaha hakwikala namulundanindi nawa nkwashi chakwila wahosheli nindi: “Iwu neli dehi ifwaha dami, neli dehi mujimba wami.” (Kutach. 2:18-24) Adama niEvu adiña nakukooleka kweneni kwakwikala anvwali jawantu ejima awanina, nakushakama muparadisa hamaseki namuzañalu nawa haya nyaka.

⁴ Hamuloña wakudikaña kwawanvwali jetu atachi, chihandilu chachiwahi mwitempa daEdeni chamanini. (Tañenu Aroma 5:12.) Ilaña, ntanjikilu yawumutu yatwalekeluhu. Neyi eyala namumbanda alondela iyi ntanjikilu, akwikala namuzañalu mumaluwi. Chikufumamu akutiya neyi chatiyileñayi Yesu hampinji yovwahililiyi Mutu windi, Yehova. Henohu kanda yenzi hamaseki, Yesu ‘wamutiyishileña [Yehova] kuwaha hefuku hefuku.’ (Yish. 8:30) Hamuloña wakubula kuwanina, amayala akañanyaña kwikala nyitu yawanina, ambanda niwena akañanyaña kwovwahila chikupu. Hela chochu, neyi amayala nawañodijawu atwalekahu kuzata nañovu, mumaluwi awu munateli kwikala muzañalu weneni.

5. Muloñadi eyala namumbanda chiyatela kulondelawu kufumba kwekala haAroma 12:10?

⁵ Chuma chabadika kulema chaleteshaña maluwi kukola chidi chakwila nawu eyala namumbanda atela kuzatisha kufumba kwamuNsona kwaloñeshelawu akwaKristu ejima kwakwila nawu: ‘Keñañanenu nawana kwenu nawushona; itejenu mwinenu abadiki kulema.’ (Rom. 12:10) Cheñi eyala namumbanda atela kuzata nañovu kulonda ‘adikokwejeña muntu namukwawu; nikwikala namuchima wawushona; nikudanakena muntu namukwawu.’—Efwes. 4:32.

Neyi Mwinikwenu Hetiyaku

6, 7. Chumanyi chinateli kufumamu neyi mumbanda mukwaKristu yovwahilaña mfumwindi wabula kwitiya?

⁶ Indi neyi mwinikwenu hikambuña Yehovaku? Kakavulu, mukuwana iyala hetiyaku. Neyi hetiyaku, mumbanda watela kushakama ñahi namfumwindi? Bayibolu yakula nawu: “Ambanda, shakamenu nakwovwahila anfumu jenwenu aweni; kulonda, hela amu anabuli kwovwahila mazu, akayikoki chakadi mazu, nanochu chakushakamawu añodi jawu; chakumonawu chimukushakama nawoma chakubula kubajama.”—1 Pet. 3:1, 2.

⁷ Izu daNzambi dalejaña mumbanda kwovwahilaña mfumwindi wabula kwitiya. Yililu yindi yayiwahi yikuleñela mfumwindi kukeña kwiluka chaleteshaña ñodindi yamwekesheña yililu yayiwahi. Chikufumamu, iyala wakakeña kwiluka yuma yakuhwelelayi ñodindi mukwaKristu nawa nkumininaku waketeja chalala.

8, 9. Chumanyi chatela kwilayi mumbanda mukwaKristu neyi mfumwindi wabula kwitiya hanakuhimpaku hela chakwila yena nakumwekesha yililu yayiwahi?

⁸ Chumanyi chimwatela kwila neyi iyala wabula kwitiya yakaana kuhimpa yililu yindi? Nsona yakonkomwenaña ambanda etiya kutwalekahu nakumwekesha yililu yawakwaKristu mpinji yejima, hela chakwila hichuma chaswayuku. Chakutalilahu, twatañaña hamukanda wa 1 Akorinda 13:4 nawu: “Kukeña kwadiwunjikaña.” Mumbanda mukwaKristu watela kutwalekahu kumwekesha yililu yayiwahi “nakudizoza kwejima nakwovwaha, nakudiwunjika,” nakuditiyilila nakukeña. (Efwes. 4:2) Munateli kutwalekahu kumwekesha yililu yawakwaKristu hela chakwila mudi mukukala kuhitila muñovu yaNzambi yazatikaña, spiritu yindi yajila.

⁹ Pawulu wasonekeli nindi: “Natweshi kwila yuma yejima mudi Kristu wankoleshaña.” (Fwi. 4:13) Spiritu yaNzambi yaleñelaña mukwaKristu wasumbula hela wasumbuka kwila yuma yayivulu yinateli kukañanyayi halwindi. Chakutalilahu, neyi wumu mumaluwi wazuwa chinateli kuleñela mwinikwindi kufuntisha katama nakatama. Hela chochu, Bayibolu yalejaña akwaKristu ejima nawu: “Bayi mwila mwinenu chatama nakatama kanayiliyuku. . . . Muloña anasoneki nawu, Yehova nahoshi nindi, Yami nukutenda, yami nukufweta.” (Rom. 12:17-19) Cheñi, mukanda wa 1 Atesalonika 5:15 watufumbaña nawu: “Bayi hamwekana muntu wukumwila mukwawu chatama nakatama kanamwiliyuku. Londelenu kwila akwenu chachiwahi, niantu ejima mafuku ejima.” Hamuloña wawukwashu waspiritu yajila yaYehova, yuma yatukalilaña yatupelelaña. Dichi, twatela kulombaña spiritu yajila yaNzambi kulonda yitwinkeña yuma yitwakeñaña.

10. Indi Yesu welili ñahi namazu atama amuhosholeleñawu niyililu yatama yamukoñeleñawu antu?

¹⁰ Yesu waheni chakutalilahu chachiwahi kudi antu amuhosheleña nikumwila yuma yatama. Mukanda wa 1 Petulu 2:23 wahosha nawu: “Yena chamutukiluwu, hafuntishili cheñi matukaku; chamweniyi yihuñu hazuwiluku, ilaña wadikunjikili kudi yena wasompeshaña chaloña.” Anatukoleshi kulondela chakutalilahu chindi chachiwahi. Dichi bayi muhilashanaña muloña wayililu yatama yelañawu antuku. AkwaKristu ejima anayikonkomweni nawu, ‘ikalenu nanyichima yaluwi, nayitoñojoka yakudizoza. Bayi mutamisha mukwenu nanochu chanakutamishiyuku, hela kumutuka nanochu chanakutukiyuku. Chinjila kwila mwenomu.’—1 Pet. 3:8, 9.

Komana Ambanda Atela Kumwenahu Hohu?

11. Indi ambanda amakwawu akwaKristu akakalakalaña mudimwinyi weneni?

¹¹ Komana kwovwahila wumutu weyala chaya mukwila nawu ambanda atela kumwenahu hohu mumaluwi, chakadi kuhoshahu hansañu yakundama kuchisaka nihayuma yikwawu? Inehi. Yehova wayinka ambanda niamayala kukooleka kwakuvulu. Toñojokenu hakukooleka kwekala nawamana kwetu a 144,000 kwakwikala anyanta niatupristu mwiwulu akayula naKristu hadinu iseki! Hanidi izanvu hadi niambanda. (Ŋal. 3:26-29) Chakadi nikujina, Yehova wayinka ambanda mudimu weneni mukuloñesha kwindi.

12, 13. Shimunenu chakutalilahu chinakumwekesha nawu ambanda aprofweteli.

¹² Chakutalilahu, kushankulu, ambanda adiñi nakuprofweta. Mukanda waYoweli 2:28, 29 washimwineñahu dehi nawu: ‘Nakechila spiritu yami hadi antu ejima; anyanenu amayala nawambanda akaprofweta. . . . Hadi ambuñenu amayala nihadi ambuñenu awambanda hamafuku owu nakechila spiritu yami.’

¹³ Atumbanji twaYesu 120 apompeli mukapeka kahewulu muYerusalema hefuku daPentekosta 33 C.E. adiña amayala niambanda. Spiritu yaNzambi ayichilili hanidi izanvu dejima. Dihafumini Petulu kuhosha mazu aprofweteli kaprofwetu Yoweli nakuyikunjika kudi amayala niambanda. Petulu wahosheli nindi: ‘Chuma chimunamoni, chochuma chateneni kaprofwetu Yoweli, nindi, Nzambi nindi, Chakela hamafuku akukuminina, nakechila spiritu yami hadi antu ejima; nianyanenu amayala nawambanda akaprofweta, . . . Mwamweni, nihadi anduñu jami amayala nawambanda nakechila spiritu yami hamafuku akalondelamu, akaprofweta.’—Yil. 2:16-18.

14. Mudimwinyi wakalakeleñawu ambanda hakutiyakesha ntañishilu yawuKristu?

¹⁴ Muyaaka nkulakaji yakusambila, ambanda akalakeli mudimu walema wakutandisha ntañishilu yawuKristu. Ashimwinineña antu haWanta waNzambi nikukoña yuma yakundamini kumudimu wakushimwina. (Luka 8:1-3) Chakutalilahu, kapostolu Pawulu wamuteneni Fwibi “mukwakukalakela [mu]chipompelu chekala kuKenikiri.” Hakutemesha nyitendi kudi akwawu akanyidimu, Pawulu wateneni ambanda amavulu ashinshika, kubombelahu ‘niaTirifwena naTirifwosa, ambanda akalakalaña chikupu mudimu mudi Mwanta.’ Cheñi wateneni ‘Perisa wakeñewa, wakalakeleña nyidimu yayivulu mudi Mwanta.’—Rom. 16:1, 12.

15. Mudimwinyi wakalakalañawu ambanda wakutiyakesha ntañishilu yawuKristu makonu?

¹⁵ Makonu, antu anakushimwina nsañu yayiwahi yaWanta waNzambi mukaayi kejima hakachi kawantu akubadika hayihita 7, amavulu hiyambanda atwansi niakulumpi. (Mat. 24:14) Hakachi kawu, amavulu hiyakwakukalakala ampinji yejima, amishonali nawa amakwawu akalakelaña haBeteli. Ñimbi yamasamu Davidi wembili nindi: “Mwanta wahanaña izu; niambanda ashimunaña nsañu hinjita [yeneni.]” (Mas. 68:11) Mwamweni awa mazu anakushikijewa! Yehova walemesha mudimu wakalakalañawu ambanda wakushimwina nsañu yayiwahi nikwila mwaya kukeña kwindi. Yehova chalejayi ambanda akwaKristu nindi ovwahileña, hichinayi mukwila nawu atela kwovwahila kuhitila mukumwenahuku.

Ambanda Ayedi Ahosheli Yuma Yatoñojokeleñawu

16, 17. Indi chakutalilahu chaSara chamwekeshaña ñahi nawu ambanda hiyatela kumwenahu mumaluwuku?

¹⁶ Neyi Yehova wayinka ambanda nyidimu yayivulu, komana amayala kwila ehula añodijawu henohu kanda atachiki kufuukula hayuma yamaneni nehi? Chikuwaha neyi akwilaña mwenimu. Nsona yahosha hayuma yayivulu kutalisha hadi ambanda ahosheli hela kukoña yuma chakadi kuyiteja kudi amfumujawu. Shinshikenu hayakutalilahu yiyedi.

¹⁷ Sara, ñoda nkakulula Abarahama, watwelekeluhu kumuleja mfumwindi kulonda yomuhañi ntemena nimwanindi weyala hamuloña wakubula kalemesha. “Chumichi chamutaminini nankashi Abarahama”—ilaña Nzambi hichamutamininuku. Yehova wamulejeli Abarahama nindi: “Bayi chikutamina hansañu yamukwenzi, hela hansañu yanduñu yeyi wamumbandaku; kumina dakutiya mwizu daSara mwejima mwanahoshiyi.” (Kutach. 21:8-12) Abarahama wamwovwahilili Yehova, wamutiyilili Sara nawa welili mwakeñeliyi.

18. Chumanyi cheliliyi Abigayili?

¹⁸ Toñojokenu cheñi hadi Abigayili, ñoda Nabali. Mpinji yatemukileñayi Davidi Mwanta Sawulu wechima, wateekeleli kwakwihi nakwadiñi nyikoku yaNabali. Chatela amutambuluhu iwu samaheta yuma yindi yayivulu, David niantu jindi amuhembeleli yuma yindi. Hela chochu, Nabali ‘wadiñi wakala nawa watama mwelilañayi mwejima’ nawa ‘wayitalumokeleli’ antu jaDavidi. Wadiñi ‘muntu wamukunkulwayi,’ nawa ‘wadiñi wasupa.’ Antu jaDavidi chamulombeluwu yakudya, Nabali wakaanini. Indi Abigayili welilidi chachitiyiliyi? Chakubula kumulejamu Nabali, “Abigayili hakunyakala kutambula makulakaji amankendi ayedi, ninswaha javinyu jiyedi, ninyikoku yakuuwa dehi yitanu, niyesekelu yatidiku yakwocha yitanu, ninyikanji yanyikabu yavinyu yawuma nkulakaji, nimankendi achikuyu chakudima makulakaji ayedi” nakumwinka Davidi niantu jindi. Komana Abigayili welili mwamuwahi? Bayibolu yatulejaña nawu “Yehova hakumweta Nabali, yofwa nikufwa.” Nkumininaku Davidi wamusumbwili Abigayili.—1 Sam. 25:3, 14-19, 23-25, 38-42.

‘Mumbanda Ahamekañawu’

19, 20. Chumanyi chaleteshaña mumbanda nawu amuhamekeña chikupu?

¹⁹ Nsona yahamekaña mumbanda welaña yuma kwesekeja nakukeña kwaYehova. Mukanda waYishimu wahamekaña “mumbanda washinshika” nawu: “Wuseya windi wabadika nankashi marubi. Mumuchima wa[m]fumwindi wamukuhwelela, yena iyala hakabula hawudiiluku. Mumbandowu wukumwilaña [m]fumwindi mwamuwahi hohu mafuku indi ejima akahandayi.” Cheñi nawa, “wajikulaña mukanwa kindi nakuhosha yamana; kwidimi dindi kwekala nshimbi yaluwi. Watalaña chachiwahi mwelaña akwetala dindi; hadyaña kudya kwawukopuku. Anyanindi anyamukaña nakumutena nawu, Wakooleka; [m]fumwindi niyena nawa wamuhamekaña.”—Yish. 31:10-12, 26-28.

²⁰ Chumanyi chaleteshaña mumbanda nawu amuhamekeña chikupu? Mukanda waYishimu 31:30 watulejaña nawu, “Kuwaha kwamujimba kwadimbanaña, nilubanji lwamukunkulwayi tuhu; ilaña mumbanda waakama Yehova diyi akahamekawu.” Kumwakama Yehova kwakeñekaña hakwila nawu mumbanda yovwahili antu enkawu wumutu. “Mutu wamumbanda diyi iyala,” nawa “mutu weyala diyi Kristu,” cheñi “mutu waKristu diyi Nzambi.”—1 Kor. 11:3.

Zañalalenu naChawana Chayinkayi Nzambi

21, 22. (a) Yumanyi yaleñelaña akwaKristu adisumbula kumuhameka Nzambi hakuyinka chawana chamaluwi? (b) Muloñadi chitwatela kulemeshela ntanjikilu yaYehova yawunlomboli niwumutu? (Talenu chikasha hefu 17.)

²¹ Kudi yuma yayivulu yaleteshaña akwaKristu adisumbula kumusakilila Nzambi! Atela kwendelaña hamu neyi eyala namumbanda amuzañalu. Sweje-e dinu atela kumusakilila Nzambi hakuyinka chawana chamaluwi muloña chinayinki kukooleka kwakunuña wumi wawu hamu nakwenda naYehova. (Luti 1:9; Mika 6:8) Ntachiki yamaluwi, weluka chikupu yuma yatela kuleta muzañalu mumaluwi. Mpinji yejima ilenuña yuma kwesekeja nachakeñañayi, nawa ‘muzañalu waYehova wukekala ñovu yenu,’ nimudinu ituña datama.—Nehe. 8:10.

²² Iyala mukwaKristu wakeña ñodindi neyi chadikeña yomweni wazatishaña wumutu windi munjila yayiwahi nawa yakutoñojokelaku ñodindi. Wukusweja kumukeña ñodindi wamwakamaña Nzambi, muloña wukumukwashaña mfumwindi nikumulemesha chikupu. Sweje-e dinu, maluwi awu amawahi akuletaña mpuhu kudi Yehova Nzambi yetu.