Chekalawu Añelu

1. Muloñadi chitwatela kuyilukila añelu?

YEHOVA wakeñaña nindi twiluki chisaka chindi. Añelu ekala muchisaka chaNzambi. MuBayibolu ayitenaña nawu “anyana kaNzambi.” (Yoba 38:6) Añelu azataña mudimwinyi? Akwashili ñahi antu kunyima? Anateli kutukwasha nimakonu?—Talenu Mazu Adi Kunsa 8.

2. Añelu afuma kudihi? Añelu añahi aleñeliwu?

² Twatela kwiluka kwafumawu añelu. Akolosi 1:16 yatulejaña nawu chelili Yehova namuleñi dehi Yesu, ‘yuma yejima yamwiwulu niyahamaseki ayileñeli.’ Mwabombela niañelu. Añelu añahi aleñeliwu? Bayibolu yahosha nawu kwekala nkulakaji yamamiliyoni awañelu.—Masamu 103:20; Chimwekeshu 5:11.

3. Nsona yaYoba 38:4-7 yatulejañadi hadi añelu?

³ Bayibolu yatulejaña cheñi nawu Yehova waleñeli añelu henohu kanda yaleñi iseki. Atiyili ñahi chamweniwu iseki? Mukanda waYoba watulejaña nawu azañaleli chikupu. Chadiña chisaka chanuñañana chamukalakeleleña Yehova.—Yoba 38:4-7.

AÑELU AKWASHAÑA ANTU JANZAMBI

4. Tuneluki ñahi netu añelu ayikeña antu?

⁴ Añelu atachikili dehi kukwasha antu nikwila nkeñelu yaYehova kutalisha kwiiseki niantu. (Yishimu 8:30, 31; 1 Petulu 1:11, 12) Atiyili kutama chadikañiliwu Adama naEva. Aneñaña chikupu hakumona antu amavula anakukaana kumwovwahila Yehova. Ilaña neyi muntu yabalumuka mumuchima nakufunta kudi Nzambi, añelu azañalalaña. (Luka 15:10) Añelu atiyaña kuwaha nawantu amukalakelaña Nzambi. Yehova wazatishaña añelu kulonda yakwashi nikukiña ambuñindi hamaseki. (Aheberu 1:7, 14) Tushinshikenu hayakutalilahu.

5. Añelu akwashili ñahi antu jaNzambi kunyima?

⁵ Yehova watemesheli añelu ayedi kulonda amukwashi Loti nichisaka chindi kufuma musumba waSodoma naGomora yajilumukili. (Kutachika 19:15, 16) Chimwahitili yaaka yayivulu, kaprofwetu Danyeli amumbilili muwina wawanyitupa, ilaña amudiili wanyi muloña ‘Nzambi watemesheli kañelu kindi, nakujika mutunwa twawanyitupa.’ (Danyeli 6:22) Kuhiñahu, hadiñayi kapostolu Petulu mukaleya, Yehova watemesheli kañelu nakumufumishamu. (Yilwilu 12:6-11) Cheñi, añelu amukwashili Yesu hampinji yadiñayi hamaseki. Chakutalilahu, chelili anamupapatishi dehi, “añelu adiña nakumukalakela.” (Maku 1:13) Henohu kunashali kwanti nakumujaha Yesu, kañelu “wamukolesheli.”—Luka 22:43.

6. (a) Tuneluki ñahi netu añelu akwashaña antu jaNzambi makonu? (b) Tukwakula malwihwinyi?

⁶ Makonu, añelu amwekanaña wanyi kudi antu. Ilaña Nzambi wuchidi kuyizatisha kulonda yakwashi ambuñindi. Bayibolu yahoshaña nawu: “Kañelu kaYehova wayituñila amwakama musumba kwi-ndo, wayipulwishaña.” (Masamu 34:7) Muloñadi chitwakeñelaña netu atukiñi? Muloña tukweti ayilumbu añovu afwilaña kutuluwañesha. Anyi wenawa? Afuma kudihi? Atuluwañeshaña ñahi? Hakwila twakuli awa malwihu, tushinshikenu hayuma yamwekeni chelili Adama naEva anayileñi dehi.

AYILUMBU JETU ABULAÑA KUMWEKANA

7. Yumanyi yineliwu antu muloña wakutwamba kwaSatana?

⁷ MuKapetulu 3 twadizili netu kañelu wadikañili naNzambi nawa wakeñeli kuyuula antu. Bayibolu yamutenaña nawu Satana Diyabolu. (Chimwekeshu 12:9) Satana wakeñeli cheñi nindi antu amakwawu adikañi naNzambi. Wamudimbili Eva nawa kufuma tuhu hayina mpinji nadimbi antu amavulu. Hela chochu, antu adi neyi Abeli, Enoki niNowa adiña ashinshika kudi Yehova.—Aheberu 11:4, 5, 7.

8. (a) Añelu amakwawu ekalili ñahi andemoni? (b) Chumanyi cheliliwu andemoni hakwila apuluki haDibaji?

⁸ Mumpinji yaNowa, añelu amakwawu adikañili nakushiya mukala wawu mwiwulu nakushakama neyi antu hamaseki. Muloñadi? Bayibolu yatulejaña nawu akeñeleña kusumbula. (Tañenu Kutachika 6:2.) Ilaña añelu ateleleli kusumbula wanyi. (Yuda 6) Kufwana awa añelu atama, antu amavulu ekalili nayilwilu yatama nimadombu. Yehova wafuukwilihu kujilumuna antu atama adiña hamaseki nadibaji. Ilaña wahandishili ambuñindi ashinshika. (Kutachika 7:17, 23) Hakwila nawu ahandi, awa añelu atama afuntili cheñi mwiwulu. Bayibolu yayitenaña awa añelu atama nawu andemoni. Adikañili neyi cheliliyi Satana nawa Diyabolu wekalili nyuuli yawu.—Matewu 9:34.

9. (a) Chumanyi chayililiwu andemoni hafuntiliwu mwiwulu? (b) Yumanyi yitukuhanjeka?

⁹ Chineli adiña akwakudikaña, Yehova hayitejeli awa andemoni kufunta muchisaka chindiku. (2 Petulu 2:4) Andemoni hiyakutwesha kubalumuka nakwikala antuku, ilaña achidi ‘kuluwañesha antu ashakama hamaseki hejima.’ (Chimwekeshu 12:9; 1 Yowanu 5:19) Tuhanjekenu chadimbañawu, hela chaluwañeshañawu antu amavulu.—Tañenu 2 Akorinda 2:11.

ANDEMONI CHADIMBAÑAWU ANTU

10. Andemoni adimbaña ñahi antu?

¹⁰ Andemoni adimbaña antu munjila jajivulu. Antu amakwawu ahanjekaña nawandemoni mesu namesu hela kuhitila mudi muntu mukwawu, chidi neyi chimbuki hela mukwatukumbukumbu. Kuhanjeka nawandemoni hikupesha. Ilaña Bayibolu yatukonkomwena nawu tutondolweleña yuma yejima yakundama kudi andemoni. (Añalija 5:19-21) Muloñadi? Chochalawulañayi chibinda atunyama kuzatisha muhetu, andemoni atwambaña kulonda aluwañeshi antu.—Talenu Mazu Adi Kunsa 26.

11. Kuhoña hichumanyi, nawa muloñadi chitwabulilaña kuhoña?

¹¹ Kuhoña hinjila yimu yazatishañawu andemoni. Kuhoña hikuzatisha ñovu yawandemoni kulonda muntu yeluki yuma yakumbidi hela yinabuli kwilukayi. Chakutalilahu, muntu nateli kuzatisha tutumbwa, kutala muchikasa chamuntu hela kumutala kumesu kulonda yamuleji yuma yikamumwekena muchihandilu. Antu amavulu atoñojokaña nawu iyi yuma yatama wanyi, henohu yatama. Yafwana nankashi. Chakutalilahu, Bayibolu yahoshaña nawu andemoni niakwakuhoña azatilaña hamu. HaYilwilu 16:16-18, twatañañahu nsañu ‘yandemoni wakuhoña’ wakwashili chañadima wamumbanda “kushimuna yuma yikamwekana kumbidi.” Chelili kapostolu Pawulu nahañi dehi iwu ndemoni, iwu chañadima walekeli kushimuna yuma yakamwekana kumbidi.

12. (a) Muloñadi chichatamina kuhanjeka nawafu? (b) Muloñadi ambuña Nzambi chabulilañawu kudibomba muyaaku yawandemoni?

¹² Andemoni atwambaña hakwila adimbi antu. Aleteshaña tukuhweleli netu tunateli kuhosha nawantu afwa dehi nawa nawu antu afwa dehi achidi amomi kwiluña dacheñi nawa tunateli kuhanjeka nawu hela anateli kutukatisha. Chakutalilahu, muntu wunafwishi ibwambu dindi hela ntaña yindi nateli kuya kudi muntu wahoñaña, hela wahoshaña nindi nateli kuhosha nawafu. Mukwakuhoña nateli kuhosha nsañu yinakutiyakana neyi yayiwahi kudi amabwambu hela antaña jamuntu wafwa nawa nateli kuhosha neyi chahosheleña muntu wafwa. (1 Samweli 28:3-19) Tushidikilu twatuvulu twahayipenji twashindamena hansañu yakwila nawu afu atwalekañahu kuhanda kumaluña acheñi. Yumiyi yinabombelimu yidika yahayipenji, kwanakana mpinji yafwiliyi muntu, kuhana yuma kudi afu, yidika yawantuluwa hela kuchisha hachipenji. Neyi akwaKristu akaana kudibomba mutushidikilu twamuchidiwu, yisaka yawu hela antu amuchituñilu anateli kuyisawula nikuyituka hela kukaana kuzata nawu nyidimu yidi yejima. Ilaña akwaKristu eluka nawu afu hiyekalaña cheñi amomi kwiluña dacheñiku. Hitwatela kuhanjeka nawuku nawa hiyakutukatishaku. (Masamu 115:17) Babalenu chikupu. Bayi muhanjekaña nawa ndemoni hela kudibomba muyaaku yawandemoniku.—Tañenu Kuhituluka 18:10, 11; Isaya 8:19.

13. Chumanyi chinakwilawu antu achinineña andemoni?

¹³ Andemoni adimbaña antu nawa ayitiyishaña woma. Makonu, Satana niandemoni jindi eluka nawu anashali hohu “nakapinji kantesha” kulonda ayifumishi hamaseki kudi Nzambi, dichi kunekalili wubanji wawuvulu. (Chimwekeshu 12:12, 17) Hela chochu, antu amavulu achinineña andemoni ichi anakuyichina wanyi. Alekeli ñahi kuyichina andemoni?

DIKAÑENU NAWA LEKENU KUDIKUNDA NAWANDEMONI

14. Kufwana akwaKristu akunyima, tunateli kuleka ñahi kudikunda nawandemoni?

¹⁴ Bayibolu yatulejaña chitwatela kudikaña nawandemoni nikubula kudikunda nawu. Chakutalilahu, antu amakwawu adiña mumusumba waEfwesesa ahanjekeleña nawandemoni henohu kanda eluki chalala. Alekeli ñahi kudikunda nawu? Bayibolu yahoshaña nawu: “Antu amavulu . . . akoñeleña yuma nawukwashu wawandemoni apompesheli nyikanda yawu hamu nakuyochela hamesu awantu ejima.” (Yilwilu 19:19) Chineli akeñeleña kwikala akwaKristu, ocheli nyikanda yawu mwadiña nsañu yakuhoña. Dichitwatela kwila ninetu makonu. Muntu wejima wunakukeña kumukalakela Yehova watela kuleka yuma yejima yakundama kudi andemoni. Yumiyi yabombelamu nyikanda, magazini, nyevulu, mafilimu, tumina niyisela yamwekeshaña nawu kuhoña, andemoni hela nyijimu yayiwahi. Mwabombela cheñi yuma yavwalañawu antu yakudikiña nachu kuyuma yatama.—1 Akorinda 10:21.

15. Chumanyi chikwawu chitwatela kwila hakwila tudikaña naSatana ninawandemoni?

¹⁵ Chimwahitili yaaka kufuma hocheliwu aEfwesesa nyikanda mwadiña nsañu yakuhoña, kapostolu Pawulu wasonekeli nindi atwalekelihu ‘nakulwisha’ nikuzuña “nawaspiritu atama.” (Aefwesesa 6:12) Hela chakwila ocheli nyikanda yawu, andemoni atwalekelihu kuyikabisha. Chumanyi chikwawu cheliliwu? Pawulu wayilejeli nindi: “Nonenu nkebu yeneni yachikuhwelelu, yimukutwesha kujima nachu nyivu yakesi yanowu watama.” (Aefwesesa 6:16) Chikuhwelelu chetu chinateli kutukiña neyi chochakiñaña nkebu mushidika kunjita. Neyi tukukuhwelela chikupu netu Yehova wukutukiña, tukudikaña naSatana ninawandemoni.—Matewu 17:20.

16. Tunateli kumukuhwelela ñahi Yehova chikupu?

¹⁶ Tunateli kumukuhwelela ñahi Yehova chikupu? Twatela kutaña Bayibolu hefuku-hefuku nikwiluka chakushindamena hadi yena kulonda yatukiñi. Neyi tumukuhwelela chikupu Yehova, Satana nawandemoni akutwesha wanyi kutukatisha.—1 Yowanu 5:5.

17. Chumanyi chikwawu chikutukiña kukupesha?

¹⁷ Chumanyi chikwawu chateleleli kwilawu akwaKristu amuEfwesesa? Ashakamineña mumusumba mwapesheleñawu nankashi. Dichi Pawulu wayilejeli nindi: ‘Twalekenuhu kulomba.’ (Efwesesa 6:18) Ateleleli kulomba mpinji yejima kudi Yehova kulonda yayikiñi. Indochu etu? Ninetu tunakushakama mwituña munenzali kupesha. Twatela kulomba kudi Yehova kulonda yatukiñi nawa twatela kuzatisha ijina dindi neyi tunakulomba. (Tañenu Yishimu 18:10.) Neyi tukumulombaña Yehova netu yatwamwini kudi Satana, Yehova wukwakula kulomba kwetu.—Masamu 145:19; Matewu 6:13.

18, 19. (a) Tunateli kumushinda ñahi Satana niandemoni? (b) Lwihwinyi lutukakula mukapetulu kanalondelihu?

¹⁸ Neyi tuleka kwila yuma yejima yakundama kukupesha nakushindamena hadi Yehova netu wukutukiña, tukudikaña naSatana ninawandemoni. Twatela kuyitiya woma wanyi. (Tañenu Yakoba 4:7, 8.) Yehova wukweti ñovu chikupu kubadika andemoni. Wayibabesheli mumpinji yaNowa nawa kumbidi wakayijilumuna. (Yuda 6) Ilukenu nenu, hitunakuzuña nkawetuku. Yehova nakuzatisha añelu jindi kulonda atukiñi. (2 Anyanta 6:15-17) Tunakuhweleli chikupu netu Yehova wukatukwasha nawa tukumushinda Satana niandemoni.—1 Petulu 5:6, 7; 2 Petulu 2:9.

¹⁹ Hanu dinu neyi Satana nawandemoni anakuleta makabi nankashi, muloñadi Yehova chinakubulilayi kuyijilumuna? Tukwakula ilu lwihu mukapetulu kanalondelihu.