1. Amabwambu imwatondaña akuyiletesha kwiladi?

Twatachikaña kwila yuma yelaña antu itwadikundaña nawu hadi mpinji yeneni. Anateli kutuhimpa munjila yayiwahi hela yatama, nawa ichi chamwekanaña chili tudi nawu hamu hela tunakuhanjeka nawu haIntaneti. Neyi chahosha Bayibolu nawu, “muntu wunakwenda nawakamaana wakekala namaana, ilaña muntu wadikundaña nawayisupi [ana abula kumukeña Yehova] wakamona kukala.” (Yishimu 13:20) Amabwambu amukeña Yehova nawa adifukulaña kudi yena anateli kuyikwasha kuswina kwakwihi nayena nikufuukula chiwahi. Ilaña amabwambu abula kwikala muchipompelu akuyiletesha kuleka kumukalakela Yehova. Dihafuma Bayibolu kutuleja nawu twatela kutonda amabwambu chiwahi! Neyi twikala nawamabwambu amukeña Nzambi, yuma yikutuwahilaña wejima wetu. Tunateli “[kudikolesha] wumu namukwawu nikudituña wumu namukwawu.”—1 ATesalonika 5:11.

Yehova hatuleñeliyi, watwinkeli chawaana chachiwahi nankashi, wuswa wakuhosha. Komana washañaku muchima chitwazatishaña ichi chawaana? Eña! (Tañenu Yakoba 1:26.) Tunateli kuzatisha ñahi wuswa wetu wakuhosha munjila yikumutiyisha Yehova kuwaha?

1. Tunateli kuzatisha ñahi chawaana chetu chakuhosha?

Bayibolu yatuleja “[kudikolesha] wumu namukwawu nikudituña wumu namukwawu.” (1 ATesalonika 5:11) Kudihu antu imuneluki anakukeñeka kuyikolesha? Yumanyi yimwatela kwila hakwila muyikundeji? Mwekeshenu nenu mwayakamenaña. Hadaha munateli kuyileja yuma yaletesha muyikeñi. Kudihu nsona yimweluka yinateli kukolesha muntu imweluka? Kudi nsona jajivulu jimwatela kuzatisha. Ilaña mwanukeña cheñi nenu, njila yimukuhoshelamu mazu yinateli kumukolesha muntu hela kumuneñesha. Dichi mpinji yejima hoshenuña chiwahi nawa mukuwunda.—Yishimu 15:1.

2. Nhoshelu yamuchidinyi yitwatela kutondolwela?

Bayibolu yahoshaña nawu: “Mukanwa kenu bayi mwidika mazu atokaku.” (Tañenu AEfwesesa 4:29.) Ichi chinatalishi mukwila nawu hitwatela kwikala nanhoshelu yawuzondu hela kuhosha mazu atama anateli kukatisha akwetu kumuchimaku. Twatela cheñi kutondolwela matuñu hela kutwambila muntu.—Tañenu Yishimu 16:28.

3. Chumanyi chikutukwasha kuhosha munjila yakukolesha?

Kakavulu yuma yitwahoshaña yamwekeshaña yuma yidi mumuchima wetu hela yitunakutoñojoka. (Luka 6:45) Dichi twatela kudidizishaña etu aweni kulonda tusheña maana hayuma yakoleshaña yidi neyi, yuma yaloña, yakadi majilu, yasañumunaña kukeña niyuma yahamekañawu. (AFwilipi 4:8) Hakwila twili iyi yuma twatela kutonda chiwahi amabwambu niyisela yitwahemaña. (Yishimu 13:20) Kubombelahu, chalema kutoñojokahu henohu kanda tuhoshi. Toñojokenu chikutiyawu akwenu namazu imukuhosha. Bayibolu yahoshaña nawu: “Nhoshelu yakutuboka yidi neyi yilonda yampoku yakabali, ilaña idimi damukamaana dookaña.”—Yishimu 12:18.

SANDUJOLENU CHIKUPU

4. Yuulenuña nhoshelu yenu

Mpinji jikwawu, wejima wetu twahoshaña yuma yitwaditoñeshaña mukuhita kwampinji. (Yakoba 3:2) Tañenu AÑalija 5:22, 23, kuhiñahu hanjekenu hanawa malwihu:

• Hakachi kaniyi yilwilu, yilwilwinyi yimukulomba nenu mwiikali nayu kulonda yiyikwashi kuyuula nhoshelu yenu? Iyi yilwilu yinateli kuyikwasha ñahi?

Tañenu 1 AKorinda 15:33, kuhiñahu hanjekenu hanilu lwihu:

• Amabwambu jenu niyisela yimwahemaña, yinateli kuhimpa ñahi nhoshelu yenu?

Tañenu Mukwakutañisha 3:1, 7, kuhiñahu hanjekenu hanilu lwihu:

• Mpinjinyi yimunateli kumwena hela kuhembelela mpinji yayiwahi yakuhoshahu?

5. Hoshenuña yuma yayiwahi hadi akwenu

VIDIYO: Hoshenuña “Mazu Amawahi Anateli Kutuña” Akwenu (4:07)

• Muniyi vidiyo, muloñadi iwu manakwetu chakeñelañayi kuhimpa chahoshañayi hadi akwawu?

• Chumanyi chelayi hakwila ahimpi?

Tañenu Mukwakutañisha 7:16, kuhiñahu hanjekenu hanilu lwihu:

• Yumanyi yitwatela kwanuka neyi tudi mukweseka kwakuhosha chatama hadi muntu?

Tañenu Mukwakutañisha 7:21, 22, kuhiñahu hanjekenu hanilu lwihu:

• Awa mavasi anateli kuyikwasha ñahi kubula kusweja kuhila neyi muntu nahoshi chatama hadi enu?

6. Hoshenuña chiwahi nachisaka chenu

VIDIYO: Kukeña niKalemesha Kwanuñañeshaña Yisaka (3:08)

• Chumanyi chinateli kuyikwasha kuhosha munjila yayiwahi nachisaka chenu?

Tañenu AEfwesesa 4:31, 32, kuhiñahu hanjekenu hanilu lwihu:

• Nhoshelu yamuchidinyi yatuñaña chisaka?

Yehova wamwekesheli chatiyileñayi hadi Mwanindi, Yesu. Tañenu Matewu 17:5, kuhiñahu hanjekenu hanilu lwihu:

• Munateli kumwimbujola ñahi Yehova neyi munakuhanjeka nachisaka chenu?

YUMA YIMUNADIZI

Mazu akweti ñovu. Twatela kutoñojokahu chikupu hayuma yitunakuhosha, mpinji yitunakuhoshelahu nichitunakuyihosha.

Kuhitulukamu

• Nhoshelu yamuchidinyi yinateli kukolesha akwenu?

• Nhoshelu yamuchidinyi yimunakufwila kutondolwela?

• Yumanyi yinateli kutukwasha kuhosha munjila yayiwahi nawa yakukolesha?

ILUKILENUHU NSAÑU YIKWAWU

Yumanyi yinateli kutukwasha kuzatisha mazu amawahi?

Ikalenu Nedimi Dawakamaana (8:04)

Ilukenu yuma yinateli kuyikwasha kutondolwela nhoshelu yatama.

“Komana Mwamweni Kasawuntu Katama?” (Chibaaba chahaIntaneti)

Talenu chimunateli kutondolwela kufwa mumuhetu wamatuñu.

Nateli Kuleka Ñahi Matuñu? (2:36)

Talenu Yehova chakwashiliyi iyala wumu kuleka kuhosha kasawuntu.

“Natachikili Kutoñojoka Nankashi haYuma Yikamwekana muChihandilu Chami” (Kaposhi Kakutalila, August 1, 2013)