Añelu Hiyanyi, Nawa Yumanyi Yelañawu?

Yehova nakukeña nindi twiluki chisaka chindi chamwiwulu. Munichi chisaka munabombeli niañelu, atenañawu nawu ‘anyana kaNzambi.’ (Yoba 38:7) Bayibolu yahoshahu nawudi hadi añelu? Yumanyi yayililañawu antu? Nawa komana añelu ejima ekala muchisaka chaNzambi?

1. Añelu hiyanyi?

Yehova wasambilili kuleña añelu henohu kanda aleñi iseki. Kufwana yena, añelu hiyileñaleña yakuspiritu yabulaña kumwekana nawa ashakamaña mwiwulu. (AHeberu 1:14) Kwekala añelu amavulu, nawa kañelu hikañelu wambukaku nawakwawu. (Chimwekeshu 5:11) Elaña “mwahoshañayi [Yehova], nakwovwahila izu dindi.” (Isamu 103:20) Kunyima, mpinji yikwawu Yehova watemesheleña añelu kushimuna nsañu, kukwasha nikupulwisha antu jindi. Makonu, añelu alombolaña akaKristu kudi antu anakukeña kumwiluka Nzambi.

2. Satana niañelu jindi hiyanyi?

Añelu amakwawu hiyatwalekelihu kwikala ashinshika kudi Yehovaku. Kañelu watachi wadikañili diyi “atenañawu nawu Diyabolu nawa Satana, wunakuluwañesha antu ashakama heseki hejima.” (Chimwekeshu 12:9) Satana wakeñeleña yayuuleña akwawu, dichi waluwañesheli antu atachi, nkumininaku, añelu amakwawu adikañili hamu nindi. Awa añelu adikañili ayitenaña nawu andemoni. Yehova wayihañili mwiwulu nakuyinatila heseki nawa akayijilumuna.—Tañenu Chimwekeshu 12:9, 12.

3. Satana niandemoni afwilaña ñahi kutuluwañesha?

Satana niandemoni aluwañeshaña antu kuhitila mukupesha, chilwilu chatama chakukeña kuhanjekelamu nawaspiritu atama. Chakutalilahu, antu amakwawu ehulaña akakuhoña natutumbwa, akakushimuna yuma yikamwekana kumbidi, atutepa niañaña. Amakwawu azatishaña njila jikwawu jakukilamu mwabombela kupesha. Antu ayidimbaña cheñi kulonda akuhweleli nawu anateli kuhanjeka nawafu. Ilaña Yehova watusoñamishaña nindi: “Bayi muya kudi akakuhoña nawandemoni hela kudi akakushimuna yuma yakamwekana kumbidiku.” (ALevi 19:31) Watusoñamishaña kulonda yatukiñi kudi Satana niandemoni jindi. Hiyayilumbu jaNzambi nawa afwilaña kutukatisha.

SANDUJOLENU CHIKUPU

4. Añelu akwashaña antu kulonda amwiluki Yehova

Añelu jaNzambi hiyayaña aweni nakushimwina antuku. Ilaña, alombolaña ambuña aNzambi kudi antu anakukeña kumwiluka Nzambi. Tañenu Chimwekeshu 14:6, 7, kuhiñahu hanjekenu hanawa malwihu:

• Muloñadi chitwakeñekelaña kutukwasha kudi añelu kulonda tushimwini?

• Komana chinayikoleshi hakwiluka nenu añelu anateli kuyilombola enu kulonda muwani antu anakukeña kutiya nsañu yamuBayibolu? Muloñadi?

5. Kaanenu kupesha

Satana niandemoni hiyayilumbu jaYehova. Ninetu hiyayilumbu jetu. Tañenu Luka 9:38-42, kuhiñahu hanjekenu hanilu lwihu:

• Yumanyi yelañawu andemoni kudi antu?

Hitunakukeña kwiteja andemoni atuluwañeshiku. Tañenu Kuhituluka 18:10-12, kuhiñahu hanjekenu hanawa malwihu:

• Njilanyi jazatishañawu andemoni kulonda eseki kutuluwañesha nikuhanjeka nanetu? Yumanyi yavula kwilawu antu mwiluña denu?

• Komana mukuhosha nenu Yehova wawahisha hakukaanisha yuma yakundama kukupesha? Muloñadi?

Vumishenu VIDIYO, kuhiñahu hanjekenu hamalwihu analondelihu.

VIDIYO: “Dikañenu naDiyabolu” (5:02)

• Munakutoñojoka nenu muya wavwalili mwana kaPalesa wadiña wafwana? Muloñadi?

• Chumanyi chateleleli kwilayi Palesa kulonda adikiñi kudi andemoni?

AkaKristu alala mpinji yejima adikañaña nawandemoni. Tañenu Yilwilu 19:19 ni 1 AKorinda 10:21, kuhiñahu hanjekenu hanilu lwihu:

• Muloñadi chichalemena kukisañana yuma yejima yimukweti yakundama kukupesha?

6. Mushindenu Satana niandemoni jindi

Andemoni ayiyuulaña kudi Satana. Ilaña añelu ashinshika ayilombolaña kudi mukulumpi wawañelu Mikeli, ijina daYesu dikwawu. Mikeli wukweti ñovu yamuchidinyi? Tañenu Chimwekeshu 12:7-9, kuhiñahu hanjekenu hanawa malwihu:

• Hinyi wukweti ñovu chikupu? Mikeli niañelu jindi tahindi Satana niandemoni jindi?

• Komana munakutoñojoka nenu akakumulondela Yesu anateli kutiya woma Satana niandemoni jindi?

Munateli kushinda njita yaSatana niañelu jindi. Tañenu Yakoba 4:7, kuhiñahu hanjekenu hanilu lwihu:

• Munateli kudikiña ñahi kudi Satana niandemoni?

YUMA YIMUNADIZI

Añelu ashinshika atukwashaña. Satana niandemoni jindi hiyayilumbu jaYehova, nawa azatishaña yuma munabombeli kupesha kulonda aluwañesheña antu.

Kuhitulukamu

• Añelu jaYehova akwashaña ñahi antu kumwiluka?

• Satana niandemoni jindi hiyanyi?

• Muloñadi chimwatela kutondolwela yuma yejima yakundama kukupesha?

ILUKILENUHU NSAÑU YIKWAWU

Talenu wunsahu wunakumwekesha nawu Yesu diyi Mikeli mukulumpi wawañelu.

“Mikeli Mukulumpi Wawañelu Hinyi?” (Chibaaba chahaIntaneti)

Talenu wunsahu wunakumwekesha nawu Diyabolu bayi neyi hichuma hela chilwilu chatama chekala munyichima yetuku.

“Komana Satana Wekala Kwoku?” (Chibaaba chahaIntaneti)

Talenu mumbanda wumu chalekeliyi yuma yejima yakundama kudi andemoni.

“Wekalili naMuzañalu muChihandilu” (Kaposhi kakutalila, July 1, 1993)

Talenu Satana chazatishañayi kupesha kulonda adimbeña antu.

“Walala Kutalisha haKuhoña, niWulozhi, niKupanda” (Nzhila Yaya kuWumi Wahaya Nyaka Munayiwani?, chibalu 5)