• Munateli Kwikala Ibwambu daYehova
    Munateli Kwikala naMuzañalu Haya Nyaaka!—Kudiza Bayibolu Chakuhanjeka

    • Munateli Kwikala Ibwambu daYehova

      Yehova nakukeña nindi mumwiluki chiwahi. Muloñadi? Weluka nindi neyi mwiluka yilwilu yindi, chelaña yuma niyuma yinakukeña kuyililayi, mukukeña kwikala ibwambu dindi. Mwamweni munateli kwikala ibwambu daNzambi? (Tañenu Isamu 25:14.) Yumanyi yimwatela kwila hakwila mwikali ibwambu dindi? Bayibolu yaakula awa malwihu nawa yashimuna chichalemena kwikala ibwambu daYehova.

      1. Yehova nakukeña nindi mwilidi?

      “Swinenu kwakwihi naNzambi, niyena wukuswina kwakwihi nanenu.” (Yakoba 4:8) Awa mazu atalisha mudihi? Yehova nakukeña nindi mwikali ibwambu dindi. Antu amakwawu chinateli kuyikalila kukuhwelela nawu anateli kwikala ibwambu daNzambi, muloña hiyakutwesha kumumonaku. Hela chochu, Mwizu dindi Bayibolu watuleja yuma yejima yinateli kutukwasha kwiluka chekalayi kulonda tuswini kwakwihi nayena. Neyi tutañaña nsañu yaNzambi yekala muBayibolu yatusonekelayi, wubwambu wetu naYehova wukukola hela chakwila kanda tumumoneñahu dehi.

      2. Chawahiladi kwikala ibwambu daYehova?

      Yehova wayikeña kubadika muntu wudi wejima. Nakukeña nindi mwikali namuzañalu nikumulomba mpinji yejima yimunakukeña wukwashu. Munateli kuumbila “kwakama kwenu kwejima hadi yena, muloña yena wayakamenaña.” (1 Petulu 5:7) Mpinji yejima Yehova wakwashaña, kukundeja nikuyitiyilila amabwambu jindi.—Tañenu Isamu 94:18, 19.

      3. Yehova wakeñaña nindi amabwambu jindi eleñadi?

      Yehova wakeña antu ejima, “ilaña Yena wadikunda chikupu namuntu woloka.” (Yishimu 3:32) Yehova wakeñaña amabwambu jindi eleña yuma yamonañayi nindi yayiwahi nawa atondolweleña yuma yamonañayi nindi yatama. Amakwawu amonaña nawu kwila alondela nshimbi jaYehova jahoshaña hakwila yuma yayiwahi nikutondolwela kwila yuma yatama nehi. Hela chochu, Yehova wukweti luwi. Watambwilaña antu ejima amukeña chikupu nawa azataña nañovu kulonda amutiyisheña kuwaha.—Isamu 147:11; Yilwilu 10:34, 35.

      SANDUJOLENU CHIKUPU

      Ilukilenuhu nsañu yikwawu chimunateli kwikala ibwambu daYehova nichinawahili enu kwikala ibwambu dindi.

      4. Abarahama wadiña ibwambu daYehova

      Nsañu yamuBayibolu yahosha hadi Abarahama (atenañawu cheñi nawu Abarama) yatukwasha kwiluka mwatalisha kwikala ibwambu daNzambi. Tañenu nsañu yahosha hadi Abarahama haKutachika 12:1-4. Kuhiñahu hanjekenu hanawa malwihu:

      • Yehova wamulejeli Abarahama kwiladi?

      • Yehova wamukanini nindidi?

      • Abarahama welili ñahi nanshimbi jamwinkeliwu kudi Yehova?

      5. Yuma yakeñañayi Yehova nindi amabwambu jindi eleña

      Kakavulu twakeñaña amabwambu jetu kwilahu yuma yimu.

      • Yumanyi yimwakeñaña nenu amabwambu jenu ayilili?

      Tañenu 1 Yowanu 5:3, kuhiñahu hanjekenu hanawa malwihu:

      • Yehova wakeñaña nindi amabwambu jindi eleñadi?

      Hakwila tumwovwahileña Yehova, twatela kuhimpa yilwilu yetu hela wuntu wetu. Tañenu Isaya 48:17, 18, kuhiñahu hanjekenu hanilu lwihu:

      • Muloñadi Yehova chakeñelañayi amabwambu jindi kuhimpa yilwilu yawu?

      Mukakutuña nakumwinka mukwawu mwazatilañawu itepa.

      Ibwambu wamuwahi nateli kutuleja kwila yuma yikutukiña nikutukwasha. Dichelañayi niYehova nawamabwambu jindi

      6. Yuma yayililañayi Yehova amabwambu jindi

      Yehova wayikwashaña amabwambu jindi kuumika neyi anamoni kukala. Vumishenu VIDIYO, kuhiñahu hanjekenu halwihu lunalondelihu.

      VIDIYO: Yehova Nañilili Yuma Yayivulu Chikupu (3:20)

      • Yehova namukwashi ñahi mumbanda wudi muvidiyo kukeheshaku yitoñojoka yatama nichineñi?

      Tañenu Isaya 41:10, 13, kuhiñahu hanjekenu hanawa malwihu:

      • Yehova wayikana amabwambu jindi ejima nindi wakayililadi?

      • Komana munakutoñojoka nenu Yehova nateli kwikala Ibwambu wamuwahi? Muloñadi?

      Nyevulu: Amabwambu anakudikwasha wumu namukwawu. 1. Iwu iyala namunyamwishiku mukwawu mesa yeneni. 2. Iwu mumbanda nakumuleja mukwawu kukala kukwetiyi. 3. Iwu iyala nakukwashaku mukwawu wudi namukombu kwenda.

      Amabwambu imwadikundaña nawu ayikwashaña neyi munakukeña wukwashu. Yehova niyena wukuyikwashaña

      7. Kwikala ibwambu daYehova mwabombela kuhanjeka nindi

      Kuhanjeka kwakoleshaña wubwambu. Tañenu Isamu 86:6, 11, kuhiñahu hanjekenu hanawa malwihu:

      • Tunateli kuhanjeka ñahi naYehova?

      • Yehova wahanjekaña ñahi nanetu?

      Nyevulu 1. Iwu mumbanda nakulomba. Mufunda wudi hamutu windi wunatalishi mwiwulu. 2. Iwu mumbanda nakutaña Bayibolu. Mufunda wudi hamutu windi wunatalishi heseki.

      Twahanjekaña naYehova mukulomba, yena wahanjekaña nanetu muBayibolu

      AMAKWAWU AHOSHAÑA NAWU: “Kwila chitwesheka kwikala ibwambu daNzambi nehi.”

      • Nsonanyi yimunateli kuzatisha yikumwekesha nawu tunateli kwikala amabwambu jaYehova?

      YUMA YIMUNADIZI

      Yehova nakukeña kwikala Ibwambu denu nawa wukuyikwasha kuswina kwakwihi nayena.

      Kuhitulukamu

      • Yehova wakwashaña ñahi amabwambu jindi?

      • Muloñadi Yehova chalejelañayi amabwambu jindi kuhimpa yilwilu yawu?

      • Munakutoñojoka nenu chakala nankashi kwikala ibwambu daYehova? Muloñadi?

      Yuma Yimukwila

      ILUKILENUHU NSAÑU YIKWAWU

      Kwikala ibwambu daNzambi kunateli kuhimpa ñahi chihandilu chenu?

      “Yehova, hiNzambi Wutwatela Kwiluka” (Kaposhi kakutalila, February 15, 2003)

      Dizenu chimunateli kukwata wubwambu naNzambi.

      “Nateli Kwikala Ñahi Ibwambu daNzambi?” (Malwihu Ehulañawu Atwansi niÑakwilu Jinateli Kuyikwasha, Volumu 2, kapetulu 35)

      Talenu chuma chinaleteshi mumbanda wumu kwiluka nindi wubwambu windi naYehova wamukwashili.

      “Hinakeñeleña Kufwaku!” (Kaposhi Kakutalila Na. 1 2017)

      Tiyenu atumpululu chinakulumbululawu chatiyañawu hadi Yehova.

      Kwikala Ibwambu daNzambi Kwatalisha Mudihi? (1:46)