2. Satana niañelu jindi hiyanyi?

Añelu amakwawu hiyatwalekelihu kwikala ashinshika kudi Yehovaku. Kañelu watachi wadikañili diyi “atenañawu nawu Diyabolu nawa Satana, wunakuluwañesha antu ashakama heseki hejima.” (Chimwekeshu 12:9) Satana wakeñeleña yayuuleña akwawu, dichi waluwañesheli antu atachi, nkumininaku, añelu amakwawu adikañili hamu nindi. Awa añelu adikañili ayitenaña nawu andemoni. Yehova wayihañili mwiwulu nakuyinatila heseki nawa akayijilumuna.—Tañenu Chimwekeshu 12:9, 12.

3. Satana niandemoni afwilaña ñahi kutuluwañesha?

Satana niandemoni aluwañeshaña antu kuhitila mukupesha, chilwilu chatama chakukeña kuhanjekelamu nawaspiritu atama. Chakutalilahu, antu amakwawu ehulaña akakuhoña natutumbwa, akakushimuna yuma yikamwekana kumbidi, atutepa niañaña. Amakwawu azatishaña njila jikwawu jakukilamu mwabombela kupesha. Antu ayidimbaña cheñi kulonda akuhweleli nawu anateli kuhanjeka nawafu. Ilaña Yehova watusoñamishaña nindi: “Bayi muya kudi akakuhoña nawandemoni hela kudi akakushimuna yuma yakamwekana kumbidiku.” (ALevi 19:31) Watusoñamishaña kulonda yatukiñi kudi Satana niandemoni jindi. Hiyayilumbu jaNzambi nawa afwilaña kutukatisha.

6. Mushindenu Satana niandemoni jindi

Andemoni ayiyuulaña kudi Satana. Ilaña añelu ashinshika ayilombolaña kudi mukulumpi wawañelu Mikeli, ijina daYesu dikwawu. Mikeli wukweti ñovu yamuchidinyi? Tañenu Chimwekeshu 12:7-9, kuhiñahu hanjekenu hanawa malwihu:

• Hinyi wukweti ñovu chikupu? Mikeli niañelu jindi tahindi Satana niandemoni jindi?

• Komana munakutoñojoka nenu akakumulondela Yesu anateli kutiya woma Satana niandemoni jindi?

Munateli kushinda njita yaSatana niañelu jindi. Tañenu Yakoba 4:7, kuhiñahu hanjekenu hanilu lwihu:

• Munateli kudikiña ñahi kudi Satana niandemoni?

2. Yumanyi yinakumwekana mukaayi nawa yilwilwinyi yikwetiwu antu kufuma tuhu mu 1914?

Yesu amwihwili kudi atumbanji twindi nawu: “Chinjikijilwinyi chikamwekesha kwikalahu kweyi nikukuma kwanshakaminu yamakonu?” (Matewu 24:3) Hakuyakula, washimwini yuma yayivulu yikamwekana hanyima yakwila natachiki dehi kuyuula mwiwulu neyi Mwanta waWanta waNzambi. Yumiyi yinabombelimu njita, kukeha kwayakuda ninyitentanshi. (Tañenu Matewu 24:7.) Bayibolu yashimwineñahu dehi cheñi nawu yilwilu yawantu “mumafuku akukuminina” yakaletesha chihandilu ‘chikakali.’ (2 Timotewu 3:1-5) Yuma yinakumwekana niniyi yilwilu yinaswejeliku kufuma tuhu mu 1914.

3. Muloñadi yuma chiyinaswejili kutaminaku mukaayi kufuma tuhu hatachikili kuyuula Wanta waNzambi?

Yesu chekaliliyi hohu Mwanta waWanta waNzambi, wazuñili njita mwiwulu naSatana niandemoni. Satana amushindili. Bayibolu yahosha nawu “amunatilili heseki nawa añelu jindi niwena ayinatilili hamu nayena.” (Chimwekeshu 12:9, 10, 12) Satana nahili nankashi muloña neluki nindi akamukisañana. Diyi wunakuletesha antu akabakaneña nankashi heseki dejima. Dichinasweji kutamina yuma mukaayi. Wanta waNzambi wakafumishahu iku kukala kwejima.