Hanu dinu hinyi “Gogi waMagogi” washimunawu haChimwekeshu 20:8? Hampinji yakweseka kwakukumishaku kukamwekana kumakumishilu ayaaka ikombakaji, antu akadikaña naYehova akekala nayililu yawubanji neyi ‘yaGogi waMagogi,’ dikwila nawu nyunza yikalukuka antu jaNzambi kumakumishilu alukadi lweneni. Nawa mazanvu ejima akayijilumuna haya nyaka. (Chim. 19:20, 21; 20:9) Dichi tunateli kuhosha netu, antu ejima akadikaña kumakumishilu Ikombakaji Dayaaka, ayitenaña nawu: “Gogi waMagogi.”