Yililu 5:42 hahosha hadi apostolu nawu: “Hiyalekeli kuleja antu hefuku hefuku, nimutembeli, nikumatalawuku, nakushimuna [nsañu yayiwahi hadi] Yesu nawu diyi Kristu.” Chimwahitili yaaka kwakwihi na 20, kapostolu Pawulu wayanukishili akulumpi amuchipompelu chamuEfwesesa nindi: “Chinabulili kuheñuka nakuleka kushimuna yuma yakuyikwasha nachu yejima; nayilejeli hatooka nikwitala nikwitala.” Komana Pawulu wayihempwili awa aeluda henohu kanda ekali akwakwitiya? Eña wayihempwili, muloña wayilejeli yuma yikwawu kutalisha “[ha]kubalumuka munyichima nakutala kudi Nzambi, nikumukuhwelela Mwanta Yesu Kristu.” (Yililu 20:20, 21) Kuhosha haYililu 20:20 mukanda waRobertson’s Word Pictures Muchitiyañenu Chachiha wahosha nawu: “Chidi chalema kwiluka nawu awa akwakushimwina abadika, ashimwinineña kwitala nikwitala.”

Mukanka wawaTubola Amunanu Mafuku

5. Indi mudimu wakushimwina awulumbulula ñahi muwuprofwetu waYoweli?

⁵ Mudimu wakushimwina wakoñeleñawu muyaaka nkulakaji yakusambila wamwekesheleña mudimu weneni wunakukalakalawu munanu mafuku. Kaprofwetu Yoweli wesekejeli mudimu wawakwaKristu awayishewa wakushimwina nachipupu chatububu twajilumunaña, kubombelahu nitubola. (Yoweli 1:4) Chineli atubola endaña neyi akwanjita, ashindaña kukala, eñilaña mumatala, nawa adyaña yuma yejima yidi munjila yinakuhitawu. (Tañenu Yoweli 2:2, 7-9.) Iku kulumbulula kunakumwekesha kutatakena nikukalakala chikupu kwawantu jaNzambi hampinji yinakuzatawu mudimu wakushimwina makonu! Kushimwina kwitala nikwitala diyi njila yasweja kulema yazatishañawu akwaKristu awayishewa nialunda nawu “anyikoku acheñi” hakukalakala iwu mudimu washimwiniwu muwuprofwetu. (Yowanu 10:16) Indi etu aYinsahu jaYehova twatachikili ñahi kuzatisha iyi njila yazatishileña apostolu yakushimwina kwitala nikwitala?

6. Kukonkomwenanyi kwahenuwu mu 1922, kutalisha hamudimu wakushimwina kwitala nikwitala, nawa amakwawu elili ñahi?

⁶ Kufuma tuhu mu 1919 nakutwalekahu, akwaKristu ejima ayikonkomwena chikupu kukalakala mumudimu wakushimwina. Chakutalilahu, chibaba chidi namutu wunakuhosha nawu, “Mudimu Walema” muKaposhi Kakutalila kawundeli kaAugust 15, 1922, chayanukishili akwaKristu awayishewa hakulema “kwakushimwina antu nsañu yasonekawu nikuhosha nawu hamatalawu, nikuyileja nawu wanta wamwiwulu wudi mukamwihi.” Njila jakuzatisha hakushimwina ajishileña muBulletin (chayinu mpinji diwu Mudimu Wetu waWanta). Hela chochu, antu adiñi nakushimwina kwitala nikwitala hatachi adiña antesha. Amakwawu alekeli kushimwina. Atachikili kudikaña munjila jashiyashana, ilaña kukala kweneni kwadiña kwakwila nawu adimweneña neyi alema chikupu nawa hiyateleli kushimwina kwitala nikwitalaku. Chiyaswejeli kukonkomwenawu hamudimu wakushimwina, antu amavulu amuchidiwu atachikili kuleka chovu-chovu kudikunda nakuloñesha kwaYehova.

7. Wukwashinyi wakeñekeleña wamwekeni hatooka muyaaka yamu 1950?

⁷ Muyaaka yalondeleluhu, antu amavulu atachikili mudimu wakushimwina. Hela chochu, chamwekeni hatooka nawu antu akeñekeleña kuyidizisha mumudimu wakushimwina kwitala nikwitala. Chakutalilahu, toñojokenu hachuma chamwekeni muUnited States. Kukutachika kwayaaka yamu 1950, mapesenti 28 awaYinsahu munidi ituña afuntili mwishina mumudimu wawu wakushimwina wakuhana mahandibilu hela kwimana hanyikwakwa nakuhana magazini. Mapesenti akubadika ha 40 adiña nakushimpokela mumudimu wakushimwina, mwahitileña tukweji twatuvulu chakadi kushimwina. Chumanyi chateleluwu kukoña hakwila nawu akwashi akwaKristu ejima adihana kushimwina kwitala nikwitala?

8, 9. Progiramwinyi yatachikiluwu mu 1953, nawa chumanyi chafuminimu?

⁸ Hakupompa kwanyuza kwadiña muMusumba waNew York mu 1953, akonkomweneni nankashi hamudimu wakushimwina kwitala nikwitala. Mana kwetu Nathan H. Knorr wadiña nakulombola mudimu wakushimwina mukaayi kejima wahosheli nindi, mudimu walema wawankoñi akwaKristu ejima, wakukwasha aYinsahu ejima kukalakalaña mumudimu wakushimwina kwitala nikwitala mpinji yejima. Wahosheli nindi, “Muntu wejima watela kushimwinaña nsañu yayiwahi kwitala nikwitala.” Atachikili progiramu yakudizisha antu mukaayi kejima kulonda kushikija ichi chikonkwanyi. Ejima adiña kanda atachiki kushimwina kwitala nikwitala, ayidizishili chakuhosha nawantu hamatalawu, kuhanjeka nawu kuhitila mukuzatisha Bayibolu, nichakwakula malwihu ehulañawu.

⁹ Muniyi progiramu yakudizisha mwafumini yuma yayiwahi nankashi. Muyaaka ikumi, naambala yawakwakushimwina mukaayi kejima yavulililuku namapesenti 100, kufuntilaku kwavulililuku namapasenti 126, nawa naambala yawatudizi aBayibolu namapesenti 150. Makonu, akwakushimwina aWanta kwakwihi namamiliyoni atanu nayedi anakushimwina nsañu yayiwahi mukaayi kejima. Iku kuvulilaku kwakuhayamisha kunakumwekesha nawu Yehova nakwashi antu jindi mumudimu wakushimwina kwitala nikwitala.—Isaya 60:22.

Kufunda Antu Mufunda Wakupuluka

10, 11. (a) Hichimwenwinyi chamulejeliwu Ezekeli, neyi chasonekawu haEzekeli kapetulu 9? (b) Indi ichi chimwenu chinakushikijewa ñahi makonu?

¹⁰ Kulema kwamudimu wakushimwina kwitala nikwitala tunateli kukwimwena muchimwenu chamulejeluwu kaprofwetu Ezekeli. Munichi chimwenu, Ezekeli wamweni amayala atanu nawumu anakwati yitwa mumakasawu nawa iyala wamuchitanu nachiyedi navwali mahina amawahi iku namanyiki luseñu lwawulombu lwamukwakusoneka. Iyala wamuchitanu nachiyedi amulejeli ‘kuhita mukachi kamukala’ kulonda ‘kufunda mufunda hamahama awantu ejima adi nakushikoka nakudila nayishimashima yejima yadiña nakukoñakoñawu mukachi kawu.’ Chuma chalondeleli hawuna mudimu wakufunda, amayala atanu nawumu adiña nayitwa yakujilumuna nachu, ayilejeli kujaha ejima abulili mufunda.—Tañenu Ezekeli 9:1-6.

¹¹ Kwesekeja nakushikijewa kwaniwu wuprofwetu tuneluki netu, iyala “wavweli mahina amawahi” nakwimenaku izaza dawakwaKristu awayishewa naspiritu. Kuhitila mumudimu wakushimwina nikwilisha atumbanji, izaza dawayishewa afundaña mufunda wachifwikija hadi antu anakudibombela kudi “anyikoku acheñi” aKristu. (Yowanu 10:16) Indi iwu mufunda hichumanyi? Hiwunsahu, wudi neyi wakufunda hamahamawu akadi kusweka, wunakumwekesha nawu awa nyikoku adihana, hiyatumbanji aYesu Kristu apapatishewa nawa anavwali wuntu wawuha wudi neyi waKristu. (Aefwesesa 4:20-24) Awa antu adi neyi anyikoku ekalaña iyinda dimu nawakwaKristu awayishewa nawa ayikwashañaku mumudimu walema wakufunda atumbanji amakwawu.—Chimwekeshu 22:17.

12. Indi chimwenu chaEzekeli chakufunda hamahama chinamwekeshi ñahi kulema kwakutwalekahu kukeña antu afwana anyikoku?

¹² Chimwenu chaEzekeli chamwekeshaña chuma chinakuleñela mudimu wetu wakukeña antu “adi nakushikoka nakudila” chiwunekalili wakunyakashana. Muloña mawumi awantu adi muwubanji. Katataka mashidika aYehova amwiwulu akwakujilumuna, anakwimenaku amayala atanu nawumu adi nayitwa, ajilumuni antu anabuli mufunda wachifwikija. Kutalisha hakusompesha kunakwinza, kapostolu Pawulu wasonekeli nindi Mwanta Yesu, hamu “nawañelu jañovu jindi,” akaleta ‘kutenda hadi antu abula kwiluka Nzambi, nihadi antu abula kwovwahila nsañu yaMwanta wetu Yesu yayiwahi.’ (2 Atesalonika 1:7, 8) Ilukenu nenu antu akayisompesha kwesekeja nachatambwilañawu nsañu yayiwahi. Dichi kutiyakesha nsañu yaNzambi kwatela kutwalekahu chakadi kuleka kushika nikunsa. (Chimwekeshu 14:6, 7) Chumichi chinaleñeli ambuña aYehova adihana kwikala namudimu weneni chikupu.—Tañenu Ezekeli 3:17-19.

13. (a) Indi kapostolu Pawulu welukili nindi wadiña namudimwinyi, nawa muloñadi? (b) Mudimwinyi wumukweti kudi antu amwiluña denu dakushimwina?

¹³ Kapostolu Pawulu welukili nindi wadiña namudimu wakushimwina nsañu yayiwahi kudi antu amakwawu. Wasonekeli nindi: “Ami nidi namukudi wakushimwina aHeleni, niantu ampata jacheñi, niakwamaana, niabula maana. Dichi ami nakeñi nankashi, mwashikila ñovu jami jejima, kushimwinenu mwashakama muRoma nsañu yayiwahi nawa.” (Aroma 1:14, 15) Hamuloña wakuhameka hawushona wamumwekesheleluwu, Pawulu wakeñeleña chikupu kukwasha antu amakwawu kulonda aheteli muluwi lwaNzambi lwabadika neyi chahetelelumu yena. (1 Timotewu 1:12-16) Wadiña nakutiya neyi wukweti mukudi namuntu wejima wabulakeneñayi, mukudi wakufweta hohu kuhitila mukushimwina nsañu yayiwahi kudi muntu yeniwu. Komana ninenu mwatiyaña neyi mukweti mukudi kudi antu amwiluña denu dakushimwina?—Tañenu Yililu 20:26, 27.

14. Muloñanyi wasweja kulema watuleñelaña kushimwina hatooka kwitala nikwitala?

¹⁴ Hela chakwila kupulwisha mawumi awantu kwekala kwalema, ilaña kudi muloña wabadika kulema watuleñelaña kushimwina kwitala nikwitala. Muwuprofwetu wasonekawu haMalaki 1:11, Yehova wahosheli nindi: “Kufumisha kwatuntukilaña itañwa nakushikija kudahuminaña, ijina dami datoha hohu mukachi kawaJentili, . . . adilambulaña nimulambu wutooka, muloña ijina dami datoha mukachi kawaJentili.” Hakushikija iwu wuprofwetu, ambuña aYehova adihana anakuhameka ijina daYehova hatooka mwahita iseki dejima hampinji yinakukalakalawu chachiwahi mudimu wawu wakushimwina. (Masamu 109:30; Matewu 24:14) Kulambula “mulambu wakumuhameka” Yehova dimuloña wasweja kulema watuleñelaña kushimwina hatooka kwitala nikwitala.—Aheberu 13:15.

Yuma Yalema Chikupu Yikamwekana Kumbidi

15. (a) Indi mudimu wawaIsarela wayililuku ñahi hambidi hampinji yanyeñumukileñawu Yeriku hefuku damuchitanu nachiyedi? (b) Indi chumichi chinakumwekeshadi kutalisha hamudimu wakushimwina?

¹⁵ Yumanyi yakamwekana kumbidi kutalisha hamudimu wakushimwina? Kukuchika kwaYeriku, neyi chasonekawu mumukanda waYoshuwa, kwamwekeshaña chuma chamwekeni. Anukenu nenu henohu Nzambi kanda yajilumuni Yeriku, aIsarela ayilejeli kunyeñumukaña musumba kamu hefuku hadi mafuku atanu nadimu. Ilaña, mwifuku damuchitanu nachiyedi, mudimu wawu wayililuku hambidi chikupu. Yehova walejeli Yoshuwa nindi: “Mwakanyeñumuka mukala katanu nakayedi, niatupristu akemba mpuña. Chakembawu nseñu yachizamba chamukoku, . . . antu ejima akabidika kabobobu kakeni. Mpwembu yamukala yakakunduka kwala-a.” (Yoshuwa 6:2-5) Munjila yoyimu mudimu wetu wakushimwina niwena watela wukayilaku hambidi. Chakadi nikujina, hampinji yakajilumunañawu kanu kaayi, ijina daNzambi niWanta windi wakekala anawishimwini dehi chikupu mukanu kaayi.

16, 17. (a) Chumanyi chikashikijewa henohu ‘yihuñu yeneni’ kanda yimani? (b) Yumanyi yitwakahanjekahu muchibaba chinalondeluhu?

¹⁶ Mpinji yatela yakashika hakela nsañu yitunakushimwina yakekala neyi ‘kubidika kabobobu kakeni.’ Mumukanda waChimwekeshu, nsañu yakusompesha kwabadika ayimwekesha neyi ‘nvula yamalola amaneni, ilola dimu desekana nantalenta yimu.’b Nawa Chimwekeshu 16:21 hahosha nawu: “Chipupu ochu chabadika nankashi kutoha.” Hituneluki chuma chikakoña mudimu wakushimwina kwitala nikwitala hakushimuna wunsompeshi wabadikaku. Ilaña tunateli kwiluka netu henohu ‘yihuñu yeneni’ kanda yimani, ijina daYehova akaditiyakesha chikupu kubadika kunyuma.—Chimwekeshu 7:14; Ezekeli 38:23.

¹⁷ Hampinji yitunakutalila yuma yalema yikamwekana kumbidi, tutwalekenuhu chikupu nakushimwina nsañu yayiwahi yaWanta. Hampinji yitwakalakalaña iwu mudimu, kukalanyi kutwamonaña mumudimu wakushimwina kwitala nikwitala, nawa tunateli kushinda ñahi iku kukala? Tukahanjeka hanawa malwihu muchibaba chinalondeluhu.

Kushinda Kukala Kwekala muMudimu waKushimwina Kwitala niKwitala

“Hitukuumika mudi Nzambi yetu nakuyishimwinenu nsañu yaNzambi yayiwahi, iku nikumona makabi amavulu.”—1 ATESALONIKA 2:2.

1. Kukalanyi kwamweniyi Yeremiya, nawa wakwishindili ñahi?

YEREMIYA wadiña muntu neyi chochitudi etu. Hampinji Yehova yamwinkeliyi mudimu “wawuprofwetu wakuya kunyuza,” wahosheli nindi: “Yowe! Mwanta Yehova! Ami hineluka kuhoshaku, muloña nikansi.” Hela chochu, hamuloña wakukuhwelela Yehova wetejeli mudimu wamwinkeluwu. (Yeremiya 1:4-10) Yeremiya womikili kadiwu, kumukaana, kasekesha, nimahumpu hadi yaaka yakubadika ha 40. (Yeremiya 20:1, 2) Mpinji jikwawu wakeñeleña kuleka mudimu windi. Hela chochu, watwalekeluhu nakushimwina nsañu yabuliliwu kwiluka kumunza mwadiña antu abulileña kwiteja. Kuhitila muñovu jaNzambi, Yeremiya wazatili mudimu wadi kukañanyayi muñovu jindi.—Tañenu Yeremiya 20:7-9.

2, 3. Indi ambuña aNzambi makonu amonaña ñahi kukala neyi kwamweniyi Yeremiya?

² Ambuña aNzambi amavulu makonu anateli kutiya neyi chatiyiliyi Yeremiya. Hampinji yitwatoñojokeleña kutachika mudimu wakushimwina kwitala nikwitala, etu amakwawu twatoñojokeli netu, ‘Hitukutweshaku.’ Ilaña chitwatoñojokeli netu hinkeñelu yaYehova yakwila nawu tushimwini nsañu yayiwahi, twalekeli kutiya woma nakutwalekahu kushimwina. Hela chochu, etu amavulu twamwenihu kukala muchihandilu hakampinji kantesha, kwatwikañesheli kutwalekahu kushimwina. Mwalala, chekala chakala kutachika kushimwina kwitala nikwitala nikutwalekahu kushimwina nakushika nikunsa.—Matewu 24:13.

³ Indi neyi chakwila mwadiña nakudiza Bayibolu nawaYinsahu jaYehova nikuwanika kukupompa hadi mpinji yayilehi ilaña munakujinoka kutachika kushimwina kwitala nikwitala? Hela neyi mudi Chinsahu wapapatishewa wamonaña kukala kwakushimwina kwitala nikwitala, hela chakwila mwakola lwakumujimba? Ilukenu nenu antu akunyichidi yejima anakushinda kukala kwakushimwina kwitala nikwitala. Nawukwashu waYehova, ninenu munateli kushinda.

Twatela Kuumika

4. Chumanyi chamukwashili kapostolu Pawulu kushimwina nsañu yayiwahi chakadi woma?

⁴ Chakadi nikujina muneluki nenu mudimu wakushimwina mukaayi kejima anakuwukalakala naspiritu yaNzambi, bayi nañovu hela namaana awantuku. (Zekariya 4:6) Chochimu nimudimu wakushimwina wamukwaKristu wejima. (2 Akorinda 4:7) Toñojokenu hadi kapostolu Pawulu. Hakwanuka mpinji yamukabishiluwu hamu namulundanindi kamishonali kudi akwankunyi, wasonekeli nindi: “Muneluki dehi nenu helili twakaba dehi nakutwila chatama kuFwilipi, hitukuumika mudi Nzambi yetu nakuyishimwinenu nsañu yaNzambi yayiwahi, iku nikumona makabi amavulu.” (1 Atesalonika 2:2; Yililu 16:22-24) Hitunateli kutoñojoka netu mukwakushimwina wadikita wudi neyi Pawulu wamweneñahu kukala mumudimu wakushimwinaku. Ilaña, neyi chochitwamonaña wejima wetu, Pawulu wamukuhweleleli Yehova hakwila nawu yahoshi nsañu yayiwahi chakadi woma. (Tañenu Aefwesesa 6:18-20.) Tunateli kwimbujola ñahi chakutalilahu chaPawulu?

5. Njilanyi yimu yatela kutwikwasha kushimwina chakadi woma?

⁵ Kulomba hinjila yimu yatukwashaña kushimwina chakadi woma. Payiniya wumu wahosheli nindi: “Nalombaña kulonda nihosheña chakadi woma, kulonda nishikeña antu hanyichima, nawa nalombaña kulonda nikaleña namuzañalu mumudimu wakushimwina. Nawa iwu himudimu waYehova, bayi neyi himudimu wetuku, dichi hitunateli kutwesha kuwukalakala chakadi wukwashu winduku.” (1 Atesalonika 5:17) Wejima wetu twatela kutwalekahu kulomba wukwashu waspiritu yaNzambi yajila kulonda tutwesheña kushimwina chakadi woma.—Luka 11:9-13.

6, 7. (a) Chimwenwinyi chamulejeluwu Ezekeli, nawa chatalishili mudihi? (b) Indi ambuña aNzambi makonu adizilañaku chumanyi kuchimwenu chamulejeluwu Ezekeli?

⁶ Mukanda waEzekeli washimunaña chuma chikwawu chinateli kutukwasha kuhosha chakadi woma. Muchimwenu, Yehova wamwinkeli Ezekeli muvuñilu wakusoneka mukachi nihewulu, asonekamu “ninyikeña, nikuneña, niyayo,” nawa wamulejeli kuwidya, nawu: “Eyi mwana kamuntu, diishaku ivumu deyi, winzeshi nyijiñwa yeyi namukandiwu wakuvuña wunakwinki.” Indi ichi chimwenu chatalishili mudihi? Ezekeli wateleleli kudiza chikupu nsañu yayileña nakushimunayi. Wateleleli kuyitañaña ifuku dejima, kulonda yayilukishi chikupu. Kaprofwetu walumbulwili nindi: “Hinukuwidya. Mukanwa kami watoweli neyi wuchi.” Ezekeli watiyileña kuwaha chikupu kushimwina nsañu yaNzambi hatooka, neyi chatowala wuchi. Welukili nindi kwadiña kukooleka kweneni nankashi kwakumwimenaku Yehova nikukalakala mudimu wamwinkeluwu kudi Nzambi, hela chakwila chumichi chabombelelumu kushimuna nsañu yabulileña kukeña kutiya antu achinchika nyichima.—Tañenu Ezekeli 2:8–3:4, 7-9.

⁷ Ichi chimwenu chikweti chuma chalema chatela kudizawu ambuña aNzambi makonu. Ninetu nawa tukweti nsañu yabulaña kukeñawu kutiya yakushimwina antu abulaña kuhameka ñovu jetu. Hakwila nawu tutwalekuhu kumona mudimu wawakwaKristu wakushimwina neyi himudimu watwinkayi Nzambi, twatela kutwalekahu kutaña nikudiza izu daNzambi. Kwikala nachaaku chakubulaña kudiza mpinji yejima chikutuleñela kubula kwiluka chikupu Izu daNzambi. Komana kwila muwahishaku hela muswejesha kutañaña Bayibolu nikudiza halwenu nehi? Kwila musweja kutoñojokañahu hayuma yimunakutaña nehi?—Masamu 1:2, 3.

Chakutachika Kuhanjeka haBayibolu

8. Njilanyi yinakwashi akwakushimwina aWanta amakwawu kutachika kuhanjeka haBayibolu mumudimu wakushimwina kwitala nikwitala?

⁸ Akwakushimwina amavulu, kukala kweneni kwamonañawu mumudimu wakushimwina kwitala nikwitala kwekala hamazu akutachika nachu kuhosha namwiniitala. Nawa mumaluña amakwawu akushimwina, chakala kutachika kuhanjeka namuntu. Akwakushimwina amakwawu ekalaña akasunuka kuhosha nawantu hetala neyi atachika kuhanjeka kwawu namazu antesha akuloñeshela chadimu kuhiñahu amwinka mwiniitala tilakiti, neyi chinalumbululiwu muchikasha chidi heshina. Mutu watilakiti hela mwevulu wawuwahi wunateli kumuleñela mwiniitala kutiyilila, nawa chikutuleñela kuhosha mukwihihisha muloña wutunendeli nikumwihula lwihu. Tunateli kuhimpa iyi njila kulonda kuleja mwiniitala matilakiti amboka-mboka asatu hela awana nikumwila yatonduhu yinakeñeshiyi. Hela chochu, chikonkwanyi chetu hichidi chakuhana hohu matilakiti hela kuyizatisha hetala didi dejimaku ilaña chidi chakutachika kuhanjeka haBayibolu kukuleñela kutachika kudiza kwaBayibolu.

9. Muloñadi kuloñesha chachiwahi chikwalemena?

⁹ Munateli kuzatisha njila yidi yejima, ilaña kuloñesha chachiwahi kukuyikwasha kuhosha chiwahi nikwikala neyena mumudimu wakushimwina kwitala nikwitala. Payiniya wumu wahosheli nindi: “Nekalaña wamuzañalu neyi niloñesha chiwahi. Chaleñelaña kukeña kuhosha nawantu hayuma yinaloñeshi.” Payiniya mukwawu wahosheli nindi, “Neyi niluka nsañu yidi munyikanda yinakuya nakuhana kudi antu, nekalaña nampwila yakukeña kuyizatisha.” Hela chakwila tunateli kuhetela mukuhituluka wumweneni muyuma yitunakukeña kuya nakuhosha, amavulu chayikwashaña neyi ahitulukamu nezu dahewulu. Kwila mwenimu kwayikwashaña kumukalakela Yehova chikupu.—Akolose 3:23; 2 Timotewu 2:15.

10. Chumanyi chitwatela kwila hakwila nawu kubulakana kwakuya mumudimu wamwiha kwikali kwakuwahi nawa kwakuhetesha?

¹⁰ Kubulakana kwakuwahi kwakuya mumudimu wamwiha kwatuleñelaña kuzata chikupu nikwikala namuzañalu mumudimu wakushimwina kwitala nikwitala. Neyi nsona yefuku yinakuhosha hamudimu wakushimwina, mwatela kuyitaña nikuhanjekahu mukwihihisha. Hela chochu, mana kwetu wunakulombola kubulakana kwakuya mumudimu wamwiha watela kwikalaku nampinji yakuhanjeka hela kumwekesha chimwenu chapela chinesakani neluña dakushimwinamu hela kuhanjeka hansañu yikwawu yinateli kuzatishawu mumudimu wakushimwina hanodu ifuku. Ichi chikukwasha ejima anawanikiku kushimwina chachiwahi. Kuhitila mukuloñeshela chadimu chachiwahi, aeluda niamakwawu alombolaña iku kubulakana anateli kulombola chiwahi nikumanisha mumpinji yashimunawu.—Aroma 12:8.

Kuwaha Kwafumaña Mukutiyilila

11, 12. Indi kutiyilila nawushona kwatukwashaña ñahi kushimwina antu nsañu yayiwahi? Hanenu yakutalilahu.

¹¹ Bayi neyi kuloñesha chachiwahi hohu dikwatukwashaña kutachika kuhanjeka haBayibolu nikushika hanyichima yawantu mumudimu wamwihaku, ilaña nikukeña chikupu antu kwatukwashaña. Njila yimu yitwamwekeshelañamu kukeña kweniku yidi yakuhitila mukutiyilila. Nkoñi wendaña wahosheli nindi: “Kwikala awunda nikutiyilila kudi antu kwayileñelaña kutiyilila kunsañu yayiwahi nawa hinjila yayiwahi yakumwekeshelamu kukeña chikupu.” Eñañi, kutiyilila antu nikuyimwekeshela wushona hayuma yinakuhoshawu kunateli kuyileñela kwikala akasunuka kuhanjeka hansañu yamuBayibolu, neyi chinamwekeshi chakutalilahu chinalondeluhu.

¹² Mukanda wasonekeleluwu muntu wumu ilaña wakeñeleñawu nawu awitañi kudi antu amavulu muchipapilu chansañu chaLe Progrès Saint-Étienne, muFrance, mumbanda wumu walumbulwili chamuhempwiluwu kudi antu ayedi adondomweneni hachinsu chindi hanyima yakufwisha mwanindi wamumbanda wadiña natukweji tusatu. Wasonekeli nindi: “Nashikeneni dakuyiluka nami hiyaYinsahu jaYehova. Nakeñeleña kuyihaña, ilaña namweni broshuwa yadiña nakuhanawu. Yadiña nakuhosha hamuloña wetejelayi Nzambi makabi. Dichi nayitambwilili kulonda kutadikisha nsañu yahosheleñawu. . . . A Yinsahu ashakamini mwitala kubadika hadi ora yimu. Adiña nakuntiyilila nawushona chikupu, nawa chelili hiyakuya, nakasunukili chakwila netejeli kwinza nakuhempula cheñi. (Aroma 12:15) Chimwahitili mafuku, iwu mumbanda wetejeli kudiza Bayibolu. Tunateli kudizilaku yuma yayivulu kuyuma yanukiliyi iwu mumbanda hampinji yamuhempwiluwu katachi, hanukili yuma yahosheli ana ahelaku, ilaña wanukili chiyadiña nakumutiyililawu.

13. Tunateli kuhimpa ñahi njila yakushimwinamu nsañu yayiwahi kudi antu yitwabulakanaña?

¹³ Neyi tutiyililaña nawushona, tukuleñela antu kutuleja muloña wunakukeñelawu Wanta. Ichi chatuleñelaña kuyishimwina nsañu yayiwahi. Chakadi nikujina, mweluka nenu akwakushimwina akuluka yitembi kakavulu atiyililaña chikupu. (Yishimu 20:5) Amwekeshaña kukeña chikupu kudi antu abulakanañawu mumudimu wakushimwina. Bayi neyi asonekaña hohu majina nimakeyala awuku ilaña akeñaña kwiluka yuma yakeñañawu nikukankila kwawu. Neyi muntu yashimuna chuma chabulaña kutiyishishayi, ayaña nakusandujolahu, kufumahu afuntaña nakumulumbulwila nsañu yinasandujoluwu. Kufwana kapostolu Pawulu, ahimpaña njila yakushimwinamu nsañu yaWanta kwesekeja nawantu abulakanañawu. (Tañenu 1 Akorinda 9:19-23.) Kukeña kwamuchidiwu kwakokolaña antu kunsañu yayiwahi nikumwekesha chikupu “luwi lwaNzambi yetu lwawushona.”—Luka 1:78.

Twalekenuhu Kwikala naYililu Yayiwahi

14. Tunateli kumwekesha ñahi yililu yaYehova hampinji yitunakushimwina?

¹⁴ Yehova watulemesha hamuloña wakutwinka wuswa wakudifuukwila. Hela chakwila Nzambi hiMukwakubadika, hakanjikijaña muntu nindi yamukalakeluku ilaña wakokolaña antu hamuloña wakuyikeña, nawa wakiswilaña antu atambwilaña nakuhameka yuma yayiwahi yayiloñeshelañayi. (Aroma 2:4) Hamu neyi akwakukalakala indi, twatela kwikala adiloñesha mpinji yejima kushimwina nsañu yayiwahi munjila yatelela naNzambi yetu waluwi. (2 Korinda 5:20, 21; 6:3-6) Muniyi njila, twatela kutwalekahu kwikala nayililu yayiwahi kudi antu amwiluña detu dakushimwinamu. Chumanyi chikutukwasha kwila mwenimu?

15. (a) Indi Yesu wayilejeli apostolu indi kwiladi neyi antu akaana nsañu yayiwahi? (b) Chumanyi chikutukwasha kutwalekahu kukeñakeña antu atela?

¹⁵ Yesu walejeli atumbanji twindi kubula kusweja kwakamena neyi antu amakwawu akaana nsañu yayiwahi, ilaña wayilejeli kutwalekahu nakukeña antu atela. (Tañenu Matewu 10:11-15.) Kwimika yikonkwanyi yitunateli kutwesha kukutukwasha kuwana atela. Mana kwetu wumu wadesekejeli namuntu wendaña nakukeñakeña manji, wuru hela malola amakwawu awuseya. Wahoshaña nindi, “Wafwilaña kuwana muntu watela wakeñaña chalala. Ichi chatela kumuletela muzañalu chikupu neyi chatiyañayi mukwakukeña wuru.” Mana kwetu mukwawu wukweti chikonkwanyi “chakuwana muntu mulungu nimulungu wukumwekesha mpwila hampinji yakumushimwinayi katachi nakufuntilaku mumafuku antesha kulonda kukolesha muntu wunamwekeshi mpwila.” Akwakushimwina amakwawu afwilaña kutaña nsona yimu neyi chinatwesheki kudi mwiniitala wudi wejima. Chikonkwanyi chamuchidinyi chachiwahi chimwatela kwimika?

16. Yumanyi yatuleñelaña kutwalekahu kushimwina?

¹⁶ Kutwesha kukalakala mudimu wakushimwina kwitala nikwitala hikwashindamena hohu hakwiteja kwawantu amwiluña dakushimwinaku. Eñañi, mudimu wakushimwina wakoñaña mudimu weneni wakupulwisha antu ashinshika, ilaña wakoñaña cheñi yuma yikwawu yalema. Mudimu wakushimwina wawakwaKristu watwinkaña kukooleka kwakumwekesha kukeña kudi Yehova. (1 Yowanu 5:3) Watuleñelaña kubula kwikala namuloña wamashi. (Yililu 20:26, 27) Wasoñamishaña antu abula kumwiluka Nzambi nawu, “mpinji yakusompeshayi [Nzambi] yinashiki dehi.” (Chimwekeshu 14:6, 7) Chabadika nankashi, kuhitila mukushimwina nsañu yayiwahi, ijina daYehova anakudihameka mwahita iseki dejima. (Masamu 113:3) Dichi, hela chakwila antu akwiteja hela nehi, twatela kutwalekahu kushimwina nsañu yaWanta. Eñañi, ñovu jetu jakushimwina nsañu yayiwahi hichuma chachiwahi nankashi kumesu aYehova.—Aroma 10:13-15.

17. Katataka antu eluki chumanyi?

¹⁷ Hela chakwila antu amavulu hiyanakulemesha mudimu wetu wakushimwinaku, katataka atachiki kuwulemesha. (Matewu 24:37-39) Yehova wamulejeli Ezekeli nindi hampinji yakashikijewa wunsompeshi wadiña nakushimwinayi, mutaña waIsarela wadikaña “akeluka nawu, Twadiña nakaprofwetu.” (Ezekeli 2:5) Munjila yoyimu, hampinji yakaletayi Nzambi wunsompeshi windi hakanu kaayi kamakonu, antu akeluka nawu nsañu yadiña nakushimwinawu aYinsahu jaYehova mumaluña mwawanikaña antu amavulu, kwitala nikwitala yafumini kudi Nzambi walala, Yehova, nawa mwalala aYinsahu akalakeleña neyi akwakumwimenaku. Kwenoku kukooleka kutukweti kwakwimenaku ijina dindi nikushimwina nsañu yindi muyinu mpinji yakala! Kuhitila muwukwashu windi, tutwalekenuhu kushinda kukala kwamumudimu wakushimwina kwitala nikwitala.

Mukwakula Nenudi?

• Tunateli kushimwina ñahi chakadi woma?

• Chumanyi chinateli kutukwasha kutachika kuhanjeka haBayibolu mumudimu wakwitala nikwitala?

• Tunateli kumwekesha ñahi kukeña antu chikupu?

• Chumanyi chikutukwasha kwikala nayililu yayiwahi kudi antu amwiluña detu dakushimwinamu?

[Chikasha/Mwevulu wudi hefu 17]

Njila Yakutachikilamu Kuhanjeka haBayibolu

Chakutachika:

◼ Hanyima yakwimusha mwiniitala, munateli kumwinka tilakiti nikuhosha nenu, “Chuma chinaleñeli kuyihempula dalelu muloña nakukeña kuhanjeka nenu haniyi nsañu yalema.”

◼ Hela munateli kumwinka tilakiti nakuhosha nenu, “Nayendeli dalelu muloña nakukeña kwiluka chimwatoñojokaña haniyi nsañu.”

Neyi yeteja tilakiti:

◼ Chakadi nikunata mpinji, mwihulenu mwiniitala chinakutoñojokayi hamutu watilakiti.

◼ Tiyililenu nakashinshi, kulonda mwiluki chinakutoñojokayi mwiniitala. Muhamekenu hamazu akuhoshayi nawa yibombelenu mukuhanjeka kwenu.

Hakutwalekahu kuhanjeka:

◼ Tañenu nikuhanjeka hansona yimu hela jajivulu, nakwesekeja nakuhanjeka kwenu nayuma yinakukeñayi niyinakankiliyi.

◼ Neyi yamwekesha mpwila, mwinkenu mukanda nawa neyi chinatwesheki lumbululenu chakudiza Bayibolu. Loñeshenu kulonda mwakafuntiluku.

‘Nzambi Diyi Wakulishaña’!

“Watumbaña hela watukumwinaña hiyalemaku; walema diyi Nzambi wakulishaña.”—1 AKORINDA 3:7.

1. Mudimwinyi wutwekala ‘akwakukalakala ambala aNzambi’?

“TUYAKWAKUKALAKALA ambala aNzambi.” Ichi dichalumbulwiliyi kapostolu Pawulu mudimu wadimena wutwatela kukalakala wejima wetu. (Tañenu 1 Akorinda 3:5-9.) Mudimu wateneneñayi Pawulu himudimu wakwilisha atumbanji. Wawesekejeli nakukuwa mbutu nikuyitukumwina. Hakwila nawu tutweshi iwu mudimu walema, twatela kulomba wukwashu waYehova. Pawulu watwanukishaña nindi “Nzambi [diyi] wakulishaña.”

2. Muloñadi kwiluka netu ‘Nzambi diyi wakulishaña’ chikwatukwashaña kwikala nammwenu yayiwahi hamudimu wetu wakushimwina?

² Iwu wunsahu walala watuleñelaña kwikala nammwenu yayiwahi hamudimu wetu wakushimwina. Tunateli kuzata nañovu mumudimu wetu wakushimwina nikudizisha, ilaña Yehova diyi watela kuhamekewa neyi chakwila muntu yekala kambanji wamuha. Muloñadi? Muloña hela chakwila tuzata nañovu chikupu, hitunateli kwiluka muntu chekalañayi kambanjiku, nawa hitukweti ñovu yakwilukaku. Mwanta Solomoni wahosheli chachiwahi hasonekeliyi nindi: “Hiweluka nimudimu waNzambi welaña yuma yejimaku.”—Mukwakutaŋisha 11:5.

3. Kudifwananyi kwekala hamudimu wakukuwa mbutu, nikwilisha atumbanji?

³ Komana kubula kwiluka muntu chekalañayi kambanji kunateli kutwileñela kutiya kutama namudimu wetu? Inehi. Ilaña, kwatwileñelaña kwikala amuzañalu. Mwanta Solomoni wahosheli nindi: “Habudidi tumbaña mbutu jeyi, nihamelela bayi wulekesha chikasa cheyuku, muloña hiwuneluki jakalumbulukaku, hela iji, hela iji, indi kwiji jejima jakawahila hamu.” (Mukwakutaŋisha 11:6) Mwalala, kutalisha kukutumba mbutu, hitwelukaña jakabalukaku. Kudi yuma yayivulu yitwabulaña kwiluka. Hohamu nimudimu wetu wakwilisha atumbanji. Yesu walumbulwili ichi chikuma muyishimu yiyedi yatwisonekeleluwu mukapetulu kamuchiwana kaNsañu Yayiwahi yaMaku. Tushinshikenu hayuma yitwatela kudizila kuniyi yishimu yiyedi.

Maseki Ashiyashana

4, 5. Mukwihihisha, lumbululenu chishimu chaYesu chamukwakukuwa wakuwaña mbutu.

⁴ Neyi chasonekawu haMaku 4:1-9, Yesu walumbulwili hadi mukwakukuwa mbutu wakuwili mbutu, jaholokeleli hamaseki ashiyashana: “Tiyililenu. Talenu, mukwakuwa wayili nakukuwa. Chakuwiliyi, jikwawu jaholokeleli kunsa yanjila, atujila hiyakwinza nakujidya. Jikwawu jaholokeleli hamalola habulili maseki amavulu, jibaluka nihohenohu, muloña habulili maseki amavulu kwishina; itañwa chidinashiki mwiwulu hijikubabika, hijikuuma, muloña jabulili nyiji. Jikwawu jaholokeleli mukachi kanyiña, oyu nyiña hiyikukula, hiyikujika mbutu, hijasoñeluku. Jikwawu jaholokeleli hamaseki amawahi, hijikusoña nakukula nakusemunwina; jasoñeli jikwawu makumi asatu, jikwawu makumi atanu nadimu, jikwawu nkulakaji.”

⁵ Mumaluña amakwawu kakavulu mbutu akuwaña jakukuwa. Mukwakukuwa mbutu wavuñilaña mbutu jindi hehina hela mukadibañu nakujikuwa chovu-chovu. Dichi munichi chishimu, mukwakukuwa mbutu hajikuwaña mumushikila hamaseki ashiyashanaku. Ilaña, mbutu jakuwañayi jashikenaña hamaluña ashiyashana.

6. Indi Yesu walumbulwili ñahi chishimu chamukwakukuwa?

⁶ Hitwatela kuboka mwatalisha ichi chishimuku. Yesu walumbulwili, neyi chasonekawu haMaku 4:14-20 nawu: “Mukwakukuwa wakuwaña mazu. Awa adi kunsa yanjila kwanakuwuwu mazu, wowu akwila chanatiyuwu, hohenohu Satana hakwinza nakufumisha mazu anakuwuwu mudi wena. Chochimu ninawa anakuwuwu hadi malola, wowu akwila chanatiyuwu mazu, hiyakuyitambula namuzañalu hohenohu. Mudi aweni muji mwosi, ilaña akukakelamu chantesha; nkumininaku chikukwinza yihuñu, hela kuyikabishila nsañu yamazu, hiyakudimbuka hohenohu. Amakwawu anakuwuwu munyiña, wowu akutiya mazu; kwakama kwamakonu, nikudimbana kwamaheta, nikufwila yuma yikwawu, hikukwiñilamu, hikukuvumbisha mazu, hiyakubula kusoña. Awa akuwiluwu hamaseki amawahi, wowu akutiya mazu, hiyakuyitambula, hiyakusoña awa makumi asatu, awa makumi atanu nadimu, awa nkulakaji.”

7. Indi mbutu nimaseki ashiyashana emenañaku chumanyi?

⁷ Ilukenu nenu Yesu hahosheli nindi akuwileña mbutu jashiyashanaku. Ilaña, wahosheli hamuchidi wumu wambutu waholokeleli hamaseki ashiyashana, nawa mbutu yakulili mujila yashiyashana. Muchidi watachi wamaseki akola, hela ominina; amuchiyedi hadi malola; amuchisatu hadi nyiña; nawa amuchiwana amawahi, asoñaña chachiwahi. (Luka 8:8) Indi mbutu hichumanyi? Hinsañu yaWanta yekala Mwizu daNzambi. (Matewu 13:19) Indi maseki ashiyashana emenañaku chumanyi? Emenañaku antu akweti nyichima yashiyashana.—Tañenu Luka 8:12, 15.

8. (a) Indi mukwakukuwa mbutu nakwimenakwinyi? (b) Muloñadi antu chatiyililañawu kumudimu wakushimwina Wanta munjila yashiyashana?

⁸ Indi mukwakukuwa mbutu nakwimenakwinyi? Nakwimenaku antu jaNzambi, anakushimwina nsañu yayiwahi yaWanta. Kufwana Pawulu niApolosi, atumbaña nikutukumwina. Ilaña hela chakwila azataña nañovu, yuma yafumañamu yekalaña yashiyashana. Muloñadi? Muloña wakwambuka kwanyichima yawantu atiyaña mazu. Munichi chishimu, mukwakukuwa mbutu helukaña yuma yafumañamuku. Awa himazu akuzañalesha chikupu, sweje-e kudi amana kwetu niahela ashinshika anakalakali hayaaka yayivulu, ilaña himwafumaña yuma yayivuluku!a Muloñadi mazu wenawa chiyanekalili akuzañalesha?

9. Mazwinyi alala akukolesha akonkomweneniyi kapostolu Pawulu niYesu?

⁹ Kashinshi kamukwakukuwa mbutu hitwakilukilaña kuyuma yafumañamuku. Pawulu wakunkiluku kunichi chikuma hampinji