Bayi Mwiteja Chuma Chidi Chejima Chiyambuli Kudi Yehovaku

“Tondenu lelu imukukeña kukalakela.”—YOSH. 24:15.

ESEKENU KWAKULA

Chumanyi chimwatela kwila kulonda mudimu wakumujimba wubuli kuyiluwañesha?

Munateli kwesekeja ñahi yuma kutalisha hayisela nimpinji yakunooka?

Neyi muntu wamuchisaka yaleka kumuzatila Yehova, munateli kuumika ñahi chineñi?

1-3. (a) Muloñadi Yoshuwa chekalilayi chakutalilahu chachiwahi chawantu afuukwiluhu chiwahi muchihandilu chawu? (b) Chumanyi chitwatela kwanuka neyi hitukufuukulahu?

IZU dakwila nawu “tondenu” dabadika kulema nankashi. Muntu wunakukeña kufuukulahu watoñojokaña hanjila jikwawu nawa wekalaña nañovu yakwila munakumuleja muchima windi. Chakutalilahu: Fwikijenu iyala wunakwenda munjila nawa yashika nihamaakenu njila jambuka nikwambuka. Njila yimu yidihi yikuyayi? Neyi neluki kunakuyayi dikwila nawu njila yimu yikumushikija kunakuyayi ilaña yikwawu yikumutwala kwacheñi.

² MuBayibolu mwekala yakutalilahu yawantu akoñeli mwenimu. Chakutalilahu, Kena wateleleli kufuukulahu kusañumuna ndulu yindi hela kuyifwomona. (Kutach. 4:6, 7) Yoshuwa wateleleli kufuukulahu kumukalakela Nzambi walala hela kudifukula kudi anzambi akutwamba. (Yosh. 24:15) Yoshuwa wadiña nachikonkwanyi chakukundama kwakwihi naYehova, dichi watondeli njila yamukwashili kukakela kudi Yehova. Kena niyena wadiña nachikonkwanyi chochimu nawa watondeluhu njila yamwambwili kudi Yehova.

³ Mpinji yikwawu, anetu tunateli kufuukulahu yuma yalema kulonda twikali munjila yaloña. Neyi chuma chamuchidiwu chiyimwekena, mwatela kwanuka kumunakuya hela chikonkwanyi chenu, dikwila nawu kumulemesha Yehova muyuma yejima yimwelaña nikutondolwela chuma chejima chinateli kuyambula kudi Yehova. (Tañenu Aheberu 3:12.) Muchinu chibaaba nichinalondeluhu tukushinshika hayuma yitanu nayiyedi yamuchihandilu yitwatela kubabala nayu kulonda yibuli kutwambula kudi Yehova.

NYIDIMU NIKUZATA

4. Muloñadi kuzata mudimu chikwalemena?

⁴ AkwaKristu akweti mudimu wakudakamena aweni niyisaka yawu. Bayibolu yahosha nawu neyi muntu nakukeña wanyi kukwasha amwitala dindi, nabadiki kutama muntu wabula kwitiya. (2 Tesa. 3:10; 1 Tim. 5:8) Eñañi, mudimu wakumujimba walema muchihandilu, ilaña neyi mubula kubabala, wunateli kuyambula kudi Yehova. Munjilanyi?

5. Yumanyi yalema yitwatela kwanuka hampinji yitunakukeña mudimu?

⁵ Fwikijenu munakukeña mudimu. Neyi mwashakamaña mwituña mwakala kuwana nyidimu, munateli kuholokela mukweseka kwakwiteja mudimu wudi wejima wunateli kumwekana. Indi neyi mudimu wumunakukeña kuzata hiwunesekani nanshimbi jamuBayiboluku? Indi neyi ndandanda yenu hela mudimu wakwenda wunakuyileñela mubuleña kuya kukupompa kwawakwaKristu hela kushiya chisaka chenu hadi mpinji yeneni? Komana mukwiteja iwu mudimu nakutoñojoka nenu mudimu wamuchidiwu wunawahi kubadika kubula mudimu? Anukenu nenu, neyi mufuukula mwaheña mukudambula kudi Yehova. (Heb. 2:1) Hela chakwila munakukeña mudimu indi kwiji munakutoñojoka kuhimpa mudimu wenu, munateli kufuukulahu ñahi chachiwahi?

6, 7. (a) Yumanyi yiyedi yatela kuleñela muntu yatachiki kuzata mudimu wakumujimba? (b) Chikonkwanyi chimu chidihi chikuyikundamisha kwakwihi naYehova, nawa muloñadi?

⁶ Neyi chashimunawu hakusambila, ilukenu kumunakuya. Dihulenu nenu: ‘Muloñadi chinnakukeñela mudimu?’ Neyi mwamonaña mudimu wakumujimba nenu wakudikwasha nachu enu aweni nichisaka chenu hakuzata mudimu waYehova, Yehova wakayikiswila. (Mat. 6:33) Yehova weluka chatela kuyikwashayi neyi mudimu wumana hela neyi yuma yikala. (Isa. 59:1) “Weluka kupulwisha akwakumwakama mukweseka.”—2 Pet. 2:9.

⁷ Indi neyi munakukeña kwiñila mudimu kulonda mwikali asamaheta? Hadaha munateli tuhu nikuheta. Hela chochu, neyi muheta, anukenu nenu ‘maheta’ amuchidiwu anateli kuyisha mukukala kweneni nankashi. (Tañenu 1 Timotewu 6:9, 10.) Kusweja kusha muchima hamaheta nimudimu jikuyambula kudi Yehova.

8, 9. Chumanyi chatela kwilukawu anvwali kutalisha hamudimu wakumujimba? Lumbululenu.

⁸ Neyi mudi anvwali, ilukenu nenu anyanenu adizilaña kuyuma yimwafuukulaña. Chumanyi chamonañawu anyanenu nawu dichimwalemesha, mudimu wumwazataña tahindi wubwambu wenu naYehova? Neyi amona nawu mwalemesha nankashi kuya mpuhu, kutuumbakana nimaheta muchihandilu chenu, komana atela kuyilondela muniyi njila yatama? Komana akuleka kuyilemesha enu anvwali jawu? Kansi wumu mukwaKristu wahosheli nindi: “Nanukaña nankashi kufuma tuhu kunyima nami, atata asha nankashi maana kumudimu wawu. Hakusambila, chamwekeneña neyi azatileña nañovu muloña akeñeleña chisaka chetu chikali nachihandilu chachiwahi. Akeñeleña nawu tushakameña chiwahi. Ilaña chayinu mpinji yuma yinahimpiki. Azataña chikupu nawa chatela alandeña hohu yuma yitunakukeña, alandaña yuma yawuseya nankashi. Chafumamu, antu amavulu atwiluka nawu twekala namali nankashi chatela atwiluki nawu twakoleshaña antu kufwila yuma yakuspiritu. Nateli kutiya kuwaha nankashi neyi atata azataña nañovu kulonda akwasheña chisaka kukundama kwakwihi naYehova chatela azateña nañovu nakuleta mali.”

⁹ Enu anvwali, bayi mudambula kudi Yehova kuhitila mukusha maana nankashi kumudimu wenuku. Mwekeshenu kudi anyanenu nenu mwakuhwelela chikupu nenu maheta akuspiritu diwu abadika kulema bayi maheta akumujimbaku.—Mat. 5:3.

10. Yumanyi yatela kutoñojokahu kansi wunakukeña kwiñila mudimu?

¹⁰ Neyi wuchidi kansi wunakutoñojoka kuzata mudimu, wunateli kutonda ñahi njila yayiwahi? Neyi chitunahanjekuhu dehi, mukufuukulahu chiwahi kwesekeja nayuma yimunakukeña kwila muchihandilu chenu. Komana mudimu wumunakukeña kudiza nikuzata wakayikwasha kuzata chikupu mudimu waWanta tahindi wakayambula kudi Yehova? (2 Tim. 4:10) Komana mwakeñaña kwimbujola antu amukaayi azañalalaña hohu neyi adi namali amavulu? Tahindi mukwimbujola chikuhwelelu chaDavidi wasonekeli nindi: “Nadiñi kansi, hanu nakula dehi nankashi, kanda nimonañahu dehi hashiyilawu muntu waloña, hela anyanindi nakulomba yakudyaku”? (Mas. 37:25) Anukenu nenu, njila yimu yikuyambula kudi Yehova nawa njila yikwawu yikuyilombola kuwumi wawuwahi. (Tañenu Yishimu 10:22; Malaki 3:10.) Njila yimu yidihi yimukutonda?a

MPINJI YAKUNOOKA NIYISELA

11. Indi Bayibolu yahosha nawudi kutalisha hampinji yakunooka niyisela, nawa chumanyi chitwatela kwanukaña?

¹¹ Bayibolu hiyakanisha kuhemaku, nawa hiyahosha nawu kuhema yisela nikwikala nampinji yakunooka kwamanishaña hohu mpinjuku. Pawulu wamusonekeleli Timotewu nindi: ‘Kukolesha mujimba kwawahishaña hakapinji kantesha.’ (1 Tim. 4:8) Bayibolu yahosha cheñi nawu ‘kwekala mpinji yakuseha’ ‘nimpinji yakuhañana’ nawa yatulejaña kwikala nampinji yeneni yakunooka. (Mukwa. 3:4; 4:6) Neyi kubabala nehi mpinji yakunooka niyisela yinateli kuyambula kudi Yehova. Munjilanyi? Wubanji weneni washindamena hayuma yiyedi, dikwila nawu muchidi wayisela yimwatondaña nimpinji yimwamanishilaña kuniyi yisela.

12. Yumanyi yimwatela kwiluka kutalisha hampinji yakunooka niyisela yimwatondaña?

¹² Chatachi, ilukenu muchidi wayisela. Ilukenu nenu munateli kuwana mpinji yayiwahi yakunooka niyisela yayiwahi. Chakadi nikujina, yisela yayivulu yiduku yahamekaña yuma yahelayi Nzambi, chidi neyi madombu, kupanda niyililu yawuvumbi. Dichi, mwatela kwiluka chiwahi mpinji yimwanookaña niyisela yimwahemaña. Komana iyi yisela yinateli kuyiluwañesha hela kuyikwasha? Komana yayileñelaña mwikali asamadombu, kudibecha kwawubanji hela kwikala nachaambu chanyuza? (Yish. 3:31) Komana yayimanishilaña mali ejima? Komana yatela kutuntwisha amakwawu? (Rom. 14:21) Iyi yisela nimpinji yakunooka yayileñelaña kwikala namabwambu amuchidinyi? (Yish. 13:20) Komana yayileñelaña mwikali nampwila yakukoña yuma yatama?—Yak. 1:14, 15.

13, 14. Yumanyi yimwatela kutoñojokahu chikupu kutalisha hampinji yimwazatishaña kuyisela nihakunooka?

¹³ Toñojokenu cheñi hampinji yimwamanishilaña kuyisela nihampinji yakunooka. Dihulenu nenu, ‘Komana namanishilaña mpinji yeneni kuyisela chakwila nashalaña hohu nampinji yantesha yakwila yuma yakuspiritu?’ Neyi mumanishila mpinji yeneni kuyisela nihampinji yakunooka, himunateli kudiluñisha chikupuku. Antu azatishaña chachiwahi mpinji yawu kuyisela nikunooka adiluñishaña chikupu. Muloñadi? Muloña aneluki nawu asambila ‘kuzata yuma yabadika kulema,’ dichi hiyadakamenaña hakuhema yisela hela hampinji yikunookaku.—Tañenu Afwilipi 1:10, 11.

¹⁴ Hela chakwila tunateli kutiya kuwaha kumanishila mpinji yeneni kuyisela, kulondela iyi njila kunateli kuyambula kudi Yehova. Ichi dichuma chamumwekeneni muhela wejina daKim wudi nayaaka 20. Wahosheli nindi, “Nayileña kuyidika yejima. Kwekalileña yidika yamaneni mulungu wudi wejima haChitanu, Hamposu niHamulungu. Ichi neluki nami kudi yuma yayivulu yalema nankashi yinatela kwila. Chakutalilahu, chineli nidi payiniya nahindukaña na 6 koloku nakuya mumudimu wakushimwina, dichi hinayaña kuyidika nakushika kuma 01 hela 02 yantetemenaku. Neluka nami yisela yejima yatama wanyi ilaña neyi kubabala nehi yinateli kutuluwañesha. Neyi chochitwazataña nyidimu yejima, twatela kwiluka mpinji yakuhema yisela yeniyi.”

15. Anvwali anateli kukwasha ñahi anyanawu kulonda adiluñisheña yisela yayiwahi?

¹⁵ Anvwali akweti mudimu wakuloñeshela anyanawu niaweni yuma yakumujimba, yakuspiritu nimuyitoñojoka. Chumichi chinabombelumu kuwanaku mpinji yakuhema yisela nikunooka. Neyi mudi anvwali, bayi mwikala nachaaku chakumonaña yisela yejima nimpinji yakunooka nenu yatamaku. Hampinji yoyimu, mwatela kwiluka yisela yinateli kuyiluwañesha. (1 Kor. 5:6) Neyi mutoñojokahu chikupu, munateli kwiluka mpinji yayiwahi yakunooka niyisela yinateli kuzañalesha chisaka chenu.b Neyi mwila mwenimu, enu nianyanenu mukutonda njila yikuyileñela mukundami kwakwihi naYehova.

WUBWAMBU WAMUCHISAKA

16, 17. Yumanyi yatama yaneñeshaña nankashi anvwali amavulu, nawa tuneluki ñahi netu Yehova weluka chineñi chatiyañawu?

¹⁶ Wubwambu wekala hakachi kanvwali namwana wekala wakola nankashi chakwila Yehova wazatishili iwu wubwambu hakulumbulula kukeña kwakeñayi antu jindi. (Isa. 49:15) Chakataña kumuchima nankashi neyi muntu wamuchisaka imwakeña yaleka kumuzatila Yehova. Muhela wumu wukweti mwana wahañiluwu wahosheli nindi, “Naneñeli nankashi. Natachikili kutoñojoka nami, ‘Muloñadi chinalekeliyi kumuzatila Yehova?’ Naditoñesheli nankashi nawa natachikili kudinkamu muloña.”

¹⁷ Yehova welukaña chineñi chimwatiyaña. Yehova ‘watiyili kumuchima kutama’ hampinji yadikañiluwu antu atachi amuchisaka chindi niantu amavulu adikañili adiñaku henohu Dibaji kanda dinzi. (Kutach. 6:5, 6) Antu abula kumonahu dehi kukala kwamuchidiwu hiyanateli kwiluka chichakataña kumuchimaku. Hela chochu, mukuluwañesha nankashi neyi mwiteja yililu yatama yamuntu wamuchisaka wunahañuwu yiyaambuli kudi Yehova. Hanu dinu, munateli kuumika ñahi chineñi chimukutiya neyi muntu wamuchisaka yaleka kumuzatila Yehova?

18. Muloñadi anvwali chatela kubulilawu kudinka muloña neyi mwanawu yaleka kumuzatila Yehova?

¹⁸ Bayi mudinka muloña hayuma yinamwekanuku. Yehova wenka muntu wudi wejima wuswa wakufuukulahu nawa muntu wejima wamuchisaka wadihana nawa wapapatishewa ‘wakasenda chiteli’ chindi. (Ŋal. 6:5) Yehova wenkaña muloña mukwakuvulumuna bayi enuku. (Ezek. 18:20) Cheñi, bayi mwinka antu acheñi muloñaku. Lemeshenu ntanjikilu yaYehova yakubabeshelamu antu. Dikañenu naDiyabolu bayi nawatubiña azataña nañovu kulonda akiñi chipompeluku.—1 Pet. 5:8, 9.

19, 20. (a) Indi anvwali akweti anyana ahañewa atela kwiladi kulonda omiki chineñi? (b) Chumanyi chatela kuchiñejawu anvwali?

¹⁹ Munjila yikwawu, neyi mumuhembela Yehova nkunyi, mukudambula kudi yena. Eñañi, muntu wamuchisaka watela kwiluka nindi mwamukeña Yehova kubadika yuma yejima nichimwakeña antu amuchisaka. Dichi hakwila nawu muumiki, koleshenu wuspiritu wenu. Bayi mudambula kudi amana kwenu niahela akwaKristu ashinshikaku. (Yish. 18:1) Lombenu kudi Yehova hakukala kwejima kumukweti. (Mas. 62:7, 8) Bayi muwana mwakuleyela kulonda mutachiki kudikunda namuntu wamuchisaka wahañawu, chidi neyi kuditemeshela nsañu hanshiña hela haIntaneti. (1 Kor. 5:11) Dikitenuña chikupu nyidimu yakuspiritu. (1 Kor. 15:58) Muhela atenawu hewulu nindi, “Ichi neluki nami natela kutwalekahu kudikita mumudimu waYehova nawa natela kwikala wakola kuspiritu kulonda chakafuntayi mwanami kudi Yehova, nakatweshi kumukwasha.”

²⁰ Bayibolu yahosha nawu “kukeña kwachiñejaña yuma yejima.” (1 Kor. 13:4, 7) Hichatamaku kutoñojoka nenu ifuku dimu muntu imwakeña wahañewa wakafunta. Chaaka nichaaka, akwakuvulumuna amavulu abalumukaña mumuchima nakufunta cheñi mukuloñesha kwaYehova. Neyi abalumuka mumuchima, Yehova hayihembelaña nkunyuku. Ilaña, “waanakenaña.”—Mas. 86:5.

FUUKULENUHU CHACHIWAHI

21, 22. Chumanyi chimunafuukuluhu kwila kutalisha hawuswa wumukweti wakudifuukwila?

²¹ Yehova wenka antu jindi wuswa wakudifuukwila aweni. (Tañenu Kuhituluka 30:19, 20.) Ichi chinatalishi mukwila nawu tukweti mudimu wakufuukulahu chachiwahi. MukwaKristu wudi wejima watela kudihula nindi: ‘Nidi munjila yamuchidinyi? Komana neteji mudimu nikuzata, yisela nimpinji yakunooka hela wubwambu wamuchisaka kuñambula kudi Yehova?’

²² Yehova watwalekañahu kukeña antu jindi. Tunateli hohu kudambula kudi Yehova neyi tutonda njila yaheña. (Rom. 8:38, 39) Ilaña chumichi bayi chitumwekenaku. Dikasenu mumuchima wenu kulonda mubuli kwiteja chuma chidi chejima chiyambuli kudi Yehova. Chibaaba chinahiñuhu chikuhosha hayikuma yikwawu yiwana yikuyikwasha kudikasa mumuchima wenu.

[Tumazu twaheshina]

[Mwevulu wudi hefu 14]

Yisela yayiwahi nikuyihema mumpinji yashikila yazañaleshaña

[Mwevulu wudi hefu 16]

Hichatamaku kutoñojoka nenu ifuku dimu muntu imwakeña wahañewa wakafunta kudi Yehova

Twalekenuhu Kukundama Kwakwihi Nayehova

“Kundamenu kwakwihi naNzambi, niyena wukukundama kwakwihi nanenu.”—YAK. 4:8.

MUNATELI KULUMBULULA?

Munjilanyi yayiwahi mutwatela kuzatishila yuma yayiha yinakutuñatuñawu nikukola kumujimba?

Tunateli kutondolwela ñahi chaaku chakusweja kukeña mali nikudinka wanta?

Tunateli kukundama ñahi kwakwihi naYehova?

1, 2. (a) Satana wukweti ‘maana’ amuchidinyi? (b) Chumanyi chikutukwasha kukundama kwakwihi naNzambi?

YEHOVA NZAMBI waleñeli antu nampwila yakukeña kukundama kwakwihi nayena. Ilaña Satana wakeñaña tutoñojokeña neyi chatoñojokañayi nindi hitwakeñaña wukwashu waYehovaku. Iku dikutwamba kwatwambañayi Satana kufuma tuhu hampinji yamudimbiliyi Evu mwitempa daEdeni. (Kutach. 3:4-6) Kufuma tuhu hayina mpinji, antu amavulu dichatoñojokañawu.

² Etu hitunakukeña kufwa mumuhetu waSatanaku. “Muloña hitunayambi maaninduku.” (2 Kor. 2:11) Satana wafwilaña kutwambula kudi Yehova kuhitila mukutuleñelaña tufuukuleña mwaheña. Ilaña neyi chitwadizili muchibaaba chinafumuhu, tunateli kufuukulahu chachiwahi kutalisha hamudimu wakuzata, yisela niyuma yitwakamenaña muchisaka. Chinu chibaaba chikulumbulula chitwatela kuzatisha chiwahi yuma yinakutuñatuñawu, kukola kumujimba, mali nikudinka wanta kulonda ‘tukundami kwakwihi naNzambi.’—Yak. 4:8.

KUYILAKU HAMBIDI MUJAKUTUÑATUÑA

3. Lumbululenu chitwatela kuzatisha chiwahi hela chatama iyi yuma yayiha yinakutuñatuñawu.

³ Mwahita kaayi kejima, yuma yazatikaña nakesi kawuneñu yinakuvulilaku nankashi. Neyi tuyizatisha chiwahi, iyi yozelu yinateli kutukwasha nankashi. Ilaña neyi tuyizatisha chatama yinateli kutwambula kudi Tata yetu wamwiwulu. Toñojokenu hamakompyuta. Ayinu magazini yimunakutaña ayisonekeli nikuyipulinta kuzatisha makompyuta. Kompyuta yinateli kwikala chitwa chachiwahi chakuzatisha hakusandujola nsañu nikutiyañana nawantu nawa mpinji yikwawu yinateli kutumanishilaku wudi. Hela chochu, tunateli kuteñuka namakompyuta amaha anakutuñatuñawu. Akwakuselujola ashinjilaña antu kulonda atoñojokeña nawu atela kulanda yuma yayiha yinakutuñatuñawu. Mukwenzi wumu wakeñeleña nankashi kwikala nakompyuta chakwila wafumishili nshiya yindi yimu nakuyilandisha kulonda yalandi kompyuta. Wakoñeli chuma chatama nankashi.

4. Indi mukwaKristu wumu wamanishili ñahi chaaku chindi chakusweja kuzatisha kompyuta?

⁴ Chinateli kutama nankashi neyi mutamisha wubwambu wenu naYehova kuhitila mukuzatisha chatama yozelu yayiha yinakutuñatuñawu. Jon mukwaKristu wudi nayaaka kwakwihi na 30, nindi: “Neluka nami Bayibolu yahosha nawu ‘twatela kuwanaku mpinji’ yakwila yuma yakuspiritu.a Ilaña namanishilileña mpinji yeneni hakompyuta.” Jon wavulileña kuzatisha kompyuta nimukachi kawufuku. Wahosheli nindi: “Neyi nisweja kuzeya, chadiña nakunkalila kuleka kuhanjeka nikutala tumavidiyo twatwihi nawa natalileña ninyivwimbimbi yatama.” Hakwila nawu yaleki ichi chaaku chatama, Jon wayichunini kompyuta kulonda yidijimeña yayeni neyi mpinji yakukama yinashiki dehi.—Tañenu Aefwesesa 5:15, 16.

5, 6. (a) Nyidimwinyi yikwetuwu anvwali kutalisha hadi anyanawu? (b) Indi anvwali anateli kwila ñahi kulonda anyanawu adikundeña nawantu amawahi?

⁵ Anvwali himwatela kuyuula yuma yejima yelañawu anyanenuku, ilaña mwatela kwiluka chinakuzatishawu kompyuta. Bayi muyiteja ataleña nsañu jawuvumbi, yisela yamadombu, yakupanda nikudikunda nawantu atama kulonda nenu abuleña kuyiluwañeshaku. Neyi mukoña muniyi njila, anyanenu anateli kukunkulula nawu, ‘Chineli aTata nawaMama ashañaku maana wanyi, namoni chidi hohu chiwahi.’ Enu anvwali, mukweti mudimu wakukiña anyanenu achidi anyanya nianyikwenzi kuyuma yejima yinateli kuyambula kudi Yehova. Hela tuhu atunyama akiñaña anyanawu kuwubanji. Toñojokenu mama yaniwu kanyama watenañawu nawu bera chatela kwilayi neyi muntu nakukeña kukwata anyanindi.—Esekejenu Hoseya 13:8.

⁶ Kwashenu anyanenu kulonda ahemeña yisela yayiwahi nawakwawu akwaKristu, atwansi niakulumpi. Nawa anukenu nenu, anyanenu akeñaña nawu mwikaleña nawu hadi mpinji yeneni. Dichi ikalenu nampinji yakuseha, kuhema, kuzata ‘nikukundama kwakwihi naNzambi’ hamu nawu.b

KUKOLA KUMUJIMBA

7. Muloñadi wejima wetu chitwakeñelaña kwikala akola kumujimba?

⁷ “Mudi ñahi mwani?” Iyi nhoshelu yamwekeshaña nawu antu hiyekala akolaku. Hamuloña wakwila anvwali jetu atachi amwitejeli Satana kuyambula kudi Yehova, wejima wetu twakataña. Satana watiyaña kuwaha neyi tukata, muloña neyi tukata hitukutwesha kumuzatila Yehovaku. Nawa neyi tufwa hitunateli kumuzatilaku. (Mas. 115:17) Dihafumaña dinu tufwileña kuzata nañovu kulonda twikali akola kumujimba.c Nawa twatela kwakamena wumi wawamana kwetu nichihandilu chawu.

8, 9. (a) Tunateli kutondolwela ñahi chaaku chakusweja kwakamena hakukola kumujimba? (b) Yumanyi yafumaña mukwikala namuzañalu?

⁸ Hela chochu, bayi tuswejaña kutoñojoka hohu hakwikala akola kumujimbaku. Antu amakwawu amanishilaña mpinji yeneni nakutoñojoka handilu, yitumbu, niyuma yikwawu yikuyileñela amwekaneña chiwahi kubadika mudimu wakushimwina nsañu yayiwahi yaWanta waNzambi. Anateli kutoñojoka nawu anakukwasha antu amakwawu. Hela chochu, Hetala daWanta nihakupompa kwanyanya nikwamaneni, hitwatela kuhanjekelañahu nsañu jakwikalilamu akola kumujimba hela yuma yikutuleñela tumwekaneña chiwahuku. Muloñadi?

⁹ Twapompaña kulonda tuhanjekaña yuma yakuspiritu nikwikala namuzañalu chikupu nawa dimukabu waspiritu yaNzambi yajila. (Ŋal. 5:22) Hampinji yakupompa, neyi tuhanjekaña hayitumbu hela yuma yakudiwahisha nachi, yinateli kuluwañesha nkeñelu yakupompa nikuneñesha amakwawu. (Rom. 14:17) Antu atela kufuukulahu aweni kutalisha hakwikala akola kumujimba. Nawa, kwosi muntu wunateli kumanisha yikatu yejimaku. Hela tuhu andotolu akuluka yitembi, ashinakajaña nikukata, nkumininaku afwaña. Nawa kusweja kwakamena hakukola kumujimba hikunateli kunuñilaku wumi wetuku. (Luka 12:25) Ilaña, “muchima wazañajala hiyitumbu yayiwahi.”—Yish. 17:22.

10. (a) Yililwinyi yayiwahi nankashi kumesu aYehova? (b) Mpinjinyi yitwakekala akola chikupu kumujimba?

¹⁰ Chochimu, chachiwahi kusha maana kummwekenu yetu. Ilaña bayi tufumishaña yinjikijilu yejima yinakumwekesha nawu tunakuli dehi. Iyi yinjikijilu yamwekeshaña kupama, kalemesha nikuwaha kwamukachi. Chakutalilahu, Bayibolu yahosha nawu: “Mutu wanvu hichibañula chalubanji neyi akuwuwana munjila yakuloña.” (Yish. 16:31) Ichi dichatumonañayi Yehova nawa twatela kudimwonaña neyi chatumonañayi yena. (Tañenu 1 Petulu 3:3, 4.) Komana chachiwahi kusha wumi wenu hakatoña kuhitila mukuyiladika hela kuzatisha yitumbu kulonda mumwekaneña chiwahi nankashi kumujimba? Hela chakwila tunashinakaji hela twakola kumujimba, kuwaha kwalala kwamukachi kwafumaña hakwikala ‘namuzañalu waYehova.’ (Nehe. 8:10) Mwituña dadiha hohu dimutwakekala akola chikupu kumujimba nikufunta cheñi kuwansi. (Yoba 33:25; Isa. 33:24) Chayinu mpinji twatela kumwekesha maana nichikuhwelelu kulonda tukundami kwakwihi naYehova nikudiluñisha wumi sampu iyi mpinji yinashiki dehi.—1 Tim. 4:8.

MALI

11. Indi mali anateli kwikala ñahi muhetu?

¹¹ Mali atama wanyi, nawa kudiselujola munjila yayiwahi nikwena kwakuwahi. (Mukwa. 7:12; Luka 19:12, 13) Ilaña, kusweja ‘kukeña mali’ kunateli kutwambula kudi Yehova. (1 Tim. 6:9, 10) Neyi tusweja kusha maana ‘kukwakama kwamakonu’ kwakwikala nayuma yakumujimba, tunateli kuzeya kuspiritu. Chochimu ‘nikudimbana kwamaheta,’ yitoñojoka yaheña yakwila nawu maheta aletaña muzañalu wahaya nyaka nikukiñewa. (Mat. 13:22) Yesu wahosheli jiika nindi ‘kwosi muntu’ wunateli kukalakela chiwahi Nzambi nimahetaku.—Mat. 6:24.

12. Nyihetwinyi yamali yinasweji makonu, nawa tunateli kuyitondolwela ñahi?

¹² Neyi tutoñojokaña netu mali alema nankashi, tunateli kukoña yuma yatama. (Yish. 28:20) Antu amakwawu akeñaña kwikala namali swayi-swayi, alandaña matiketi akuhema nachu yisela kulonda ekali namali hela kudiñija mukuselujola kwakwikala namali swayi swayi nikukokola antu amakwawu amuchipompelu. Antu amakwawu atambulaña mali kudi akwawu nikuyileja nawu akayifuntishila mali amavulu. Dichi bayi mwikala nalwisuku. Ikalenu ababala. Kwikala namali amavulu mukampinji kantesha hichuma chakala.

13. Indi yitoñojoka yaYehova kutalisha hamali yambuka ñahi nayitoñojoka yawantu amukaayi?

¹³ Neyi tusambila kukeña “wanta windi nikuloña,” Yehova wakiswilaña chitwazataña nañovu hakwila nawu twikali nayuma yitunakukeña muchihandilu. (Mat. 6:33; Efwes. 4:28) Yehova hakeñaña nindi tunoñokeña hampinji yakupompa hamuloña wakuzata nankashi hela kutachika kutoñojoka hamali iku tudi Mwitala daWantaku. Ilaña, antu amavulu mukaayi akuhwelela nawu neyi amanishilaña mpinji yeneni kukukeña mali anateli kwikala nambidi yayiwahi nikudiluñisha kumbidi. Alejaña anyanawu kufwila yikonkwanyi yakwikala namaheta. Yesu wahosheli nindi yitoñojoka yamuchidiwu yatama nankashi. (Tañenu Luka 12:15-21.) Chumichi chatwanukishaña hadi Gehazi watoñojokeli nindi nateli kwikala nalwisu iku wudi nawubwambu wawuwahi naYehova.—2 Anya. 5:20-27.

14, 15. Muloñadi chitwatela kubula kukuhwelela maheta? Shimunenu chakutalilahu.

¹⁴ Ambuulu amakwawu anwinaña mumenji neyi akañanya kutuuka hamuloña wakukuupula inshi weneni. Komana chuma chamuchidiwu chinateli kumwekana nikudi mukwaKristu? Eluda wumu wejina daAlex walumbulwili nindi: “Neluka nankashi chakuzatisha mali. Neyi nifumisha mulola wawuvulu wakuwelesha nachu mumutu, nafuntishañamu wukwawu munchumpa.” Dichi, Alex watachikili mudimu wakuselujola muyisankanu, watoñojokeli nindi wukwikala namali amavulu nawa wukuleka mudimu windi kulonda yatachiki mudimu wawupayiniya. Dichi weñijili mutu mukudiza chakulanda nichakulandisha yuma. Wazatishili mali indi nimali asondaminiyi kwacheñi, nakulanda yuma yakuselujola yatoñojokeliyi nindi yinateli kumuhetesha. Ilaña yuma yalandiliyi yekalili yamukunkulwayi. Alex nalumbululi nindi: “Nafwilileña kufuntishamu mali ami. Natoñojokeleña nami neyi nitwalekahu antu akutachika cheñi kulanda yuma yami.”

¹⁵ Hadi tukweji twatuvulu, Alex watoñojokeleña hohu hayuma yindi. Chadiña nakumukalila kusha maana kuyuma yakuspiritu nawa wakañenyeña kukaama. Ilaña yuma yindi wuseya waholokeli chikupu. Alex washalili makasa munshiñu nawa walandishili itala dindi. Wahosheli nindi: “Naneñesheli nankashi chisaka chami.” Ilaña wadizililuku chuma chabadika kulema. Wahosheli nindi, “Ichi neluki nami muntu wejima wakuhwelelaña muyuma yamukaayi kaSatana wakatiya nsonyi chikupu.” (Yish. 11:28) Eñañi, neyi tukuhwelela maheta, mali, hela wuswa wakwiluka chakuwana mali mukanu kaayi dikwila nawu tunakuhweleli Satana, “nzambi yampata yamakonu.” (2 Kor. 4:4; 1 Tim. 6:17) Ichi Alex wapelesha chihandilu chindi ‘hamuloña wansañu yayiwahi.’ Wukuyileja nindi kwila mwenimu kunaleñeli chisaka chindi kwikala namuzañalu nikukundama kwakwihi naYehova.—Tañenu Maku 10:29, 30.

KUDINKA WANTA

16. Indi kudinka wanta kwakuwahi kwambuka ñahi nakudinka wanta kwatama?

¹⁶ Kudinka wanta muyuma yayiwahi kwakuwahi. Chakutalilahu, twatela kudinka wanta hakwikala aYinsahu jaYehova. (Yere. 9:24) Kudilemesha kwatukwashaña kufuukulahu chiwahi nikulondela nshimbi jajiwahi. Ilaña kusweja kudinka wanta hayuma yitukweti hela chifulu kunateli kutwambula kudi Yehova.—Mas. 138:6; Rom. 12:3.

17, 18. (a) Shimunenu yakutalilahu yamuBayibolu yawantu adizozeli niadinkeli wanta. (b) Indi mana kwetu wumu welili ñahi kulonda chaaku chakudinka wanta chibuli kumwambula kudi Yehova?

¹⁷ MuBayibolu mwekala yakutalilahu yawantu adinkeleña wanta niadizozeli. Mwanta David walombeli wukwashu kudi Yehova mukudizoza nawa Yehova wamukiswilili. (Mas. 131:1-3) Yehova wakehesheli Mwanta Nebukaneza niBeleshaza adinkeli wanta. (Dan. 4:30-37; 5:22-30) Makonu, twamonaña yuma yatuleñelaña tudizozi hela nehi. Ryan, nkoñi wakuzatila wudi nayaaka 32 wayili nakuzatila kuchipompelu chacheñi. Ryan nalumbululi nindi, “Nakuhweleli nami akuntonda wueluda swayi, ilaña chaaka chamanini kuntonda nehi.” Komana Ryan wahilili nankashi nikutoñojoka nindi aeluda anakumulemesha wanyi? Komana wukuleka kuya nakupompa nakwiteja kudinka wanta kumwambuli kudi Yehova niantu Jindi? Indi enu mwadi kwiladi?

¹⁸ Ryan wanukaña nindi, “Natañileña nsañu yejima yamunyikanda yetu yahosheleña hakwikala namuchima wakutalila yuma yinabuli kumwekana.” (Yish. 13:12) “Natachikili kutoñojoka nami natela kudiwunjika nikudizoza. Nateleli kufumbewa naYehova.” Ryan watachikili kutoñojoka nankashi hakukwasha amakwawu muchipompelu niantu awanineñayi mumudimu wamwiha. Watachikili kulombola atudizi aBayibolu apaminineñaku kuspiritu. Wahosheli nindi, “Nahayamini nankashi hakuntonda wueluda hanyima yachaaka chimu nachikunku. Nalekeli kutoñojokahu nankashi muloña nadiluñishileña nankashi mudimu wami wakushimwina.”—Tañenu Masamu 37:3, 4.

KUNDAMENU KWAKWIHI NAYEHOVA

19, 20. (a) Chumanyi chitwatela kwila kulonda yuma yitwakoñaña mpinji yejima yibuleña kutwambula kudi Yehova? (b) Yakutalilahwinyi yitwatela kwimbujola yawantu akundamini kwakwihi naYehova?

¹⁹ Nsañu yejima yitunahanjekuhu muchinu chibaaba nichinafumuhu yatama wanyi. Twadinkaña wanta hakwikala ambuña aYehova. Chisaka chamuzañalu nikukola kumujimba yidi hakachi kayawana yabadika yatwinkayi Yehova. Tweluka netu mudimu wakumujimba nimali anateli kutukwasha nankashi muchihandilu chetu. Tweluka netu yisela yinateli kutuzañalesha niyuma yayiha yinakutuñatuñawu yinateli kutukwasha. Ilaña kufwila iyi yuma hampinji yabula kutelela, kusweja kuyifwila, hela munjila yinateli kuluwañesha kudifukula kwetu yinateli kutwambula kudi Yehova.

²⁰ Satana wakeñaña kutwambula kudi Yehova. Hela chochu, munateli kudikiña kukukala kwamuchidiwu hamu nichisaka chenu! (Yish. 22:3) Kundamenu kwakwihi naYehova, nawa twalekenuhu kwikala kukabadi kindi. Tukweti yakutalilahu yayivulu nankashi yamuBayibolu yinateli kutukwasha haniyi nsañu. Enoki niNowa ‘endeli naNzambi walala.’ (Kutach. 5:22; 6:9) Mosi ‘watwalekeluhu kumona wakamonewaña nawa watatakeneni.’ (Heb. 11:27) Yesu amukwashileña kudi Nzambi muloña welileña yuma yamuzañalesheleña Tata yindi wamwiwulu. (Yow. 8:29) Imbujolenu yakutalilahu yamuchidiwu. “Zañalalenu mafuku ejima. Bayi muleka kulombaku. Sakililenu mwahita yuma yejima.” (1 Tesa. 5:16-18) Nawa bayi mwiteja chuma chidi chejima chiyambuli kudi Yehovaku!

[Tumazu twaheshina]

[Mwevulu wudi hefu 18]

Anvwali, kwashenu anyanenu kulonda azatisheña chachiwahi yuma yayiha yinakutuñatuñawu

[Mazu ekoku adi hefu 21]

Bayi mwiteja chuma chidi chejima chiyambuli kudi Yehovaku!

[Mwevulu wudi hefu 21]

Chatela mufwileña chifulu muchipompelu, diluñishenuña mudimu wenu wakushimwina!