Babalenu Nanyihetu Yadiyabolu!

‘Somokenu mumuhetu waDiyabolu.’—2 TIM. 2:26.

MUKWAKULA NENUDI?

Twatela kudishinshika hachumanyi neyi tukweti chaaku chakuhosha akwenu chatama?

Neyi tushinshika hadi Pilatu niPetulu, yumanyi yimukudizila hansañu yakubula kutiya antu woma nikutiyilila munakuyileja akwenu?

Tunateli kutondolwela ñahi chaaku chakusweja kudinka nyiloña?

1, 2. Nyihetwinyi yazatishañayi Diyabolu yitukuhanjekahu muchinu chibaaba?

DIYABOLU webaña ambuña aYehova. Hanakufwila nindi yatujilumuni neyi chajahañayi chibinda wakuluka yitembi anyamaku. Ilaña, nkeñelu yaDiyabolu yidi yakulawula muntu wamumi nikumuzatisha munjila yinakeñiyi.—Tañenu 2 Timotewu 2:24-26.

² Hakwila nawu chibinda yakwati kanyama kakumi, wazatishaña muhetu watelela. Nateli kubiñila kanyama kutooka kulonda yakakwati mwiswa. Hela nateli kuzatisha muhetu wakusweka wudi nakazala kulonda kanyama kafumu chakadi kwiluka. Diyabolu wazatishaña nyihetu yamuchidiwu kulonda akwati ambuña aNzambi amomi. Neyi hitunakukeña kufwa mumuhetu winduku, twatela kwikala atona nikwiluka yinjikijilu yakusoñamisha yinakumwekesha nawu muhetu waSatana wudi kukamwihi. Muchinu chibaaba tukuhanjeka hayuma yikutukwasha kudihemba kunyihetu yisatu yazatishañayi Diyabolu kulonda yakwati nachu antu. Iyi diyi nyihetu yazatishañayi (1) nhoshelu yatama, (2) kutiya antu woma nikakeja dawantu (3) nikusweja kudifwisha namuloña. Muchibaaba chinalondeluhu, twakahanjeka hanyihetu yikwawu yiyedi yazatishañayi Satana.

JIMENU KESI KANHOSHELU YATAMA

3, 4. Yumanyi yikufumamu neyi tukañanya kuhemba idimi detu? Shimunenu chakutalilahu.

³ Hakwila nawu tunyama tutemuki mutunaswami, chibinda wabambaña kesi kulonda yajahi tunyama tunakutemoka. Muchifwikija, Diyabolu wazatishaña kesi kulonda yasandi chipompelu chawakwaKristu. Neyi yabutula kesi antu muchipompelu akupalañana kulonda yayilawuli. Tunateli kumukwasha ñahi chakadi kwiluka nikufwa mumuhetu windi?

⁴ Kambanji Yakoba wesekejeli idimi nakesi. (Tañenu Yakoba 3:6-8.) Neyi tukañanya kuyuula idimi detu, tukubutula kesi kachifwikija muchipompelu. Tukukibutula ñahi? Talenu ichi chakutalilahu: Anabidiki hakupompa nawu muhela wumu anamutondi kwikala payiniya wampinji yejima. Hanyima yakupompa, akwakushimwina ayedi hiyakuhanjeka haniyi nsañu. Muhela wumu nazañalali nankashi nawa nahoshi nindi Nzambi yamukwashi kulonda yatwalekuhu. Muhela mukwawu hakujinoka nkeñelu yinatachikiliyi iwu muhela wupayiniya nawa hakuhosha nindi nakukeña hohu amwiluki nankashi muchipompelu. Hanawa akwakushimwina ayedi munateli kudikunda nawumu yodihi? Mukushikena dakwiluka muhela wunateli kubutula kesi muchipompelu.

5. Hakwila nawu tujimi kesi kanhoshelu yatama, twatela kudishinshika ñahi munyichima yetu?

⁵ Tunateli kujima ñahi kesi kanhoshelu yatama? Yesu nindi: “Kanwa kahoshaña yuma yinalumbami mumuchima.” (Mat. 12:34) Chatachi twatela kudishinshika mumuchima wetu. Komana twatondolwelaña yuma yikutukojeja tuhoshi yuma yatama? Chakutalilahu, neyi tutiya nawu mana kwetu nakuzata nañovu kulonda yashiki hakukalakala nyidimu yamuchipompelu, komana twatoñojokaña netu wudi namuchima wakukeña kumuzatila Nzambi tahindi twatoñojokaña netu nakukeña kuditiyisha kuwaha? Neyi tudi nachaaku chakujinoka amana kwetu, twatela kwanuka netu Diyabolu niyena wajinokeli kambuña Nzambi washinshika Yoba. (Yoba 1:9-11) Chatela tumujinokeña mana kwetu, twatela kwiluka chuma chinaleñeli tumutoñojokeleña yuma yatama. Komana kudi chuma chinaleteshi tuhoshi muniyi njila? Tahindi nyichima yetu yinenzali nawulembi waspiritu yatama yamunanu mafuku akukuminina?—2 Tim. 3:1-4.

6, 7. (a) Yumanyi yatuleñelaña kuhosha yuma yatama hadi akwetu? (b) Tunateli kwiladi neyi anatwili katama?

⁶ Tutalenu hayuma yikwawu yikutukojeja kutoñojoka yuma yatama hadi akwetu. Chuma chimu chidi chakukeña kwila yuma yakudimwekesha kudi akwetu. Hela tunateli kudimona neyi twabadika akwetu. Nawa tunateli kudiyiñisha hakubula kwila yuma yitwatela kukoña. Neyi twadisambaña, lwisu hela kubula kudikuhwelela, munateli kufuma jomisha mbaña.

⁷ Hadaha kudi chuma chinatwiliyi mukwetu chikutuleñela tumuhoshi chatama. Indi kwiji yetu ahoshawu chatama. Neyi ayihosha mazu atama, kufuntisha katama nakatama hikunateli kumanisha kukalaku. Neyi mwila mwenimu chidi neyi munakusha nsonsu hamulañi wakesi, chumichi chinesekani nankeñelu yaDiyabolu bayi yaNzambuku. (2 Tim. 2:26) Dichi twatela kumwimbujola Yesu. Chamutukiluwu “hafuntishili cheñi matukaku.” Ilaña yena “wadikunjikili kudi yena wasompeshaña chaloña.” (1 Pet. 2:21-23) Yesu wakuhweleleli nindi Yehova wakamanisha kukala munjila yakeñañayi nihampinji Yindi yatelela. Anetu nawa twatela kumukuhwelela Nzambi. Neyi nhoshelu yetu yikukoleshaña akwetu, dikwila nawu ‘tukudikasa mwonji wakuwunda’ muchipompelu chetu.—Tañenu Aefwesesa 4:1-3.

TONDOLWELENU MUHETU WAKUTIYA ANTU WOMA NIKAKEJA DAWANTU

8, 9. Muloñadi Pilatu chamuhishililiyi Yesu namuloña?

⁸ Neyi kanyama kanafwi mumuhetu, kakañanyaña kwikala nañovu yakutemuka. Chochimu, muntu watiyaña antu woma nikakeja dawantu wakañanyaña kudiyuula muyuma yikwawu muchihandilu. (Tañenu Yishimu 29:25.) Tuhanjekenu hayakutalilahu yiyedi yawamayala atiyileña antu woma nawa akakejeluwu kudi antu nikwiluka yuma yitwatela kudizilaku.

⁹ Ñuvulu wawaRoma Pontusi Pilatu welukili nindi Yesu hadiña namuloñaku nawa hakeñeleña kumwila katamaku. Pilatu wahosheli nindi Yesu ‘hakoñeli chuma chakutela kufwaku.’ Hela chochu, Pilatu wetejeli nindi amujahi. Muloñadi? Muloña Pilatu watiyili mwamukakejeluwu akwamadombu. (Luka 23:15, 21-25) Akwankunyi nindi abidikili nawu “neyi wukumuumbaku yeniwu, hiwukwikala ibwambu daKesaruku” dichi amukakejeli nawu akoñi mwakeñeleñawu. (Yow. 19:12) Pilatu watiyili woma nindi neyi yekala kukabadi kaKristu akumufumisha hachifulu hela akumujaha. Dichi wetejeli kumulombola nikwila nkeñelu yaDiyabolu.

10. Chumanyi chaleñeleli Petulu yamukaani Kristu?

¹⁰ Kapostolu Petulu wadiña ibwambu daYesu chikupu. Wahosheli hatooka nindi Yesu diyi Mesiya. (Mat. 16:16) Petulu watwalekeluhu kushinshika chelili atumbanji amakwawu akañanyi kwiluka mazu ahosheliyi Yesu nawa amushili. (Yow. 6:66-69) Hampinji yenjili ayilumbu nakumukwata Yesu, Petulu wazatishili mpoku yakabali hakukiña Mwanta windi. (Yow. 18:10, 11) Nkumininaku, Petulu watiyili woma wawantu nawa wamukaanini Yesu Kristu nindi hamwilukaku. Mukapinji kantesha hohu, iwu kapostolu wafwili mumuhetu wakutiya antu woma nawa wakañenyi kwikala nawulobu.—Mat. 26:74, 75.

11. Yililu yamuchidinyi yatama yitwatela kutondolwela?

¹¹ Etu akwaKristu twatela kutondolwela ikakeja dawantu dakukeña kwila yuma yamuneñeshaña Nzambi. Akulumpi janyidimu hela antu amakwawu anateli kutukanjikija nawu tubuli kashinshi hela kutukanjikija nawu twili wuvumbi. Akashikola niwena amonaña kukala kwafumaña kudi akwawu kwakuyikakeja nawu atwambeña hakusoneka kweseka, kutala nyevulu yanzekesi, kunwa makanya, kuzatisha yitumbu yashetana, kusweja kunwa walwa nikwila wuvumbi. Chumanyi chikutukwasha kutondolwela muhetu wakutiya antu woma nikakeja dawantu dakukeña kwila yuma yamuneñeshaña Yehova?

12. Yumanyi yitukudizila kudi Pilatu niPetulu?

¹² Tutalenu hayuma yitwatela kudizila kudi Pilatu naPetulu. Pilatu hamwilukili Kristu chikupuku. Hela chochu, welukili nindi Yesu hadiña namuloñaku nawa wadiña waloña. Ilaña Pilatu hadizozeli nikumukeña Nzambi walalaku. Wafwili mumuhetu waDiyabolu. Petulu welukili nsañu yalala nawa wamukeñeli Nzambi. Ilaña mpinji yikwawu Petulu wadisambileña, watiyileña antu woma nawa wafwili mumuhetu wekakeja dawantu. Henohu Yesu kanda amukwati, Petulu wahosheli nakuditiya nindi: “Hela ejima akudimboka, ami nehi.” (Maku 14:29) Kapostolu wateleleli kudiloñesha henohu kanda aholokeli mukweseka neyi cheliliyi ñimbi yamasamu wamukuhweleleli Nzambi nawa wembili nindi: “Yehova wadikuma nanami; hinukutiya womaku; chumanyi chakañilawu antu?” (Mas. 118:6) Hawufuku wakukumishaku kwikala hamaseki, Yesu wayili naPetulu niapostolu ayedi mwitempa daÑesemani. Chatela ekali atona, Petulu niamabwambu jindi akamini mutulu. Yesu wayihindwishili nawa wayilejeli nindi: “Tonenu, lombenu, mubuli kwiñila mukweseka.” (Maku 14:38) Ilaña Petulu walezumukilili cheñi mutulu nawa nkumininaku watiyili antu woma nikufwa mumuhetu wekakeja dawantu.

13. Tunateli kushinda ñahi ikakeja dakukeña kwila yuma yatama?

¹³ Yuma yakoñeli Pilatu niPetulu yatudizishaña chuma chikwawu chalema: Kwiluka kwakweni, kudizoza, kubula kudisamba, kumukeña Nzambi nikumutiya Yehova woma bayi antuku diyuma yikutukwasha kutondolwela ikakeja dawantu. Neyi chikuhwelelu chetu chikushindamena hakwiluka kwakweni, tunateli kuhosha nawulobu hayuma yitwakuhwelela. Chumichi chikutukwasha kutondolwela ikakeja dawantu nikubula kutiya antu woma. Dichi bayi tushindamena hañovu jetuku. Ilaña twatela kwiluka netu tunakukeña ñovu yaNzambi kulonda tutondolweli ikakeja dawantu. Twatela kulomba spiritu yaYehova nawa kukeña kutwamukeña kukutuleñela kulemesha ijina dindi ninshimbi jindi. Kubombelahu, twatela kudiloñesha henohu kanda tuholokeli mukweseka. Chakutalilahu, neyi tudiloñeshela chadimu nikulomba tukukwasha anyanetu kushinda neyi akwawu ayikakeja nawu akoñi yuma yatama.—2 Kor. 13:7.a

TONDOLWELENU CHIDIYA CHACHIKAÑA CHAKUSWEJA KUDIFWISHA NAMULOÑA

14. Chumanyi chakeñañayi Diyabolu nindi tutoñojokeña kutalisha hayiluwa yitwakoñeli kunyima?

¹⁴ Mpinji yikwawu tunyama atwitaña nambulu hela nachidiya chelola mumunkula wanfwa. Kanyama kanabuli kwiluka chikakunka kumunsalu, mbulu hela chidiya chelola chikumukulukila nakumuchika chikupu. Kusweja kudifwisha namuloña kudi neyi ilola dalema dachikaña. Chitwatachika kutoñojoka hanshidi yitwakoñeli kunyima, ‘twatiyaña mabinjila nankashi.’ (Tañenu Masamu 38:3-5, 8.) Satana nakukeña nindi tutoñojokeña netu Yehova hatela kutwanakenaku nawa hitukutwesha kulondela nshimbi Jinduku.

15, 16. Munateli kutondolwelela ñahi chidiya chakudinka nyiloña?

¹⁵ Munateli kutondolwela ñahi ichi chidiya chachikaña? Neyi chakwila munaputoli nshidi jahamesu bwi-i, zatilenuhu kulonda mwikali cheñi nawubwambu wawuwahi naYehova. Yihulenu aeluda kulonda ayikwashi. (Yak. 5:14-16) Zatenu nañovu kulonda mwololi yiluwa yimwakoñeli. (2 Kor. 7:11) Neyi ayifumba bayi muneñaku. Muloña neyi ayifumba hichinjikijilu chinakumwekesha nawu Yehova wayikeña. (Heb. 12:6) Dikasenu mumuchima kulonda mwakabuli kwila yuma yayileñeleli kuputola nawa zatilenu hachuma chimunafuukuli. Chimwabalumuka mumuchima nikufutumuka, kuhwelelenu mwifutu danyiloña daYesu Kristu nenu dinateli kubuta hanshidi yenu.—1 Yow. 4:9, 14.

¹⁶ Antu amakwawu anukaña nshidi yakoñeluwu yayanakenawu dehi. Neyi ninenu mwanukaña, anukenu nenu Yehova wamwanakeneni Petulu niapostolu amakwawu amutemukeli Mwanindi wakeñayi hampinji yadiñayi Yesu mukukala kweneni. Yehova wamwanakeneni iyala wahañiluwu muchipompelu chaKorinda wavulumwini chikupu ilaña wabalumukili mumuchima. (1 Kor. 5:1-5; 2 Kor. 2:6-8) Izu daNzambi dahosha hadi antu akoñeli nshidi yeneni abalumukili ilaña Nzambi wayanakeneni.—2 Kushi. 33:2, 10-13; 1 Kor. 6:9-11.

17. Tunateli kuhetelamu ñahi mwifutu danyiloña?

¹⁷ Yehova wanakenaña nikuvulamena nshidi yimwakoñeli kunyima neyi mubalumuka chikupu mumuchima nikwiteja nenu nayanakeni. Bayi mutoñojoka nenu ifutu damuloña daYesu hidikutwesha kubuta nshidi jenuku. Tukufwa muchidiya chaSatana neyi tukutoñojokaña mwenimu. Hichikweti muloña nayuma yinakukeñayi Diyabolu nindi mukuhweleluku, ifutu danyiloña dinateli kubuta nshidi jawantu ejima avulumunaña nawa abalumukaña mumuchima. (Yish. 24:16) Neyi tukuhwelela mwifutu danyiloña tukusubula chitelu chakusweja kudinka nyiloña nawa tukwikala nañovu yakumukalakela Nzambi namuchima wetu wejima, maana niwumi wetu wejima.—Mat. 22:37.

NYIHETU YASATANA HITWAYIYAMBAKU

18. Tunateli kutondolwela ñahi nyihetu yaDiyabolu?

¹⁸ Satana wakeñaña hohu kutukwata bayi neyi wakamenaña muhetu wukuzatishayi nindi atulawuluku. Chineli nyihetu yaSatana hitwayiyambaku, tunateli kumutemuka Diyabolu. (2 Kor. 2:10, 11) Hitukufwa munyihetu yinduku neyi tulomba maana akutukwashaku kuumika kukala kukutumwekena. Yakoba wasonekeli nindi: “Mwinenu nabuli maana, alombi kudi Nzambi, wahanaña kudi antu ejima makasa ayedi, hahosholañaku; akumwinkawu.” (Yak. 1:5) Twatela kuzatila hayuma yitunalombi kuhitila mukudiza Bayibolu nkawetu nikuzatisha yuma yitunakudiza Mwizu daNzambi. Nyikanda yashindamena haBayibolu yasonekaña izanvu danduñu wamaana nikashinshi yinateli kutuleja nyihetu yatañayi Diyabolu nichitwatela kuyitondolwela.

19, 20. Muloñadi chitwatela kuhelela yuma yatama?

¹⁹ Kulomba nikudiza Bayibolu kwatukwashaña kukeña yuma yayiwahi. Twatela kuhela cheñi yuma yatama. (Mas. 97:10) Tunateli kutondolwelela yuma yatama neyi tukutoñojokaña hayuma yomisha mbaña yafumañamu. (Yak. 1:14, 15) Neyi tuhela yuma yatama nakukeña yuma yayiwahi, tukwiluka nkabu yinakushayi Satana munyihetu yindi nawa tukufwamu wanyi.

²⁰ Twatela kumusakilila Nzambi hakutukwasha kulonda Satana yabuleña kutulawula munyihetu yindi. Yehova watwamwinaña muchikasa ‘chawatama’ naspiritu Yindi, Izu dindi nikuloñesha kwindi. (Mat. 6:13) Muchibaaba chinalondeluhu, tukahanjeka hanyihetu yikwawu yiyedi yalawilañamu Diyabolu nankashi ambuña Nzambi amomi.

Imikenu Mushindu Kulonda Mutondolweli Nyihetu Yasatana!

‘Imikenu mushindu namaana aDiyabolu akudimbana.’—EFWES. 6:11.

MUKWAKULA NENUDI?

Indi kambuña Yehova nateli kutondolwela ñahi kufwa mumuhetu wakufwila yuma yakumujimba?

Yumanyi yinateli kukwasha mukwaKristu wudi mumaluwi kubula kufwa muwina wakwila wuvumbi?

Muloñadi chimukuhoshela nenu kutondolwela muhetu wamaheta nikwila wuvumbi mwafumaña wuloku chikupu?

1, 2. (a) Muloñadi Satana chabulilañayi kutiyila luwi awayishewa ‘nianyikoku acheñi’? (b) Nyihetwinyi yaSatana yitukuhanjekahu muchinu chibaaba?

SATANA DIYABOLU hatiyilaña antu luwuku, sweje-e dinu antu amuzatilaña aYehova. Satana nakwasa njita nawawayishewa ashalahu. (Chim. 12:17) AkwaKristu ashinshika anakutwalekahu namudimu wakushimwina nsañu yaWanta makonu nawa anakumusawula Satana nawu diyi nyuuli wadinu ituña. Diyabolu hayikeña “anyikoku acheñi” anakukwasha awayishewaku nawa adi nakukooleka kwakwikala nawumi wahaya nyaka, kukooleka kwabulayi Satana. (Yow. 10:16) Dihanafumi hakusweja ndombu. Hela tukweti kuchiñeja kwakuya mwiwulu hela kwakushakama hamaseki, Satana hakamenaña yumiyuku. Nakukeña hohu nindi tukañanyi.—1 Pet. 5:8.

² Satana wazatishaña nyihetu yashiyashana kulonda yatulawileñamu. Chineli ‘waputisha dehi mesu’ ayitoñojoka yawantu abula kwitiya, akaanaña kwiteja nsañu yayiwahi nawa nyihetu yindi hiyayimonañaku. Hela chochu, Diyabolu walawulaña niantu eteja dehi nsañu yaWanta. (2 Kor. 4:3, 4) Chibaaba chinafumuhu chashimwini chitwatela kutondolwela nyihetu yaSatana yisatu: (1) nhoshelu yatama, (2) kutiya antu woma nikakeja dawantu (3) nikusweja kudifwisha namuloña. Hanu dinu tuhanjekenu hanjila jikutukwasha kutondolwela nyihetu yikwawu yaSatana yiyedi, kufwila yuma yakumujimba nikweseka kwakukeña kwila wuvumbi.

YUMA YAKUMUJIMBA HIIKOÑA DAKWATILAÑA HANSHIÑU

3, 4. Kwakama kwamakonu kwaleñelaña ñahi muntu kufwila yuma yakumujimba?

³ Muchishimu chindi chimu, Yesu wateneni mbutu yakuwililuwu munyiña. Walumbulwili nindi muntu nateli kutiya izu, ilaña “kwakama kwamakonu nikudimbana kwamaheta hikuvumbisha mazu, niyena wukwikala wakasoñaña.” (Mat. 13:22) Satana chilumbu chetu nakuzatisha muhetu wakufwila yuma yakumujimba.

⁴ Muntu neyi yayibomba, iyi yuma yiyedi yavumbishaña izu. Chuma chimu ‘hikwakama kwamakonu.’ Muyinu “nyaka yakala,” kudi yuma yayivulu yikuyiletesha kwakamena. (2 Tim. 3:1) Hamuloña wakukala kwachihandilu nikubula nyidimu, kunakukañesha antu kulanda yuma yinakaankiluwu. Hadaha munakwakamena yuma yakamwekana kumbidi nakudihula nenu, ‘Neyi nakumishi dehi kuzata akanyinka mali amavulu?’ Hamuloña wakwakama yumiyi, antu amakwawu afwilaña maheta nakutoñojoka nawu chekalawu namali chihandilu chakawaha.

5. Muloñadi chitukuhoshela netu ‘maheta’ adimbanaña?

⁵ Yesu wahosheli hachuma chikwawu, ‘kudimbana kwamaheta.’ Neyi muntu yabomba maheta nakwakamena wukuvumbisha izu. Bayibolu yeteja nawu “mali hichuma chakudihemba nachu.” (Mukwa. 7:12) Ilaña kufwila maheta kwatama. Antu etejaña nawu neyi muntu yasweja kufwila maheta dikwila nawu wukushimbula wanyi nakufwa muniwu muhetu wakukeña yuma yakumujimba. Amakwawu ekala dehi anduñu amaheta.—Mat. 6:24.

6, 7. (a) Indi kufwila yuma yakumujimba kunateli kusha ñahi muntu muwubanji hamudimu? (b) Yumanyi yatela kutoñojokayi mukwaKristu neyi amuleja nawu yazateña maora amavulu nakusompweshamu?

⁶ Mpwila yakufwila maheta yatachikaña chovu-chovu. Chakutalilahu, talenu chuma chinateli kumwekana. Mukulumpi wenu wamudimu nenzi nakuyileja nindi: “Kudi nsañu yayiwahi yinakukeña nami nukuleji! Kampani yetu anayinki mudimu weneni kudi nfulumendi. Dikwila nawu tukuzataña maora amavulu hadi tukweji twantesha tukulondelahu. Ilaña dinu wukutambulaña chimali chachivulu nankashi!” Mukwila ñahi? Eña, mukweti mudimu weneni wakukeñela chisaka chenu yuma yakumujimba, ilaña mukweti cheñi mudimu wukwawu wumwatela kuzata. (1 Tim. 5:8) Kudi yuma yikwawu yimwatela kutoñojokahu. Mukuzataña maora añahi akusompweshamu? Mudimu wenu wakumujimba wukukañeshaña yuma yakuspiritu yidi neyi kupompa niKudifukula kwaChisaka kwamelela?

⁷ Neyi himukufuukula hayumiyi, chumanyi chimukutwamijaku, mukukeña kwikala namali amavulu nakujiyisha wuspiritu wenu hamuloña wakuzata maora amavulu? Komana mukuleka kutwamijaku Wanta muchihandilu chenu hamuloña wakukeñesha mali? Munamoni chimunateli kuluwankana neyi mutwamijaku yuma yakumujimba nakudiwula wuspiritu wenu niwachisaka chenu? Neyi dikukala kumunakumona, munateli kwimika ñahi mushindu kulonda mubuli kufwa muniwu muhetu?—Tañenu 1 Timotewu 6:9, 10.

8. Yakutalilahwinyi yamuNsona yitwatela kutoñojokahu yikutukwasha kuhimpa chihandilu chetu?

⁸ Hakwila nawu mubuli kufwa muniwu muhetu wakufwila yuma yakumujimba, shinshikenuña hachihandilu chenu mumpinji mumpinji. Bayi mwikala neyi Esawu, wasawili yuma yakuspiritu nayililu yinduku. (Kutach. 25:34; Heb. 12:16) Nawa bayi mwikala cheñi neyi samaheta walejeluwu kulandisha yikumba yindi yejima nakwinka atuzweñi kulonda yamulondi Yesuku. Chatela yeli mwamulejeluwu, iwu iyala “hakufumaku nakuneña; muloña wadiñi muntu waheta maheta amavulu.” (Mat. 19:21, 22) Hamuloña wantuya yamaheta, ona iyala hekalili nakukooleka kweneni kwakulondela muntu wabadika antu ejimaku. Dichi babalenu kuchina mwakenda kashalahu kwikala kambanji kaYesu Kristu.

9, 10. Indi Nsona yahosha nawudi hakufwila yuma yakumujimba?

⁹ Hakwila muleki kufwila yuma yakumujimba, tiyililenu kufumba kwaYesu kwakwila nawu: “Kwakama nenu, Tukudyadi? Tukunwadi? Hela nenu, Tukuvwaladi? Bayi mwakama mwokuku. Muloña yuma yejimiyi diyi yakeñañawu aJentili; Tata yenu wamwiwulu neluki chimunakaankili yuma yejimiyi.”—Mat. 6:31, 32; Luka 21:34, 35.

¹⁰ Chatela mufwi mumuhetu wakutwamba wamaheta, fwilenu kwikala nayitoñojoka yadiña nansoneki waBayibolu Aguri, wasonekeli nindi: “Bayi wuñiteja kwikala nawuzweñi nankashi hela namaheta nankashuku. Nyinki yuma yinnakukeña.” (Yish. 30:8, Contemporary English Version) Aguri welukili nindi mali akiñaña muntu ilaña welukili cheñi chadimbanaña maheta. Anukenu nenu kwakama kwamakonu nikudimbana kwamaheta kwakisañanaña wuspiritu. Neyi musweja kufwila yuma yakumujimba yikuyimanishila mpinji, yikuyizeyesha nawa himukwikala nampwila yakufwila yuma yaWantaku. Dichi dikasenu mumuchima wenu kulonda mubuli kufwa mumuhetu waSatana wakufwila yuma yakumujimba.—Tañenu Aheberu 13:5.

WUVUMBI, WINA WAKUNAMA WAKUSWEKA

11, 12. Yumanyi yikuleñela mukwaKristu kwila wuvumbi kumudimu?

¹¹ Ayibinda anakukeña kujaha kanyama wukweti ñovu embaña wina mwahitilañayi. Abutekañahu mafu, tunyitondu nimaseki. Satana wukweti muhetu wumu mwafwaña nankashi antu wadifwana nawina wachibinda. Hinshidi yawuvumbi. (Yish. 22:14; 23:27) AkwaKristu amavulu anaholokeli muwina kuhitila mukwiteja yuma yikuyileñela aholokeli mukukala. AkwaKristu adisumbula elaña wuvumbi muloña wakudikunda namuntu wunabuli mwinikwawu.

¹² Kumwekesha yililu yawuvumbi namuntu wabula kwikala mwinikwenu kunateli kutachikila hamudimu. Chileji chimu chashimwini nawu ayivumbi awambanda amavulu niawamayala elaña wuvumbi nawakwawu akanyidimu. Komana mudimu wumwazataña wabombelamu kuhanjeka nawantu awamayala hela awambanda? Neyi mwazataña nawu, mwadijilila nankashi? Komana kuhanjeka kwenu kwakuminaña munzatilu yenu tahindi kwakunkaña kuyuma yikuyileñela mwili yuma yikwawu? Chakutalilahu, hanyima yakusweja kuhanjeka namukwawu mukwamudimu weyala, muhela mukwaKristu wukutachika kumuleja nsañu yakujinda nikumuleja kukala kunakumonayi mumaluwi. Chakutalilahu chikwawu, hanyima yakudinjilila namukwawu mukwamudimu wamumbanda, mukwaKristu weyala wukutachika kutoñojoka nindi: “Wakeña yuma yinamulejaña nawa watiyililaña neyi inakumuleja. Wanhamekaña. Kachi dichanlemeshañawu nihetala!” AkwaKristu amuchidiwu anateli kwila wuvumbi kala mpinji, netu?

13. Indi yililu yawuvumbi yinateli kutachika ñahi muchipompelu?

¹³ Nimuchipompelu munateli kwikala antu amwekeshaña yililu yawuvumbi. Talenu chuma chamwekeni. Daniel niñodindi, Sarah,a adiña apayiniya ampinji yejima. Kwesekeja nachahosheliyi, Daniel wadiña cheñi “eluda wetejeleña nyidimu yejima yamwinkeleñawu muchipompelu.” Wetejeleña kukooleka kwejima kwamwinkeleñawu. Daniel wadizishileña anyikwezi atanu Bayibolu nawa hakachi kawu asatu apapatisheweli. Awa amana kwetu amaha akeñeleña wukwashu. Chelili Daniel waswejeli kukasika nanyidimu yamuchipompelu, ñodindi Sarah diyi wayikwashileña. Atachikili kudinjilila: Atudizi adizishileñayi Daniel kunyima Bayibolu akeñeleña kuyikundeja, nawa Sara wayikundejeleña. Sarah niyena wakeñeleña wakumukundeja, atudizi twaDaniel aBayibolu atachikili kumukundeja. Iwu wadiña muhetu wafwana chikupu! Daniel nindi: “Hamuloña wakukwashana hadi tukweji twatuvulu, ñodami wazeyeli nankashi kuspiritu nimuyitoñojoka. Anami nawa namushileña nkawindi nawa chumichi chaleteli yuma yomisha mbaña. Ñodami welili wuvumbi nakadizi inadishileña. Watachikili kuzeya kuspiritu henohu tunakushakama hamu chakadi ami kwiluka, muloña nashili muchima nankashi hanyidimu yamuchipompelu.” Munateli kutondolwela ñahi wubanji wamuchidiwu?

14, 15. Yumanyi yinateli kukwasha akwaKristu adisumbula kutondolwela wina wakwila wuvumbi?

¹⁴ Hakwila nawu mutondolweli muhetu wawuvumbi, toñojokenu mwatalisha chikaninu chakukakela kudi mwinikwenu. Yesu wahosheli nindi: “Anabombuwu kudi Nzambi, bayi ayambula kudi muntuku.” (Mat. 19:6) Bayi mutoñojoka nenu kukooleka kumukweti muchipompelu kwalema nankashi kubadika mwinikwenuku. Cheñi nawa, mwatela kwanuka nenu neyi musweja kushiya mwinikwenu nkawindi kukoola tunyidimu twamukunkulwayi kukuleta wufwayi mumaluwi enu nawa munakumumbila mukweseka nakudikokela jomisha mbaña.

¹⁵ Neyi mudi aeluda, mwahembaña ñahi anyikoku? Kapostolu Petulu wasonekeli nindi: “Biñenu mukanka wanyikoku yaNzambi wudi mukachi kenu, nakuyitala; bayi chakukanjikijaku, chiña nakutiya kuwaha mwaya muchima waNzambi; bayi nakulonda kuheta kwatamaku, chiña namuchima wakukeñamu.” (1 Pet. 5:2) Bayi mulalamena antu amuchipompelu chenuku. Hela chochu, bayi musha muchima hamudimu wakubiña amana kwenu chakwila mudiwula nimudimu wumukweti wakwikala mutu wachisakaku. Neyi munakudiisha chipompelu chikupu ilaña mwinikwenu ‘nakufwa nanzala’ hetala, dikwila nawu kwosi yuma yimunakwila nawa munakuleta wubanji. Daniel nindi, “Kudi yuma yayivulu yimwatela kwila yinabadiki hakukalakala nyidimu yamuchipompelu yikusha chisaka chenu muwubanji.”

16, 17. (a) Yumanyi yatela kwilawu akwaKristu adisumbula kumudimu yikumwekesha nawu yililu yawuvumbi ayikeña wanyi? (b) Mazwinyi akusoñamisha anakutusoñamishawu kudi nduñu wamaana nikashinshi?

¹⁶ MuKaposhi Kakutalila niAwake! mwekalaña kufumba kwakuwahi kwakwashaña akwaKristu adisumbula kulonda abuli kufwa mumuhetu wawuvumbi. Chakutalilahu, Kaposhi Kakutalila kaSeptember 15, 2006, katufumbili nawu: “Babalenu nayililu yinateli kuyiletesha mutachiki kumwekesha kukeña hamudimu hela kwejima kumudi. Chakutalilahu, kuzata maora amavulu nakusompweshamu namuntu wabula kwikala mwinikwenu munateli kuholokela mukweseka. Chineli mwasumbula hela mwasumbuka, nhoshelu yenu niyililu yenu yatela kumwekesha nawu yililu yawuvumbi mwayikeña wanyi. Chineli munakufwila kumwakama Nzambi, bayi mukokola muntu kuhitila mukunkenkama hela munvwalilu yatama nimummwekenu yenuku. . . . Mwatela kusha mwevulu wamwinikwenu hela wanyanenu hamesa kumudimu kulonda wuyanukisheña niakwenu ejima nawu mwalemesha chisaka chenu. Dichi bayi mwiteja muntu wunakufwila kuyihuñumuna nayililu yawuvumbuku.”

¹⁷ Nduñu wamaana nikashinshi watusoñamisha nindi tuleki kutoñojoka hayililu yakwila wuvumbi namuntu wabula kwikala mwinikwetu. Muloña neyi tukutoñojokaña hayumiyi tunenzi twili wuvumbi. (Yak. 1:14, 15) Neyi twasumbula hela twasumbuka, chikuwaha neyi tukuhitulukaña mumpinji mumpinji namwinikwetu munyikanda yetu yahoshaña hansañu yamaluwi. Maluwi hintanjikilu yaloñeshayi Yehova yomweni nawa ajila. Neyi tukwikalaña nampinji yakuhanjeka namwinikwetu hansañu yamaluwi etu tukumwekesha netu twalemesha yuma yajila.—Kutach. 2:21-24.

18, 19. (a) Wubanjinyi wafumaña mukwila wuvumbi? (b) Wulokwinyi wafumaña mukwikala ashinshika mumaluwi?

¹⁸ Neyi muchima wunakuyidimba nindi mwili wuvumbi, toñojokenu hawubanji wafumaña mukwila wujila niwuvumbi. (Yish. 7:22, 23; Ŋal. 6:7) Antu elaña wuvumbi amuneñeshaña Yehova nawa aneñeshaña mwinikwawu niawenawu. (Tañenu Malaki 2:13, 14.) Dichi, toñojokenuña hawuloku watambwilañawu antu adihembaña chiwahi. Bayi neyi akweti hohu kuchiñeja kwakushakama haya nyakaku ilaña anakudiluñisha nichayinu mpinji nawa akweti chinleji chitooka.—Tañenu Yishimu 3:1, 2.

¹⁹ Ñimbi yamasamu wembili nindi: “Akeña nshimbi [jaNzambi] amonaña kumwena zo-o nankashi; hiyakweti hakudimbukilaku.” (Mas. 119:165) Dichi keñenu chalala nawa “babalenu mumukwendela. Bayi mwendaña neyi antu abula maanaku, endenu neyi akwamaana” muyinu mpinji yatama. (Efwes. 5:15, 16) Satana naleleki nyihetu munjila jejima mutwendaña kulonda mufweña akwakudifukula alala. Ilaña tunadiloñeshi chikupu kudikiña etu aweni. Yehova natwinki yuma yitunakukeña kulonda ‘tudikañi’ ‘nikujima nyivu yakesi yamukwakutama yejima’!—Efwes. 6:11, 16.