MUTU WUDI HEFU DATACHI | KOMANA NZAMBI WAYISHA MUCHIMA?

Komana Nzambi Wayakamenaña?

“Ami kwami nikazweñi wabula yuma; hela chochu, Mwanta enda antoña.”—Masamu 40:17.—DAVIDI KAISARELA WAKUSHANKULU

Komana Davidi welili chiwahi kulomba Nzambi nindi yamwakameneña? Komana Nzambi wayakamenaña? Antu amavulu ajinokaña neyi Nzambi wasweja ñovu wayakamenaña. Muloñadi?

Chuma chatachi chaleñelaña chakwila nawu Nzambi wasweja ñovu kubadika antu. Wamonaña nyuza “neyi imata didi mumbeketi, ayifuukula neyi lunkuñu lwasweja kukeha lwakupezu.” (Isaya 40:15) Nsoneki wamakonu wabula kumukuhwelela Nzambi wahosheli nindi “hitwatela kukuhwelela netu kwekala Nzambi wakamenaña antu hela yuma yelañawuku.”

Antu amakwawu atoñojokaña nawu yililu yawu yaleñelaña Nzambi yabuleña kuyakamena. Chakutalilahu, iyala wejina daJim wahosheli nindi: “Nalombeleña mpinji yejima kulonda nikali nakuwunda nikudiwunjika, ilaña neyi hahita mpinji nazuwileña cheñi. Nkumininaku, nelukili nami nelileña yuma yatama nawa Nzambi wukunkwasha wanyi.”

Komana Nzambi wekala kwakulehi nawantu chakwila hanateli kutukwashaku? Watiyaña ñahi hadi antu jindi abula kuwanina? Chakadi Nzambi yomweni kutuleja chekalayi, kwosi muntu wunateli kumuhoshelaku hela kwakula awa malwihu. Ilaña nsañu yafuma kudi Nzambi yekala muBayibolu yahoshaña nawu Nzambi wekala kwakulehi wanyi nawa wayakamenaña antu. Bayibolu yahoshaña nawu “kutoña yena hekala kwakulehi nanetu ejimaku.” (Yililu 17:27) Yibaaba yiwana yinalondeluhu, yikulumbulula Nzambi chakamenañayi antu nichamwekeshañayi nawu wakamenaña antu adi neyi enu.

[Mwevulu wudi hefu 3]

“Nyuza yidi neyi imata didi mumbeketi.”—ISAYA 40:15

MUTU WUDI HEFU DATACHI | KOMANA NZAMBI WAYISHA MUCHIMA?

Nzambi Wayakamenaña

‘Mesu aNzambi atalaña mwendelaña muntu, wamonaña mwayañayi mwejima.’—YOBA 34:21.

CHALEÑELAÑA ANTU AMAKWAWU AJINOKEÑA: Kwesekeja nakusandujola kwakatataka, mumulalanji wetu wumu mwekala mapulaneti akubadika 100 biliyoni. Antu chiyatoñojoka chasweja kutoha yuma yaleñayi Nzambi, ehulaña nawu, ‘Muloñadi Nzambi wakuleña kwejima chinateli kushilaku maana kuyuma yelaña antu mukapulaneti kanyanya?’

CHAHOSHAÑA IZU DANZAMBI: Nzambi hatwinkeli hohu Bayibolu nikutumba chisayikilaku. Ilaña Yehova watulejaña nindi: “Nukukulombola nadisu dami.”—Masamu 32:8.

Toñojokenu hadi Haga mumbanda wakuEjipitu wadiñaku muyaaka yamuma 1900 B.C.E. Haga wamusawileña Sarayi wamwiñijili mudimu, dichi Sarayi watachikili kumukabisha nawa Haga watemukilili muchinkalampata. Chineli Haga wakoñeli chiluwa, komana Nzambi walekeli kumwakamena? Bayibolu yashimuna nawu: “Kañelu kaYehova wamuweni.” Ona kañelu wamulejeli Haga nindi: ‘Yehova natiyi chiwunamoni yihuñu.’ Kuhiñahu Haga wamulejeli Yehova nindi: “Yeyi Nzambi Wamonaña.”—Kutachika 16:4-13.

“Nzambi wamonaña” wayakamenaña ninenu nawa. Chakutalilahu: Mama yawantu wukweti kukeña wakamenaña nankashi anyanindi anyanya muloña mwana neyi wuchidi wanyanya anvwali atela kumwakamena nankashi. Munjila yoyimu, Nzambi watwakamenaña nankashi neyi tunaneñi nawa tudi mukukala. Yehova wahosheli nindi, “Ami nashakama hewulu hajila, hamu namuntu wukweti muchima wachikeka, wadizoza, kulonda nihizumwishi nyichima yawantu adizoza, nihizumwishi nawa nyichima yawantu akweti nyichima yachikeka.”—Isaya 57:15.

Hela chochu, munateli kudihula nenu: ‘Indi Nzambi wañakamenaña ñahi? Komana wansompeshaña kwesekeja nachinamwekanaña, tahindi washinshikaña mumuchima wami nakumona chinekala nikuñiluka chiwahi?’

[Mwevulu wudi hefu 4]

Mwana neyi wuchidi wanyanya anvwali atela kumwakamena nankashi

MUTU WUDI HEFU DATACHI | KOMANA NZAMBI WAYISHA MUCHIMA?

Nzambi Wayiluka Chiwahi

“Eyi Yehova, wunantali chachiwahi wunañiluki”—MASAMU 139:1.

CHALEÑELAÑA ANTU AMAKWAWU AJINOKEÑA: Antu amavulu atoñojokaña nawu Nzambi wamonaña antu ejima nindi hiyakwanshidi, akweti majilu nawa hatela kuyikwashaku. Kendra wakabakeni nachineñi, wadifwishileña namuloña nindi wakañenyeña kwila yuma yakeñañayi Nzambi. Nkumininaku wahosheli nindi, “Nalekeli kulomba.”

CHAHOSHAÑA IZU DANZAMBI: Yehova washinshikaña wanyi yiluwa yetu muloña weluka chitwekala. Bayibolu yahosha nawu “Yena weluka nyijimba yetu, Waanukaña kwindi nindi hilunkuñu hohu kwalu.” Dichi watwibabeshaña wanyi ‘mwesekena nshidi jetu,’ ilaña watwanakenaña neyi tunabalumuki mumuchima.—Masamu 103:10, 14.

Toñojokenu hadi Davidi, mwanta wawaIsarela watenawu muchibaba chatachi. Hampinji yalombeleñayi kudi Nzambi, Davidi wahosheli nindi: “Chinadiñi nichidi wamwisu, mesu eyi anmweni, asonekeli mumukanda weyi yidi yami yejima . . . Ntali chachiwahi, eyi Nzambi, wiluki muchima wami.” (Masamu 139:16, 23) Eñañi, Davidi welukili chikupu nindi hela chakwila wakoñeli nshidi yahamesu bwi-i, Yehova wukwiluka nindi nabalumuki mumuchima.

Yehova wayiluka nankashi kubadika muntu. Bayibolu yahosha nawu “Antu atalaña kumesu hakwila Yehova watalaña kumuchima.” (1 Samweli 16:7) Nzambi weluka chayileñelaña mwileña yuma munjila yimwelilañamu, weluka chayileñawu, njila yimwakulililumu, kwiluña kumwashakamineña nichaleñela mwikali chimwekala. Wamonaña nawa walemesha chimwazataña nañovu hakwila mwikali muntu wamuwahi hela chakwila mwaluwañeshaña.

Hanu dinu Nzambi wazatishaña ñahi yuma yelukayi hadi enu kulonda yayikundenji?

[Mwevulu wudi hefu 5]

“Chinadiñi nichidi wamwisu, mesu eyi anmweni.”—MASAMU 139:16

MUTU WUDI HEFU DATACHI | KOMANA NZAMBI WAYISHA MUCHIMA?

Nzambi Wayikundejaña

“Nzambi, wakundejaña akwakululuta, diyi watukundejeli.”—2 AKORINDA 7:6.

CHALEÑELAÑA ANTU AMAKWAWU AJINOKEÑA: Hela chakwila akeñaña kuyikundeja, antu amakwawu atoñojokaña nawu chaluwa kulomba kudi Nzambi nawu yayikwashi kuumika kukala kukwetiwu. Mumbanda wejina da Raquel wahosheli nindi, “Neyi nimona chinakukabakanawu antu amavulu mukaayi, namonaña kukala kunukweti nami kwanyanya chakwila nakañanyaña kumulomba Nzambi nami yankwashi.”

CHAHOSHAÑA IZU DANZAMBI: Nzambi wela dehi chuma chalema kulonda yakwashi antu nikuyikundeja. Muntu wejima hanu hamaseki waswana nshidi, dikwila nawu antu hiyakweti ñovu yakulondela chikupu mwakeñañayi Nzambuku. Hela chochu, Nzambi “watukeñeletu, hakutemesha Mwanindi [Yesu Kristu] ekali ifutu danyiloña yetu.” (1 Yowanu 4:10) Kuhitila mumulambu waYesu, Nzambi watwanakenaña nshidi jetu, twekalaña nachinleji chitooka nawa twachiñejaña kushakama haya nyaka mwituña dadiha mukekala kuwunda.a Komana idi ifutu dawantu ejima hohu tahindi dinakumwekesha nawu Nzambi wayakamenaña chikupu enu halwenu?

Shinshikenu chakutalilahu chakapostolu Pawulu. Mulambu waYesu wamuzañalesheli nankashi chakwila wasonekeli nindi: “Nahandaña mukwitiya kwakukuhwelela Mwana kaNzambi, wankeñeli, wadiheni kunkoolami.” (Aŋalija 2:20) Mwamweni, Yesu wafwili henohu Pawulu kanda yekali mukwaKristu. Ilaña Pawulu wamweni iwu mulambu nindi hichawana chamwinkeluwu kudi Nzambi.

Mulambu waYesu hichawana chayinkawu ninenu kufuma kudi Nzambi. Ichi chawana chinakumwekesha nawu mwalema chikupu kudi Nzambi. ‘Chikuyikundeja haya nyaka, nikuchiñeja kwakuwahi naluwi, nikuyikolesha munyidimu yayiwahi nimumazu amawahi ejima.’—2 Atesalonika 2:16, 17.

Ilaña munahiti dehi yaaka 2,000 kufuma hahaniniyi Yesu wumi windi. Yumanyi yikwawu yinakumwekesha makonu nawu Nzambi nakukeña kwikala ibwambu denu?

[Tumazu twaheshina]

[Mwevulu wudi hefu 6]

“Mwana kaNzambi, wankeñeli, wadiheni kunkoolami.”—AŊALIJA 2:20

MUTU WUDI HEFU DATACHI | KOMANA NZAMBI WAYISHA MUCHIMA?

Nzambi Wakeñaña Kwikala Ibwambu Denu

“Kwosi muntu natweshi kwinza kudami chakadi kumukoka kudi Tata wantemesheluku.”—YOWANU 6:44.

CHALEÑELAÑA ANTU AMAKWAWU AJINOKEÑA: Antu amavulu amukuhwelela Nzambi atoñojokaña nawu wekala kwakulehi nawena. Christina mumbanda washakamaña mwituña daIreland, wayileña kuchechi mulungu nimulungu wahosheli nindi, “Namwilukili hohu nami hiNzambi waleñeli yuma yejima. Ilaña namwiluka wanyi. Hinatoñojokeluhu nami nateli kwikala ibwambu damiku.”

CHAHOSHAÑA IZU DANZAMBI: Neyi tudi nakukala, Yehova hatumbaña chisayikilaku. Yesu walumbulwili chatwakamenañayi Nzambi munichi chishimu: “Neyi kudi muntu wukweti nyikoku yindi nkulakaji, neyi hanapwapuki wumu, abuli kushiya makumi atanu nawana natanu nawana, ayi kumapidi nakukeñakeña owu napwapuki, tahindi?” Chikumanyi chitukudizilaku? ‘Dichi muchima waTata yami wudi mwiwulu hanakeñi mwana wanyanya wudi neyi iwu kunoñaku.’—Matewu 18:12-14.

‘Mwana wejima wanyanya wudi neyi iwu’ walema kudi Nzambi. Indi Nzambi ‘wakeñakeñaña ñahi owu napwapuki’? Kwesekeja nansona yindi hewulu, Yehova wakokaña antu kwinza kudi yena.

Talenu cheliliyi Nzambi kulonda yakoki antu ashinshika. Muyaaka 100 C.E., Nzambi watemesheli kambanji mukwaKristu Fwilipu kuya kudi kalamba wakuEtiyopiya kulonda yamulumbulwili mwatalisha wuprofwetu wamuBayibolu watañileñayi. (Yililu 8:26-39) Nkumininaku, Nzambi wamutemesheli kapostolu Petulu kuya kwitala dakalamba wamuRoma wejina daKonelisu, wadiña nakulomba nikukeña kudifukula kudi Nzambi. (Yililu 10:1-48) Nzambi walombweli cheñi kapostolu Pawulu nialunda nindi kuya kukaloña kadiña hanzi yamusumba waFwilipi. Chiyashikili, awanini muntu wejina daLidiya “wadifukwileña kudi Nzambi” nawa ‘Yehova wenzunwini muchima windi, kulonda atiyi.’—Yililu 16:9-15.

Iyi nsañu yitunahanjekuhu yinakumwekesha nawu Yehova wayikwashili antu ejima akeñeleña kumwiluka. Anyi makonu ayaña kumatala awantu nikumaluña kwekalaña antu amavulu nakushimwina nsañu yaNzambi yekala amuBayibolu? Antu amavulu akwakula nawu, “aYinsahu jaYehova.” Dihulenu nenu, ‘Komana Nzambi diyi wunakuyituma kulonda ankwashi nikali ibwambu dindi?’ Mwani lombenu kudi Nzambi kulonda yayikwashi mwikali ibwambu dindi.a

[Tumazu twaheshina]

[Mwevulu wudi hefu 7]

Anyi makonu ayaña kumatala awantu nikumaluña kwekalaña antu amavulu nakushimwina nsañu yaNzambi yekala muBayibolu?