Bebe wayikeñeli chikupu atata yindi. Awa mazu ayihosheli kudi ibwambu dindi wakuhwelelayi, nawa amuneñesheli chikupu Bebe. Mpinji yejima wahosheleña nindi, “Atata afwili chatama.” Chimwahitili yaaka Bebe wasonekeli nsañu yamwekeni, nawa chamwekeni hatooka nawu wachidiña nachineñi.

Neyi chamweniyi Bebe, hahitaña mpinji hakwila chineñi chimani, sweje-e neyi wamukeñeli owu muntu wunafwi. Kufwa diyi “chilumbu wakukumishaku” ashimunawu muBayibolu. (1 Akorinda 15:26) Kufwa kwashikenaña dakumwekana, kwatushintakeshaña henohu tunadiloñeshi wanyi nawa kwashikenaña antu itwakeña. Kwosi muntu wabulaña kufwa. Dichi bayi tuhayama neyi tunaneñi muloña wakufwisha ntaña yetu hela makabi itwamonaña hanyima yakufwishaku.

Hadaha mwadihulahu dehi nenu: ‘Hahitaña yaaka yiñahi hakwila chineñi chimani? Muntu nateli kuumika ñahi? Nateli kukundeja ñahi antu anafwishi? Komana antaña jetu afwa dehi amba akasañuka?’

Mwakabakanahu dehi nayikatu hakapinji kantesha? Hadaha mwakoleli swayi swayi chakwila mujimbala nimakabi imwamweni. Ilaña chineñi dichi chekala wanyi. Dr. Alan Wolfelt wasonekeli mumukanda windi waHealing a Spouse’s Grieving Heart nindi, “Kwosi chuma chakala ‘kumanisha neyi chineñi.’” Ilaña wahosheli cheñi nindi: “Mukuhita kwampinji chineñi chinateli kukeha nawukwashu wawakwetu.”

Chakutalilahu, shinshikenu cheliliyi nkakulula Abarahama chafwiliyi ñodindi. Bayibolu yahoshaña nawu, ‘Abarahama watachikili kutumpa nikumudila Sara.’ Mazu akwila nawu ‘watachikili’ amwekeshaña nawu hahitili mpinji hakwila chineñi chimani.a Muntu mukwawu wadiña Yakoba, wadimbiliwu nawu mwanindi Yosefu amujahili kudi kanyama wamwisaña. Wadilili hadi “mafuku amavulu,” nawa antaña jindi akañenyi kumukundeja. Mwahitili yaaka yayivulu, ilaña kufwa kwaYosefu kwachidiña nakumukata kumuchima.—Kutachika 23:2; 37:34, 35; 42:36; 45:28.

Nimakonu chumichi chamwekanaña kudi antu amavulu anakudila muntu akeñawu. Shinshikenu yakutalilahu yiyedi yinalondelihu.

• “Mfumwami, Robert, wafwili haJuly 9, 2008. Ifuku damwekeni maposu dadiña tuhu neyi chochekalaña mafuku ejima. Twadifufwili, kudikumbata nikuhosha nawu ‘nakukeña’ neyi chochitwelileña mpinji yejima hanyima yakudawula. Nichidi nachineñi hela chakwila munahiti yaaka 6. Neluki wanyi neyi nakaleka kumudila nfumwami Robert.”—Gail, wudi nayaaka 60.

• “Hela chakwila hanahiti yaaka 18 kufuma hafwili ñodami inakeña, nichidi kumwanuka nawa naneñaña. Neyi nimona yileñaleña yayiwahi namwanukaña nami neyi wadiña koku wadi kutiya kuwaha kumona yuma yinakumona.”—Etienne, wudi nayaaka 84.

Mwamweni, antu amavulu niwena dichatiyañawu. Muntu himuntu waneñaña munjila yambuka, dichi tukuluwañesha neyi tutachika kuseha muntu chinaneñiyi hakukala kunamoniyi. Nawa bayi tuditwika nyiloña neyi tunasweji kuneña muloña wakujimbesha muntu itwakeñaku. Tunateli kuumika ñahi chineñi?

Kudi yuma yayivulu yinateli kuyikwasha haniyi nsañu. Bayi nsañu yejima yinateli kuyikwashaku. Chakutalilahu, antu amakwawu akuyileja nawu bayi mudila hela kuneña munjila yidi yejimaku. Amakwawu akuyileja mwacheñi nawa mukumwekesha chineñi chikupu. Bayibolu yashimuna yuma chiwahi, yashimunañawu niakwakusandujola amakonu.

Muyisemwa yikwawu antu ahoshaña nawu iyala hatela kudilaku. Komana kudihu chuma chikuyitiyisha nsonyi neyi mudila hela hadi antu amavulu? Antu atalaña hayitoñojoka yawantu etejaña nawu kudila hinjila yakumwekeshelamu kuneña. Mukuhita kwampinji kudila kwakayikwasha kuumika hela chakwila munaneñi nankashi. Kukañesha kudila kukuyiletela kukala kumujimba. Bayibolu yashimuna wanyi nawu kudila kwatama hela nawu iyala hatela kudilaku. Toñojokenu hadi Yesu. Chafwiliyi ibwambu dindi Lazaru, Yesu wadilili hadi antu amavulu hela chakwila wadiña nañovu yakusañula afu.—Yowanu 11:33-35.

Antu amakwawu adilaña nakuhila, sweje-e neyi muntu nafwi chakukasumwisha. Kudi yuma yayivulu yinateli kumuhilisha muntu wunafwishi, chidi neyi mazu atama ninsañu yakutwamba yinakuhoshawu antu alemeshawu. Mike wakuSouth Africa washimwini nindi, “Nadiña nayaaka 14 hafwiliwu atata. Chitwadiña hachipenji, mukulumpi wamuAnglican wahosheli nindi Nzambi wakeñaña antu amawahi nawa wayisendaña swayi.a Chumichi chanhilishili chikupu muloña twayikeñeli atata. Hela chakwila munahiti dehi yaaka 63, mazu ahosheliyi aneñeshaña.”

Indi kudinka nyiloña? Sweje-e neyi muntu nafwa mukukashimwisha, muntu wunafwishi wukutoñojokaña nindi, ‘Neyi nalekeli kwila mwenimu kachi chumichi chinamwekani wanyi.’ Hadaha mwatobokeli namuntu wunafwi. Mukutachika kudinka nyiloña.

Neyi munakudinka nyiloña nawa munahili, bayi muyihemba kumuchimaku. Ilaña, lejenuku mukwenu wunateli kuyitiyilila nawa wukuyileja nindi ochi munakutiya dichatiyañawu niakwenu ejima afwishaña. Bayibolu yatulejaña nawu: “Ibwambu damuntu wamukeñaña mukwawu mwahita mpinji jejima; mana kwamuntu wavwalikila yakala.”—Yishimu 17:17.

Ibwambu wabadika chikupu wunatela kumukundeja muntu wunafwishi hiNleñi yetu, Yehova Nzambi. Mulejenu kukala kwenu kwejima mukulomba muloña “yena wayihembaña.” (1 Petulu 5:7) Kubombelahu, washika nindi ejima akumulomba wukuwundisha yitoñojoka yawu “nakuwunda kwaNzambi kwabadika maana ejima.” (Afwilipi 4:6, 7) Cheñi, ilenu Nzambi yayikwashi kuhitila mwizu dindi dakundejaña Bayibolu. Sonekenu jinsona jinateli kuyikundeja. (Talenu chikasha.) Munateli kuhembela nsona jantesha kumutu. Kutoñojoka haniyi nsona kukuyikwasha sweje-e nawufuku himwekalaña nkawenu nawa hichakalaña kukama.—Isaya 57:15.

Katataka iyala itukutena netu Jack wudi nayaaka 40, wajimbesha ñodindi nachikatu chakansa. Jack wahosheli nindi mpinji yikwawu watiyaña wuudi chikupu. Ilaña kulomba kwamukwashaña. Wahosheli nindi, “Neyi nilomba kudi Yehova namonaña nami nidi nkawamiku. Kakavulu nahindukaña nawufuku nawa nakamaña cheñi wanyi. Hanyima yakutaña nikutoñojoka hamazu akukundeja amuNsona nikushimuna yihuñu yami mukulomba, muchima niyitoñojoka yami yawunda chikupu, nawa natweshaña kukamaña.”

Kansi wamumbanda wejina daVanessa wafwishili amama yindi nayikatu. Niyena kulomba kwamukwashili. Wahosheli nindi, “Hampinji yinadiña muyihuñu yayeni, nelileña hohu chinatena ijina daNzambi, hohenohu nitachika nikudila. Yehova watiyileña kulomba kwami nawa wankolesheleña.”

Akwakukwasha antu anafwishi alejaña antu anakukabakana nachineñi kuya nakukwasha antu hela kuzataku nyidimu yamuchituñilu. Neyi mwila mwenimu mukwikala namuzañalu nawa chineñi chikukeha. (Yililu 20:35) AkwaKristu amavulu afwishaña antaña jawu amonaña nawu kukwasha akwawu kwayikundejaña.—2 Akorinda 1:3, 4.

Komana chayikalilahu dehi kukundeja ntuñi nenu wunaneñi hamuloña wukujimbesha ntaña yindi? Mpinji yikwawu twelukaña wanyi jakuhosha hela jakwila, dichi twakuminaña dakushakama hohu. Ilaña kudi yuma yitwatela kwila yinateli kukwashana.

Kakavulu, chuma chakeñekaña hikuya hohu nakuyitala nikuhosha mazu antesha adi neyi “chatama mwani.” Muyisemwa yayivulu, kumukumbata muntu hela kumukamunaku hachikasa chanti, kwamwekeshaña nawu munakumwakamena. Neyi muntu wunafwishi nakuhosha, tiyililenu nakanañachima. Sweje-e dinu, zatilenuku chisaka chinafwishi tunyidimu, hadaha tunakubula kuzatayi chidi neyi kuteleka, kuhemba anyana hela kuyikwasha kuloñesha yuma yahachipenji neyi hadi kukaankila. Neyi tukuzataña nyidimu yamuchidiwu kuyikwasha kubadika kuhosha hohu mazu amawahi.

Mpinji yikwawu, mwatela kuhosha hadi muntu wunafwi, chidi neyi kuhosha hayililu yayiwahi hela hayuma yayiwahi yakoñeliyi. Neyi tukuhoshaña hayuma yamuchidiwu chikumuleñela muntu wunafwishi kuzañalala. Chakutalilahu, Pam wafwishili nfumwindi Ian yaaka 6 yinahitihu, wahosheli nindi: “Antu anlejaña yuma yayiwahi yelileñayi nfumwami Ian yinabulili kwiluka nawa yumiyi yanzañaleshaña chikupu.”

Akwakusandujola ahoshaña nawu antu anafwishi hakusambila ayikwashaña chikupu, ilaña alekaña kuyakamena muloña amabwambu jawu ashaña maana kunyidimu yawu. Dichi, twalekenuhu kuhanjeka nebwambu denu wunafwishi.a Antu amavulu ananeñi atiyaña kuwaha kuyihempula haniyi mpinji kulonda akeheshuku chineñi.

Shinshikenu chakutalilahu chakansi wamumbanda Kaori wakuJapan, waneñeli chikupu hampinji yafwishiliyi amama yindi, kuhiñahu wafwishili yayindi wamumbanda chimwahitili tukweji 15. Wakoolekeli muloña amukwashileña mpinji yejima kudi amabwambu jindi ashinshika. Ibwambu wumu diyi Ritsuko nawa wadiña mukulumpi kubadika Kaori, wekalili ibwambu dindi chikupu. Kaori wahosheli nindi, “Kuhosha hohu chalala hinatiyili kuwahaku. Kwosi muntu inakeñeleña kwikala neyi chadiña mama yamuku nawa hinatoñojokeleña nami kuduhu wakela mama yamiku. Hela chochu, chahembeleñayi mama Ritsuko chaletesheli nimukeñi chikupu. Mulungu nimulungu, twayileña nakushimwina ninakupompa hamu. Wantambikileña kuya nakunwa tii, wanleteleleña yakuda nikunsonekela nyikanda nimakaadi kakavulu. Yililu yayiwahi yamwekesheleñayi Mama Ritsuko yankwashili chikupu.”

Hanahiti dehi yaaka 12 kufuma hafwili amama yaKaori nawa yena ninfumwindi anakuzata mudimu wampinji yejima wakushimwina. Kaori wahosheli nindi, “Mama Ritsuko watwalekelihu kuñakamena. Neyi nafunti kumukala, nayaña nakumuhempula mpinji yejima nawa natiyaña kuwaha kuhanjeka nindi.”

Muntu mukwawu akwashiliwu nankashi hiPoli, Chinsahu chaYehova wamuCyprus. Poli wadiña neyala wamuwahi, Sozos, wadiña nayilili yayiwahi neyi kabiña mukwaKristu wamuwahi watambikileña anshona nianfwila kwitala dawu nakuhanjeka nikudiila nawu hamu yakuda. (Yakoba 1:27) Chawushona, Sozos chashikijiliyi yaaka 53, wafwili nachikatu chakuwoñu. Poli wahosheli nindi, “Nafwishili nfumwami washinshika winashakamini nindi yaaka 33 muwulu.”

Chamanini chipenji, Poli wabuukilili kuCanada hamu namwanindi wayaaka 15, Daniel. KuCanada, atachikili kupompa nawaYinsahu jaYehova. Poli wahosheli nindi, “Amabwambu jami amuchipompelu munabuukilili, elukili wanyi chadiña chihandilu chetu nimakabi itwamweni. Ilaña enjileña nakututala nikutukundeja namazu amawahi nikutukwasha. Chumichi chamukwashili mwanami, sweje-e hampinji yajimbesheliyi atata yindi. Antu adiña nakulombola muchipompelu amukeñeli chikupu Daniel. Manakwetu wumu wamusendeleña Daniel nakuhanjeka nawamabwambu jindi hela nakuya nakuhema ngunja.” Chayinu mpinji wejima wawu mama yawantu nimwana anakuzata chiwahi kuspiritu.

Kuhosha hohu chalala, tukweti njila jajivulu mutunateli kukwashilamu nikukundeja antu anakudila. Bayibolu niyena yatukundejaña kuhitila mukutuleja nsañu yayiwahi yakuchiñeja.

Neyi munakumwanuka Gail, itwashimuna hakusambila muyinu magazini, wajinokeleña neyi chakwila wakaleka kumudila nfumwindi Robert wafwili. Hela chochu, nakutalila kulonda yakamumoni cheñi nfumwindi Robert mwituña dadiha dakanayi Nzambi. Wahosheli nindi, “Nsona yinakeña nankashi, hiChimwekeshu 21:3, 4.” Hahosha nawu: “Nzambi yomweni wakekala nawu. Wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku. Yuma yakusambila yinahiti dehi.”

Gail wahosheli nindi: “Ichi chikaninu chalala. Natoñojokelañaku antu ajimbesha antaña jawu, abula kwiluka kuchiñeja kwakwila nawu akadimona cheñi nawantaña jawu.” Gail wazataña kwesekeja nayuma yakuhwelelayi kuhitila mukuzataku mudimu wampinji yejima wakushimwina, kulejaku antuñi nindi chikaninu chaNzambi chakumbidi hampinji ‘yikwakabula kufwa.’

Munateli kuhosha nenu, ‘chumichi kwila chimwekana nehi!’ Ilaña shinshikenu chakutalilahu chaYoba. Wakatili chikupu. (Yoba 2:7) Hela chakwila Yoba watoñojokeli nindi wukuhanda wanyi, ilaña wakuhweleli nindi Nzambi wukweti ñovu yakumusañula nakushakama hamaseki. Wahosheli chakufuma hamuchima nindi: “Mutenowu wadi kunsweka mukaluña . . . Wadi kutambika, ami nadi kwitiya; wunafwili mudimu wakumakaseyi.” (Yoba 14:13, 15) Yoba wakuhweleleli nindi Nzambi yindi wukumwanukaña nawa wakamusañula.

Katataka, Nzambi yamusañuli Yoba niantu akadi kutwesha kuchinda, neyi dinu iseki anadibalumuni dehi kwikala paradisa. (Luka 23:42, 43) Hamukanda waYililu 24:15 Bayibolu yashimuna nawu, “kwamba kekala kusañuka.” Yesu watushiika nindi, ‘Bayi muhayama chumichuku; mpinji yakenza henohu antu ejima adi mumajamu achanukishu akatiya izu dindi.’ (Yowanu 5:28, 29) Yoba wakamona chakashikijewa ichi chikaninu. Wakekala nakukooleka kwakwikala namujimba ‘wawukwenzi’ nawa mujimba windi ‘wakekala kwase-ne-ne, kubadika wamwana wanyanya.’ (Yoba 33:24, 25) Dichakekalawu niantu ejima anakwiteja ntanjikilu yaNzambi yaluwi lwakusañula antu nakushakama heseki.

Neyi mwaneñaña hamuloña wakujimbesha ntaña yenu, yuma yitunahanjekihu hiyikumanisha chineñi chenu chejimaku. Kuhitila mukutoñojoka hayikaninu yaNzambi yamuBayibolu, mukwikala nakuchiñeja kwakweni niñovu yikuyikwasha kuumika.—1 Atesalonika 4:13.

Munakukeña kudizilahu nsañu yikwawu yinakuhosha hakuumika chineñi? Tahindi mudi namalwihu adi neyi, “Muloñadi Nzambi chetejeleliyi kutama nimakabi?” Mwani yenu haWebu sayiti yetu, ya jw.org/lun, kulonda mumoni Bayibolu chiyahanaña ñakwilu yikuyikundeja nawa yikuyikwasha.