Yehova Walemesha Izu Dimwahoshaña Nenu “Ameni”
YEHOVA walemesha kudifukula kwetu. Yehova ‘washañaku maana nikutiyilila’ kudi ambuña indi, walemesha yuma yejima yitwelaña hakudifukula kudi yena hela chakwila hituyuma twanyanya. (Mal. 3:16) Chakutalilahu, talenu izu ditwahoshaña mpinji yejima. Izu dakwila nawu “ameni.” Komana Yehova walemesha idi izu? Eña wadilemesha! Hakwila twiluki muloña waweni, tushinshikenu ntahi mwatalisha idi izu nichadizatishawu muBayibolu.
“ANTU EJIMA AKELA NAWU, ‘AMENI’”
Izu daLunda dakwila nawu “ameni” daya mukwila nawu “mwomwenomu” hela “mwalala.” Dafuma kwizu dachiHeberu datalisha mukwila nawu ‘kwikala washinshika,’ kwikala ‘wakukuhwelela.’ Kunyima adizatishileña hakwiteja nyiloña. Neyi muntu nasanyiki dehi, wahosheleña nindi “ameni” nakumwekesha nindi chuma chinahoshiyi chalala nawa neteji yuma yejima yinateli kufuma muyuma yinahoshiyi. (Kuch. 5:22) Neyi yahosha nindi “ameni” hamesu awantu, wateleli kuhemba munahoshiyi.—Nehe. 5:13.
Chakutalilahu chachiwahi chinakumwekesha chazatishawu izu dakwila nawu “ameni” chekala haKuhituluka kapetulu 27. Hanyima yakwila aIsarela aneñili dehi Mwituña Dachikaninu, apompeleña hakachi kampidi yaEbali nayaGerizimi nakutiyilila kunshimbi yayilejeleñawu. Apompeleña nakutiyilila kunshimbi nikusanyika nawu aneteji nshimbi. Elileña mwenimu nakuhosha nawu “ameni!” neyi ataña yuma yinateli kufumamu neyi afumpa nshimbi. (Kuhit. 27:15-26) Fwikijenu ipumba datiyakeni hakwileñawu nezu datiyakana chineli kwadiña antu amavulu. (Yosh. 8:30-35) Avulameneni wanyi mazu ahosheliwu hanidi ifuku. Ana aIsarela ahembeli mwahosheliwu, muloña Bayibolu yahosha nawu: “AIsarela amukalakeleli Yehova mafuku aYoshuwa ejima, nimafuku ejima adiñuwu akulumpi ashiyiliyi Yoshuwa, elukili mudimu waYehova wakoñeleliyi aIsarela wejima.”—Yosh. 24:31.
Yesu niyena wazatishili izu dakwila nawu “ameni” nakumwekesha nindi munahoshiyi mwalala, ilaña wadizatishileña munjila yambukaku. Chatela yazatishi idi izu hakwakula mazu anahoshiwu kudi muntu wacheñi, ilaña yena wazatishileña “ameni” (izu dabalumunawu muChizungu nawu “chalala”) Nakukonkomwena nindi munahoshiyi mwalala. Kakavulu wafuntishileñahu nakuhosha nindi “ameni ameni.” (Mat. 5:18; Yow. 1:51) Dichi, wadiña nakuyileja antu amutiyilileña nindi yuma yinahoshiyi yalala. Yesu wadiña nakuhosha muniyi njila muloña diyi etejeliwu kushikija yikaninu yaNzambi yejima.—2 Kor. 1:20; Chim. 3:14.
“ANTU EJIMA HIYAKWILA NAWU ‘AMENI’ HIYAKUHAMEKA NIYEHOVA”
A Isarela niwena azatishileña izu dakwila nawu “ameni’ hampinji yamushimekeleñawu nikulomba kudi Yehova. (Nehe. 8:6; Mas. 41:13) Chahosheleñawu nawu ameni hanyima yakulomba, awa antu atiyilileña amwekeshelaña nawu aneteji mwanalombiwu. Antu ejima apompeli adiña nakudibombamu nawa adifukwileña kudi Yehova muniyi njila. Dichi chuma chamwekeni haleteliyi Mwanta Davidi Chimbañu chaYehova muYerusalema. Hanyima yachidika, walombeli kudi Nzambi munsañu yasonekawu neyi kamina yekala ha 1 Kushindulula 16:8-36. Mazu indi ayishikili hamuchima antu ejima apompeli, dichi “Antu ejima hiyakwila nawu ‘Ameni!’ hiyakuhameka niYehova.” Atiyili kuwaha hakudifukula kudi Yehova hamu.
AkwaKristu amumafuku awapostolu niwena azatishileña izu dakwila nawu “ameni” hamushimekeleñawu Yehova. Ansoneki aBayibolu azatishili idi izu munyikanda yawu. (Rom. 1:25; 16:27; 1 Pet. 4:11) Mukanda waChimwekeshu wamwekeshaña yuma yamwekeni mwiwulu, yileñaleña yakuspiritu yinakumuhameka Yehova nakuhosha nawu: “Ameni! Muhamekenu Ya!” (Chim. 19:1, 4) AkwaKristu akusambila kakavulu ahosheleña nawu “ameni” hanyima yakulomba neyi anakupompa. (1 Kor. 14:16) Hela chochu, hiyakuminineña dakulondelamu chakadi kutoñojoka hezuku.
CHALEMENA AMENI YENU
Chineli tunadizi dehi chazatishileñawu ambuña aYehova izu dakwila nawu “ameni” kunyima, tunawani kwila nawu hinjila yimu yayiwahi yakukunkulwilamu kulomba. Neyi tuhosha netu “ameni” hanyima yakulomba, hinjila mutwamwekeshelaña netu mutunahoshi mwalala. Neyi twiteja netu “ameni,” hela tuhu wumweneni, mukulomba kwahatooka, dikwila nawu tuneteji mazu anahoshiwu. Shinshikenu cheñi chichalemena neyi tuhosha netu “ameni.”
Twashañaku muchima neyi anakulomba muloña hinjila yikwawu yakudifukwilamu. Bayi neyi twadifukulaña kudi Yehova hampinji yakulomba mumazu hohuku ilaña nimuyilwilu. Dichi twashañaku maana nikashinshi neyi anakulomba muloña wakwila twakeñaña kuhosha “ameni” yakufuma hamuchima.
Twekala anuñañana nawakwetu akwakudifukula. Hampinji yakulomba kwachipompelu, wejima wetu twatiyililaña kukulomba. (Yil. 1:14; 12:5) Chitwakwilaña hamu hakulomba nawamanakwetu niahela, chatukwashaña kwikala anuñañana. Chitwakwilaña hamu netu “ameni” chili nezu datiyakana hela mumuchima, kulomba kwetu kwamuleñelaña Yehova kwila yuma yitunamulombi.
Chitwahosha netu “ameni” twamushimekaña Yehova
Twamushimekaña Yehova. Yehova wamonaña yuma yejima yitwelaña neyi tunakumushimeka. (Luka 21:2, 3) Wamonaña chidi yilwilu yetu niyuma yejima yidi mumuchima wetu. Hela chakwila tunakutiyila kupompa hafoni, twatela kukuhwelela chikupu netu Yehova walemesha “ameni” yetu. Neyi tuhosha netu “ameni,” dikwila nawu tunakumushimeka Yehova hamu nawakwetu anapompi.
Chitwahosha netu “ameni” tunateli kumona neyi hiizu damukunkulwayi, ilaña dalema. Bayibolu yimu yaencyclopedia yahosha nawu: “Kuhitila mukuzatisha idi izu dimu, ambuña aNzambi amwekeshaña chikuhwelelu chawu, kwiteja chikupu nikuchiñeja kukwetiwu munyichima yawu.” Dichi, “ameni” yetu yimutiyisheña Yehova kuwaha.—Mas. 19:14.