“Inakukeña Wanyi”
1 Ichi dichi chavula kwakulawu antu kunsañu yitwashimwinaña mumaluña amakwawu. Chumanyi chikutukwasha kukañesha kutiya kutama neyi tuwana antu akweti kadiwu mwiluña? Tunateli kusañumuna ñahi mpwila yetu yansañu yayiwahi?
2 Twalekenuhu naMuzañalu: Kwanukaña muloña wunekaliliwu antu amavulu nakadiwu chikutukwashaku etu kutwalekahu namuzañalu. Antu adizishawu maana akwila nawu yuma yenjiluku yayeni hela akulila muyisaka yetiya nawu Nzambi kwekala kwosi hiyatela kumona kulema kwaBayiboluku. Amakwawu atela ayineñesha kuhitila muwunfwikiji wunakumonawu munsakililu. Amakwawu niwena, kadiwu kawu kanateli kumwekesha kuhila kwawu nikubula chikuhwelelu. (Efwes. 2:12) Amakwawu ‘ashañaku maana wanyi’ muloña wakusweja kwakamena yuma yamuchihandilu.—Mat. 24:37-39.
3 Hichidi namuloña nakukaana kwawantu amakwawuku, tunateli kwikala namuzañalu mumudimu wakushimwina, hakwiluka netu nzatilu yetu yamulemeshaña Yehova. (1 Pet. 4:11) Kubombelahu, kuhosha hachalala, hela tuhu kudi antu ana abulaña kumona kulema kwachalala, kwakoleshaña chikuhwelelu chetu. Tufwilenu kumona antu amwiluña neyi chayimonañayi Yehova. Wayanakeneni antu amuNineve abulili ‘kwiluka chambu hakachi kachikasa chachidiilu nichachimunswa.’ (Yona 4:11) Antu anakushakama mwiluña detu anakukeña nsañu yayiwahi! Dichi dinu, bayi tulekaku ilaña twatela kukeña jinjila jakusañumwinamu mpwila yawu hansañu yaBayibolu.
4 Hanjekenu Hakwakama Kudi Mwiluña Denu: Hadaha munateli kuhosha nsañu yinakwakamenawu mwiluña hakutachika kuhanjeka nakumwihula mwiniitala yahoshi yitoñojoka yindi. Tiyililenu hampinji yinakuhoshayi, kuhiñahu mulejenu nsañu yakukundeja yamuBayibolu hakwakula yuma yinakameniyi. Chelili kukala kunamani dehi mwiluña, Chinsahu wumu wamwekesheli wushona waweni hetala nihetala. Wahosheli nindi, “kukashimuka, antu atachikili kuhosha.” “Nahanjekeli chachiwahi nawantu amavulu muloña hadina ifuku namwekesheleña kukeña kudi antu inahempwileña.”
5 Kukala kwejima kunakumona muchidi wamuntu akakufumishahu kudi Wanta waNzambi. Esekenu kwiluka kukala kukwetiyi mwiniitala. Nateli kuyiteja kumulumbulwila nsañu yamuBayibolu yakuchiñeja. Neyi nehi, ‘wukatiyilila mpinji yikwawu.’—Yililu 17:32.