Kapetulu 5
Dizishenu Mwanenu Kufumisha Kuwansi
1, 2. Kudihi kwatela kuwanawu anvwali wukwashu hakukulisha anyanawu?
YAAKA 3,000 yinahituhu, nvwali wahamekaña wahosheli nindi, “anyana hiwuswana wakutwinka kudi Yehova.” (Masamu 127:3) Eñañi, muzañalu wakwikala nvwali hiwuloku wabandika kufuma kudi Nzambi, nawa adisumbula amavulu atambwilaña wuloku weniwu. Hela chakwila antu akweti anyana azañalalaña ilaña elukaña cheñi nawu kwikala nvwali himudimu weneni.
2 Sweje-e makonu, kuhemba anyana himudimu weneni hama. Hela chochu, antu amavulu ahembaña anyanawu chiwahi, nawa ñimbi yamasamu wonenenuwu wahosheli nindi: “Chiña Yehova atuña itala, neyi nehi, akutuña akukabakana tuhu.” (Masamu 127:1) Neyi mulondela nshimbi jaYehova chiwahi, mukwikala nvwali wamuwahi chikupu. Bayibolu yahosha nawu: “Mukuhweleli Yehova namuchima weyi wejima, bayi wushindamena kukashinshi keyeyi awenuku.” (Yishimu 3:5) Komana mukutiyililaña kufumba kwaYehova hampinji yimukutachika mudimu wakukulisha mwanenu hadi yaaka 20?
KWITEJA CHAHOSHA BAYIBOLU
3. Mudimwinyi wukwetuwu atata jawantu hakukulisha anyana?
3 Muyisaka yayivulu mukaayi, amayala amonaña mudimu wakukulisha anyana nawu himudimu wawambanda. Eña, Izu daNzambi dahosha hamudimu wukwetuwu atata jawantu nawu wakuleta yuma yakeñekaña hetala. Ilaña, yahosha cheñi nawu iyala wukweti nyidimu hetala. Bayibolu yahosha nawu: “Mudimu weyi wuloñeshañahu dehi mumpata, kadiwahishilañahu dehi kumpata, nkumininaku dinu hiwukutuña itala deyi.” (Yishimu 24:27) Kwesekeja nankeñelu yaNzambi, atata jawantu niamama jawantu azatilaña hamu hakufumba anyana.—Yishimu 1:8, 9.
4. Muloñadi chitukubulila kumwena nyana yawamayala netu yabadika yawambanda?
4 Indi anyanenu mwayimonaña ñahi? MuAsia “kakavulu anvwali hiyatiyaña kuwaha neyi mwana wamumbanda navwalikiku.” Nsañu yakubula kukeña nyana yawambanda yichidi kumwekana mumatuña aLatin America, hela tuhu “muyisaka yawantu ataña.” Ilaña walala wudi wakwila nawu nyana yawambanda bayi neyi yamukunkulwayuku. Yakoba tata yawantu waya mpuhu wakushankulu, wayilumbulwili anyanindi ejima, kushilahu niawambanda avwalikili hayina mpinji nindi, “anyana anantoñweliyi Nzambi.” (Kutachika 33:1-5; 37:35) Chochimu, Yesu wakiswilili “anyana anyanya” ejima (amayala niawambanda) amuleteleluwu. (Matewu 19:13-15) Tuneluki netu Yesu wamwekesheli yitoñojoka yaYehova.—Kuhituluka 16:14.
5. Yumanyi yikukwasha adisumbula kufuukulahu chiwahi kutalisha hanyana yatela kuvwalawu?
5 Komana kumwashakamaña, antu etejaña wamumbanda kuvwala nyana yayivulu chikupu? Dichi, adisumbula atela kufuukulahu aweni hansañu yanyana yatela kuvwalawu. Chumanyi chatela kwila anvwali abula mali akudyishilamu, nikuvwikilamu hela kutañishilamu nyana yayivulu? Chakadi nikujina, anvwali wenawa atela kutoñojokahu neyi hiyakufuukula hakuvula kwanyana yatela kuvwalawu. Adisumbula amakwawu akañanyaña kuhemba anyanawu, ayinkaña antaña jawu nyana yikwawu kulonda ayikwashuku kuhemba. Komana chachiwahi kuyihembela anyana? Inehi. Kuhana anyana hikwayamunaña anvwali kumudimu wukwetuwu hadi anyanawuku. Bayibolu yahoshaña nawu: “Muntu wukubula kukwasha ayindi, kusweja akwetala dindi, naleki mwaya kwitiya kwakukuhwelela.” (1 Timotewu 5:8) Adisumbula eluka nawu akweti mudimu afuukwilaña chadimu kuvula kwawantu ‘amwitala dawu’ kulonda atweshaña ‘kukwasha ayawu.’ Komana kwila azatisha njila yakukeheshelamu kuvwala nyana kulonda atweshi kukwasha ayawu nehi? Iyi nsañu atela kufuukulahu aweni, dichi neyi adisumbula anakukeña kuyizatisha, awenawu akufuukulahu neyi anakukeña kuzatisha yitumbu yakukañesha lusemu. “Antu ejima akadisendela yiteli yawu, iwu nachindi, iwu nachindi.” (Aŋalija 6:5) Hela chochu, nshimbi jamuBayibolu jahisha kukeheshaku nyana kuhitila mukufumisha ivumu. Yehova Nzambi diyi “kaseloki kawumi.” (Masamu 36:9) Dichi neyi muntu wukujaha kafuña kabaabika dehi wukumwekesha kasawuntu keneni kudi Yehova nawa chochimu nakujahana.—Kwidika 21:22, 23; Masamu 139:16; Yeremiya 1:5.
KUMWINKA MWANENU YUMA YAKEÑEKAÑA
6. Mpinjinyi yatela kutachika kumufumbawu mwana?
6 HaYishimu 22:6 hahoshaña nawu: “Mufumbi mwana endi munjila yatela kuyayi.” Kufumba mwana himudimu wukwawu weneni wukwetuwu anvwali. Mpinjinyi yimwatela kutachika kufumba mwana? Henohu wuchidi kansi nankashi. Kapostolu Pawulu wahosheli nindi Timotewu amufumbili “kufumisha kuwansi.” (2 Timotewu 3:15) Izu dachiGriki dinazatishuwu hanu dazatikaña kudi nkemba hela mwana wuchidi kanda yavwaliki. (Luka 1:41, 44; Yililu 7:18-20) Dichi, Timotewu atachikili kumufumba henohu wuchidi kansi nankashi. Neyi mwana wuchidi wanyanya diyi mpinji yayiwahi yakutachika kumufumba. Hela tuhu mukeki wekalaña nampwila yakukeña kwiluka.
7. (a) Muloñadi chichalemena kudi anvwali ejima ayedi kudikunda chikupu nankemba? (b) Wubwambu wamuchidinyi wadiñi hakachi kaYehova naMwanindi wumu hohu?
7 Mama yawantu wumu wahosheli nindi, “Ifuku dinashili hamakasa, namukeñeli chikupu mwanami.” Dichatiyañawu amama jawanyana amavulu. Iyi mpanda yayiwahi yekala hakachi kamama yawantu nankemba yaswejaña hampinji yekalañawu hamu kufuma tuhu hakuvwalika. Kwamusha kwakoleshaña wubwambu wawu. (Esekejenu 1 Atesalonika 2:7.) Mama yawantu chahemeshañayi nkemba yindi nikuhosha nindi hiyuma yalema yaleñelaña mwana kutiya kuwaha. (Esekejenuku Isaya 66:12.) Indochu tata yawantu? Niyena watela kumukeña nkemba chikupu. Yehova yomweni hichakutalilahu chakumwekesha kukeña. Mumukanda waYishimu, twatañañamu nsañu yawubwambu wekala hakachi kaYehova naMwanindi wumu hohu, wuyanemenuku nakuhosha nindi: “Yehova wanheteli hatachikiliyi njila yindi, helili nyidimu yindi . . . nadiñi nindi, nimukalawenu hami; namutiyishilaña kuwaha hefuku hefuku.” (Yishimu 8:22, 30; Yowanu 1:14) Chochimu, tata yawantu wukweti kukeña wekalaña nawubwambu wawuwahi namwanindi kufumisha tuhu kuwansi windi. Nvwali wumu wahosheli nindi, “Mwatela kumwekesha kukeña chikupu.” Watwalekeluhu nindi, “Kwosi mwana wafwahu dehi hamuloña wakumukumbata hela kumupwepujola.”
8. Yumanyi anvwali yatela kufumbawu ankemba chakadi kumanisha mpinji?
8 Kudi yuma yayivulu yakeñekaña kudi ankemba. Chavwalikawu, wooñu wawu watweshaña kutiya nsañu nikuyihemba, nawa anvwali diwu atela kuyileja. Talenu chakutalilahu chedimi. Akwakusandujola ahoshaña nawu, hakwila nawu mwana yahoshi nikutaña chiwahi “chashindamena chikupu hakutiyañana nawanvwali jindi henohu wuchidi kansi.” Hoshenuña nikutañila mwanenu henohu wuchidi nkemba. Niyena wukutachika kuyimbujola, nawa chakadi kunata mpinji mukutachika kumudizisha kutaña. Chakadi nikujina, wukutachika kutaña henohu kanda yatachiki shikola. Chumichi chikuyikwashaku sweje neyi mwashakamaña mwituña mwekala antañishi antesha nawa mutupeka twakutañila mwekalaña nyana yayivulu.
9. Chikonkwanyi chamuchidinyi chalema chikupu chatela kwilukawu anvwali?
9 Chuma chaswejaña kwakamenawu anvwali akwaKristu hadi mwanawu, hikumudizisha yuma yakuspiritu. (Talenu Kuhituluka 8:3.) Chikonkwanyi chamuchidinyi chatela kwikalawu nachu? Atela kukwasha anyanawu kwikala nayililu neyi yaKristu, dikwila nawu ‘kuvwala muntu wamwiha.’ (Aefwesesa 4:24) Hakuyikwasha, mwatela kukeña yuma yayiwahi yakutuña nachu ninjila yayiwahi yakutuñilamu.
LEJENU MWANENU CHALALA
10. Anyana atela kwikala nayililu yamuchidinyi?
10 Kuwaha kwetala kwashindamena nankashi hamuchidi wayuma yinazatishuwu hakutuña nachu itala. Kapostolu Pawulu wahosheli nindi yuma yayiwahi yakutuña nachu yililu yamukwaKristu, ‘hiwuru, siliva, nimalola awuseya.’ (1 Akorinda 3:10-12) Yumiyi yinakwimenaku yililu yidi neyi, chikuhwelelu, maana, kashinshi, kujila, kalemesha nikumuhameka Yehova ninshimbi jindi. (Masamu 19:7-11; Yishimu 2:1-6; 3:13, 14) Indi anvwali anateli kukwasha ñahi anyanawu kwikala naniyi yililu kufuma kuwansi wawu? Kuhitila mukulondela njila yashimwinuwu dehi kunyima.
11. Indi anvwali amuIsarela akwashili ñahi anyanawu kwikala nayililu yayiwahi?
11 Chikwashalili mafuku antesha muza wawaIsarela nakwiñila Mwituña daChikaninu, Yehova walejeli anvwali amuIsarela nindi: “Nimazu awa nukukuleja lelu akekalaña mumuchima weyi; wakalejañamu anyaneyi chakashinshi, diyi mpanji yiwakahanjikaña chiwakashakamaña mwitala deyi, nichiwakendaña munjila, nihakukama, nihakuhinduka.” (Kuhituluka 6:6, 7) Eña, anvwali atela kwikala akutalilahu, amabwambu, akwakutiyañana, nawa antañishi.
12. Muloñadi anvwali chiyatela kwimikilawu chakutalilahu chachiwahi?
12 Ikalenu akutalilahu. Chatachi, Yehova wahosheli nindi: “Nimazu awa. . . akekalaña mumuchima weyi.” Watwalekeluhu nindi: “Wakalejañamu anyaneyi.” Dichi anvwali atela kusambila kwikala nayililu yayiwahi. Nvwali watela kukeña chalala nikuchizatisha muwumi windi. Neyi yakoña mwenimu, nateli kushika hamuchima wamwanindi. (Yishimu 20:7) Muloñadi? Muloña anyana adizaña yuma yayivulu kuhitila mukumona kubadika mukutiya.—Luka 6:40; 1 Akorinda 11:1.
13. Hampinji yinakwakamenawu anyanawu, indi anvwali akwaKristu atela kwimbujola ñahi chakutalilahu chaYesu?
13 Ikalenu amabwambu. Yehova walejeli anvwali amuIsarela nindi: ‘Wukayilejaña anyaneyi chiwakashakamaña mwitala deyi, nichiwakendaña munjila.’ Chumichi chakeñekaña anvwali kuhanjeka nawanyanawu hela chakwila akweti yuma yayivulu yakwila. Yesu welukili nindi wateleli kwikala nampinji yakuhanjeka nawanyana. Mumafuku akukumishaku amudimu windi wakushimwina, ‘[antu] amuleteleli anyana anyanya kulonda ayinañiki makasa.’ Chumanyi cheliliyi Yesu? “Hakuyakata mumakasindi, hakuyikiswila nkisu.” (Maku 10:13, 16) Toñojokenu, mpinji yakufwa kwaYesu yadiña kwakwihi chikupu. Ilaña wadiñi nampinji yakuhanjeka nawanyana nikuyakamena. Mwalala tunadiziluku yuma yayivulu chikupu!
14. Muloñadi chichawahila anvwali kwikala nampinji yakuhanjekaña namwanawu?
14 Mwenda muhanjeka. Kwikala nampinji yakushakama hamu namwanenu chikuyikwasha kuhanjeka nindi. Neyi munakuhanjeka chikupu, mukwiluka yililu yinakukula namwanenu. Anukenu nenu, kuhanjeka kwabadika hakuhosha hohu. Mama yawantu wumu wakuBrazil wahosheli nindi, “nadizili kutiyilila, kutiyilila nakanañachima.” Hamuloña wakudiwunjika, mwanindi watachikili kumuleja yitoñojoka yindi.
15. Yumanyi yimwatela kwiluka kutalisha hayisela?
15 Anyana akeñaña “mpinji yakuseha . . . nimpinji yakuhañana,” nimpinji yakuhema. (Mukwakutaŋisha 3:1, 4; Zekariya 8:5) Yisela yawahaña neyi anvwali nianyana ayihemenaña hamu. Chawushona mumatala amavulu kuhema yisela kudi wena atalaña chisanji chanyivwimbimbi. Hela chakwila maprogiramu amakwawu ahaniyi yisanji atuzañaleshaña, amavulu aluwañeshaña yililu yayiwahi, nawa kuyitala kwakañeshaña kuhanjeka muchisaka. Komana kwila mwilahu chuma chachiwahi hamu nawanyanenu nehi? Kwimba tumina, kuhema yisela, kudikunda nawamabwambu, nikuya nakutala maluña amawahi. Yisela yamuchidiwu yaleñelaña antu kuhanjeka.
16. Yumanyi yatela kudizishawu anvwali anyanawu hadi Yehova, nawa atela kuyidizisha ñahi?
16 Ikalenu antañishi. Yehova nindi: “Wakalejañamu anyaneyi [awa mazu.]” Nsañu yejima yinakulumbulula yuma yimwatela kutañisha nichimwatela kutañisha. Chatachi, mwatela ‘kukeña Yehova Nzambi yenu namuchima wenu wejima, nawumi wenu wejima, nañovu jenu jejima.’ (Kuhituluka 6:5) Kuhiñahu, ‘awa mazu . . . wakayilejañamu.’ Mwatela kuyileja nshimbi yikuyileñela amukeñi Yehova namuchima wawu wejima nikukeña nshimbi jindi. (Esekejenuku Aheberu 8:10.) Izu dakwila nawu ‘kuyileja’ dalumbuluka kuyidizisha nakufuntila funtilahu. Yehova nakuyileja nindi njila yatachi yakukwashilamu anyanenu kwikala nayililu yayiwahi yidi yakuhoshaña hadi yena mpinji yejima. Ichi chinabombelumu kuyidizisha Bayibolu mpinji yejima.
17. Yumanyi anvwali yatela kudizishawu anyanawu, nawa muloñadi?
17 Anvwali amavulu eluka nawu kumuleja mwana nakumushika hamuchima hichuma chakala. Kapostolu Petulu walejeli akwawu akwaKristu nindi: “Fwilenu mayeli awuspiritu akadi makasu, neyi anyikeki anavwaliki katataka, kulonda mukuli nachu mushiki kuwamwinu.” (1 Petulu 2:2) Izu dakwila nawu “kufwila” dinakumwekesha nawu antu amavulu hiyafwaña nzala yakuspirituku. Dichi anvwali atela kukeñakeña jinjila mwakukwashila mwanawu afwileña yakudya yakuspiritu.
18. Njilanyi jazatishileñayi Yesu hakutañisha jatela kwimbujolawu anvwali?
18 Yesu washikileña antu hanyichima kuhitila mukuzatisha yakutalilahu. (Maku 13:34; Luka 10:29-37) Iyi njila yakutañishilamu yazatikaña chiwahi sweje-e kudi anyana. Dizishenu anyanenu nshimbi jamuBayibolu kuhitila mukuyileja mpanji jajiwahi nankashi, hadaha mpanji jekala muMukanda Wami waMpanji Jamu Bayibolu.a Mwatela kuyileja anyana kuhoshañahu. Yilenu azatishi yitoñojoka yawu kuhitila mukuleñaleña nikuhema yimwenu yayuma yasonekawu muBayibolu. Yesu wazatishileña cheñi malwihu. (Matewu 17:24-27) Imbujolenu njila yazatishiliyi hampinji yimunakudiza kudiza kwachisaka. Chatela mushimuni hohu lushimbi lwaNzambi, ihulenu malwihu adi neyi, Muloñadi Yehova chatwinkeleliyi ilu lushimbi? Chumanyi chikumwekana neyi tuluhemba? Chumanyi chikumwekana neyi tubula kuluhemba? Malwihu amuchidiwu anateli kukwasha mwana kutoñojoka nikwiluka nindi nshimbi jaNzambi jajiwahi nawa jakwashanaña.—Kuhituluka 10:13.
19. Neyi anvwali akulondelaña nshimbi jamuBayibolu hakudizisha anyanawu, yumanyi yayiwahi yikuhetelamu anyana?
19 Neyi mwikala akutalilahu, amabwambu, akwakuhanjeka, nawa antañishi, munateli kukwasha mwanenu kufuma kuwansi kwikala nawubwambu wakola naYehova Nzambi. Wubwambu wamuchidiwu wukukwasha mwanenu kwikala mukwaKristu wamuzañalu. Wukutwalekahu kwikala nachikuhwelelu chakola hela kudi ikakeja dawakwawu hela wudi mukweseka. Mukwashenu mpinji yejima kulonda yamoni kulema kwaniwu wubwambu.—Yishimu 27:11.
KUFUMBA CHIKWAKEÑEKELAÑA CHIKUPU
20. Indi kufumba hichumanyi, nawa akwifumbaña ñahi?
20 Kufumba hikudizisha kwololaña yitoñojoka nimuchima. Anyana akeñekaña kuyifumba mpinji yejima. Pawulu walejeli atata jawantu nindi “yilelenuña [anyanenu] nakuyibabesha nikuyikonkomwena mudi Mwanta.” (Aefwesesa 6:4) Anvwali atela kufumba anyanawu nakukeña, neyi chochafumbañayi Yehova. (Aheberu 12:4-11) Kufumba kwashindamena hakukeña akuhaninaña kuhitila mukwihujola munjila yayiwahi. Dichi anatuleji ‘kutiyilila kufumba.’ (Yishimu 8:33) Munjilanyi mumwatela kufumbila mwana?
21. Nshimbinyi yatela kuhembawu anvwali hampinji yinakufumbawu anyanawu?
21 Anvwali amakwawu atoñojokaña nawu kufumba anyanawu hikuyihosha nezu dankalu, kuyihoshola, hela kuyituka. Dichi Pawulu wahosheli haniyi nsañu nindi: “Ninenu atata jawantu, bayi muvulokaña anyanenu azuwuku.” (Aefwesesa 6:4) AkwaKristu ejima ayikonkomwena kwikala “amwovu nawantu ejima . . . afumbi akwantadi mwanaheñeluwu, namuchima wawunda.” (2 Timotewu 2:24, 25) Anvwali akwaKristu hela chakwila eluka nawu hiyatela kuhita mumbaduku, ahembaña awa mazu hampinji yafumbañawu anyanawu. Mpinji yikwawu kuhosha hohu mukanwa hikwazatikañaku, mwatela kuzatisha njila jikwawu jakubabeshelamu.—Yishimu 22:15.
22. Neyi munakukeña kubabesha mwana, chumanyi chimwatela kumuleja?
22 Hamuloña wakushiyashana kwanyana nikufumba nikwena kwatela kushiyashana. Nyana yikwawu ‘hiyetejaña kuyifumba namazuku.’ Dichi nyana yamuchidiwu, neyi muyibabeshaña mumpinji mumpinji hamuloña wakubula kwovwahila munateli kupulwisha wumi wawu. (Yishimu 17:10; 23:13, 14; 29:19) Hela chochu, mwana watela kwiluka muloña wumunakumubabeshela. ‘Nimutondu nikuhoshola kwaletaña maana.’ (Yishimu 29:15; Yoba 6:24) Hela chochu, kubabesha kukweti mwakukumina. Yehova walejeli antu jindi nindi: “Nakakubabeshaña mwawuñaji.” (Yeremiya 46:28b) Bayibolu yahisha chikupu kukapola mwana nakuhila hela kumuhumpula chikupu, chakwila yela ninyinkakambu nikumukatisha.—Yishimu 16:32.
23. Chumanyi chatela kwilukayi mwana neyi anamubabeshi kudi anvwali jindi?
23 Yehova chalejeliyi antu jindi nindi wakayibabesha, wasambilili kuhosha nindi: “Bayi [m]utiya womanaku, muloña ami nidi neyi.” (Yeremiya 46:28a) Chochimu, neyi mubabesha mwana munjila yidi yejima, bayi kumuleñela yatoñojokeña nindi mwamuhelaku. (Akolose 3:21) Ilaña, mwana watela kwiluka nindi anamufumbi muloña nvwali yindi ‘wudi nindi.’
KIÑENU MWANENU KUYUMA YATAMA
24, 25. Indi anyana atela kukiñewa kuwubanjinyi weneni makonu?
24 Akulumpi amavulu anukaña mpinji yakuwansi nawu yadiña mpinji yayiwahi chikupu. Anukaña chayikiñileñawu, elukili chikupu nawu anvwali jawu akuyakamena mukukala kudi kwejima. Anvwali akeñaña anyanawu kwikala akiñewa, ilaña mukanu kaayi kanakuswejelaku kutama, kukiña anyana munjila yayiwahi hichuma chinakuswejelaku kukala.
25 Chuma cheneni chinakutiyisha woma nankashi makonu hikwila wuvumbi nanyana yanyanya. Mwituña daMalaysia, yileji yawantu anakwila wuvumbi nanyana yanyanya yavulililuku mapampa kawaana kubadika hadi yaaka ikumi. MuGermany kwakwihi nanyana 300,000 ayikwataña nakwila nawu wuvumbi hachaaka hachaaka, nawa mwituña dimu damuSouth America, chileji chimu chashimwini nawu, nambaala yakutiyisha woma yesekejeluwu yawanyana anakukwatawu hachaaka yinashiki ku 9,000,000. Chawushona, nyana yayivulu ayikwatilaña mumatalawu kudi antu elukawu nawa akuhwelelawu. Dichi anyana atela kubatama mudi anvwali jawu chikupu. Indi anvwali anateli kukiña ñahi anyanawu?
26. Jinjilanyi mwatela kukiñilawu anyana, nawa kwiluka kunateli kukiña ñahi mwana?
26 Wunsahu wamwekeshaña nawu anyana abula kwiluka jajivulu hansañu jawuvumbi diwu aswejaña kukwatawu, njila yabadika yimwatela kumukiñilamu yidi yakumudizisha, hela chakwila wuchidi kansi. Kwiluka kunateli kupulwisha muntu ‘kunjila yayuma yatama, kwapulwishaña kudi muntu wahoshaña yakuluwalala.’ (Yishimu 2:10-12) Kwiluka chumanyi? Kwiluka nshimbi jamuBayibolu, jahosha hayililu yayiwahi niyatama. Elukaña cheñi nawu akulumpi amakwawu elaña yuma yatama nawa atwansi hiyatela kwovwahila neyi antu ayileja kwila yuma yatamaku. (Esekejenuku Danyeli 1:4, 8; 3:16-18.) Dichi bayi muyilejaña hohu kamuku. Atwansi amavulu akeñekaña kuyileja nakufuntila funtilahu hakwila nawu ayihembi oyu nsañu. Hampinji yinakukulawu, tata yawantu nateli kulemesha yuma yimu kutalisha kudi mwanindi wamumbanda, mama yawantu niyena watela kulemesha mwanindi weyala, dikwila nawu anakuleja mwanawu maana amawahi. Hela chochu, njila yabadika yakukiñilamu anyana kuyuma yatama yidi yakuyitala enu anvwali.
LOMBENU WUNLOMBOLI WANZAMBI
27, 28. Indi Nsulu yabadika watela kukwasha anvwali hampinji yinakukulishawu mwanawu hinyi?
27 Eñañi, kufumba mwana kufuma kuwansi hichuma chakala, ilaña anvwali akakwitiya hiyatalañanaña nakukala nkawawuku. Mumafuku awaNsompeshi, iyala wejina daManowa welukili nindi wakekala namwana, wamwihwili Yehova kulonda yamuleji maana mwakukulishila mwanindi. Yehova wakwili kulomba kwindi.—Ansompeshi 13:8, 12, 24.
28 Nimakonu, hampinji yinakukulishawu anvwali akakwitiya anyanawu, niwena atela kulomba kudi Yehova. Kwikala nvwali himudimu weneni chikupu, ilaña mwekalaña nkisu jajivulu hama. AkwaKristu adisumbula amwituña daHawaii ahosheli nawu: “Mudi nayaaka 12 yakuzata mudimu wakola henohu yaaka yakala yawukwenzi kanda yishiki. Dichi neyi munazati nañovu kutalisha hakuzatisha nshimbi jamuBayibolu, mukwikala amuzañalu nawa kwamwena neyi anyana afuukulahu kumukalakela Yehova namuchima wawu wejima.” (Yishimu 23:15, 16) Neyi mwanenu yafuukulahu kumukalakela Yehova, ninenu munatela kuhosha nenu: “Anyana hiwuswana wakutwinka kudi Yehova.”
[Tumazu twaheshina]
a Wasonekawu kudi Watchtower Bible and Tract Society of New York, Inc.
INDI IJI NSHIMBI JAMUBAYIBOLU JINATELI KUKWASHA . . ÑAHI ANVWALI KUDIZISHA ANYANAWU?
Mukuhwelelenu Yehova.—Yishimu 3:5.
Akamenenu chisaka chenu.—1 Timotewu 5:8.
Yehova hiTata yetu wukweti kukeña.—Yishimu 8:22, 30.
Anvwali akweti mudimu wakufumba anyanawu.—Kuhituluka 6:6, 7.
Mwatela kuyibabesha anyanenu.—Aefwesesa 6:4.
[Chikasha chidi hefu 61]
KUFUMBA KWAKUWAHI
Njila yimu yayiwahi yakubabeshelamu anyana yidi yakuyileja eluki yuma yatama yafumaña mukwila yuma yaheña. (Aŋalija 6:7; esekejenuku Kwidika 34:6, 7.) Chakutalilahu, neyi mwanenu yatamisha yuma, chikuwaha chikupu neyi yomwenindi wukuyiwahisha. Komana namwili mukwawu katama? Mulejenu yayi nakudanakena. Njila yikwawu yakubabeshelamu yidi yakumulekesha kuzata tunyidimu hakapinji kantesha kulonda yeluki chuma chimunakumuleja. Neyi mwila mwenimu, mwana wukwiluka chichawahila kukakela kunshimbi jajiwahi.
[Nyevulu yidi hefu 57]
Anvwali, ikalenu akutalilahu, amabwambu, akwakuhanjeka, nawa antañishi