Kulombola Kudifukula kwaChisaka
1. Yehova wayinka anvwali mudimwinyi, nawa anateli kuwuzata ñahi?
1 Yehova watwinka mudimu wakutañisha anyanetu nsañu yalala. (Kuhit. 6:6, 7) Anyana atela kudiza kumukeña Yehova nikwiluka chatelelawu kwikala akashinshi kudi yena. Anwvali atwamijaku kwakamena chisaka chawu kuspiritu. Dichaletesha izaza danduñu wamaana nikashinshi kutanjika ntanjikilu yaKudifukula kwaChisaka kwamelela. Iyi himpinji yamelela yatanjikawu mulungu nimulungu kudiza Bayibolu muchisaka.
2. Yumanyi yatela kwilawu anvwali kulonda eluki nawu ejima anakuhetelamu muKudifukula kwaChisaka kwamelela?
2 Nsañu Ninjila Jakudizilamu: Yumanyi yimwatela kudiza hampinji yaKudifukula kwaChisaka? Mutu wachisaka watela kwiluka yuma yatela kudiza chisaka. Nateli kwihula yuma yinakutoñojokawu amakwawu nawu yinateli kuyikwasha nawa akudiza nsañu yikushimunawu. Neyi yeteja yuma yikushimunawu, Kudifukula kwaChisaka kukwikala kwakuwahi nawa kwakukolesha. Mpinji yikwawu chikuwaha neyi mukuhanjeka hakukala kwamonañawu atwansi kushikola. Munateli kuhanjika munjila yakuyikolesha hansañu yidi neyi wubwambu weyala namumbanda, yuma yikwawu yelañawu hashikola neyi anakutaña wanyi ‘nikufwila kwatama kwawukwenzi.’ (2 Tim. 2:22) Anvwali amakwawu azatishaña iyi mpinji mafuku ejima kulonda akwashi anyanawu kwikala akuluka yitembi nikuyilaku hambidi mumudimu wakushimwina. Chekala chalema neyi nyitu yayisaka yitoñojokaña mpinji yejima yuma yinakaankili yisaka yawu nikwiluka chatela kushikawu hanyichima yawu.
3. Indi anvwali anateli kwiluka ñahi nawu Kudifukula kwaChisaka kunakuyizañalesha?
3 Indi anvwali anateli kwiluka ñahi nawu Kudifukula kwaChisaka kunakuyizañalesha? Mwatela kudiza munjila yayiwahi nawa yakalemesha. Zatishenuña malwihu niyakutalilahu yapela kulonda ejima atoñojokeña nikuhoshahu. Mpinji yikwawu yisaka yikwawu yazatishaña yimwenu yamuBayibolu, nawa muntu nimuntu muchisaka wahemaña hadi nhemi wumu, kutaña mbadi yindi muBayibolu hela kuhema hachuma chamwekeni. Bayi neyi iyi njila yakutañishilamu yekala yakuzañalesha hohuku, ilaña yinateli kukwasha anyanenu kusha muchima kuyuma yinakudizawu kulonda nshimbi jamuBayibolu jiyishiki hanyichima. Munateli kuyihameka anyanenu chinakuzatawu nañovu hampinji yimunakudiza, nawa hoshenuña namuzañalu hampinji yimunakudiza nawu yuma yakuspiritu.
4. Chikonkwanyinyi chimukweti hakulombola Kudifukula kwaChisaka?
4 Anukenu Chikonkwanyi Chenu: Ilukenu nenu chikonkwanyi chenu chacheni chakudizisha anyanenu yitoñojoka yaYehova. (Efwes. 3:17-19) Ichi chinayi mukwila nawu mumushiki mwanenu hamuchima. Lejenu chisaka chenu muloña watelelawu kwila mwaya muchima waNzambi nichumichi chichawahila nankashi muchihandilu. Kudifukula kwaChisaka mpinji yejima kwalema muloña kwakoleshaña chisaka kuspiritu. Kwadizishaña anyana kwiluka chiyatela kuumikawu kukala kwamwekanaña muchihandilu. Ilukenu nenu Yehova wakayikiswila neyi mutwalekahu kuzata nañovu hakulombola Kudifukula kwaChisaka.