Kapetulu 5
Kusubuka Kwadiluñishañawu Akwakudifukula aYehova
1, 2. (a) Muchidinyi wakusubuka wayinkeliwu antu atachi ayedi kudi Nzambi? (b) Tenakuhu nshimbi jimu jalombweleña mudimu waAdama niEvu.
HAMPINJI yaleñeliyi Yehova iyala watachi nimumbanda watachi, adiluñishili kusubuka kubadika kunakudiluñishawu antu makonu. Mukala wawu wadiña Paradisa, Itempa dadiwahi daEdeni. Yikatu hiyayikañesheli kwikala amuzañalu muwumi wawuku, muloña yitoñojoka yawu ninyijimba yawu yadiña yaloña. Hiyadiña nakutalila kufwa neyi muntu wudi wejima kufuma tuhu hayina mpinjiku. Cheñi, hiyadiña neyi makinaku, ilaña adiña nachawaana chachiwahi chawuswa wakudifuukwila, wuswa wakufuukula aweni. Hakwila nawu atwalekihu kudiluñisha kusubuka kwakuwahi kwamuchidiwu, ateleli kulemesha nshimbi jaNzambi.
2 Chakutalilahu, shinshikaku hanshimbi jakuleña jatuñayi Nzambi. Eña, iji nshimbi hijadiñi jakusonekaku, ilaña Adama niEvu ayileñeli munjila yakwila nawu chadiña hichisemwa kudi wena kujovwahila hohu. Chatiyawu nzala chadiña hichinjikijilu chakukeña kudya; neyi atiya mpwila, akeñeleña kunwa; neyi itañwa dinahumi; akeñeleña kukama. Yehova wayinkeli cheñi mudimu wakuzata. Mudimu weniwu wadiña neyi hilushimbi muloña wadi kulombola nzatilu yawu yejima. Ateleli kuvwala anyana, nikwikala anyanta hayuma yejima yikweti wumi hamaseki, nikuswija ñinza yaParadisa sampu kaayi kejima kanawanini. (Kutachika 1:28; 2:15) Iyi nshimbi yadiña yayiwahi nawa yakuhetesha. Yayinkeli mudimu wawuwahi chikupu, nawa yayikwashileña kuzatisha nankashi yitoñojoka yawu munjila yakuhetelamu. Cheñi, adiña akasunuka hakufuukula ochatela kukalakalawu mudimu wawu. Kwosi chuma nichimu chiyakankililuwuku.
3. Indi Adama niEvu adi kwiluka ñahi chakuzatisha chiwahi kusubuka kwawu kwakudifuukwila?
3 Hela chakwila Adama niEvu ayinkeli kukoleka kwakudifuukwila, ichi hichayili mukwila nawu kufuukula kudi kwejima kwadi kufuukulawu mwadi kufuma yuma yayiwahiku. Kusubuka kwawu kwakudifuukwila hayuma kwadiña namwakukumina kwesekeja nanshimbi jaNzambi. Hanu dinu, adi kujiluka ñahi? Kuhitila mukutiyilila Nleñi yawu nikushinshika nyidimu yindi. Nzambi wayinkeli Adama niEvu maana akeñekeleña hakuzatisha yuma yadiziliwu. Chineli ayileñeli amaninina, yitoñojoka yawu yakusemuka nachu yateleli kudifwanaku nayililu yaNzambi hakufuukula. Eña, ateleli kwikala ashinshika hakumwekesha kalemesha hachuma chayikoñeleli Nzambi nawa nawu akeñeleña kumuzañalesha.—Kutachika 1:26, 27; Yowanu 8:29.
4. (a) Komana lushimbi lwayinkeliwu Adama niEvu lwakubula kudya kumukabu wakumutondu wumu lwayikañesheli kubula kwikala asubuka? (b) Muloñadi iyi nshimbi chiyadiña yashikila?
4 Dichi Nzambi wafuukwilihu kweseka kwakama kwawu kuyamwakaminiwu hamu neyi Muntu wayinkeli wumi nawa nikukeña kwawu kwakuhemba nshimbi jayinkeliyi. Yehova wamwinkeli Adama ilu lushimbi nindi: “Nyitondu yamwitempa yejima wukudya tuhu; ilaña mutondu wakwiluka nachu niyayiwahi niyatama eyi bayi wakawidyaku; muloña ifuku diwakadya chalala wakafwa.” (Kutachika 2:16, 17) Chelili Evu anamuleñi dehi, niyena amulejeli ilu lushimbi. (Kutachika 3:2, 3) Komana iku kulekesha kwayikañesheli kusubuka? Inehi. Adiña nayakudya yayivulu yayiwahi yamuchidi wejima yateleli kudyawu chakubula kudya mukabu wawuna mutondu wumu. (Kutachika 2:8, 9) Chadiña chachiwahi kwanuka nawu iseki dambala daNzambi, muloña diyi wadileñeli. Dichi wukweti wuswa wakutuña nshimbi jesekana nankeñelu yindi nawa jatela kuhetesha antu.—Masamu 24:1, 10.
5. (a) Indi Adama niEvu ajimbesheli ñahi kusubuka kwakuwahi kwadiñawu naku? (b) Chumanyi chasinsili hakusubuka kwadiluñishileñawu Adama niEvu, nawa chinatukumi ñahi?
5 Hanu dinu chumanyi chamwekeni? Hamuloña wakwikala nalwisu, kañelu wumu wazatishili chatama wuswa windi wakufuukula nakwikala Satana, dalumbulula nawu “Mukwakudimbulula.” Wamudimbili Evu kuhitila mukumuleja chuma chambukaku nankeñelu yaNzambi. (Kutachika 3:4, 5) Adama wadibombeli naEvu hakufumpa lushimbi lwaNzambi. Kuhitila mukunona chuma chambala, ajimbesheli kusubuka kwawu kwalema. Nshidi yekalili mwanta wawu, nawa neyi chasoñamishiliyi Nzambi, mukuhita kwampinji kufwa kwalondelelihu. Wuswana waswanishiliwu anyanawu wadiña hinshidi—yamwekanaña hachaaku chakwila chatama chitwavwalikaña nachu. Nshidi yaleta cheñi kuzeyazeya mwafumaña yikatu, wushinakaji nikufwa. Kufwila kwila yuma yatama kunasweji kuhitila muwufwinda waSatana, kwaletesha nshakaminu yawantu kwikala yakudihela, niwubanji, nimakabisha, ninjita yinakujaha yihita yawantu amavulu. Chumichi chinambukiku chikupu nakusubuka kwaheniyi Nzambi kumuchidi wamuntu hatachi.—Kuhituluka 32:4, 5; Yoba 14:1, 2; Aroma 5:12; Chimwekeshu 12:9.
Kwatela Kuwanika Kusubuka
6. (a) Kudihi kunateli kuwanewa kusubuka kwalala? (b) Indi Yesu wahosheli hamuchidinyi wakusubuka?
6 Kushinshika hayuma yatama yinakumwekana kwejima lelu dinu, chinamwekani chikupu nawu antu anakufwila kusubuka kwabadikahu. Hanu dinu kudihi kutwatela kuwanika kusubuka kwalala? Yesu wahosheli nindi: “Neyi mukushakama mumazu ami, mukwikala atumbanji twami chalala; mukwiluka nsañu yalala, ninsañu yalala yikuyifumisha muwuduñu.” (Yowanu 8:31, 32) Iku kusubuka hidiku kwafwilañawu antu neyi anakaani nyuli wumu hela muchidi wumu wanfulumendi nakuhakwilaku yikwawuku. Ilaña iku kusubuka kunashiki chikupu hakulema kwakweni kwamakabi awantu. Yesu wadiña nakuhosha hansañu yakulubuka kufuma muwunkoli wanshidi. (Yowanu 8:24, 34-36) Dichi, neyi muntu yekala kambanji kalala kaYesu Kristu, wamonaña chaambu cheneni muwumi windi, hikusubuka!
7. (a) Munjilanyi mutunateleli kwikala asubuka kunshidi makonu? (b) Chumanyi chitwatela kwila hakwila nawu twikali naniku kusubuka?
7 Ichi chinayi mukwila nawu chakatataka eniKristu alala achidi akasika kuyaaku yakuvwalika nayu kutalisha kuyililu yanshidi. Hamuloña wakwila aswana nshidi, achidi kulwisha nayu. (Aroma 7:21-25) Neyi chalala muntu washakamaña kwesekeja nantañishilu yaYesu, hamba kekala cheñi nduñu yanshiduku. Nshidi hiyikekala kudi yena neyi nyuli watama wahanaña hohu nshimbi nindi yakumini dakwovwahilaku. Hakaluwankana nachihandilu chakadi nkeñelu nawa chatela kumushila chinleji chamuchima chikweti muloñaku. Wakadiluñisha nachinleji chamuchima chitooka kumesu aNzambi muloña nshidi yakunyima anayanakeni dehi kushindamena hachikuhwelelu chindi mumulambu waKristu. Yililu yakukeña kuputola yatela kumwekana, ilaña neyi yaleka kuyikoña hamuloña wakwanuka ntañishilu yayiwahi yaKristu, dikwila nawu nshidi hiyikwikala mwanta windiku.—Aroma 6:12-17.
8. (a) Kusubukanyi kwatwinkaña winiKristu walala? (b) Yililu yetu yatela kwikala ñahi kutalisha kudi anyuli akwituña?
8 Toñojokaku hakusubuka kutwadiluñishaña hamu neyi eniKristu. Tunalubuki kuyuma yafumaña muntañishilu yakutwamba, nikuwuduñu wakukuhwelela muyuma yakupanda ninshidi. Walala walema hansañu yanochu chekalawu afu nikusañuka wunatwilubuli kuyitoñojoka yakuchina kufwa. Hakwiluka netu jinfulumendi jawantu abula kuloña keña ajisinsi kudi Wanta waNzambi waloña kunatukwashi kwikala nachikuhwelelu. (Danyeli 2:44; Matewu 6:10) Hela chochu, kusubuka kwamuchidiwu hikwetejaña kubula kulemesha anyuli janfulumendi ninshimbi jawuku.—Titusa 3:1, 2; 1 Petulu 2:16, 17.
9. (a) Indi Yehova mukudikeñela watukwashaña ñahi kudiluñisha muzañalu weneni wakusubuka wunekali waswayi kudi antu? (b) Tunateli kufuukula ñahi namaana?
9 Yehova hatwitejaña kuwana njila yayiwahi yakuhandilamu kuhitila munjila yakweseka-esekaku. Weluka chatwileñayi, niyuma yatwiletelaña muzañalu waweni, nawa niiheta detu dahaya nyaka. Weluka chekala yitoñojoka niyililu yinateli kuluwañesha wulunda wamuntu naYena niakwawu antu, hadaha nikumukañesha ona muntu kubula kwiñila mwituña dadiha. Mukudikeñela, Yehova watulejaña yuma yejimiyi kuhitila muBayibolu nikuloñesha kwindi kunakumwekana. (Maku 13:10; Aŋalija 5:19-23; 1 Timotewu 1:12, 13) Komana chidi kudetu kuzatisha wuswa wetu wakudifuukwila watwinkayi Nzambi hakutonda ochitwatela kwila. Kwambukaku naAdama, neyi tukutiyilila chuma chinatuleji Bayibolu, twakafuukula namaana. Twakamwekesha netu kwikala nawulunda wawuwahi naYehova dichuma cheneni mukuhanda kwetu.
Antu Amakwawu Akeñaña Muchidi Wukwawu waKusubuka
10. Kusubuka kwamuchidinyi kwafwilañawu aYinsahu jaYehova amakwawu?
10 Mpinji yikwawu aYinsahu jaYehova amakwawu achidi atwansi—niakulumpi—atela kutoñojoka nawu anakukeña muchidi wukwawu wakusubuka. Ituña datela kuleta ikoku, dichi chiyatwaleka nakutoñojokahu, mpwila yawu yakukeña kwila yuma yabula kwikala yawinikristu yinavuli mukaayi yikuswejelaku. Antu amuchidiwu bayi neyi atela kufuukulahu kuzatisha yitumbu chatama, nikusheta, hela kwila wuvumbuku. Ilaña akutachika kudikunda nawantu amakwawu abula kwikala eniKristu alala nakukeña nawu ayitiyeña kuwaha. Atela nikutachika kwimbujola nhoshelu yawu niyililu yawu.—3 Yowanu 11.
11. Kudihi kwafumaña ikoku dakwila yuma yatama mpinji yikwawu?
11 Mpinji yikwawu ikoku dakudiñija muyililu yabula yawiniKristu yafumaña kudi muntu waditwambilaña kumukalakela Yehova. Dichi chadiña nikudi eniKristu atachi, nawa chuma chochimu chatela kumwekana nimumafuku etu. Kakavulu antu amuchidowu akeñaña kwila yuma yatoñojokañawu nawu yikuyiletela muzañalu, ilaña yumiyi hiyetejewa nanshimbi jaNzambuku. Alejaña akwawu kwikala “namuzañalu.” ‘Akanaña nawu kwosi wuduñu, kutoña wena hiyanduñu akutoka.’—2 Petulu 2:19.
12. Yumanyi yatama yafumaña muyililu yambukaku nanshimbi jaNzambi?
12 Yuma yafumaña mukusubuka kwamuchidiwu mpinji yejima yekala yatama, chineli chabalumunaña kudikaña nanshimbi jaNzambi. Chakutalilahu, wuvumbi watela kuluwañesha yitoñojoka, nikukojeja yikatu, nikufwa, nikwimita mavumu akadi kukeña, hadaha nikwamboka mumaluwi. (1 Akorinda 6:18; 1 Atesalonika 4:3-8) Kuzatisha yitumbu chatama kwakojejaña kuzuwa swayi, nikuluwañesha hakuhosha, nikubula kumona chiwahi, nilushetela, nikoona chatama, nikutamwoka nawa nikufwa. Chikuletesha kuteñuka kunateli kukojeja kwila yuma yatama kulonda yatwalekihu nachina chaaku. Chochimu nayuma yafumaña mukunwa walwa chatama. (Yishimu 23:29-35) Ejima elaña mwenimu atela kutoñojoka nawu asubuka, ilaña enzaña nakwiluka mukulaba nawu ekala dehi anduñu janshidi. Nshidi himwanta wawukatu. Kutoñojoka haniyi nsañu chakatataka kwatela kutukwashaku kudihemba kubula kumona yuma yamuchidiwu.—Aŋalija 6:7, 8.
Kwatachikilaña Kukala
13. (a) Indi kufwila kuna kwakojejaña kukala kakavulu kwatachikaña ñahi? (b) Hakwila nawu twiluki chekala “kudikunda nawantu atama,” mmwenu yanyi yitwatela kwikala nayu? (c) Hampinji yimukwakulaña malwihu adi muparakarafu 13, konkomwenenu hammwenu yaYehova.
13 Toñojokaku kwatachikilaña kukala kakavulu. Bayibolu yalumbululaña nawu: “Antu ejima ayesekaña nachayikokolañawu nakuyidimbeka nakufwila kwawu aweni kwatama. Dichi kufwila kwatama chikukubaaba ivumu hikukuvwala nshidi; nshidi chiyikukula hiyikuvwala kufwa.” (Yakoba 1:14, 15) Munjilanyi mwakulilaña kufwila kweniku? Kwakulaña nayuma yeñilaña muyitoñojoka. Kakavulu ichi chamwekanaña hamuloña wakudikunda nawantu abulaña kuzatisha nshimbi yaBayibolu. Hela chochu, wonsu wetu tweluka netu twatela kutondolwela “kudikunda nawantu atama.” (1 Akorinda 15:33) Hanu dinu kudikunda kwamuchidinyi kwatama? Indi Yehova wamonaña ñahi nsañu? Kutoñojoka hamalwihu analondelihu nikusandujola jinsona jinateniwu kukutukwasha kuwaana ñakwilu yayiwahi.
Komana walala wakwila nawu antu amakwawu amwekanaña kulemeshewa chinalumbuluki nawu hiyamabwambu amawahi? (Kutachika 34:1, 2, 18, 19)
Komana mpanji yawu, hadaha nimaleñu awu amwekeshaña nawu tudikundi nawu? (Aefwesesa 5:3, 4)
Indi Yehova watiyaña ñahi neyi tudikunda nawantu abula kumukeña? (2 Kushindulula 19:1, 2)
Hela chakwila twazataña hela twayaña kushikola nawantu abula kwitiya muyuma yitwetiyamu, muloñadi chitunakukeñekela kwikala ababala? (1 Petulu 4:3, 4)
Kutala chisanji chanyivwimbimbi nijifilimu, nikuzatisha Intaneti, nikutaña nyikanda, nimagazini, niyipapilu yansañu hinjila yimu mwakudikundila nawantu. Yuma yamuchidinyi yafumaña muniyi yuma yitwatela kusoñamaku? (Yishimu 3:31; Isaya 8:19; Aefwesesa 4:17-19)
Indi ntondelu yetu yawamabwambu yamwekeshañadi kudi Yehova kutalisha hanochu chitudi? (Masamu 26:1, 4, 5; 97:10)
14. Kusubukanyi kweneni kudi hambidi kwakamonawu ejima azatishaña kufumba Kwezu daNzambi nakashinshi makonu?
14 Katataka hambidi yetu hadi ituña dadiha daNzambi. Kuhitila munfulumendi yaWanta waNzambi wakwiwulu, muchidi wamuntu akamulubula kufuma muwufwinda waSatana nimpata yamakonu yejima yatama. Mukuhita kwampinji, yuma yekalaku hamuloña wanshidi akayifumisha hadi muchidi wamuntu wovwahila nakwikala amaninina muyitoñojoka ninyijimba yakola, kulonda twakatweshi kudiluñisha wumi wahaya nyaka muParadisa. Yileñaleña yejima yamba kadiluñishaku kusubuka kwendelaña hamu ‘naspiritu yaYehova’ mukuhita kwampinji. (2 Akorinda 3:17) Komana chachiwahi kujimbesha yuma yejimiyi hamuloña wakubula kulemesha nshimbi Yezu daNzambi makonu? Kuhitila mukuzatisha kusubuka kwawiniKristu chiwahi makonu, twayenu tumwekeshi chikupu netu chuma chacheni chitunakukeña ‘hikusubuka kwalema kwawanyana kaNzambi.’—Aroma 8:21.
Kuhitilukamu kwaKuhanjeka
• Muchidinyi wakusubuka wadiluñishiliwu antu atachi ayedi? Indi kusubuka kweniku kunesekani ñahi nakunakumona muchidi wamuntu makonu?
• Kusubukanyi kukwetiwu eniKristu alala? Indi ichi chinambukiku ñahi nachuma chamonañawu mukaayi nawu hikusubuka?
• Muloñadi chichinekalili chalema kutondolwela kudikunda kwatama? Kwambukaku naAdama, kufuukula kwanyi kutalisha kuyuma yatama kutwatela kwiteja?
[Nyevulu yidi hefu 46]
Izu daNzambi dasoñamishaña nawu: “Bayi ayidimbaku; kudikunda nawantu atama kwatamishaña maana amawahi”