Watchtower LAYIBULALI YAHAINTANETI
Watchtower
LAYIBULALI YAHAINTANETI
Lunda
  • BAYIBOLU
  • NYIKANDA
  • KUPOMPA
  • wt kapetulu 6 mafu 50-59
  • Muloña Wutwatela Kumona Wejima Wetu

Vidiyo yimwatonda hosi.

Atwanakeniku mwani, vidiyo yakañanya kwenzunuka.

  • Muloña Wutwatela Kumona Wejima Wetu
  • Difukulenu Kudi Nzambi Walala Wumu Hohu
  • Tunyitu Twanyanya
  • Nsañu Yinadifwani
  • Yuma Yinamwekeshi Nsañu yaNyaka
  • Kupuluka naKwiñila Mwituña daNzambi Dadiha
  • Chiyamwekesheliwu Antu Amakwawu Ñimenu Yawu Kuniwu Muloña
  • Indetu Tukwakula Netudi?
  • Yehova Diyi Mwanta Wetu Mukwakubadika!
    2010 Kaposhi Kakutalila Kanakubidika Wanta wa Yehova
  • Shenu Maana Hachuma Chalema
    Kaposhi Kakutalila Kanakubidika Wanta WaNzambi (Kakudiza)—2017
  • Hakwilenuku Chiyuulu chaYehova!
    Kaposhi Kakutalila Kanakubidika Wanta WaNzambi (Kakudiza)—2017
  • Komana Mwahakwilañaku Wanta waYehova?
    2007 Kaposhi Kakutalila Kanakubidika Wanta wa Yehova
Difukulenu Kudi Nzambi Walala Wumu Hohu
wt kapetulu 6 mafu 50-59

Kapetulu 6

Muloña Wutwatela Kumona Wejima Wetu

1, 2. (a) Muloñanyi wavulumwiniyi Satana muEdeni? (b) Indiwu muloña wunamwekeshi ñahi nachina chuma chahosheliyi?

NINEYI wunabombelewimu mumuloña weneni wunabadiki nyiloña yejima yamonañawu antu. Ñimenu yeyi kutalisha kuniwu muloña diyikumwekesha wumi weyi wahaya nyaka wakumbidi. Iwu muloña watachikili hampinji yatachikili kudikaña muEdeni. Hayina mpinji Satana wamwilili Evu nindi: “Chalala Nzambi [wahosheli] nindi, Nyitondu yejima yamwitempa bayi mwakayidyaku, tahindi?” Mumbanda wakwili kutalisha kumutondu wumu chahosheliyi Nzambi nindi: “Bayi mwakawidyaku, . . . mwakenda kafwa.” Dichi Satana wamutwikili Yehova muloña wakutwamba nindi, chili wumi waEvu hela waAdama bayi neyi washindameneni hakumwovwahila Nzambuku. Satana wahosheli nindi Nzambi waswekeleña chuma chachiwahi kuyileñaleña yindi—wuswa wakudituñila nshimbi jawu aweni muwumi. Satana wasanyikili nindi: “Nzambi neluki nindi ifuku [dimwakadyaku], mesu enu akatona, mwakekala neyi chadiyi Nzambi, mwakeluka niyayiwahi niyatama.”—Kutachika 3:1-5.

2 Munjila yikwawu, Satana wahosheleña nindi antu atela kuhanda chiwahi neyi akudifuukwilaña aweni kubadika kwovwahila nshimbi jaNzambi. Dikwila nawu walukukili njila yaNzambi yakuyulilamu. Chumichi chaleteli muloña weneni wawanta waNzambi wakuyula kwejima, dikwila nawu, wuswa windi wakuyula. Lwihu alwihwili: Chumanyi chachiwahi kudi antu, kuyulewa naYehova tahindi, kudiyula awenawu? Ilaña, Yehova wateleli kuyikisañana Adama niEvu hohana, hela chochu hichadi kumanisha chikupu muloña wawanta wakuyulaku. Hakwiteja nshakaminu yawantu yakudiyula hampinji yayilehi, Nzambi watwesheli kumwekesha yuma yadi kufuma mukudiyula chakadi yena ninshimbi jindi.

3. Muloñanyi wamuchiyedi waleteliyi Satana?

3 Kulukuka kwaSatana kwawuswa waYehova wakuyula hikwakuminini hachuma chamwekeni muEdeniku. Satana wajinokeli kashinshi kawantu amakwawu hadi Yehova. Chumichi chekalili himuloña wamuchiyedi wadifwanaku. Kujinoka kwindi kwashikili nihakubombelamu anyana kaAdamu niEvu ejima nianyana kaNzambi akuspiritu ejima, kushilahu niMwana kaYehova wakeñewa wawedi. Chakutalilahu, mumafuku aYoba, Satana wahosheli nindi ejima amukalakelaña Yehova amuzatilaña hamuloña wayuma yakumujimba yayikoñelañayi, bayi neyi hamuloña wakumukeña Nzambi ninjila yindi yayulilañamuku. Watadikili nindi neyi amona lukadi, wonsu wawu akwiteja kufwila yuma yakumujimba.—Yoba 2:1-6; Chimwekeshu 12:10.

Yuma Yinamwekeshi Nsañu yaNyaka

4, 5. Indi nsañu yanyaka yinamwekeshi ñahi kutalisha hansañu yamuntu yakuyula nyendu yindi?

4 Chikuma cheneni chamumuloña wawanta dichi ichi: Nzambi haleñeli antu nindi adishakamineña chakadi wunyuli windi mwaka ashakami chiwahiku. Hakwila nawu chiyiwahili wayilishili ashindameneña hanshimbi yindi yaloña. Kaprofwetu Yeremiya welukili chikupu nindi: “Eyi Yehova, neluki nami njila yamuntu hiyekala mudi yomwenuku, mudi muntu wendaña himwekala yakuyula nyendu yinduku. Eyi Yehova, mbabeshi.” (Yeremiya 10:23, 24) Nawa Izu daNzambi dashimunaña nawu: “Mukuhweleli Yehova namuchima weyi wejima, bayi wushindamena kukashinshi keyeyi awenuku.” (Yishimu 3:5) Neyi chaleñeliyi Nzambi muchidi wamuntu nindi ayuleweña nanshimbi jindi jayulaña yileñaleña kulonda ahandi, watuñili cheñi nshimbi yayiwahi yadi kuletesha antu kushakama chiwahi neyi chakwila ayovwahila.

5 Mwamweni, Nzambi welukili nindi chisaka chawantu hichakashakama chiwahiku neyi chikudiyula chacheni chakadi wunyuli windi. Hakweseka kudiyula kwakudiyandisha chakadi wunyuli waNzambi, antu anatuñi yipompelu yashiyashana yamatuña nachiyulu, ninyichidi yamaheta, ninyichidi yansakililu. Yeniyi yuma yashiyashana yinakojeji antu kwiñila muyikonkojola yakamanaña nawakwawu antu, nakuletesha madombu, ninjita, nikufwa. “Muntu wayulaña mukwawu muntu kulonda yamukatishi.” (Mukwakutaŋisha 8:9, NW) Ichi dichinakumwekana muchihandilu chejima chawantu. Neyi chashimwineñahu dehi Mwizu daNzambi, antu atama niakwakutwamba anatwalekihu ‘nakuswejelaku chikupu.’ (2 Timotewu 3:13) Nawa munkulakaji yamwaka wa 20, muchidi wamuntu wakulililiku mujasayansi nimujakutuñatuña, nawa mwamwekeni lukadi lweneni lwabulahu dehi kumwekana. Mazu adi haYeremiya 10:23 analumbuluki chikupu—antu hiyayileñeli nawu ayuleña nyendu yawuku.

6. Munjilanyi Nzambi mwakamanishilayi kudiyula kwawantu chakadi yena chakatataka?

6 Yuma yatama yinafumi mukushimbula kwakudiyula chakadi Nzambi yinamwekeshi chikupu nawu kuyula kwawantu hikwamba katweshaku. Kuyula kwaNzambi hohu dikwatela kuleta muzañalu, nikukwatankana, kukola lwakumujimba, niwumi. Nawa Izu daNzambi dashimunaña nawu kudiyula kwawantu kwetejayi Yehova keña kumani. (Matewu 24:3-14; 2 Timotewu 3:1-5) Katataka, keña yodiñijimu nakuhimpa nsañu jawantu nakuzatisha kuyula kwindi heseki dejima. Wuprofwetu waBayibolu wahoshaña nawu: ‘Hamafuku amba kekala anyantowu [anyanta awantu anakuyula], Nzambi wamwiwulu wamba kaloñesha wanta [mwiwulu] wakabula kukisañanawu, wantowu hiyamba kawushiyila antu acheñuku [hiyakayula iseki kamuchiyediku]; wakahumona mawanta ejima [amakonu] puchi puchi, nakuyinoñesha, [wena nkawawu] wakemana mbe haya nyaka.’—Danyeli 2:44.

Kupuluka naKwiñila Mwituña daNzambi Dadiha

7. Neyi kuyula kwaNzambi kunakumishi dehi kuyula kwawantu, anyi akahanda?

7 Chikela neyi kuyula kwaNzambi kunakumishi dehi kuyula kwawantu, anyi akapuluka? Bayibolu yakulaña nawu: “Akwakwoloka [ana akwashaña wuswa wakuyula kwaNzambi] diwu akashakama mwituña, antu alala akashalamu. Hakwila antu atama [ana abulaña kukwasha wuswa wakuyula kwaNzambi] akayifumisha mwituña.” (Yishimu 2:21, 22) Chochimu, niñimbi yamasamu wahosheli nindi: “Hakuleha chanti muntu watama hakekala nawa mwokuku; . . . Ilaña akwakudizoza akaswana ituña, akatiya kuwaha nankashi nakushama chachiwahi chamwena.—Masamu 37:10, 29.

8. Indi Nzambi wakayiñisha ñahi chikupu wanta windi?

8 Hanyima yakwila ituña daSatana anadikisañani dehi, Nzambi wakasinsishahu ituña dindi dadiha, damba kafumishahu chikupu ndombu yatama, ninjita, niwuzweñi, nikuyanda, niyikatu, nikufwa kunamweshi muchidi wamuntu yihuñu hamakombakaji ayaaka. Bayibolu yashimuna chachiwahi hankisu yinakuhembelela muchidi wamuntu wovwahila nawu: “[Nzambi] wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku. Yuma yakusambila yinahiti dehi.” (Chimwekeshu 21:3, 4) Kuhitila munfulumendi yaWanta windi wamwiwulu wunakuyulewa naKristu, Nzambi wamba kayiñisha chikupu hela kumwekesha wuswa Windi wakwikala Mwanta wetu, dikwila nawu, Nyuli yetu.—Aroma 16:20; 2 Petulu 3:10-13; Chimwekeshu 20:1-6.

Chiyamwekesheliwu Antu Amakwawu Ñimenu Yawu Kuniwu Muloña

9. (a) Indi ana anakutwalekahu kwikala ashinshika kudi Yehova amonaña ñahi izu dindi? (b) Indi Nowa wamwekesheli ñahi kashinshi kindi, nawa tunateli kuhetelaku ñahi kuchakutalilahu chindi?

9 Hampinji yejima yakunyima, kwadiña amayala achikuhwelelu niambanda amwekesheli kashinshi kawu kudi Yehova hamu neyi Mwanta. Elukili nawu wumi wawu washindameneni hakutiyilila nihakumwovwahila. Nowa wadiña hakachi kawu. Nzambi wamwilili Nowa nindi: “Namoni antu ejima kunayikumi dehi; . . . Katuñi watu.” Nowa wovwahilili wunlomboli waYehova. Hela chakwila ayisoñamishili, antu amakwawu amunana mafuku atwalekelihu nachihandilu chawu neyi kwiji kwosi nichuma chawenyi chikamwekana. Ilaña Nowa watuñili watu weneni nankashi nawa watwalekahu kushimwina kudi amakwawu hajinjila jaloña jaYehova. Nsañu yatwalekahu nawu: “Dichi cheliliyi Nowa; mwejima mwamulejeliyi Nzambi dimu mweliliyi.”—Kutachika 6:13-22; Aheberu 11:7; 2 Petulu 2:5.

10. (a) Indi Abarahama niSara anyamwini ñahi wanta waYehova? (b) Munjilanyi mutunateli kuhetela kuchakutalilahu chaAbarahama niSara?

10 Abarahama niSara niwena adiña chakutalilahu chachiwahi chakunyamuna wanta waYehova, nakwila yuma yejima yayilejeliwu kudi Yehova. Ashakamini muUri mukala wamaheta wawaKaladeya. Ilaña chelili Yehova yomuleji Abarahama kuya kwituña dikwawu, dabulili kwilukayi, Abarahama “yonyamuka nikunyamuka, mwomwamulejeliyi Yehova.” Chakadi nikujinoka, Sara wadiña nachihandilu chachiwahi—itala, niamabwambu, niantaña. Ilaña wovwahilili kudi Yehova nikudi nfumwindi nakuya kwituña daKenani, hela chakwila helukili chikekala chihandilu chindiku.—Kutachika 11:31–12:4; Yililu 7:2-4.

11. (a) Mumpinji yamuchidinyi yanyamwininimu Mosi wanta waYehova? (b) Indi chakutalilahu chaMosi chatela kutuhetesha ñahi?

11 Mosi himuntu mukwawu wanyamwini wanta waYehova. Nawa welili mwenimu hampinji yakala—kudimonaña mesu namesu naFwaro wakuEjipitu. Bayi nawu Mosi wadiña wadikuhwelelaku. Ilaña, wajinokeli wuswa windi wakuhosha chiwahi. Hela chochu wamwovwahilili Yehova. Nawukwashu waYehova niwamana kwindi Aroni, Mosi kayedi kayedi washimwineña mazu aYehova kudi Fwaro wachinchika. Nianyana kaIsarela amakwawu amwinkeli Mosi mwiyena. Ilaña, Mosi wovwahilili nakwila yuma yonsu yamulejeliwu kudi Yehova, nawa kuhitila mudi yena, aIsarela ayilubwili kufuma muEjipitu.—Kwidika 7:6; 12:50, 51; Aheberu 11:24-27.

12. (a) Chumanyi chamwekeshaña nawu kwikala ashinshika kudi Yehova kunabombelimu yuma yayivulu kubadika kwila chuma chashimunawu kudi Nzambi munsona? (b) Indi kutiyishisha kashinshi kamuchidiwu kunateli kutukwasha ñahi hakuzatisha 1 Yowanu 2:15?

12 Ana adiña ashinshika kudi Yehova hiyatoñojokeleña nawu chuma chakeñekeleña yowu kwovwahila yuma yasonekayi Nzambuku. Hampinji yesekeliyi ñoda Potifwari kumudimbeka Yosefu nindi yokami nindi, kwadiña kwosi lushimbi lwasonekeliyi Nzambi lwalekesheli wuvumbi. Ilaña, Yosefu welukili hansañu yakuloñesha kwamaluwi atachikiliyi Yehova muEdeni. Welukili nindi kukama nañoda muntu wacheñi chikumutiyisha Nzambi kutama. Yosefu hakeñeleña nindi yeseki kuwana chipimu chadikumwitejayi Nzambi kwikala neyi mwiniEjipituku. Wanyamwineña jinjila jaYehova kuhitila mukutoñojoka hanzatilu yaNzambi namuchidi wamuntu nawa nikuzatisha chakashinshi yuma yatoñojokeleñayi kwikala nkeñelu yaNzambi.—Kutachika 39:7-12; Masamu 77:11, 12.

13. Indi Diyabolu amumwekesheli ñahi nawu hisakutwamba kutalisha hadi (b) Yoba? (b) Aheberu asatu?

13 Hela chakwila anayishi mukweseka kwamuchidinyi, ana amwiluka Yehova chikupu hiyamufutalelañaku. Satana wahosheli nindi neyi Yoba yajimbesha maheta amavulu hela yokata, hela Yoba ahamekeliwu kudi Yehova—watela kumufutalela Nzambi. Hela chakwila helukili muloña waholokeleliyi mukukalaku, Yoba wamumwekesheli Diyabolu nindi hisakutwamba. (Yoba 2:9, 10) Chimwahitili nkulakaji yanyaka, chakeñayi kumumwekesha mwahosheliyi, Satana wasañumwini kuzuwa kwamwanta waBabiloni kulonda yachinishi anyikwenzi asatu aHeberu nakufwa mukesi kaluteñi neyi abula kufukama nakudifukula kumukishi wemikiliwu kudi mwanta. Hakuyikanjikija kutondahu kwovwahila lushimbi lwamwanta indi kwiji kwovwahila lushimbi lwaYehova lwalekesheli kupesha, achimwekesheli hatooka to-o nawu amukalakelaña Yehova nawa nawu yena diyi wadiña Mwanta wawu Wabadika. Kudi wena kashinshi kudi Nzambi chadiña chuma chalema nankashi kubadika wumi wawu wayina mpinji!—Danyeli 3:14-18.

14. Chinekali ñahi chapela kudetu antu abula kuloña kumwekesha nawu chalala twekala ashinshika kudi Yehova?

14 Kutalisha kuniyi yakutalilahu, komana tunatweshi kukunkulula netu kwikala washinshika kudi Yehova, muntu chiña yekala waloña hela ona wukuputola dikwila nawu nakañanyi chikupu? Kwakulehi! Bayibolu yatulejaña nawu Mosi mpinji yimu waputoleli. Hela chakwila chamuneñesheli Yehova, ilaña hamukanini Mosiku. Apostolu aYesu Kristu niwena adiña nakuzeyazeya. Kushinshika hawuswana wetu wakubula kuloña, Yehova wazañalalaña neyi tubula kukaana nkeñelu yindi mumushikila munjila yidi yejima. Neyi twila chuma chatama hamuloña wakuzeya, chikwikala chalema kubalumuka mumuchima chikupu nakubula kwila chuma chatama chikala hichinjililu. Kwila mwenimu, tunakumwekesha chikupu netu twakeña yuma yahoshañayi Yehova nindi yayiwahi nikuhela yuma yashimunayi nindi yatama. Kushindamena hachikuhwelelu chetu chakulema kwamulambu waYesu wakwanakena nshidi, tunatweshi kwimana atooka kumesu aNzambi.—Amosa 5:15; Yililu 3:19; Aheberu 9:14.

15. (a) Hinyi hakachi kawantu ejima wahembeli kashinshi kaloña kudi Nzambi, nawa chumichi chamwekeshelidi? (b) Munjilanyi muyanatukwashiliwu nayuma yeliliyi Yesu?

15 Hela chochu, komana dikwila nawu kwovwahila kwakashinshi kuwanta waYehova hikwakala nankashi kudi antuku? Ñakwilu yachu yadiña neyi ‘nsañu yalema yajindiliwu’ hadi yaaka 4,000. (1 Timotewu 3:16) Hela chakwila Adama amuleñeli waloña, ilaña hemikili chakutalilahu chachiwahi chakwakama Nzambuku. Hanu dinu hinyi watwesheli? Kwosi mwanindi niwumu mukwanshidi watwesheliku. Muntu watwesheli kwilamu wadiña Yesu Kristu hohu. (Aheberu 4:15) Yuma yawanishiliyi Yesu yamwekesheli nawu Adama wadiña nachihandilu chachiwahi, kachi watwalekelihu nakashinshi kakeni neyi wachikeñeli. Muloña hiwadiña munyidimu yaNzambi yakuleñaku. Komana Yesu Kristu diyi chakutalilahu chitwatela kwimbujola hakumwekesha bayi neyi hakwovwahila kunshimbi jaNzambi hohuku, ilaña nihakumwakama Yehova halwetu, Mwanta Wakuleña kwejima.—Kuhituluka 32:4, 5.

Indetu Tukwakula Netudi?

16. Muloñadi chitwatela kutwalekelahu kwikala asoñama kuyililu yetu kutalisha kuwanta waYehova?

16 Wonsu wetu makonu twatela kutalañana namuloña wamwanta wakuleña kwejima. Neyi tuhosha hatooka netu tudi kukabadi kaYehova, Satana wukutulukuka. Waletaña kukala kufuma kutubadi twejima nawa wukatwalekahu kwila mwenimu kushika nikunsa yampata yindi yatama. Dichi twatela kwikala asoñama. (1 Petulu 5:8) Yililu yetu yinakumwekesha kabadi kitunemeni kamuloña weneni wawanta waYehova nimuloña wamuchiyedi wakashinshi kudi Nzambi kadi mukweseka. Chikwikala chafwana kudetu neyi tukulemesha yililu yabula kutelela hamuloña wakwila nawu yinakumini dakusweja mukaayi. Kuhemba kashinshi kwakeñekaña nawu tufwili kuzatisha chikupu nshimbi jaYehova jaloña jajiwahi muyuma yejima yamuwumi.

17. Wunsahwinyi kutalisha kuntachikilu yakutwamba nikwiya yinateli kutwilisha kuyitondolwela?

17 Chakutalilahu, hitwatela kumwimbujola Satana wekala ‘tata yakutwambaku.’ (Yowanu 8:44) Twatela kwikala ashinshika muyuma yejima yitwelaña. Mwituña daSatana, atwansi kakavulu hiyashimunaña mwalala kudi anvwali jawuku. Ilaña atwansi awiniKristu hiyelañamuku, amwekeshaña muloña waSatana kwikala wakutwamba wakwila nawu antu jaNzambi atela kuleka kashinshi kawu neyi anaholokeli mukweseka. (Yoba 1:9-11; Yishimu 6:16-19) Kulondelahu kudi yuma yamukulanda nakulandulula yatela kumwekesha muntu nawu wudi kukabadi ‘katata yakutwamba’ bayi kaNzambi walalaku. Twatela kutondolwela iyi yuma. (Mika 6:11, 12) Cheñi, kwiya hiyakwitejaku, hela chakwila muntu nakankili, hela tuhu kwiyila muntu waheta. (Yishimu 6:30, 31; 1 Petulu 4:15) Hela neyi dichaaku chekala kwiluña diwashakamaña hela neyi chuma chinanoniwu chanyanya, kwiya dinu akuhisha munshimbi jaNzambi.—Luka 16:10; Aroma 12:2; Aefwesesa 4:28.

18. (a) Hakumana kweKombakaji daNyaka daKuyula kwaKristu, kwesekanyi kwakenza hadi antu ejima? (b) Chaakwinyi chitwatela kumwekesha makonu?

18 Mwikombakaji daNyaka daKuyula kwaKristu, Satana niandemoni jindi akekala mwikela, hiyakatwesha kuluwañesha muchidi wamuntuku. Wenowu muzañalu! Ilaña hanyima yanyaka ikombakaji, akayumbaku hakapinji kanti. Satana hamu nanana amulondelaña akakabisha muchidi wamuntu wejima wakafuntishawu wakahemba kashinshi kawu kudi Nzambi. (Chimwekeshu 20:7-10) Neyi tukekala nakukoleka kwakwikalaku hampinji yakamumbawu Satana, ñimenu yetu yikekala ñahi kutalisha kumuloña wamwanta wakuleña kwejima? Chineli muchidi wamuntu wejima hayina mpinji wukekala waloña, nzatilu yejima yakadi kashinshi yakekala himushikila nawa yakakojeja kujilumuka kwahaya nyaka. Komana chikwikala chalema nankashi chayinu mpinji kutachika kwikala nachaaku chakwovwahila kunshimbi jejima jinakutwinkayi Yehova, kuhitila Mwizu dindi hela mukuloñesha kwindi. Kwila mwenimu, tukumwekesha kwakama kwetu kwakweni kudi yena hamu neyi Mwanta Wakuleña Kwejima.

Kuhituluka kwaKuhanjeka

• Muloñanyi weneni owu yitwatela kumona wejima wetu? Indi tweñililimu ñahi?

• Chumanyi chasweja kuwaha kutalisha hanshakaminu yawamayala niambanda akunyima amwekesheli kashinshi kawu kudi Yehova?

• Muloñadi chichinekalili chalema nawu tumulemesheña Yehova nayililu yetu ifuku nifuku?

    Lunda Publications (2006-2025)
    Fumenumu
    Iñulenu
    • Lunda
    • Inkenuhu akwenu
    • Hakusetiñila
    • Copyright © 2025 Watch Tower Bible and Tract Society of Pennsylvania
    • Nshimbi Jakulondela
    • Nshimbi Jakujinda
    • Privacy Settings
    • JW.ORG
    • Iñulenu
    Inkenuhu akwenu