yamwanta yatachikili kukanjikija akwaKristu kulondela tushidikilu twansakililu Yetuña. Hela dimwakoñeleñawu hela nehi, kwakwihi na 112 C.E., neyi chinamwekeshi mukanda wamusonekeleluwu Trajan wutwatena hakutachika mpanji yetu, Pliny wakanjikijileña akwaKristu muBitiniya kulondela tushidikilu twenitu.

Trajan wahamekeli njila yahakwilileñamu Pliny nyiloña yamuleteleleñawu nakuhana lushimbi lwakujaha akwaKristu akaanineña kudifukula kudi anzambi amuRoma. Trajan wasonekeli nindi, “Hela chochu, neyi muntu yakaana nindi himukwaKristuku, nawa yamwekesha chikupu nindi himukwaKristuku, kuhitila mukulemba kudi anzambi jetu, (chakabula kumujinoka) chabalumukayi mwanakenenu.”

Aroma muyitoñojoka yawu hiyelukiluhu nsakililu yakeñeleña antu jawu kudifukulaña chikupu kunoyu nsakililuku. Nawa anzambi awaRoma hiyakeñeleña nsakililu yamuchidiwuku, dichi muloñadi Nzambi yawakwaKristu chakeñeleñayi antu akudifukula kudi yena hohu? Atoñojokeleña nawu kudifukula kudi anzambi Etuña chamwekesheleña kalemesha kuchiyuulu chetuña. Dichi, neyi muntu yakaana kudifukula kudi awa anzambi amwinkeleña muloña wakufutukila ituña. Kwesekeja nachachimweniyi Pliny, akwaKristu amavulu hiyateleleli kuyikanjikija kulondela mwakeñeleñawuku. Muloña akwaKristu elukili nawu neyi adifukula kudi anzambi akumuneñesha Yehova, nawa akwaKristu amavulu akusambila atondeluhu kufwa kubadika kudifukula kumukishi wamwanta.

Muloñadi chitwatela kushilaku maana makonu? Mumatuña amakwawu, enimbu amwituña atela kulemesha yifwikija yetuña. Hakwikala akwaKristu, twalemeshaña chikupu chiyuulu chanfulumendi yetuña. (Rom. 13:1) Hela chochu, neyi kudi yidika yakuhameka mpandelu, kukonkomwena kwaYehova Nzambi kwakukeña kumwakamaña yena hohu nikufumba kwaMwizu dindi dikwatusañumunaña ‘kutemuka kupesha’ ‘nikudihemba kunsañu jawankishi.’ (1 Kor. 10:14; 1 Yow. 5:21; Nahu. 1:2) Yesu wahosheli nindi: “Kadifukulaña kudi Yehova Nzambi yeyi, diyi wakakalakelaña kanka windi hohu.” (Luka 4:8) Dichi tutwalekuhu kuhemba kashinshi ketu kudi Nzambi itwalombaña.

Muloñadi Chitwatela Kulemeshela Atushinakaji?

KUCHIKUMU chakuCalifornia, ku U.S.A, kwekala mutondu wekala hakachi kanyitondu yaswejawu antu kukwata nyevulu mukaayi. Awutenaña nawu Lone Cypress. Kwesekeja nachashimunañawu antu, iwu mutondu wunashakami yaaka yakubadika 250. Iwu mutondu walubanji awakamenaña munjila jajivulu, muloña wakukola. Chakutalilahu, awukasa nansambu nawa akiñikaku malola kwishina kulonda wubuli kuchañuka.

Mutondu waLone Cypress watela kutwanukisha akwaKristu atushinakaji itudi nawu, omikaña chikupu. Njila yabadika mwamwekeshelañawu kuumika yekala yakushimwina nsañu yayiwahi. Kaprofwetu Yoweli washimwineñahu dehi nindi, ‘mapala awamayala’ akashimwinaña nsañu yamuBayibolu. (Yoweli 2:28-32; Yil. 2:16-21) Toñojokenu hamaora amavulu azatañawu hakukwasha antu kudiza ‘nsañu yayiwahi yawanta’! (Mat. 24:14) Atushinakaji amakwawu akwakushimwina aWanta anomiki makabisha nikukala kukwawu hadi yaaka yayivulu. Neyi chakwila mutondu wacypress awiluka nawu wakola nawa awukolesha namalola ninsambu, atushinakaji itudi nawu twatela kuyakamena nikuyilemesha nankashi!

Yehova Nzambi walejeli antu akushankulu nindi: “Neyi kukwinza muntu wukweti mutu wanvu wakanyamukaña wakalemeshaña ipala kumesu indi.” (Lev. 19:32) Hakachi kawambuña