Kapetulu 18
“Hiyampata Yamunu Mwishinaku”
1. (a) Henohu kanda yafwi, Yesu wayilombeleliku atumbanji twindi nindidi? (b) Muloñadi ‘kubula kwikala wampata yamunu mwishina’ chikwalemena?
NAWUFUKU wakwila henohu kanda amujahiku, Yesu wayilombeleliku atumbanji twindi. Hakwiluka nindi akayisha mukweseka kweneni kudi Satana, Yesu wamulejeli Tata yindi nindi: “Hinalombi nami wuyifumishi mumpata yamunu mwishinaku, ilaña nami wuyihembi kudi watama. Wena hiyampata yamunu mwishinaku, neyi chineli ami nawa hinidi wampata yamunu mwishinaku.” (Yowanu 17:15, 16) Muloñadi kwambuka nampata yamunu mwishina chikunekalili kwalema? Muloña Satana diyi nyuli wampata yamunu mwishina. EniKristu hiyatela kukeña kwikala kabadi kampata yinakuyulewa naSatanaku.—Luka 4:5-8; Yowanu 14:30; 1 Yowanu 5:19.
2. Munjilanyi mwabuliliyi Yesu kwikala wampata yamunu mwishina?
2 Kubula kwikala ampata yamunu mwishina hichayili mukwila nawu Yesu wayiheleli amakwawuku. Kwambukaku, Yesu wokili akata, wasañwili afu, nawa wayitañishili antu hansañu yaWanta waNzambi. Cheñi waheni wumi windi kukoola muchidi wamuntu. Ilaña hakeñeli yililu yatama ninzatilu yanowu amwekesheleña spiritu yetuña daSatanaku. Dichi wakonkomweneni kuleka yuma yamuchidiwu yidi neyi kufwila kwila wuvumbi, kwikala nachihandilu chamaheta, nikufwila wulemu. (Matewu 5:27, 28; 6:19-21; Luka 20:46, 47) Hichadiña chakuhayamaku, Yesu cheñi watondolweleña nsañu jamatuña nachiyulu. Hela chakwila wadiña kaYudeya, hadiñijili munsañu jakutadeka jamatuña jadiña hakachi kawaRoma nawaYudeyaku.
‘Wanta Wami Hiwampata yaMunu Mwishinaku’
3. (a) Nsañwinyi akulumpi jansakililu awaYudeya yamutwambililuwu Yesu kudi Pilatu, nawa muloñadi? (b) Chumanyi chinamwekeshi nawu Yesu hakeñeleña kwikala mwanta wawuntuku?
3 Toñojokaku chuma chamwekeni chelili akulumpi jansakililu yawaYudeya anamukwati dehi Yesu nakumutwala kudi Pontusi Pilatu, ñuvulu waRoma. Chakadi kuhita mumbadi, ana anlomboli ahilili muloña Yesu wasolweli wunfukeji wawu. Hakwila nawu ñuvulu wawu yakoñihu chuma hadi Yesu, amutwambilili nawu: ‘Iwu muntu twamuwana nakuluwañesha muza wetu, nakulekesha kusonka kudi Kesari, nakwila nindi yomweni diyi Kristu, mwanta.’ (Luka 23:2) Iku kwadiña kutwamba kwakweni muloña mwahitili chaaka chimu heliliwu antu hiyakukeña kumwilisha Yesu mwanta, yena wakaanini. (Yowanu 6:15) Welukili nindi wakekala Mwanta wakwiwulu kumbidi. (Luka 19:11, 12) Cheñi nawa adikumuswanyika kudi Yehova, bayi antuku.
4. Indi yitoñojoka yaYesu yadiña ñahi kutalisha hakusonka nyisoku?
4 Mumafuku asatu hohu henohu Yesu kanda amukwati, Afwarisi akeñeleña kumukwata Yesu namazu kulonda ahoshi hansañu yakukaanisha kusonka. Yena nindi: “Nlejenu idali [muwayawaya wawaRoma]. Dikweti chifwikija chanyi, ninsona yanyi?” Chelili ahoshi nawu “YaKesari,” hakuyakula nindi: “Dichi mwinkenu Kesari yuma yaKesari; Mwinkenu Nzambi yuma yaNzambi.”—Luka 20:20-25.
5. (a) Yesu wayidizishili atumbanji twindi nindidi hampinji yamukwatiliwu? (b) Munjilanyi Yesu mwalumbulwililiyi hansañu yachuma chakoñeliyi? (c) Chumanyi chafumini mukuna kweseka?
5 Inehi, Yesu hadiña nakuleja chakudikaña nawanyuli akwituñaku. Chelili amashidika niantu amakwawu enzi nakumukwata Yesu, Petulu waholeli mpoku yakabali nakuketula itu deyala wumu. Ilaña Yesu nindi: “Somekaku cheñi mpoku yeyi yakabali muchindalu chayu; muloña antu ejima akukwata kumpoku yakabali akafwa kumpoku yakabali.” (Matewu 26:51, 52) Ifuku dalondelelihu, Yesu walumbulwili nzatilu yindi kudi Pilatu nindi: “Wanta wami hiwampata yamunu mwishinaku; neyi wanta wami wadiña wampata yamunu mwishina, ambuñami adi kulwa, kulonda abuli kunhana kudi aYudeya.” (Yowanu 18:36) Pilatu wetejeli nindi ‘hamuweni namuloña’ wakumwinka Yesuku. Hamuloña wekakeja dawantu, Pilatu wetejeli kumujahila Yesu hamutondu.—Luka 23:13-15; Yowanu 19:12-16.
Atumbanji Alondelaña Kulombola kwaYesu
6. Indi eniKristu akusambila amwekesheli ñahi kutondolwela spiritu yetuña nawa nikukeña antu?
6 Chafuminimu, atumbanji twaYesu elukili chuma chakeñekaña hakubula kwikala wampata yamunu mwishina. Chatwalili mukwila nawu kutondolwela spiritu yatama niyililu yakanu kaayi yinabombelimu yiseki yamadombu niwuvumbi yadiña nakuzatika mumabulu nimumatala akuhemenamu aweniRoma. Hamuloña wakutondolwela yiseela yeniyi, atumbanji ayiteneneña nawu ahela muchidi wamuntu. Ilaña hiyaheleli akwawu antuku, azatili nañovu kulonda kukwashaku amakwawu kuhetelamu muyuma yaheniyi Nzambi yakupulukilamu.
7. (a) Hamuloña wakubula kwikala ampata yamunu mwishina, chumanyi chamweniwu atumbanji akusambila? (b) Indi atumbanji amweneña ñahi anyuli amatuña nikusonka nyisonku, nawa muloñadi?
7 Atumbanji twaYesu ayikabishileña kakavulu neyi chamukabishileñawu yena kudi anyuli janfulumendi adimbileñawu. Ilaña kwakwihi na 56 C.E., kapostolu Pawulu wasonekeli kudi eniKristu amuRoma, nakuyikonkomwena ‘kwovwahila anyanta [anyuli amatuña]; muloña kwosi wanta wabula kufuma kudi Nzambuku.’ Bayi neyi Yehova diyi washaku jinfulumendi jetuñaku, ilaña wajiteja kwikalaku sampu Wanta windi nkawawu wukatachiki kuyula iseki dejima. Pawulu wayilejeli chachiwahi eniKristu kulemesha anyuli jetuña nikusonka nyisonku—Aroma 13:1-7; Titusa 3:1, 2.
8. (a) EniKristu atela kukumina mudihi hakwovwahila kudi anyuli amatuña? (b) Indi eniKristu akusambila alondeleli ñahi chakutalilahu chaYesu?
8 Hela chochu, kwovwahila anyuli amatuña kwekala namwakukumina, bayi neyi mujejimaku. Neyi kudi yikonkojola hakachi kanshimbi jaYehova nijawantu, ana amukalakelaña Yehova ovwahilaña nshimbi Jindi. Talenu chahosha mukanda waOn the Road to Civilization—A World History hadi eniKristu akusambila nawu: “EniKristu akaanineña kuzata nyidimu yimu yawaRoma. EniKristu . . . atoñojokeleña nawu chikuhwelelu chawu chikufumpika neyi eñila mudimu wawushidika. Akaanineña kwikala nachifulu mujamatuña nachiyulu. Akaanineña kudifukula kudi mwanta.” Hampinji yelili chota cheneni chanyiloña chawaYudeya ‘chiyileji chakola’ atumbanji kuleka kushimwina, akwili nawu: “Chiña twovwahila Nzambi, bayi antuku.”—Yililu 5:27-29.
9. (a) Muloñadi eniKristu muYerusalema chakoñeliwu neyi cheliliwu mu 66 C.E.? (b) Munjilanyi muchinekalili chakutalilahu chalema?
9 Kutalisha kunsañu jamatuña nimpami jawushidika, atumbanji atwalekelihu kubula kudiñijamu chikupu. Mu 66 C.E., aYuda amuYudeya adikañili naKesari. Hohenohu amashidika aweniRoma anyeñumukili Yerusalema kwi-ndo. Chumanyi cheliliwu eniKristu amuwuna musumba? Anukili kufumba kwaYesu kwakufuma mumusumba. Chelili aRoma afunti chantesha, eniKristu azambukili Kaloña Yodana nakutemukila kwituña damapidi daPela. (Luka 21:20-24) Hakubula kudiñija mujamatuña kunekali chakutalilahu kudi eniKristu akumbidi.
EniKristu Hiyatela Kudibomba Mujamatuña Munanu Mafuku Akukumininaku
10. (a) Mudimu wamuchidinyi wunakukalakalawu nankashi aYinsahu jaYehova, nawa muloñadi? (b) Munsañu yamuchidinyi muyabulañawu kudiñija?
10 Komana nsañu yanyaka yamwekesha nawu kudihu izaza munanu mafuku akukuminina dinakwimbujola eniKristu akusambila hakubula kudibombamu chikupu mujamatuña? Eña, aYinsahu jaYehova anakwila mwenimu. Wejima wawu chakatataka, anakutwalekahu kushimwina nawu Wanta waNzambi diyi njila hohu yimu yakuletelamu kuwunda kwahaya nyaka, niiheta, nimuzañalu kudi antu akeña kuloña. (Matewu 24:14) Dichi kutalisha hampami jidi mukachi kanyuza, wena anakutwalekahu nakubula kudiñija mujamatuña.
11. (a) Indi kubula kudiñija mujamatuña kudi aYinsahu kunambuki ñahi nayililu yawakulumpi jansakililu? (b) Mmwenwinyi yekalawu nayu aYinsahu jaYehova kutalisha kuyuma yelañawu amakwawu mujamatuña nachiyulu?
11 Kwambukaku chikupu, akulumpi jansakililu jamukaayi anadiñijimu chikupu munsañu jamatuña nachiyulu. Mumatuña amakwawu, ahitañamu kajiinji nakutonda muntu hela kumufumisha hetanda. Akulumpi jansakililu amakwawu ekala nayifulu mujamatuña. Amakwawu niwena akabishaña anyuli amatuña kukeña yuma yatiyañawu akulumpi jansakililu kuwaha. Ilaña aYinsahu jaYehova hiyekalamu nambadi munsañu jamatuña nachiyuluku. Cheñi nawa hiyadiñijaña hela kukañesha amakwawu kudiñija muchipompelu chetuña nachiyulu, kuzuñila chifulu chetuña nachiyulu, hela kusakula mukutondaku. Yesu wahosheli nindi atumbanji twindi hiyampata yamunu mwishinaku, dichi aYinsahu jaYehova hiyadiñijaña munsañu jamatuña nachiyuluku.
12. Chumanyi chinakumwekana hamuloña wakwila nsakililu yakanu kaayi yadiñija mujamatuña?
12 Neyi chashimwineñahu dehi Yesu, nyuza yayaña kakavulu kunjita. Nitumazaza twamukachi kanyuza twadizuñañeshaña. (Matewu 24:3, 6, 7) Akulumpi jansakililu kakavulu akwashañaku muza wumu hela izaza dinakuzuñisha dikwawu, nikukonkomwena antu jawu kwila mwomumu. Chumanyi chafumañamu? Antu amunsakililu yimu ajahaña akwawu munjita hamuloña wakushiyashana kwamuza hela muchidi. Chumichi chinambuki chikupu nankeñelu yaNzambi.—1 Yowanu 3:10-12; 4:8, 20.
13. Indi wunsahu wamwekeshañadi kutalisha hadi aYinsahu jaYehova hakubula kudiñija mujamatuña?
13 Ilaña aYinsahu jaYehova akaana chikupu kudiñija muyikonkojola yejima. The Watchtower yaNovember 1, 1939, yahosheli nawu: “Antu ejima adi kukabadi kaMwanta hiyakadiñija munyuza yinakulwaku.” A Yinsahu jaYehova mumatuña ejima hela adi mukukala kwamuchidinyi atwalekañahu kukakela kuniyi ñimenu. Hiyetejaña kaayi kanabwoki nansañu jamatuña nachiyulu nijinjita kufumpa wumana kwawu wamukaayi kejimaku. ‘Anachili mpoku jawu kwikala matemwa, nimayoñawu kwikala nyipanga.’ Hakubula kudiñija mujamatuña, hiyadizaña cheñi njitaku.—Isaya 2:3, 4; 2 Akorinda 10:3, 4.
14. Hamuloña wakutwalekahu kwikala ambukaku netuña, chumanyi chinakumonawu aYinsahu jaYehova?
14 Chumanyi chinafumimu hakubula kudiñija mujamatuña? Yesu nindi: “[Hamuloña wakwila] himudi ampata yamunu mwishinaku, . . . dihanafumi kuyihela kudi antu mpata yamunu mwishina.” (Yowanu 15:19) A Yinsahu jaYehova amavulu anayikasi hamuloña wakwikala ambuña aNzambi. Amakwawu ayikabishaña, nikuyijaha neyi chochamwekeni kudi eniKristu amunkulakaji yayaaka yakusambila. Hamuloña wakwila Satana, “nzambi yampata yamakonu,” wadimbululaña ambuña aYehova, abula kwikala ampata yamunu mwishina.—2 Akorinda 4:4; Chimwekeshu 12:12.
15. (a) Kudihi kunakuya nyuza yejima, nawa aYinsahu jaYehova anasoñami kuchumanyi? (b) Muloñadi kwambukaku nampata yamunu mwishina chikunekalili chuma chalema?
15 Ambuña aYehova adi namuzañalu muloña hiyadi ampata yamunu mwishinaku, muloña nyuza yejima yinakuya kunsa yachu kuAmagedoni. (Danyeli 2:44; Chimwekeshu 16:14, 16; 19:11-21) Twakapuluka kuyuma yakafumamu muloña ñimenu yetu yambukaku netuña. Hakwikala antu anuñañana kaayi kejima, twovwahilaña Wanta waNzambi wakwiwulu. Mwamweni, kubula kwikala ampata yamunu mwishina kwakojejaña kutwidiwula nikutuyandisha. Katataka tuhu, yumiyi keña yileki muloña mpata yamakonu yatama yidi mumakasa aSatana akayijilumuna haya nyaka. Munjila yikwawu, ana amukalakelaña Yehova akashakama hanyaka mwituña dadiha dadiwahi muchiyulu chaWanta waNzambi.—2 Petulu 3:10-13; 1 Yowanu 2:15-17.
Kuhitulukamu kwaKuhanjeka
• Indi Yesu wamwekesheli ñahi chalumbuluka ‘kubula kwikala wampata yamunu mwishina’?
• Indi yitoñojoka yaweniKristu akusambila yadiña ñahi kutalisha (a) kuspiritu yetuña, (b) anyuli etuña, (c) nikusonka nyisonku?
• Munjilanyi aYinsahu jaYehova amunanu mafuku mwamwekeshelañawu wunsahu wawiniKristu wawu wakubula kudiñija mujamatuña?
[Mwevulu wudi hefu 165]
Yesu walumbulwili nindi yena niatumbanji twindi ‘hiyadiña ampata yamunu mwishinaku’