Kukeña kwaKristu Kwatusañumunaña Kukeñañana
1. Chakutalilahu chaYesu chatusañumunaña kwiladi?
1 Yesu wemika chakutalilahu chachiwahi chakukeña. Wemikila atumbanji twindi chakutalilahu chachiwahi chakukeña chatela kulondelawu.—Rom. 8:35.
2, 3. Indi aYinsahu jaYehova atuña ijina damuchidinyi muchituñilu?
2 A Yinsahu jaYehova ayiluka nawu amwekeshaña kukeña kudi neyi kwaKristu. Shinshikenu aYinsahu adihanini kukwashana hanyima yakwila mpepela yeneni yikisañani iluña deneni daUnited States mu 2005. Akwakuzata mukudikeñela akubadika ha 20,000 adihanini kukwasha ana kwawu adiñi mukukala.
3 Mwiluña dimu menji amukaluñalwiji amwañeli mwiluña dakushika kumakilomita 80, menji atuñili mbañu yayilehi jimita 10. Menji chiyakeheluwu matala amavulu ayikisañeni chikupu. A Yinsahu akwakuzata mukudikeñela akuluka yitembi afumini kumatuña amavulu aleteli yozelu niyuma yakutuña nachu nawa adiheni kukalakala mudimu wejima. Hichakutalilahu chachiwahi chakumwekesha yitoñojoka yaKristu.
4, 5. Chumanyi chikutusañumuna kukwasha akwetu?
4 Antu antesha hohu hakachi ketu diwu omikahu dehi wubanji weneni wadimwekenaña waweni. Hela chochu, wejima wetu twakataña, chili etu aweni hela antaña jetu. Kukeña kwaYesu kwamuletesheli kutiya wushona chelili mazaza amuleteli ayeji nawa ‘wokili adiña akata ejima.’—Mat. 8:16; 14:14.
5 Ninetu twatiyilaña antu wushona neyi Yesu. Shinshikenu chakutalilahu chaCharlene wayaaka yakuvwalika 44, wadiña nachikatu chakansa nawa amulejeli nawu kunashali mafuku ikumi nakufwa. Ahela ayedi akuspiritu, Sharon naNicolette, adiheni kumukwasha hanawa mafuku asheleluku hakwila yofwi. Ana mafuku ashikili nyilungu yitanu nawumu. Sharon wahosheli nindi: “Neyi wuneluki neyi muntu wukuhanda wanyi hichuma chakala. Hela chochu, Yehova watukwashili kuumika. Chuma chitwamweni chatuletesheli kukundama kwakwihi naYehova nikudi wumu namukwawu.” Nfumwa Charlene wahosheli nindi: “Nakanukaña mafuku ejima chatukwashiluwu awa ahela ayedi. Yililu yawu yayiwahi yamukwashili mwinikwami Charlene wakashinshi kuumika mumafuku akuleta kukufwa kwindi. Nakayisakililaña haya nyaka. Kudihana kwawu kwakolesheli chikuhwelelu chami mudi Yehova nikukeña kunakeña amana kwetu amukaayi kejima.”
6. Twatela kusha maana chikupu kuchumanyi?
6 Munateli kumwekesha chikupu nenu mwakeña ana kwenu muchipompelu chenu? Tumwekeshenu kukeña kudi neyi kwaKristu kudi ana kwetu ejima neyi chayikeñeliyi Kristu yomweni ‘ndo-o nikunsa.’ Kukeña kwamuchidiwu kwaleñelaña antu kutwiluka nawu tudi atumbanji twaKristu alala.—Yow. 13:1, 34, 35.