Komana Ichi diChuma Chafuukwiliyi Nzambi?
TAÑAKU chipapilu chansañu chidi chejima. Tiyilelaku kuchisanji hela talaku hachisanji chanyivwimbimbi. Kudi nsañu jajivulu jawubanji, njita niwubanji wakuchinisha! Toñojokaku hakukala kweyi eyaweni. Hekwawu yikatu hela kufwa kwamuntu yiwakeña kunakuletela chikela cheneni. Wunateli kutiyi neyi chatiyiliyi iyala wamuwahi Yoba wahosheli nindi yena “wazoweli nayihuñu.”—Yoba 10:15.
Dihuli eyaweni neyi:
Komana ichi dichuma chanfuukwililiyi Nzambi hamu niantu ejima?
Kudihi kunatela kuwana wukwashu wakumika nachu kukala kwami?
Kudihu kuchiñeja kwakwila nawu twamba kamonahu kuwunda hamaseki?
Bayibolu yahanaña ñakwilu yashikila yanawa malwihu.
BAYIBOLU YATAÑISHAÑA NAWU NZAMBI WUKALETA IKU KUHIMPIKA HAMASEKI.
“Wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku.”—Chimwekeshu 21:4
“Henohu dihu hakakilukayi mukwakubalakata neyi nkayi.”—Isaya 35:6
“Henohu dihu hakatoneshawu mesu awamputamesu.”—Isaya 35:5
“Antu ejima adi mumajamu achanukishu . . . akedikamu.”—Yowanu 5:28, 29, NW
“Mwenimbu hakahosha nindi, Ami nakataku.”—Isaya 33:24
“Hanu hamaseki hakavula kudya kwansaachi.”—Masamu 72:16, NW
HETELAKUMU MUYUMA YATAÑISHAÑA BAYIBOLU
Bayi wukana yuma yinamwekeshuwu hefu dinafumihu neyi hiyuma yakulumbisha hohuku. Nzambi wakana dehi kuleta yumiyi nawa Bayibolu yalumbulula ochakayiletayi.
Hela chochu Bayibolu yaheteshaña mujinjila jajivulu. Hela chakatataka, Bayibolu yahanaña njila yakudiluñishilamu wumi wawuwahi wamuzañalu. Hulumanaku chantesha kulonda wutoñojoki hansañu yakukala nikwakama kweyi. Kunateli kubombelamu kukala kwamali, yikonkojola yamuchisaka, yikatu kumujimba hela kufwa kwamuntu yiwakeña. Bayibolu yinateli kukukwashaku kuzata nakukala kwamakonu, nawa yinateli kukwinka wukwashu kuhitila mukwakula malwihu adi neyi awa:
Muloñadi chitwakabakenaña?
Tunateli kumika ñahi nakwakama kwamuwumi?
Tunatweshi kuzañalesha ñahi chisaka chetu chikupu?
Chumanyi chatwimwekenaña neyi tunafwi?
Komana twamba kadimonahu cheñi nawantu yitwakeña afwa dehi?
Tunatweshi kukuhwelela ñahi netu Nzambi wamba kashikija yikaninu yindi yakumbidi?
Chineli wunakutaña wunu mukanda chinakumwekesha nawu wunakukeña kwiluka yuma yatañishaña Bayibolu. Wunu mukanda wukukwasha. Ilukaku neyi maparakarafu akweti malwihu adifwana adi heshina defu. Yihita yawantu atiyaña kuwaha kuzatisha njila yamalwihu niñakwilu neyi hiyakuhanjeka nsañu yamuBayibolu nawaYinsahu jaYehova. Tunakuhweleli netu nineyi wukutiya kuwaha. Tambwilaku nkisu yaNzambi hampinji yiwunakudiluñisha muzañalu nichakuhitamu chachiwahi hampinji yiwunadizi chuma chacheni chatañishaña Bayibolu!