Kapetulu 3
Nsapi Jiyedi Jaleñelaña Maluwi Kutwalekahu
1, 2. (a) Indi maluwi atela kutwalekahu hadi yaaka yiñahi? (b) Chumichi chinateli kuzatika ñahi?
NZAMBI chanuñañesheliyi iyala nimumbanda watachi, kwosi wunsahu wamwekesheli nawu maluwi akekala hohu akampinji kantesha. Adama naEvu ateleleli kushakama haya nyaka. (Kutachika 2:24) Nshimbi jaNzambi jahosha hamaluwi akalemesha jekala jakunuñañesha iyala nimumbanda. Muloña wetejawu muNsona wakudiseñelahu chiña neyi wumu hela wejima wawu ela wuvumbi nawa anateli kusumbula cheñi hela kusumbuka.—Matewu 5:32.
2 Komana antu ayedi anateli kushakama amuzañalu haya nyaka? Eñañi, Bayibolu yalumbulula yuma yiyedi yalema hela netu nsapi, yinateli kuleta muzañalu. Neyi eyala namumbanda azatisha iji nsapi jiyedi, akwikala namuzañalu nawa akwikala nankisu chikupu. Hinsapinyi jeniji?
NSAPI YATACHI
3. Nyichidinyi yisatu yakukeña yatela kumwekeshawu adisumbula?
3 Nsapi yatachi hikukeña. Bayibolu yalumbulula nyichidi yakukeña kwashiyashana. Kukeña kwatachi kwakwikala waseha nawantu, nawa kwekalaña hakachi kawamabwambu adikunda. (Yowanu 11:3) Kwamuchiyedi hikukeña kwekala hakachi kawantu muchisaka. (Aroma 12:10) Kwamuchisatu hikukeña kwamwekeshaña eyala nimumbanda. (Yishimu 5:15-20) Hela chochu, eyala namumbanda atela kumwekesha iyi nyichidi yejima yakukeña. Ilaña kudi kukeña kwamuchiwana, kwabadika iyi nyichidi yikwawu yakukeña.
4. Indi kukeña kwamuchiwana hikukeñanyi?
4 Mwidimi datachi dazatishawu muNsona jachiGriki dawakwaKristu, izu dakukeña damuchiwana aditenaña nawu a·gaʹpe. Idi izu adizatisha ha 1 Yowanu 4:8, hatulejañawu nawu: “Nzambi diyi kukeña.” Eñañi, “etu twamukeña yena nanochu chasambililiyi [Nzambi] kutukeñetu.” (1 Yowanu 4:19) Kukeña kwamuchidiwu dikwatela kwikala namukwaKristu, wukusambila kumukeña Yehova Nzambi dinu niakwawu antu. (Maku 12:29-31) Izu daa·gaʹpe adizatisha cheñi haAefwesesa 5:2, hahosha nawu: “Endenu nakukeña neyi chatukeñeliyi Kristu, hakudihana hansañu jetu ekali mulambu.” Yesu wahosheli nindi kukeña kwamuchidiwu dikwakayilukilawu atumbanji twindi alala: “Neyi mukukeñañana [a·gaʹpe], dihu hakayilukilawu antu ejima nawu mudi atumbanji twami.” (Yowanu 13:35) Talenu cheñi chazatishawu izu daa·gaʹpe ha 1 Akorinda 13:13: “Ichi dinu kwekala kukuhwelela, nikuchiñeja, nikukeña, yumiyi yisatu; chasweja kulema yowu kukeña [a·gaʹpe].”
5, 6. (a) Muloñadi kukeña chikwabadikila chikuhwelelu nikuchiñeja? (b) Yumanyi yinakumwekesha nawu kukeña kunateli kuleñela maluwi kutwalekahu?
5 Chumanyi chaleñela kukeña kwaa·gaʹpe kubadiki chikuhwelelu nikuchiñeja? Iku kukeña kwashindamena hanshimbi, nshimbi jalala, jekala Mwizu daNzambi. (Masamu 119:105) Mwekala kukeña kwalala kwakufwila kwilila antu yuma yayiwahi kwesekeja nachamonañayi Nzambi, hela muntu wukukaana hela wukwiteja. Kukeña kwamuchidiwu kwakwashaña adisumbula kulondela kufumba kwamuBayibolu kwakwila nawu: ‘Dovwahilenuña nikudanakena muntu namukwawu. Neyi kudi muntu wukweti muloña namukwawu amwanakeni; chayanakenenuwu enu kudi Mwanta, ninenu nawa ilenu chochimu.’ (Akolose 3:13) Adisumbula adikeña ekala ‘akeñañana chacheni [a·gaʹpe] mukachi kawu; muloña kukeña kwabutaña nyiloña yayivulu.’ (1 Petulu 4:8) Kukeña anakwilumbululi nawu kwabutaña yiluwa. Kukeña hikwakañeshaña yiluwaku, muloña antu ejima abula kuwanina akoñaña yiluwa.—Masamu 130:3, 4; Yakoba 3:2.
6 Neyi adisumbula akukeña Nzambi nikudikeña aweni, maluwi awu akutwalekahu nawa akwikala amuzañalu muloña “kukeña hikwakañanyañaku.” (1 Akorinda 13:8) Kukeña “diyi mpanda yasweja kunuña antu hamu.” (Akolose 3:14) Neyi mwadisumbula, munateli kumwekesha ñahi kukeña kwamuchidiwu? Tañilenuña Izu daNzambi hamu, nikuhanjekahu. Talenu chakutalilahu chaYesu chakukeña nawa esekenu kumwimbujola, nikutoñojokahu, nikuzata neyi chazatileñayi. Cheñi, yenuña kukupompa kwawakwaKristu, kwatañishañawu Izu daNzambi. Nawa lombenu kudi Nzambi kulonda yayikwashi kwikala naniku kukeña kwabadika, nawa himukabu waspiritu yajila yaNzambi.—Yishimu 3:5, 6; Yowanu 17:3; Aŋalija 5:22; Aheberu 10:24, 25.
NSAPI YAMUCHIYEDI
7. Kalemesha hichumanyi, nawa hinyi watela kukimwekesha mumaluwi?
7 Neyi adisumbula adikeña chikupu, dikwila nawu akudilemeshaña, nawa kalemesha diyi nsapi yamuchiyedi yaletaña muzañalu mumaluwi. Kalemesha akilumbulula nawu “hikutoñojokelaku antu, nikuyinka kavumbi.” Izu daNzambi dafumbaña akwaKristu ejima, kushilahu niadisumbula nawu: ‘Hakumwekesha kalemesha kudi wumu namukwawu; itejenu mukwenu abadiki kulema.’ (Aroma 12:10) Kapostolu Petulu wasonekeli nindi: “Mwomumu ninenu amayala, shakamenu nawañodi jenu mwaya maana, nakulemesha mumbanda nenu diyi wakuminamu ñovu.” (1 Petulu 3:7) Mumbanda anamufumbi nawu watela ‘kulemesha nfumwindi chikupu.’ (Aefwesesa 5:33) Neyi munakukeña kulemesha muntu, mukumwakamenaña, mukulemeshaña chifulu chikwetiyi nimwahoshañayi, nikwila yuma yejima yinakukeñayi.
8-10. Munjilanyi kalemesha mukanateli kukwashila adisumbula kwikala namaluwi amawahi nawa amuzañalu?
8 Antu akeñaña kudiluñisha maluwi awu adilemeshaña kuhitila ‘mukubula kutoñojoka nsañu yawu hohuku, chiña nsañu [jamukwawu] nawa.’ (Afwilipi 2:4) Hiyatoñojokaña hohu hayuma yayitiyishaña kuwaha wena hohuku, chikumwekesha nawu wadikeña. Ilaña, atalaña nihayuma yakeñayi mukwawu. Atwamijañaku yuma yakeñaña mukwawu.
9 Kalemesha katela kukwasha adisumbula kudiwula yiluwa. Bayi tukuhwelela netu antu ayedi akutoñojokaña mwomumuku. Chuma chalemeshayi iyala, mumbanda hakuchilemeshaku nawa chuma chakeñayi mumbanda hadaha iyala hakuchikeñaku. Dichi wejima wawu atela kulemesha yuma yakeñayi mukwawu, chakala yinesekani nanshimbi jaYehova. (1 Petulu 2:16; esekejenuku Fwilemoni 14.) Cheñi, wejima wawu atela kudilemesha kuhitila mukubula kudisawujola hela wusensi, hadi antu amavulu hela kubadi.
10 Eñañi, kumukeña Nzambi nikudikeña wumu namukwawu nawa nikudilemesha chikupu diji nsapi jiyedi jalema jaleñelaña mumaluwi mwikali muzañalu. Anateli kujizatisha ñahi mumbadi jikwawu jamumaluwi?
KWIMBUJOLA WUMUTU WAKRISTU
11. Kwesekeja nansona, indi mutu mumaluwi hinyi?
11 Bayibolu yashimuna nawu iyala amuleñeli nayililu yinateli kumuleñela kwikala mutu wachisaka wamuwahi. Dichi iyala diyi wemenañaku iñodindi ninyanindi kudi Yehova muyuma yakuspiritu niyakumujimba. Watela kufuukula chachiwahi kwesekana nankeñelu yaYehova nikumwekesha chakutalilahu chachiwahi chakwikala nayililu yayiwahi. “Enu ambanda, ovwahilenu anfumu jinwenu aweni neyi chimwovwahilaña Mwanta. Muloña iyala diyi mutu wamumbanda, chochadiyi Kristu mutu wachipompelu.” (Aefwesesa 5:22, 23) Hela chochu, Bayibolu yahosha nawu iyala niyena wukweti mutu, Wamubadika ñovu. Kapostolu Pawulu wasonekeli nindi: “Nakeñi mwiluki, mutu weyala diyi Kristu; mutu wamumbanda diyi iyala; mutu waKristu diyi Nzambi.” (1 Akorinda 11:3) Iyala wamaana welukaña chakuzatisha wumutu windi kuhitila mukwimbujola mutu windi, Yesu Kristu.
12. Chakutalilahwinyi chachiwahi chamwekesheliyi Yesu hakumwekesha kwovwahila nikuzatisha wumutu?
12 Yesu niyena wukweti mutu, Yehova, nawa wamwovwahilaña chikupu. Yesu nindi: “Hinalondaña muchima wamami awenuku, chiña muchima waTata wantemesheli.” (Yowanu 5:30) Yesu hichakutalilahu chachiwahi. Yesu diyi “wedi wayuma yaleñeluwu yejima.” (Akolose 1:15) Wekalili Mesiya. Wukekala Mutu wachipompelu chawakwaKristu awayishewa nawa Mwanta watondewa waWanta waNzambi wayibadika añelu ejima. (Afwilipi 2:9-11; Aheberu 1:4) Hela chakwila wadiña nachifulu cheneni nawa wachiñejeleña yuma yabadika, Yesu hadiña wazuwa, wadivinya hela wakalishaku. Hadiña wawukatuku, nawa hayilejeleña atumbanji twindi nindi amwovwahileñaku. Yesu wadiña muwahi nawa wawushona, sweje kudi antu amwesheleñawu ihuñu. Wahosheli nindi: “Inzenu kudami enu ejima mudi nakukabakana, mwasenda yalema, ami nukuyinookesha. Ditwikenu mpanda yami, mudizili kudami muloña ami nawunda, nadizoza mumuchima, ninenu mukumona kunooka munyichima yenu. Muloña mpanda yami yaswayi, nichisenda chami chapepela.” (Matewu 11:28-30) Atumbanji atiyileña kuwaha kwikala naYesu.
13, 14. Indi iyala wukweti kukeña watela kuzatisha ñahi wumutu windi neyi chelileñayi Yesu?
13 Iyala wakeñaña nindi chisaka chindi chikali namuzañalu watela kwimbujola yililu yayiwahi yaYesu. Iyala wamuwahi hazuwa nikukalishaku nawa hazatishaña wumutu windi chatama neyi kabama kakweta nachu mumbandaku. Ilaña, wamukeñaña nikumulemesha. Yesu wadiña ‘wadizoza mumuchima,’ iyala niyena watela kubadikishahu muloña, kwambukaku naYesu, yena waluwañeshaña. Neyi yaluwañesha wakeñaña iñodindi yamwanakeni. Dichi iyala wadizoza wetejaña yiluwa yindi, hela chakwila wukukañanya kuhosha nindi, “Ñanakenuku; wahosha mwalala.” Chikwikala chaswayi mumbanda kulemesha iyala wadizoza kubadika iyala wadinka wanta nawa wachinchika. Mumbanda wakalemesha niyena nateli kudanakena neyi naluwañeshi.
14 Nzambi waleñeli mumbanda nayililu yayiwahi yatela kuzatishayi hakuleta muzañalu mumaluwi. Iyala wamaana wukwiluka yililu yañodindi nawa hakumukañeshaku. Ambanda amavulu ekala nawushona chikupu nikashinshi, yililu yakeñekaña hakwakamena chisaka nikukolesha wubwambu wawu. Kakavulu, mumbanda wawahishaña hetala kulonda ashakameña hawunyonji. “Mumbanda washinshika” alumbululawu haYishimu 31 wadiña nayililu yayiwahi nawa welukili nyidimu nichisaka chidi chahetelelumu chikupu. Muloñadi? Muloña muchima wanfumwindi “wamukuhwelela.”—Yishimu 31:10, 11.
15. Indi iyala nateli kumwekesha ñahi kukeña nikalemesha kudi ñodindi neyi chelileñayi Kristu?
15 Muyisemwa yikwawu, antu alemesha nankashi chifulu cheyala, chakwila neyi wumwihula lwihu achimonaña neyi hikasawuntu. Nateli kumuhemba iñodindi wukwila neyi nduñu. Kuzatisha wumutu munjila yatama kwatamishaña wubwambu windi nañodindi ninaNzambi. (Esekejenuku 1 Yowanu 4:20, 21.) Munjila yikwawu, amayala amakwawu akañanyaña kulombola nakwilisha añodijawu kwikala nyitu yamatala. Iyala wovwahilaña chikupu Kristu, hamuzatishaña iñodindi chatama hela kumusawulaku. Ilaña wembujolaña chakutalilahu chaYesu chakudihana mukukeña nawa wakoñaña neyi chafumbiliyi Pawulu nindi: “Enu amayala, keñenu añodi jenu neyi chakeñeliyi Kristu chipompelu, hakudihanahu yomweni kuchikoola.” (Aefwesesa 5:25) Yesu Kristu wakeñeli atumbanji twindi chikupu chakwila wayifwilili. Iyala wamuwahi wembujolaña yililu yaKristu, nikumona yayiwahi mudi iñodindi, chatela yamukanjikijeña kwila yuma yinakeñiyi. Neyi iyala wamwovwahilaña Kristu nikumwekesha kukeña nikalemesha kakeni, wukuleñela iñodindi kumwovwahila.—Aefwesesa 5:28, 29, 33.
CHATELA KWOVWAHILAYI MUMBANDA
16. Yililu yamuchidinyi yatela kumwekeshayi mumbanda kudi nfumwindi?
16 Chelili Adama anamuleñi dehi, “Yehova Nzambi welili nindi, Hichinawahi iyala kushakama kanka winduku; nukumwilila nkwashi wamutelela.” (Kutachika 2:18) Nzambi waleñeli Evu kwikala “nkwashi” bayi neyi mukwakudibecha ninduku. Maluwi hiyadi kwikala neyi mbopolu yikweti atupitawu ayedi anakudibechaku. Iyala wadi kumwekesha wumutu munjila yayiwahi, nawa mumbanda wadi kumwekesha kukeña, kalemesha, nikwovwahila.
17, 18. Munjilanyi mwatela kwikalilayi mumbanda nkwashi muwahi kudi nfumwindi?
17 Hela chochu, kudi yuma yayivulu yakoñañayi mumbanda wamuwahi yinabadiki hakwovwahila. Wafwilaña kwikala nkwashi wamuwahi, nikumukwasha nfumwindi hayuma yafuukulañayi. Hela chochu, nateli kwila mwenimu neyi yeteja munafuukuliyi. Hela neyi nakaani, kunuñañana nanfumwindi kukuleñela kufuukula kwindi kusoña nyikabu.
18 Mumbanda nateli kumukwasha nfumwindi kwikala mutu wamuwahi munjila jikwawu. Watela kumuhameka hayuma yinakudikitayi yawunlomboli, chatela kwila yamusawuleña hela kumuleñela yatoñojokeña nindi hanatweshi kumuhembaku. Hampinji yinakuhoshayi nanfumwindi munjila yayiwahi, watela kwiluka nindi, “spiritu yayovu yawunda . . . dichi chalema nankashi kumesu aNzambi,” bayi neyi yalema hohu kudi nfumwinduku. (1 Petulu 3:3, 4; Akolose 3:12) Indi neyi chakwila iyala hetiyaku? Chili wetiya hela nehi, Nsona yakonkomwenaña ambanda “kukeña anfumu jawu nikukeña anyanawu; ekali awundisha mumesu, akadi kubajama, akwakukalakala kumatalawu, akwaluwi, akwakwovwahila anfumu jawu aweni, kulonda mazu aNzambi abuli kutukewa.” (Titusa 2:4, 5) Neyi kunamwekani nsañu yinashindameni hachinleji, iyala wabula kwitiya wukulemesha chinleji chañodindi neyi yamuleja ‘naspiritu yayovu nawa yawunda.’ Amayala amakwawu abula kwitiya ‘anayikoki chakadi mazu, nanochu chakushakamawu añodi jawu; chakumonawu chimukushakama nawoma, chakubula kubajama.’—1 Petulu 3:1, 2, 15; 1 Akorinda 7:13-16.
19. Chumanyi chatela kwilayi mumbanda neyi iyala yamwila nindi yafumpi lushimbi lwaNzambi?
19 Indi neyi iyala yamwila iñodindi kwila chuma chahishayi Nzambi? Neyi yamwila mwenimu, watela kwiluka nindi Nzambi diyi Nyuli yindi wabadika. Watela kwimbujola chakutalilahu hachuma cheliluwu apostolu hampinji yayililuwu kudi akulumpi nawu afumpi nshimbi jaNzambi. HaYililu 5:29 hahosha nawu: ‘Petulu nawapostolu amakwawu hiyakwakula nawu: Twatela kwovwahila Nzambi neyi nyuli bayi antuku.’
KUTIYAÑANA
20. Mbadinyi yalema mwakeñekaña kumwekesha kalemesha nikukeña?
20 Kukeña nikalemesha hiyuma yalema mumbadi yikwawu yamaluwi, mukutiyañana. Iyala wukweti kukeña wahanjekaña nañodindi hanyidimu yadikitañayi, hakukala kukwetiyi, nichinakutoñojokayi hayuma yikwawu. Ichi dichuma chakeñañayi mumbanda. Iyala wekalaña nampinji yakuhosha nañodindi nikutiyilila chikupu chinakuhoshayi wamwekeshaña nindi wamukeña nikumulemesha. (Yakoba 1:19) Ambanda amakwawu ahoshaña nawu anfumu jawu ahanjekaña nawu kapinji kantesha. Chawushona. Eñañi, munanu mafuku akala, amayala anateli kuzata mpinji yeneni kumudimu, ambanda niwena anateli kwiñila mudimu hamuloña wakukala kwachihandilu. Ilaña adisumbula atela kwikala nampinji yakuhanjekaña. Neyi nehi, akutachika kwaambokelamu. Chumichi chinateli kuleta kukala kweneni neyi atachika kudikunda namuntu wabula mwinikwawu.
21. Indi nhoshelu yayiwahi yaletaña ñahi muzañalu mumaluwi?
21 Njila yatiyañenañamu adisumbula yekala yalema. “Mazu amawahi adi neyi mutu wawuchi, kumuchima kutowala, mumafwaha ngu.” (Yishimu 16:24) Hela mukwenu wamumaluwi wetiya chili nehi, Bayibolu yahosha nawu: “Kuhosha kwenu kwikala naluwi, kwakutoweja namuñwa” dikwila nawu kwikali kwakuwahi. (Akolose 4:6) Neyi mukwenu nomoki nanyidimu, mwatela kuhosha mazu amawahi, aluwi, kulonda yatiyi kuwaha. ‘‘Izu dakuhoshela hidinateleli didi neyi mabula awuru analoñejuwu mumabañu asiliva.” (Yishimu 25:11) Ilukenu ntiyakenu yezu denu nimazu akuhosha. Chakutalilahu, neyi muntu nahili, wukuleja mukwawu mukuhila nindi: “Enzelaku kuchinsu!” Ilaña kuhosha “kwakutoweja namuñwa” himazu akuhosha mukuwunda, nezu daluwi, nenu, “Enzelenuku kuchinsu mwani.”
22. Yililwinyi yatela kwikala nawadisumbula hakwila atwelekuhu nakutiyañana?
22 Kutiyañana kwawahaña neyi muhoshaña mumesu awunda, nikwikala waseha nikwinyeka chiwahi, kuwunda, kwikala chiwahi, nikwovwaha. Adisumbula neyi atwalekahu nakutiyañana chiwahi, akushimunaña yuma yinakukeñawu mukukasunuka, nawa akudikundejaña nikudikwasha neyi kunamwekani kukala. Izu daNzambi dakonkomwenaña nawu: ‘Kundejenu ananeñi.’ (1 Atesalonika 5:14) Mpinji jikwawu eyala namumbanda anateli kuhomba. Anateli ‘kudikundeja,’ nikudikolesha wumu namukwawu.—Aroma 15:2.
23, 24. Indi kukeña nikalemesha kunateli kukwasha ñahi adisumbula kumanisha kukala? Hanenu chakutalilahu.
23 Adisumbula adilemeshaña nawa adikeña hichayikalilaña kumanisha kukala kwejima kwayimwekenañaku. Afwilaña kubula ‘kuditalumokelaña’ wumu namukwawu. (Akolose 3:19) Wejima wawu atela kwiluka nawu, “izu dankalu dasañumunaña kuzuwa.” (Yishimu 15:1) Babalenu kuchina kusekesha hela kuhisha mukwenu wunakuhosha jidi mumuchima windi. Ilaña mazu anakuhoshayi akuyikwasha kwiluka jinakutoñojokayi mukwenu. Esekenu kumanisha kukala hamu nikumona mwakwilila.
24 Anukenu mpinji yamulejeliyi Sara nfumwindi, Abarahama, njila yakumanishilamu kukala nawa Abarahama wakaanini. Ilaña, Nzambi wamulejeli Abarahama nindi: “Kumina dakutiya mwizu daSara, mwejima mwanahoshiyi.” (Kutachika 21:9-12) Abarahama watiyilili mwahosheliyi iñodindi nawa amukiswilili. Chochimu, neyi mumbanda yahosha yuma yambukaku nayinakutoñojokayi nfumwindi, iyala watela kumutiyilila. Hampinji yoyimu, mumbanda bayi yamuyuleña iyalaku ilaña watela kutiyilila munakuhoshayi nfumwindi. (Yishimu 25:24) Neyi iyala hela mumbanda yakeñaña hohu yuma yinakutoñojokayi mpinji yejima dikwila nawu hiyadikeña nikudilemeshaku.
25. Indi kutiyañana chiwahi kunateli kuleta ñahi muzañalu munsañu jikwawu jawubwambu wamumaluwi?
25 Adisumbula atela kutiyañanaña cheñi munsañu jakukaama hamu. Kwikala nachifwa nikubula kudihemba kunateli kumanisha chikupu iwu wubwambu waweni wamumaluwi. Chachiwahi kudiwunjika nikutiyañana chakadi kudisweka. Wejima wawu neyi hiyakuduminañaku, hiyakwikala nakukala hansañu yakukaama hamuku. Iyi nsañu ninsañu jikwawu, “bayi muntu alonda yakudiwahisha nachu yomwenuku, chiña yakuwahisha nachu mukwawu.”—1 Akorinda 7:3-5; 10:24.
26. Hela chakwila mumaluwi ejima mwekalaña yuma yayiwahi niyatama, indi kutiyilila Izu daNzambi kunateli kukwasha ñahi adisumbula kwikala amuzañalu?
26 Izu daNzambi dahana kufumba kwakuwahi nankashi. Eñañi, maluwi ejima mwekalaña yuma yayiwahi niyatama. Ilaña neyi adisumbula ovwahila wunlomboli waYehova washimunawu muBayibolu, nawa maluwi awu ashindamena hakukeña kwamunshimbi nikudilemesha, akukuhwelela chikupu nawu maluwi awu akutwalekahu nawa akwikala amuzañalu. Dichi hiyakudilemesha hohu awenuku ilaña akulemesha niNtachiki yamaluwi, Yehova Nzambi.
INDI IJI NSHIMBI JAMUBAYIBOLU JINATELI KUKWASHA ÑAHI . . . ADISUMBULA KUTWALEKAHU NAMALUWI AMUZAÑALU?
AkwaKristu alala adikeña wumu namukwawu.—Yowanu 13:35.
AkwaKristu adanakenaña wumu namukwawu.—Akolose 3:13.
Kwekala ntajikilu yayiwahi yawumutu.—1 Akorinda 11:3.
Chachiwahi kuhosha yuma yayiwahi munjila yaloña.—Yishimu 25:11.
[Mwevulu wudi hefu 28]
Kukeña kwawadisumbula nikalemesha kwaletaña muzañalu mumaluwi