Yehovaa Nzambi diyi wayisumbwishili antu atachi. Bayibolu yatulejaña nawu waleñeli mumbanda watachi, ‘hakumutwala kudi muntu.’ Adama wazañaleli chakwila wahosheli nindi: “Iwu neli dehi ifwaha dami, neli dehi mujimba wami.” (Kutachika 2:22, 23) Yehova wakeñaña nindi adisumbula ashakameña namuzañalu.

Neyi himukwiñila mumaluwi, hadaha mukutoñojoka nenu yuma yejima yakekala chiwahi. Ilaña, nieyala namumbanda adikeña nankashi amonaña kukala. (1 Akorinda 7:28) Muyinu buloshuwa, mukuwanamu nshimbi jamuBayibolu jinateli kuleta muzañalu mumaluwi enu nimuchisaka neyi mujizatisha.—Masamu 19:8-11.

1 LEMESHENU MUDIMU WAYINKAYI YEHOVA

BAYIBOLU YAHOSHAÑA NAWU: Iyala diyi mutu wachisaka.—Aefwesesa 5:23.

Neyi mwasumbula, Yehova nakukeña nindi muhembeña ñodenu chiwahi. (1 Petulu 3:7) Wamuleñeli kulonda yekali nkwashi yenu nawa nakukeña nindi mumukeñi nikumulemesha. (Kutachika 2:18) Mwatela kukeña ñodenu nankashi nawa mwatela kumwilila yuma yinakukeñayi kubadika yimunakukeña.—Aefwesesa 5:25-29.

Neyi mwasumbuka, Yehova nakukeña nindi mulemesheña nfumwenu nankashi nikumukwasha kulonda yazateña mudimu wamwinkawu. (1 Akorinda 11:3; Aefwesesa 5:33) Lemeshenu mwanafuukuliyi nawa zatilenu hamu. (Akolose 3:18) Neyi mukwilaña mwenimu, nfumwenu niYehova akuyikeña nankashi.—1 Petulu 3:1-6.

YUMA YIMWATELA KWILA:

• Ihulenu mwinikwenu yayileji chimunateli kwila kulonda mwikali iyala hela mumbanda wamuwahi. Tiyililenu nakanañachima nawa zatenu nañovu kulonda mwikali nayililu yayiwahi

• Wundishenu muchima. Hakahita mpinji hakwila mukeluki chakudizañalesha

2 DAKAMENENUÑA CHIKUPU

BAYIBOLU YAHOSHAÑA NAWU: Mwatela kutoñojokaña hayuma yakeñañayi mwinikwenu. (Afwilipi 2:3, 4) Mulemeshenuña mwinikwenu, nakwanuka nenu Yehova wakeñaña ambuñindi ejima ekali ‘amwovu nawantu ejima.’ (2 Timotewu 2:24) “Kwekala muntu wahoshaña mazu akutuboka neyi wudi nakukutapola mpoku yakabali; ilaña madimi awakwamaana akoleshaña antu.” Dichi mwatela kwiluka mazu imwatela kuhosha. (Yishimu 12:18) Spiritu yaYehova yinateli kuyikwasha kulonda muhosheña chachiwahi nawa nakukeña.—Aŋalija 5:22, 23; Akolose 4:6.

YUMA YIMWATELA KWILA:

• Lombenu wukwashu kulonda mwikali awunda nikwikala nayitoñojoka yayiwahi henohu kanda muhanjeki nsañu yalema namwinikwenu

• Toñojokenu chiwahi hayuma yimunakukeña kuhosha nichimukuyihosha

3 FUUKWILENUÑA HAMU

BAYIBOLU YAHOSHAÑA NAWU: Neyi mwiñila mumaluwi, mukwikala ‘mujimba wumu’ namwinikwenu. (Matewu 19:5) Hela chochu mudi antu ayedi nawa munateli kwikala nayitoñojoka yambuka. Dichi mwatela kudiza kulonda mwiluki chakufuukwila hamu. (Afwilipi 2:2) Mwatela kwikala anuñañana neyi munakufuukulahu. Bayibolu yahoshaña nawu: “Yuma yejima yafuukulañawu antu yakolelaña kumpuña.” (Yishimu 20:18) Itejenu nshimbi yamuBayibolu yiyikwashi hampinji yimunakufuukwila hamu yuma yalema.—Yishimu 8:32, 33.

YUMA YIMWATELA KWILA:

• Mwatela kumuleja mwinikwenu chimunakutiya bayi neyi kumuleja hohu nsañu hela chimunakutoñojokaku

• Mulejenumu mwinikwenu henohu kanda mwili chuma chimunakukeña

Yehova wakeñaña nindi twikali ‘ashinshika.’ (Mika 6:8) Kashinshi kalema nankashi mumaluwi enu, muloña chakadi kwikala ashinshika himukudikuhwelelaku. Kudikuhwelela kwalema hakwila nawu mudikeñi chikupu.

Makonu, antu analeki dehi kwikala ashinshika mumaluwi. Hakwila muhembi maluwi enu, mwatela kulondela iyi yuma yiyedi.

1 LEMESHENU MALUWI ENU

BAYIBOLU YAHOSHAÑA NAWU: ‘Mushinshiki yuma yabadika kulema.’ (Afwilipi 1:10) Maluwi enu dichuma chalema nankashi muwumi wenu. Mwatela kulemesha maluwenu.

Yehova nakukeña nindi mushi muchima hadi mwinikwenu ‘mushakami nakuzañajala’ hamu. (Mukwakutaŋisha 9:9) Wayilejaña chikupu nindi bayi mudiwula mwinikwenuku, ilaña mwatela kuwana njila yakuditiyishilamu kuwaha. (1 Akorinda 10:24) Mwinikwenu watela kwiluka nindi mwamukeña nawa mwamulemesha.

YUMA YIMWATELA KWILA:

• Mwatela kwikala nampinji yakuhajekela hamu namwini kwenu, mwinikwenu watela kwiluka nindi mwamukeña

• Mwatela kuhoshaña nenu “etu” bayi nenu “amiku”

2 HEMBENU MUCHIMA WENU

BAYIBOLU YAHOSHAÑA NAWU: “Muntu wukutala mumbanda namesu akumufwila, neli dehi nindi wuvumbi mumuchima windi.” (Matewu 5:28) Neyi muntu yatwalekahu nakutoñojoka yuma yatama, dikwila nawu hakwikala washinshika kudi mwini kwinduku.

Yehova wahoshaña nindi mwatela ‘kuhemba muchima wenu.’ (Yishimu 4:23; Yeremiya 17:9) Hakwila mwili mwenimu, mwatela kuhemba mesu enu. (Matewu 5:29, 30) Londelenu chakutalilahu chankakulula Yoba, watiyañeni namesu indi kulonda yabuli kutala mumbanda namesu akumufwila. (Yoba 31:1) Fwilenuña kubula kutala nyevulu yanzekesi. Nawa dikasenu mumuchima kulonda mubuleña kumwekesha kukeña kudi muntu wacheñi kubadika mwinikwenu.

YUMA YIMWATELA KWILA:

• Mwekeshenu chikupu kudi antu amakwawu nenu mwamukeña mwinikwenu

• Ilukenu chinakutiyayi mwinikwenu nawa ketwishenu wubwambu wenu nawantu amakwawu wukuletesha mwinikwenu kutiya kutama