Chimwadisumbula tuhu, mukutachika kumona kukala kwashiyashana. Kweniku kukala kukwinzaña muloña wakushiyashana kwayitoñojoka ninjila yimwelilañamu yuma kwesekeja nankulilu yenu. Kukala kukwawu kwafumaña kudi antu acheñi hela yuma yamwekanaña chakukashimwisha.

Hadaha mukutachika kutondolwela kukala kunamwekani, ilaña Bayibolu yatulejaña nawu twatela kumanisha kukala kutukweti. (Matewu 5:23, 24) Neyi mukuzatishaña nshimbi jamuBayibolu mukumanisha kukala kumukweti.

1 HOSHENU HAKUKALA KUMUKWETI

BAYIBOLU YAHOSHAÑA NAWU: ‘Kwekala mpinji yakuhosha.’ (Mukwakutañisha 3:1, 7) Mwatela kwikala nampinji yakuhosha hakukala kumukweti. Chakadi kuhita mumbadi mulejenu mwinikwenu chimunakutiya nichimunakutoñojoka hanoyu nsañu. Hoshenuña namwinikwenu ‘chalala.’ (Aefwesesa 4:25) Hela chakwila wonsu wenu munahili nankashi, wundishenu muchima. Kwakula mumesu awunda kunateli kuyileñela muhanjeki chachiwahi chakadi kutachika kutoboka.—Yishimu 15:4; 26:20.

Hela munakaani munahoshiyi mwinikwenu, hoshenuña chiwahi, bayi muleka kumwekesha kukeña nikulemesha mwinikwenuku. (Akolose 4:6) Nyakalenu kumanisha kukala nawa bayi muleka kuhanjekaku.—Aefwesesa 4:26.

YUMA YIMWATELA KWILA:

• Ikalenu nampinji yayiwahi yakuhosha hakukala kumukweti

• Neyi mwinikwenu nakuhosha, bayi mumuketwishaku. Anenu nawa mukwikala nampinji yakuhosha

2 TIYILILENU KULONDA MUTIYISHI

BAYIBOLU YAHOSHAÑA NAWU: “Keñañanenu nawana kwenu nawushona; itejenu mwinenu abadiki kulema.” (Aroma 12:10) Kutiyilila kwalema nankashi. Tiyenu munakuhoshayi mwinikwenu ‘namuchima wawushona niwakudizoza.’ (1 Petulu 3:8; Yakoba 1:19) Bayi mumwekesha neyi munakutiyilila henohu munashi maana kwacheñuku. Neyi chinatwesheki, lekenu yuma yimunakwila kulonda mutiyi munakuhoshayi mukwenu hela mulejenu nenu mukuhanjeka mpinji yacheñi. Neyi mwinikwenu mumumonaña nenu hibwambu denu bayi neyi hichilumbu chenuku, ‘himukunyakalaña kuzuwaku.’—Mukwakutañisha 7:9.

YUMA YIMWATELA KWILA:

• Tiyililenuña munakuhoshayi mwinikwenu hela chakwila yuma yinakuhoshayi yinayitiyishi kutama

• Ilukenu munatalishiyi mwinikwenu. Talenu chinakumwekanayi mwinikwenu nichinakutiyakana izu dindi

3 ILENU MUMUNAFUUKULI

BAYIBOLU YAHOSHAÑA NAWU: “Mukukabakana kwejima mwekala kudiilamu; ilaña kubobola mukanwa kwaletesha kubula yuma.” (Yishimu 14:23) Bayi mukumina dakuwana njila yakumanishilamu kukala hohuku. Mwatela kwila mumunafuukuli wonsu wenu. Ilaña mwatela kuzata nañovu nawa mwakafuma yuma yayiwahi. (Yishimu 10:4) Neyi mukuzatilaña hamu, mwakatambwila ‘wuloku wawuwahi’ hanyidimu yimunakudikita.—Mukwakutañisha 4:9.

YUMA YIMWATELA KWILA:

• Fuukulenu yuma yimwatela kwila yikuyikwasha kumanisha kukala kumukweti

• Neyi hanahiti mpinji, talenu chimunakuzata

Wejima wetu twakeñaña mali hakwila tulandi yuma yakeñaña yisaka yetu. (Yishimu 30:8) Muloña “mali hichuma chakudihemba nachu.” (Mukwakutaŋisha 7:12) Chinateli kuyikalila antu adisumbula kuhanjeka hansañu yamali, ilaña bayi mwiteja mali ayileteli kukala mumaluwuku. (Aefwesesa 4:32) Eyala namumbanda adisumbula atela kudikuhwelela nikuzatila hamu neyi anakufuukula mwakuzatishila mali.

1 FUUKULENU CHACHIWAHI

BAYIBOLU YAHOSHAÑA NAWU: “Mwinenwinyi wukwila neyi wukukeña kutuña itala deneni, wukubula kusambila kushakama nakuchinda mali achidikochu, atali neyi wukweti mali akudimanisha nachu?” (Luka 14:28) Chalema kufuukwila hamu chimukuzatisha malenu. (Amosa 3:3) Ilukenu yuma yimunakukeña kulanda nimali imukweti. (Yishimu 31:16) Neyi mudi namali akulanda chuma, hichinayi mukwila nawu mwatela kulandaku. Bayi mudiñijaña munyikuduku. Zatishenu hohu mali imukweti.—Yishimu 21:5; 22:7.

YUMA YIMWATELA KWILA:

• Neyi mudi namali anasompokumu hakumana kwakakweji, fuukwilenu hamu chimukuyizatisha

• Neyi mali imudinawu anakehi, keheshenuku yuma yimunakukeña kulanda. Chakutalilahu, munateli kuloñesha yakudya yenu chatela muyi nakudyila kumatala akudiila

2 HOSHENU HATOOKA CHAKADI KUHITA MUMBADI

BAYIBOLU YAHOSHAÑA NAWU: ‘Twalondaña yuma yalumbuluka kumesu aYehova nikumesu awantu nawa.’ (2 Akorinda 8:21) Mulejenu mwinikwenu chakubula kumusweka mali imwafolaña niimwazatishaña hakakweji.

Mpinji yejima hanjekenu namwinikwenu hayuma yamaneni yimunakufuukula kulanda. (Yishimu 13:10) Kuhanjekaña hansañu yamali kunateli kuyikwasha kushakama mukuwunda mumaluwi enu. Ilukenu nenu mali imwafolaña himali achisaka, bayi nenu enu nkawenuku.—1 Timotewu 5:8.

YUMA YIMWATELA KWILA:

• Ditejenu mali imwatela kuzatisha chakadi kwihula mwinikwenu

• Bayi muhembelela kukala kukamwekani hakwila mukahanjeki hansañu yamaluku