Maluwi aleteshaña anadisumbuli kudimena. Hela chakwila mwatela kukeña nikulemesha anvwali jenu, ilaña mwinikwenu diyi muntu imwatela kulemesha chikupu hanu heseki. Chumichi chinateli kuyikalila antaña jenu amakwawu. Ilaña kulondela nshimbi jamuBayibolu kunateli kuyikwasha, hakwila mushakami mukuwunda nawantaña jenu hampinji yimunakufwila kushakama chachiwahi nachisaka chenu chachiha.

1 BAYI MUDIWULAÑA ANTAÑA JENUKU

BAYIBOLU YAHOSHAÑA NAWU: “Lemeshaku tata yeyi nimama yeyi.” (Aefwesesa 6:2) Hela chakwila munakuli dehi, mpinji yejima mwatela kulemesha anvwali jenu. Mwatela kwiluka cheñi nenu, mwinikwenu niyena watela kuyakamena anvwali jindi. “Kukeña hikwahetaña ichimaku,” dichi bayi mutiya kutama neyi mwinikwenu nakudikunda nawanvwali jinduku.—1 Akorinda 13:4; Aŋalija 5:26.

YUMA YIMWATELA KWILA:

• Bayi muhoshaña nenu “Antaña jeyi mpinji yejima adiwulaña” hela “A mama yeyi akeñaña wanyi yuma yinelaña”

• Esekenu kumona yuma neyi chinakuyimonayi mwinikwenu

2 NEYI CHINATWESHEKI BAYI MUHIMPA MUMUNAFUUKULUKU

BAYIBOLU YAHOSHAÑA NAWU: “Dichi chakushiyilayi iyala nitata yindi nimama yindi nakumukakela iñodindi; niwena akela mujimba wumu.” (Kutachika 2:24) Neyi muneñili dehi mumaluwi, anvwali jenu akutwalekahu kutoñojoka nawu muchidi mumakasa awu nawa akukeñaña nawu elukeña yuma yejima yinakuzatika mumaluwi enu.

Iyenu mwatela kuyileja mwakukumina nawa yilejenu munjila yayiwahi eluki. Yilejenu chakadi kuhita mumbadi nawa nakalemesha. (Yishimu 15:1) Kudizoza, kwovwaha nikudiwunjika kukuyikwasha kwikala nawubwambu wakola nawantaña jenu nikutwalekahu ‘kuditiyilila wumu namukwawu nakukeña.’—Aefwesesa 4:2.

YUMA YIMWATELA KWILA:

• Neyi antaña jenu anakudiñija mumaluwi enu, hanjekenu namwinikwenu hampinji yayiwahi

• Ditejenu chimwatela kumanisha iku kukala

Mwana neyi navwaliki antu adisumbula azañalalaña nikwakama. Chineli diyi mwana watachi, chikuyikalila muloña mpinji yeneni niñovu yikukeñekaña hakwakamena mwana wunasemuki. Muloña wakubula kukaama tulu nikuzeya kunateli kuleta kukala mumaluwi enu. Wejima wenu eyala namumbanda mwatela kuhimpa kulonda mwakameneña mwanenu nimaluwi enu. Indi kufumba kwamuBayibolu kunateli kuyikwasha ñahi kulonda mwiluki chakuzata nakukala kwamuchidiwu?

1 ILUKENU CHIKUHIPAYI MWANA CHIHANDILU CHENU

BAYIBOLU YAHOSHAÑA NAWU: “Kukeña kwadiwunjikaña, kukweti niluwi.” Cheñi nawa kukeña “hikwakokwelaña kwindi hohuku; hikwanyakalaña kuzuwaku.” (1 Akorinda 13:4, 5) Chineli munekali dehi mama yamwana, mukusweja kusha maana hadi mwana wunasemuki. Hela chochu, nfumwenu wukutachika kumona nindi munakumudiwula, dichi mwatela kwanuka nenu niyena nakukeña nindi mumwakameneña. Neyi mwikala adiwunjika nawa aluwi, munateli kumukwasha kulonda yeluki nindi munakumwakamena niyena nawa wukuyikwashañaku kwakamena mwanenu.

“Ninenu amayala, shakamenu nawañodi jenu mwaya maana.” (1 Petulu 3:7) Mwatela kwiluka nenu ñodenu wukusweja kusha maana kudi mwanenu. Wukuswejaña kwakama, kuzeya, hadaha nikuneña hamuloña wanyidimu yayiha yinakuzatayi. Mpinji yikwawu, nateli kuyihilila, ilaña wundenu, muloña “muntu walabaña kuzuwa wabadika chilobu.” (Yish. 16:32) Mwekeshenu kashinshi, nawa mukwashenuñaku.—Yishimu 14:29.

YUMA YIMWATELA KWILA:

• Atata jaWantu: Kwashenu ñodenu kwakamena mwana, nimpinji yawufuku. Keheshenuku mpinji yimwombilaña kunyidimu yikwawu kulonda mwikaleña nampinji yeneni hamu nañodenu nimwanenu

• Amama jaWantu: Neyi nfumwenu nakukeña nindi yayikwashuku kwakata mwana, bayi mukanaku. Neyi nakukañanya kumwakata chachiwahi, bayi mumusehaku, ilaña mulejenu chachiwahi chakumwakata

2 KOLESHENU MALUWI ENU

BAYIBOLU YAHOSHAÑA NAWU: ‘Niwena akekala mujimba wumu.’ (Kutachika 2:24) Hela chakwila munekali dehi namuntu wamuha muchisaka chenu, anukenu nenu enu nimwinikwenu muchidi “mujimba wumu.” Shenuku kashinshi kulonda mutwalekuhu kushakama chiwahi mumaluwi enu.

Ambanda, hamekenuña anfumujenu hakuyikwasha nikuyakamena. Mazu enu akusakilila anateli ‘kuyikolesha.’ (Yishimu 12:18) Atata jawantu, lejenu ñodenu nenu mwamukeña nawa mwamulemesha chikupu. Muhamekenuña chinakuhembayi chisaka chenu.—Yishimu 31:10, 28.

“Bayi muntu alonda yakudiwahisha nachu yomwenuku, chiña yakuwahisha nachu mukwawu.” (1 Akorinda 10:24) Mpinji yejima ilenuña yuma yikumutiyishaña mwinikwenu kuwaha. Adisumbula, ikalenuña nampinji yakuhanjeka, kuhameka nikuditiyilila wumu namukwawu. Bayi mudibondañaku. Shenu muchima hachuma chinakukeñayi mwinikwenu. Bayibolu yahoshaña nawu: “Bayi mudibondaku, chiña mushamu mafuku akutoñola.” (1 Akorinda 7:3-5) Hanjekenu haniyi nsañu enu ayedi chakadi kuhita mumbadi. Kudiwunjika nikutiyilila kukukolesha maluwi enu.

YUMA YIMWATELA KWILA:

• Bayi muvulamena kwikala nampinji yakuhanjeka enu ayeduku

• Dililenuña tuyuma twanyanya tukuleñela mwinikwenu yamoneña nindi mwamukeña, chidi neyi kumutemeshela meseji hela kumwinka chawaana

3 DIZISHENU MWANENU

BAYIBOLU YAHOSHAÑA NAWU: “Kufumisha kuwansi wuneluki nyikanda yajila yinatweshi kukuleja maana akumona nachu wamwinu.” (2 Timotewu 3:15) Fuukulenuhu yuma yimwatela kwila hakumudizisha mwanenu. Wukweti wuswa wakudiza chikupu hela tuhu kanda yavwaliki. Neyi wuchidi mwivumu, mwanenu nateli kwiluka izu denu nichimunakutiya. Mutañilenuña hampinji yichidiyi mukeki. Hela chakwila hakutiyaña yuma yimukumutañilañaku, ilaña chikumukwashaku neyi nakuli dehi kulonda yakadiluñisheña kutaña.

Hela mwanenu wuchidi wanyanya nankashi nateli kuyitiya chimukuhoshaña hadi Nzambi. Watela yatiyeña chimunakulomba kudi Nzambi. (Kuhituluka 11:19) Neyi munakuhema namwanenu, hoshenuña hayuma yaleñayi Nzambi. (Masamu 78:3, 4) Mwanenu chikukulañayi, wukwiluka nindi mwamukeña Yehova nawa niyena wukudiza kumukeña.

YUMA YIMWATELA KWILA:

• Lombenu maana kulonda mwiluki chakumudizisha mwanenu

• Futilenuñahu hamazu alema kulonda mwanenu yatachiki kudiza hachidiyi mukeki