Yehova chatuñiliyi chisaka, waloñesheli nindi anwvali diwu atela kulombolaña anyanawu. (Akolose 3:20) Anwvali mudi namudimu wakudizisha anyanenu kulonda amukeñi Yehova nawa akuli nakwikala antu alumbuluka. (2 Timotewu 1:5; 3:15) Mwatela cheñi kwiluka yuma yidi mumuchima wamwanenu weyala hela wamumbanda. Hela chochu, mwatela kumwekesha chakutalilahu chachiwahi. Neyi Izu daYehova disambila kwikala mumuchima wenu, chikuyikwasha kudizisha mwanenu Izu daYehova.—Masamu 40:8.

1 IKALENU AKASUNUKA KULONDA ANYANENU CHIYIPELELEÑA KUHOSHA NANENU

BAYIBOLU YAHOSHAÑA NAWU: ‘Nyakalenu kutiya, mulabi kuhosha.’ (Yakoba 1:19) Munakukeña nenu anyanenu ekali akasunuka kuhanjeka nanenu chakubula kudakamena. Atela eluki nawu mpinji yidi yejima munateli kutiyilila neyi anakukeña kuhosha nanenu. Shakamenuña chachiwahi nawanyanenu kulonda chiyipeleleña kuhosha jidi kumuchima wawu. (Yakoba 3:18) Neyi eluka nawu mukuyizuwila hela mukuyitwika nyiloña, akutachika kuyijinda nsañu. Bayi muswejaña kuyizuwila anyanenuku, mpinji yejima yilejenuña nenu mwayikeña.—Matewu 3:17; 1 Akorinda 8:1.

YUMA YIMWATELA KWILA:

• Neyi anyana anakukeña kuhosha nenu tiyililenu

• Mpinji yejima hanjekenuña nawanyanenu, bayi muhanjekaña hohu neyi kudi kukalaku

2 FWILENU KWILUKA MUNAKUTALISHAWU ANYANENU

BAYIBOLU YAHOSHAÑA NAWU: “Muntu watiyaña izu dawakwawu wakawana yayiwahi.” (Yishimu 16:20) Mpinji yikwawu, mwatela kushaku kashinshi kulonda mwiluki chinakutoñojokawu anyanenu. Atwansi avulaña kulebumuna nsañu hela kuhosha hohu yuma yikwinza kumutu. ‘Muntu welaña wuchidi kanda atiyi chachiwahi hakwakula, chamuleñelaña wusupi.’ (Yishimu 18:13) Bayi munyakalaña kuhilaku.—Yishimu 19:11.

YUMA YIMWATELA KWILA:

• Fuukulenuhu chikupu kulonda mubuleña kuyiketwisha anyanenu neyi anakuhosha hela kusweja kuhila, hichidi namuloña namazu akuhoshawuku

• Anukenuña chimwatiyileña hampinji yimwadiña neyi wena niyuma yimwamweneña nenu diyi yalema

3 FUMBILENU HAMU ANYANA

BAYIBOLU YAHOSHAÑA NAWU: “Eyi mwanami, tiya mwakufumbañayi tata yeyi, bayi wuleka nshimbi jamama yeyuku.” (Yishimu 1:8) Yehova wenka tata yawantu nimama yawantu ñovu yakuyuula anyanawu. Dizishenu anyanenu kulonda ayilemesheña nikuyovwahila. (Aefwesesa 6:1-3) Anyana elukaña neyi chakwila anvwali jawu ‘adibomba hamu nayitoñojoka yimu.’ (1 Akorinda 1:10) Anvwali, neyi munakuditadikisha, bayi muditadikishilaña hamesu awanyanenuku, mukuleñela abuleña kuyilemesha.

YUMA YIMWATELA KWILA:

• Hanjekenu nawa ditejenu chimukufumbaña anyanenu

• Neyi enu nimwinikwenu mudi nanjila yacheñi yakufumbilamu anyana, fwilenu kwiluka chinakutoñojokayi mwinikwenu

4 MWATELA KUFUKULAHU CHIWAHI

BAYIBOLU YAHOSHAÑA NAWU: “Mufumbi mwana endi munjila yatela kuyayi.” (Yishimu 22:6) Mwatela kuzata nañovu kulonda muyidizishi chachiwahi anyanenu. Mwatela kwiluka mwakudizishila anyanenu, kushilahu nikuyibabesha. (Masamu 127:4; Yishimu 29:17) Kubabesha anyana hikwatalisha mukwila nawu muyeteña hohuku, ilaña kwashindamena hakuyikwasha anyanenu eluki muloña watela kulondelawu nshimbi. (Yishimu 28:7) Mwatela cheñi kuyidizisha anyana akeñi Izu daYehova nikwiluka nshimbi jamuBayibolu. (Masamu 1:2) Kwila mwenimu kukuyikwasha ekali nachinleji chachiwahi.—Aheberu 5:14.

YUMA YIMWATELA KWILA:

• Anyanenu atela kwiluka chikupu nawu Nzambi himuntu anateli kukuhwelelawu

• Yikwashenu anyanenu kulonda eluki nikutondolwela yuma yatama, yekalaña haIntaneti. Yidizishenu chakutondolwela antu akeñaña nawu eli nawu wuvumbi

Hela chakwila mukweseka kuzata nañovu hakwila mwikali namaluwi amawahi nichisaka chamuzañalu, kudi yuma yinateli kumwekana mukukasumwisha yinateli kuyikañesha kwikala namuzañalu. (Mukwakutaŋisha 9:11) Nzambi wukweti kukeña watukwashaña neyi tunaholokeli mukukala. Neyi mulondela iji nshimbi jamuNsona, enu nichisaka chenu munateli kuumika, hela neyi mudi mukukala kweneni.

1 SHINDAMENENU HADI YEHOVA

BAYIBOLU YAHOSHAÑA NAWU: “Mutwikenu kwakama kwenu kwejima, muloña yena wayihembaña.” (1 Petulu 5:7) Mpinji yejima mwatela kwanukaña nenu Nzambi hidiyi waletaña kweseka kumwamonañaku. (Yakoba 1:13) Chimukukundamaña kwakwihi nayena, wukuyikwashaña chikupu. (Isaya 41:10) “Ichilenu nyichima yenu kumesu indi.”—Masamu 62:8.

Neyi mutañaña nikudiza Bayibolu ifuku niifuku yikuyikundejaña. Chikufumamu, mukwiluka Yehova ‘chatukundejañayi mulukadi lwetu lwejima.’ (2 Akorinda 1:3, 4; Aroma 15:4) Wayikana nindi wukuyinka “kuwunda kwaNzambi kwabadika maana ejima.”—Afwilipi 4:6, 7, 13.

YUMA YIMWATELA KWILA:

• Lombenu kudi Yehova yayikwashi mwikali awunda nawa mutoñojokeña chiwahi

• Shinshikenu hanjila jejima jimunafuukuluhu nawa tondenuhu njila yayiwahi yimwatela kulondela

2 DIHEMBENU CHIWAHI NICHISAKA CHENU

BAYIBOLU YAHOSHAÑA NAWU: “Muchima wamuntu wababala wakwataña kwiluka; matu awakwamaana akeñakeñaña kwiluka.” (Yishimu 18:15) Ilukenu wunsahu wejima. Ilukenu yuma yejima yinakukeña muntu wejima wamuchisaka chenu. Hanjekenu nawu. Tiyililenu chinakuhoshawu.—Yishimu 20:5.

Indi neyi muntu wamuchisaka chenu nafwi? Bayi mutiya nsonyi yakudilaku. Anukenu nenu Yesu ‘niyena wadilili.’ (Yowanu 11:35; Mukwakutaŋisha 3:4) Kunooka chachiwahi nikukama tulu nikwena kwakwashanaña. (Mukwakutaŋisha 4:6) Ichi chikuyikwasha kuumika kukala kumunamoni.

YUMA YIMWATELA KWILA:

• Henohu kanda muholokeli mukukala, mwatela kuhanjekaña nachisaka chenu. Neyi kumwekana kukala, anyanenu akwikala akasunuka kuhanjeka nanenu

• Hanjekenu nawantu amakwawu amonahu dehi kukala kwamuchidiwu

3 LOMBENU WUKWASHU

BAYIBOLU YAHOSHAÑA NAWU: “Ibwambu damuntu wamukeñaña mukwawu mwahita mpinji jejima; mana kwamuntu wavwalikila yakala.” (Yishimu 17:17) Amabwambu jenu akukeña kuyikwasha, ilaña akukañanya kwiluka hakutachikila. Bayi mutiya nsonyi yakuyileja yuma yimunakukeñaku. (Yishimu 12:25) Cheñi, lombenu antu eluka nshimbi jamuBayibolu kulonda ayikwashi mutwalekuhu kwikala nawubwambu wakola naNzambi. Nshimbi jamuBayibolu jikuyilejawu jikuyikwasha.—Yakoba 5:14.

Chikuyikwasha chikupu neyi mpinji yejima mudikundaña nawantu amukuhwelela Nzambi nawa akuhwelela muyikaninu yindi. Cheñi mukwikala namuzañalu chikupu neyi mukwasha antu anakukeña wakuyikolesha. Yilejenu yuma yimwakuhwelela hadi Yehova niyikaninu yindi. Twalekenuhu kukwasha antu adi mukukankila, bayi mudambulaña nawantu ayikeña nawa ayakamenañaku.—Yishimu 18:1; 1 Akorinda 15:58.

YUMA YIMWATELA KWILA:

• Hanjekenu nebwambu denu kulonda yayikwashi

• Shimunenu yuma yimunakukeña chakadi kuhita mumbadi