magazini kwiluka nawu kukuma kudi kwakwihi. Hela chochu, antu amakwawu akanaña nakuhosha nawu, iyi nsañu hinsañu jawantu nawa anateli kuyisoneka kwesekeja nachinakukeñawu. Ahoshaña cheñi nawu chineli njila jakuhanjekelamu jinakuvulilaku, dichinaleteshi kaayi kasweji kutama. Hela chikwila ahoshaña mwenimu, kudi wunsahu wawuvulu wunakumwekesha nawu tudi mumpinji yakala mukuhanda kwawantu.

Ankuluñaña amakwawu ahoshaña nawu tunakumona yuma yamboka mboka hanu hamaseki. Chakutalilahu muchaaka cha 2014 izanvu daScience and Security Board dasoñamishili akaUnited Nations Security Council mumagazini yaBulletin of the Atomic Scientists hayuma yatama yinateli kuleta wubanji kudantu. Awa asayantisiti ahosheli nawu: “Kushinshika haniyi yuma yatama yinateli kuleta wubanji hadi antu kunaleteshi twiluki netu yuma yinataminiku chikupu.” Antu amavulu aneluki chikupu nawu tunashiki mumpinji yakala muchihandilu chawantu. Ansoneki aniyi magazini niantañi aneluki chikupu nawu tudi mumafuku akukuminina nawa kukuma kudi kwakwihi. Chatela mwakameña muloña wayuma yikamwekana kumbidi, mwatela kutiya kuwaha. Muloñadi? Muloña munateli kupuluka kukuma chikwakenza.

Bayibolu yatulejaña nawu kukuma mwabombela nikujilumuna: “Henohu hamba kekala lukadi lwasweja, lwakwila kufumisha kutachi yamatuña kushika nikulelu, kanda alumonañahu dehi . . . Neyi akabula kukehesha wena mafuku owu, hikwakekala antu akahandaku.” (Matewu 24:21, 22) Ilaña Nzambi watukana nindi antu amavulu akapuluka: ‘Mpata yamunu mwishina yikuhita . . . , ilaña muntu welaña muchima waNzambi wakashakama haya nyaka.’—1 Yowanu 2:17.

Neyi munakukeña kupuluka hakahitaña iyi mpata yamunu mwishina kulonda ‘mwakashakami haya nyaka,’ chumanyi chimwatela kwila? Komana mukutachika kudilumbikila yuma yakumujimba? Inehi. Bayibolu yatukonkomwenaña nawu twatela kutwamijaku yuma yakuspiritu. Twatañaña nawu: “Chineli yumiyi yejima yakasuñunuka chochichi, shakamenu nakujila nakwakama Nzambi, nakutalila nakukeña nankashi chakenza ifuku daNzambi.” (2 Petulu 3:10-12) Iwu mukuku wamazu wunakumwekesha nawu ‘yuma yejima’ yakasuñunuka yinabombelumu chiyuulu chamajika kanwa kushilahu niantu ejima atondaña ichi chiyuulu nawa akanaña chiyuulu chaNzambi. Mwamweni, neyi tudilumbikilaña maheta akumujimba, tukapuluka wanyi neyi kujilumuka kunenzi.

Dichi, hakwila tukapuluki twatela kumwakama Yehova Nzambi nikwikala nayililu yayiwahi nawa nikwila yuma yamuzañaleshaña. (Zefwaniya 2:3) Chatela twileña yuma yinakwila antu amavulu nikudiwula yinjikijilu yinakumwekesha nawu tunakushakama mumafuku akukuminina, twatela ‘kutalilaña nankashi ifuku daYehova dinakwinza.’ A Yinsahu jaYehova anateli kuyileja nsañu yamuBayibolu yikuyikwasha kulonda mukapuluka hanidi ifuku dinakwinza.

MWATIYAÑA ñahi neyi mutoñojoka hakushinakaja? Antu amavulu akamaña chikupu nikutiya woma. Akamaña muloña wayuma yenzaña neyi muntu nakuli, chidi neyi kumwekana kukota, mujimba kuzeya, kavulamena nikukatakata.

Hela chochu, antu ambuka chikupu chashinakajañawu. Amakwawu ekalaña akola kumujimba, nawa avulamenaña wanyi hela chakwila anakoti. Yitumbu yinakutuñawu yinakukwashaku antu amakwawu kubula kukatakata. Chumichi chinakuleñela antu mumatuña amakwawu kushakama yaaka yayivulu nawa akola kumujimba.

Ilaña, antu amavulu akeñaña kwikala namuzañalu neyi anashinakaji, hela chakwila anakumona kukala kwenzaña neyi muntu nashinakaji. Yumanyi yimwatela kwila kulonda mwikali namuzañalu? Hakwila mwikali namuzañalu mwatela kwiteja nenu munashinakaji. Hakwila twili mweni, tushinshikenu hanshimbi jamuBayibolu jinateli kutukwasha.

IKALENU ADIZOZA: “Kudi akwakudizoza kwokwekala maana.” (Yishimu 11:2) Muniyi nsona, “akwakudizoza” anateli kutalisha kudi atushinakaji etejaña nawu anashinakaji dehi nawa kwila azata nyidimu yazatileñawu hiyadiña akwenzi nehi. A Charles adi nayaaka 93, ashakamaña kuBrazil, ahosheli nawu: “Neyi wushakama yaaka yayivulu, watela kushinakaja. Hiwunateli kufunta kuwukwenzuku.”

Dichi kwikala adizoza, hikwatalisha mukwila nawu mwatela kuhoshaña nenu “nashinakaji dehi, nawa kwosi chuma chinnateli kwila.” Kwikala nayitoñojoka yamuchidiwu kunateli kuleñela muntu kubula kwikala namuzañalu. Yishimu 24:10 yahosha nawu, “Neyi wakazeya hefuku dakala ñovu jeyi jakeha.” Ilaña, muntu wadizoza wamwekeshaña maana, nawa wazataña kwesekeja nahanakumini nañovu jindi.

A Corrado adi nayaaka 77, akuItaly, ahosheli nawu: “Neyi munakukanduka namotoka, mukuhimpaña hohu magiya nawa bayi mujima motokaku.” Mwalala, muntu neyi nakuli watela kuhimpa munzatilu. A Corrado nawañodawu ahimpa chakuzataña nyidimu yahetala kulonda ekaleñaku nampinji yakunooka, abuleña kuzeya nankashi hanyima yakuzata nyidimu yejima. A Marian adi nayaaka 81, akuBrazil, ahimpa yitoñojoka yawu kutalisha hakushinakaja. Ahosheli nawu, “Nadizi chakuzata nyidimu, nanookañaku