Wanta Wanzambi—Hinfulumendi Yakadi Majika Kanwa

Neyi antu anakwila majika kanwa, mukwiteja nenu antu adi munfulumendi yejima atela kwila majika kanwa, netu? Neyi dimu, dikwila nawu nfulumendi yakadi majika kanwa yakafuma kudi antu wanyi. Bayibolu yahosha nawu nfulumendi yeniyi, hiWanta waNzambi, nfulumendi yalejeliyi Yesu atumbanji twindi kulomba.—Matewu 6:9, 10.

Wanta waNzambi hinfulumendi yalala yinakuyuula mwiwulu. Yikafumishahu nfulumendi jawantu jejima. (Masamu 2:8 9; Chimwekeshu 16:14; 19:19-21) Wanta wakakoñela antu yuma yayivulu nawa wukafumishahu nfulumendi yamajika kanwa. Shinshikenu hayuma 6 yaWanta yinakumwekesha nawu chumichi chakamwekana.

1. ÑOVU

KUKALA: Nfulumendi yawantu yatambulaña mali kudi antu jawu munyisonku nimunyombu. Njila mwatambwilañawu mali yaleteshaña anlomboli amakwawu kwiya, amakwawu atambulaña maseleka kudi antu anakukeña kuyifumishilaku nyisonku hela mali amakwawu ahanañawu kunfulumendi. Chumichi chaletaña kukala, nfulumendi yikunuñaku nyisonku kulonda yisinsishumu mali analuwankani nawa majika kanwa akuswejelaku. Munfulumendi yamuchidiwu, antu ashinshika akuyandilamu.

CHAKUMANISHA KUKALA: Ñovu yaWanta waNzambi yafumaña kudi Yehovaa Nzambi watwesha yejima. (Chimwekeshu 11:15) Hiwatambulaña nyisonku hakwila nawu wutwalekuhu kuyuulaku. Ilaña, Nzambi wukweti ‘ñovu yabadika’ nawa wahanaña, wakayinka antu akayuulañawu muniwu Wanta yuma yakeñañawu.—Isaya 40:26; Masamu 145:16.

2. NYUULI

KUKALA: Susan Rose-Ackerman ashimunawu muchibaba chinafumuhu wahosheli nindi, “nfulumendi yatela kuleka majika kanwa” hakwila nawu amani. Nfulumendi ayidiwulaña neyi yinakuleja atupokola niantu adi hayifulu yanyanya kuleka majika kanwa henohu antu adi hayifulu yamaneni anakwila majika kanwa. Ninyuuli alemeshawu kudi antu wawanina wanyi. Neyi chahosha Bayibolu nawu, ‘hamaseki hihekala muntu waloña welaña chachiwahuku.’—Mukwakutaŋisha 7:20.

CHAKUMANISHA KUKALA: Kwambukaku nawantu abula kuloña, Yesu Kristu atondawu kudi Nzambi kwikala Nyuuli waWanta helaña chuma chatamaku. Yesu wamwekesheli chumichi hampinji yakaaniniyi maseleka, dikwila nawu “mawanta ampata yamunu mwishina ejima, nikulema kwawu.” Yesu amulejeli nawu akumwinka awa mawanta neyi yodifukula kudi nyuuli wamukaayi, Diyabolu. (Matewu 4:8-10; Yowanu 14:30) Nihampinji yamukabishileñawu nakumujaha, Yesu watwalekeluhu kwikala washinshika chakwila wakaanini kunwa walwa wabatuka wadi kuwundisha kukata ilaña wadi kumushetesha. (Matewu 27:34) Yesu chamusañwiluwu kudi Nzambi wayili mwiwulu, chumichi chamwekeshaña nawu washikahu kuyuula muWanta.—Afwilipi 2:8-11.

3. KUHIMPA CHIYUULU

KUKALA: Mumatuña amavulu antu avotaña mpinji yejima, akeñaña nawu afumishuhu anlomboli amajika kanwa hayifulu. Kuhosha hohu chalala, makampeni nikuvota kwaleñelaña kwila majika kanwa, nimumatuña mwekala maheta. Kuhitila muyawana yahanañawu hampinji yakampeni niyuma yikwawu, muntu waheta nateli kukokola anlomboli adihu hanoyu mpinji niakahiñahu.

Ñaji Paul Stevens wamuChota Chanyiloña Cheneni chamu U.S. wasonekeli nindi, ikoku damuchidiwu “hidafumpaña nshimbi ninjila mwayuulilaña Nfulumendi hohuku ilaña nikashinshi kawantu kamanaña.” Dihafuma antu amavulu mukaayi kejima kwiluka nawu nyitayi yajipolitiki diyi yasweja majika kanwa.

CHAKUMANISHA KUKALA: Wanta waNzambi wukafumishahu kampeni nimajika kanwa nawa wukatwalekahu kuyuula haya nyaka. (Danyeli 7:13, 14) Chineli Nyuuli amutonda kudi Nzambi, Wanta hiwashindamena hamavoti awantuku nawa hiyakawufumishahu kudantuku. Chineli iwu Wanta wahaya nyaka, wukakoña yuma yikakwasha antu haya nyaka.

4. NSHIMBI

KUKALA: Hakusambila, antu atoñojokaña nawu kutuña nshimbi jajiha kukuwahisha yuma. Hela chochu, ankuluñaña ahoshaña nawu kuvulisha nshimbi kwakojejaña hohu majika kanwa. Kubombelahu, hela chakwila azatishaña mali amavulu hakutuña nshimbi yakumanisha majika kanwa, hiyazatikañaku.

CHAKUMANISHA KUKALA: Nshimbi jaWanta waNzambi jabadika chikupu janfulumendi jawantu. Chakutalilahu, chatela yashimuni nshimbi jajivulu, Yesu waheni lushimbi lwatenañawu nawu Lushimbi Lwalema. Wahosheli nindi: “Dichi yejima yimunakeñi antu kuyililenu, ninenu nawa yililenu mwomumu.” (Matewu 7:12) Sweje-e, iyi nshimbi yaWanta yahosha hayuma yasañumunaña kwila chuma. Yesu wahosheli nindi, “Keñaku mukwenu neyi chiwadikeña eyi aweni.” (Matewu 22:39) Chineli Nzambi welukaña jidi kumuchima wamuntu, mwamweni diyi wahanaña iyi nshimbi.—1 Samweli 16:7.

5. YILILU

KUKALA: Yililu yakojejaña majika kanwa hilwisu nikudikeña. Anlomboli amunfulumendi niantu amwekeshaña yililu yamuchidiwu. Hakwila nawu itala dakuhembela yuma diyashimunawu muchibaba chinafumuhu damuSeoul dihumukeña, anlomboli amunfulumendi atambwili maseleka kudi akwakutuña elukili nawu neyi ahana maseleka, akuzatisha mali antesha kubadika kulanda yuma yakola yakutuña nachu.

Hakwila nawu majika kanwa amani, antu atela kuyidizisha chakuleka yililu yidi neyi lwisu nikudikeña. Dichi, nfulumendi yawantu yidana wuswa niñovu yakudizisha antu chakuleka iyi yililu.

ZATENUÑA HAKUMINA ÑOVU YENU

Bayibolu yahosha hadi muntu “wadikitaña nyidimu yindi” nihadi mumbanda “wakalakalaña nyidimu namakasindi.” (Yishimu 22:29; 31:13) Hela chochu, kuzata nañovu hikwenzaña nañomaku. Antu antesha diwu akeña kuzata nyidimu yabula kwilukawu. Hadaha dichaleñelaña antu amavulu kubula kuzata nyidimu, muloña azataña wanyi nañovu kulonda eluki.

Chakadi nikujina, muntu nateli kwiluka kuzata mudimu wudi wejima neyi nakuzata namuchima wumu, dikwila nawu kushaku kashinshi kulonda yawiluki. William wudi nayaaka 24 wahosheli nindi, “Neyi muzata hakumina ñovu yenu nawa mumona yuma yinafumimu, mukutiya kuwaha. Himukutoñojokaña kuzatisha tunjila twanyiketu hakuzata hela kuzata hohu chanteshaku.”

TOÑOJOKENUÑA MUDIMU WENU CHIWAHETESHAÑA AKWENU

Bayi mutoñojokaña hohu hamali imunakutambulaku. Ilaña dihulenu nenu: ‘Muloñadi chinakuzatila iwu mudimu? Chumanyi chadi kumwekana neyi nabulaña kuzata iwu mudimu hela neyi nabula kuwuzata chiwahi? Indi akwetu ahetelañamu ñahi mumudimu wunazataña?’

Munateli kutoñojoka halwihu lwakukumishaku muloña mukutiya kuwaha neyi mwiluka mudimu wenu chiwunakuhetesha antu amakwawu. Yesu wahosheli nindi: ‘Mukuhana mwekala muzañalu weneni kubadika wekala mukutambwila.’ (Yililu 20:35) Kudi antu amakwawu ahetelaña munyidimu yitwazataña bayi neyi akwakulanda niakanyidimu hohuku. Awa antu hiyantu amuchisaka niantu anakaankili.

Antu amuchisaka. Neyi mutu wachisaka yazata nañovu kukeñela chisaka chindi yuma yinakukeñawu, wayikwashaña munjila jiyedi. Chatachi, wayikeñelaña yuma yatela kuyikwasha kumujimba yidi neyi yakudya, yakuvwala nimwakukama. Wazataña mudimu wamwinkawu kudi Nzambi ‘wakukwasha ayindi.’ (1 Timotewu 5:8) Chamuchiyedi, muntu ashindamenawu muchisaka wadizishaña akwawu chakuzata nañovu kuhitila muyuma yelañayi. Shane itwashimuna muchibaaba chinafumuhu wahosheli nindi, “Nzatilu yawatata yatwinkaña chakutalilahu chachiwahi. Ashinshika muloña anazati nañovu muchihandilu chawu, sweje-e mudimu wakusoña. Nyidimu yazatañawu, yinandizishi nawu nyidimu yamakasa yalema nankashi, kutuña yuma yatela kukwasha antu.”

Antu anakaankili. Kapostolu Pawulu wayilejeli akwaKristu ‘kukalakala nyidimu . . . kulonda aheti yuma yakuyinka akwawu anabuli.’ (Aefwesesa 4:28) Dichi neyi tukuzata nañovu nakudikeñela etu aweni nichisaka chetu yuma yakumujimba, tunateli kukwashaku niantu anakaankili. (Yishimu 3:27) Dichi neyi tukuzataña nañovu chikutukwasha kwikala namuzañalu wafumaña mukuhana.

ZATENU NAKUBADIKISHA

Mumpanji yindi yaya mpuhu yaHampidi, Yesu wahosheli nindi: “Muntu wukukukakela nindi wuyi nindi mpata yimu, yaku nindi nijiyedi nawa.” (Matewu 5:41) Munateli kuzatisha ñahi ilu lushimbi ludi haniyi nsona munyidimu yenu? Chatela muzateña hohu chantesha, wanenu njila yakuzatilamu nakubadikisha. Imikenu yikonkwanyi, ikalenu namuchima wakuzata mudimu wenu chiwahi nawa mukunyakashana. Zañalalenuña nimutunyidimu twanyanya tumwazataña.

Neyi muzata nakubadikisha, dikwila nawu mukuzañalalaña namudimu wenu. Muloñadi? Muloña enu aweni muneluki chakuzata. Mukuzataña nañovu muloña dichimunakukeña bayi neyi anakuyikanjikijaku. (Fwilemoni 14) Neyi tuzata muniyi njila, tukwanuka lushimbi lwekala haYishimu 12:24: “Chikasa chamukwakudikita nyidimu chochamba kayuulaña akwawu, ilaña mukwakukatala amba kamwesekela yikwonkwanyi.” Mwamweni, antu antesha hohu diwu ekala muwuduñu hela enkañawu yikwonkwanyi. Hela chochu, muntu wazataña chantesha hohu watiyaña neyi wudi muwuduñu, muloña amukanjikijaña kudi akwawu mpinji yejima. Ilaña muntu wazataña nakubadikisha hamuloña wakwila dichinakukeñayi wekalaña wamuzañalu muwumi windi. Watwalekañahu kuzata chiwahi nyidimu yindi.

ZATENUÑA NYIMUDIMU NAKWESEKEJA

Kuzata nañovu kwakuwahi, hela chochu twatela kwanuka netu kudi yuma yayivulu yakeñekaña kubadika mudimu. Bayibolu yatulejaña kudikita nañovu. (Yishimu 13:4) Ilaña hiyashimuna nawu twiñiji mutu munyidimuku. Nsona yaMukwakutaŋisha 4:6 yahosha nawu, “Chakudya chamuchikasa chimu chakudya mumesu mwawunda, chinabadiki chamumakasa ayedi chakudya nakukabakana nakukabila tuhu mpepela.” Munjilanyi? Muntu weñija mutu munyidimu hanateli kudiluñisha nyikabu yakumakasinduku neyi nyidimu yindi yimumanishilaña mpinji niñovu. Dikwila nawu, mudimu windi wukwikala neyi “nakukabila tuhu mpepela.”

Bayibolu yinateli kutukwasha kuzata nyidimu nakwesekeja. Hela chakwila yahosha nawu twatela kuzata nañovu nyidimu yetu, yatulejaña cheñi ‘kushinshika yuma yabadika kulema.’ (Afwilipi 1:10) Yumanyi yabadika kulema? Kwikala nampinji yakuhanjeka nachisaka nimabwambu yekala hakachi kayuma yeniyi. Ilaña yuma yasweja kulema hinyidimu yakuspiritu yidi neyi kutaña Izu daNzambi nikutoñojokahu chikupu.

Antu elaña mwenimu azañalalaña nanyidimu yawu. William ashimunawu wahosheli nindi, “Muntu wumu hakachi kawantu añiñijili mudimu wazataña nyidimu nakwesekeja. Wazataña nañovu, nawa watiyañanaña nawakwakulanda muloña wakuzata chiwahi. Chafumayi kumudimu, hatoñojokaña hamudimu winduku ilaña washaña muchima hachisaka chindi nikudifukula. Chumichi chamuleñela kwikala namuzañalu.”