Wanta Chiwunakushinda—Twalwishaña Kulonda Nfulumendi Yitwiteji Kutandisha Nsañu Yayiwahi Mukukasunuka

HAMPINJI yimunakushimwina kwitala nikwitala, mutiya nisayirini yinakuvumina kwakulehi. Hiyikutiyakena mwakamwihi. Nenu mutachikeña kuhanjeka namwiniitala mukwawu, mukwenu imunakushimwina nindi naluwankani muloña wamotoka yawakapokola yinemani. Kapokola hakufuma mumotoka nakuyihula nindi: “Enu yenu munakuhita kwitala nikwitala nakuhanjeka nsañu yamuBayibolu? Antuñi nenu anakwaba.” Munakwakula nakalemesha hakudilumbulula nenu mudi aYinsahu jaYehova. Chumanyi chikumwekana?

Chuma chikuyimwekena chikushindamena hachayilawu ayinsahu kunyaka. Indi nfulumendi yineli ñahi nawaYinsahu jaYehova mwiluña dimwashakamaña, hayaaka yinahitihu? Komana nfulumendi yayiteja kwikala akasunuka? Neyi chidi mwenimu, dikwila nawu amanakwenu niahela akuspiritu azatilili nañovu hayaaka yayivulu kulonda ‘kuhakwilaku nikukolesha nsañu yayiwahi kwesekeja nanshimbi.’ (Fwi. 1:7) Kwejima kumwashakamaña, neyi mutoñojokaña chikupu hanyiloña yashindawu aYinsahu jaYehova, chikuhwelelu chenu chikwikala chakola. Munichi chibalu, tukuhanjeka hanyiloña yikwawu yakuhayamisha yashindawu. Nyiloña yitwashinda yamwekeshaña nawu Wanta walala, muloña hitwadikushinda iyi nyiloña yamuchidiwu muñovu jetwetu aweniku.