Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
FEBRUARY 4-10
YUMA YALEMA YAMWIZU DANZAMBI | AROMA 1-3
“Twalekenuhu Kudizisha Chinleji Chenu”
(Aroma 2:14, 15) Muloña neyi antu akunyuza, abula nshimbi, akoñaña yuma kwesekeja nanshimbi, awa antu, hela chakwila hiyakweti nshimbiku, akweti nshimbi munyichima yawu. 15 Diwu amwekeshaña nawu nsañu yidi munshimbi ayisoneka munyichima yawu, iku yinleji yawu yanyichima yinakuyisompesha, nawa yitoñojoka yawu yayinkaña nyiloña hela kuyiyiñisha.
Munateli Kwikala Ñahi naChinleji chaMuchima Chachiwahi?
Komana ichi chawaana chachinleji chekala nawambuña aYehova hohu? Toñojokenu hamazu akapostolu Pawulu onenewa akwila nawu: “Hela aJentili abula nshimbi, chakwilawu yuma yekala kunshimbi mwaya chisemwa chawu, wenawa abula nshimbi anadilili dehi lushimbi awenawu; amwekeshaña nachu nyidimu yanshimbi jakusoneka dehi munyichima yawu, chinleji chawu chamuchima hichikwikala chinsahu, niyitoñojoka yawu hiyikuya ninimu ninimu, hekwawu kuyitanyisha, hekwawu kuyiyiñisha.” (Aroma 2:14, 15) Hela tuhu antu abula kwiluka chikupu nshimbi yaYehova, mpinji yikwawu chinleji chawu chinateli kuyileñela kuzata kwesekeja nanshimbi jaNzambi.
(Aroma 2:15) Diwu amwekeshaña nawu nsañu yidi munshimbi ayisoneka munyichima yawu, iku yinleji yawu yanyichima yinakuyisompesha, nawa yitoñojoka yawu yayinkaña nyiloña hela kuyiyiñisha.
Munateli Kwikala Ñahi naChinleji chaMuchima Chachiwahi?
Munateli kufuukula ñahi kushindamena hachinleji? Chamwekana neyi antu amakwawu asandujolaña hohu hayitoñojoka yawu nakufuukula mwakwilila. Nkumininaku ahoshaña nawu, “Muchima wami wutooka to-o.” Yuma yafwilaña muchima yinateli kuleta ikoku chikupu, nawa yinateli kuluwañesha chinleji. Bayibolu yahosha nawu: “Muchima wasweja kudimbana, wadimbana chakubadika yuma yejima, wasweja nikukata, wukutwesha kuwiluka hinyi?” (Yeremiya 17:9) Komana bayi tusweja kulemesha yuma yakeñaña muchima wetuku. Ilaña twatela kusambila kushinshika hayuma yamuzañaleshaña Yehova Nzambi.
Neyi tuzatisha chinleji chakufumba hakufuukula, chikumwekesha nawu twamwakamaña Nzambi, bayi yuma yitwakeñañaku. Toñojokenu hachakutalilahu chatelela. Nguvulu wakashinshi Nehemiya wadiña nawuswa wakulomba wufwetu ninyisonku kudi antu amuYerusalema. Ilaña helili mwenimuku. Muloñadi? Waheleli yitoñojoka yayeni yakumuhilisha Yehova kuhitila mukukabisha antu jaNzambi. Wahosheli nindi: “Ami kwami kwila mwenomu nehi, muloña wakumutiya Nzambi woma.” (Nehemiya 5:15) Dichi chachiwahi kumwakama Nzambi chikupu, nikwikala nawoma wakubula kumuneñesha Tata yetu wamwiwulu namuchima wejima. Woma wamuchidiwu wukutuleñela kukeña Izu daNzambi ditulomboleña neyi hitukufuukula hachuma.
Kukeña Yuma Yalema yakuSpiritu
(Aroma 3:4) Inehi! Hela chakwila antu ejima anateli kwikala namakudi, Nzambi yekali walala, neyi chochasonekawu nawu: “Kulonda akumoni nawu waloña kuhitila mumazu eyi nawa abuli kukufwisha namuloña hampinji yinakukusompeshawu.”
Yikuma Yamaneni Kufuma Mumukanda waAroma
3:4. Neyi mazu awantu azuñañesha yuma yahoshayi Nzambi Mwizu dindi, achina “Nzambi ekali walala” kuhitila mukukuhwelela nsañu yekala muBayibolu nikwila yuma kwesekeja nachakeñañayi Nzambi. Neyi tushimwinaña mumudimu waWanta nikwilisha atumbanji neyena, tukukwashaku antu kwiluka nawu Nzambi walala.
(Aroma 3:24, 25) nawa hakuyitena nawu aloña hichawaana hohu muloña waluwi lwindi lwasweja kuhitila mwifutu danyiloña dahaniniyi Kristu Yesu. 25 Nzambi wamuhanini kwikala mulambu wefutu dakubuta hanshidi yawantu akuhwelelaña mumashi indi. Welili chumichi kulonda yamwekeshi kuloña kwindi, muloña Nzambi mukudiwunjika kwindi, wanakeneneña nshidi yavulumwiniwu kushankulu.
Yikuma Yamaneni Kufuma Mumukanda waAroma
3:24, 25—Indi ‘kukuula kwekala mudi Kristu Yesu’ kunateli kubuta ñahi “nyiloña yavulumwinuwu dehi chachikulu” henohu mulambu kanda awuhani? Wuprofwetu watachi wahosha hadi Mesiya, wasonekawu haKutachika 3:15, washikijeweli mu 33 C.E. hampinji yamujahiluwu Yesu hamutondu wakuyandishila. (Aŋalija 3:13, 16) Hampinji yashimwiniyi Yehova iwu wuprofwetu wakuhana mulambu wefutu danyiloña, kudi yena wadiña neyi awuhana dehi, muloña kwosi chuma chatela kumukañesha Nzambi kushikija chuma chafuukulayi. Dichi kushindamena hamulambu waYesu Kristu wadiña kanda awuhani, Yehova wakanakena nshidi yanyana kaAdama akakuhwelela munichi chikaninu. Cheñi nawa ifutu danyiloña denzununa njila yakusañuka kwawantu adiñaku henohu akwaKristu kanda ekaluku.—Yililu 24:15.
Kutaña Bayibolu
(Aroma 1:1-17) Ami Pawulu, nduñu yaKristu Yesu, ami atambikawu kwikala kapostolu nawa atondawu kulonda nishimwini nsañu yayiwahi yaNzambi, nayisonekeli 2 nsañu yayiwahi yakaniniyi Nzambi muNsona kuhitila mudi atuprofwetu indi. 3 Nsañu yayiwahi yahosha hadi Mwanindi, owu wavwalikili mumujimba wawuntu kufuma mudi anyana kaDavidi. 4 Ilaña muloña wañovu yaspiritu yajila, amuteneni nawu Mwana kaNzambi chamusañwiliwu kufuma mudi afu, chalala diyi Yesu Kristu Mwanta wetu. 5 Kuhitila mudi yena, atumwekesheleli luwi lwasweja nikutwinka mudimu wawupostolu nankeñelu yakwila nawu akwanyuza yejima amwovwahileña hakwikala nachikuhwelelu muloña wejina dindi, 6 ninenu mudi mukachi kanawa akwanyuza yejima nawa Nzambi wayitambikili ninenu nawa kulonda mwiikali antu jaYesu Kristu, 7 kudi enu ejima mudi muRoma akeñawu kudi Nzambi, enu atenañawu kwikala ajila: Luwi lwasweja nikuwunda jafumaña kudi Tata yetu Nzambi nikudi Mwanta Yesu Kristu jiikali nanenu. 8 Chatachi, inakumusakilila Nzambi yami kuhitila mudi Yesu Kristu kutalisha hadi enu ejima, muloña chikuhwelelu chenu anakuchihoshahu mwahita kaayi kejima. 9 Muloña Nzambi inakalakelaña mudimu wajila namuchima wami wejima hakushimwina nsañu yayiwahi yahosha hadi Mwanindi, diyi chinsahu chami weluka nindi mpinji yejima nayitenaña enu mukulomba kwami chakadi kuleka, 10 nakulembelela nami, neyi yuma yenda chiwahi, nakenza kudi enu neyi dichidi nkeñelu yaNzambi. 11 Muloña inakufwila chikupu kuyimona, nakayinki yawaana yakuspiritu kulonda mwakakoli mbe-e; 12 hela nami twakadikoleshi, muntu-himuntu nachikuhwelelu chamukwawu, dikwila nawu chenwenu nichamami. 13 Ilaña enu anakwami inakukeña mwiluki nenu, kakavulu nafwilaña kwinza kudi enu, ilaña ankañeshaña kushika nikulelu kulonda mukachi kenu nimwena nakawanimu nyikabu neyi yidi dehi nawakwanyuza amakwawu. 14 Ami nidi namukudi kudi aGiriki nikudi añiinza, kudi akwamaana nikudi abula maana; 15 dichi inakufwila kwinza nakushimwina nsañu yayiwahi nikudi enu mudi muRoma nawa. 16 Muloña ami hinnakutiya nsonyi nansañu yayiwahiku; kafwampi, hiñovu yaNzambi yakwamwina nachu muntu wejima wukweti chikuhwelelu, kutachikila kudi kaYudeya kushika nikudi kaGiriki. 17 Muloña kuloña kwaNzambi kunakusolokela kuhitila munsañu yayiwahi nawa antu akweti chikuhwelelu amonaña chumichi, nawa chakoleshaña chikuhwelelu chawu, neyi chochasonekawu nawu: “Ilaña muntu waloña wakahanda muloña wachikuhwelelu.”
FEBRUARY 11-17
YUMA YALEMA YAMWIZU DANZAMBI | AROMA 4-6
“Nzambi Watumwekeshelaña Kukeña Kwindi”
(Aroma 5:8) Ilaña Nzambi wamwekesheli luwi lwindi hadi etu, muloña hampinji yitwadiña akwanshidi, Kristu watufwilili.
(Aroma 5:12) Dichi, neyi chocheñilili nshidi mukaayi kuhitila mudi muntu wumu, nikufwa nikwena kwenjili kuhitila munshidi, dichi kufwa kwataandili kudi antu ejima muloña wejima wawu avulumwini.
Nzambi Watumwekeshelaña Kukeña Kwindi
Pawulu walumbulwili ichi chikuma, hakutachika nachikuma chakwila nindi: “Kudi iyala wumu nshidi yeñilili mumpata yamunu mwishina, ninshidi yaleteli kufwa; chochenochu nawa nikufwa kwashikeneni antu ejima, muloña wejima wawu avulumwini.” (Rom. 5:12) Tuneluki iyi nsañu muloña Nzambi wasonekeli nsañu yashimunaña chatachikili chihandilu chawantu. Yehova waleñeli antu ayedi, Adama naEvu. Nleñi waloña, niantu atachi ankakulula jetu aleñeliyi adiña aloña. Nzambi wayinkeli lushimbi lumu nawa wayilejeli nindi neyi alufumpa akafwa. (Kutach. 2:17) Hela chochu, atondeluhu kwila yuma yatama, afumpili lushimbi lwaNzambi lwayilejeliyi, dichi amukaanini Nzambi Mukwakuhana nshimbi nawa Mwanta.—Kuhit. 32:4, 5.
(Aroma 5:13, 14) Muloña nshidi yadiña mukaayi henohu Nshimbi kanda yiikaliku, ilaña kwosi muntu enkañawu muloña wanshidi hakadi nshimbiku. 14 Hela chochu, kufwa kwayuulili neyi mwanta kutachikila kudi Adama nakushika kudi Mosi, kushilahu niantu abulili kuvulumuna neyi chavulumwiniyi Adama, chinfwana chanowu wadiña nakwinza.
Nzambi Watumwekeshelaña Kukeña Kwindi
Adama wavwalili anyana chelili nekali dehi mukwanshidi, nawa anyanindi ejima aswanini nshidi niyuma yatama yafumaña munshidi. Hela chochu, hidiwu afumpili lushimbi lwahaniniyi Nzambuku, Adama diyi wafumpili, dichi anyana kaAdama hiyayinkeli muloña wowumu wanshidiku; nawa adiña kanda ayinki nshimbi yakulondela. (Kutach. 2:17) Chochimu, anyana kaAdama aswanini nshidi. Dichi, nshidi nikufwa kwatwalekeluhu kushika nimpinji yayinkeluwu aIsarela nshimbi yakulondela kudi Nzambi, yamwekesheli chikupu nawu hiyakwanshidi. (Tañenu Aroma 5:13, 14.) Yuma yatama yafuma kunshidi tunateli kuyilumbulula kuhitila muchakutalilahu chanyisoñu yitwasambulaña kudi anvwali. Hela chakwila anyana amakwawu muchisaka asambulaña musoñu kudi anvwali jawu, bayi neyi anyana ejima awusambulañaku. Ilaña hadi chaambu nanshidi. Wejima wetu twaswana nshidi kufuma kudi Adama, muloña wakusambula nshidi dichitwafwilaña wejima wetu. Komana iku kukala kwamba kamana?
(Aroma 5:18) Dichi, neyi chochayifwishiliwu antu ejima namuloña kuhitila munshidi yakoñeli muntu wumu, munjila yoyimu, kuhitila mumudimu wumu waloña, antu ejima ayitenaña nawu aloña kulonda akekali nawumi.
(Aroma 5:21) Muloñadi? Kulonda neyi chochayuulili nshidi neyi mwanta hamu nakufwa, munjila yoyimu, niluwi lwasweja lunakuyuula neyi mwanta mukuloña kunakulombola antu kuwumi wahaya nyaaka mudi Mwanta wetu Yesu Kristu.
Nzambi Watumwekeshelaña Kukeña Kwindi
Indi mazu achiGriki akwila nawu “kulonda kubalumuna antu ekali aloña” ‘nikuleta kuloña kudantu’ atalisha mudihi? Mukwakubalumuna Bayibolu wumu wasonekeli haniyi nsañu nindi: “Awa mazu adi neyi azatishañawu muchota chanyiloña. Anakushimuna muntu chahimpañayi hakwila yekali nawubwambu naNzambi, bayi kuhimpa kwamumuchima wamuntuku . . . Awa mazu anakumwekesha nawu Nzambi hinsompeshi wunahakwiluku muntu wunatwikuwu muloña, analetuwu muchota kumesu aNzambi, kulonda amusompeshi hamuloña wakubula kuloña. Ilaña Nzambi hakumumbaku samuloña.”
Indi “Mukwakusompesha iseki dejima” waloña wamumbiluku muntu wabula kuloña kushindamena hachumanyi? (Kutach. 18:25) Njila yalema yatachi yazatishiliyi Nzambi, watemesheli Mwanindi wumu hohu kwinza heseki hamuloña wakukeña. Yesu wakoñeli chikupu mwaya kukeña kwaTata yindi, hela chakwila wahitili mukweseka, amusekesheli chikupu, nikumuyandisha. Watwalekeluhu kwikala washinshika nihampinji yafwiliyi hamutondu wakuyandishila. (Heb. 2:10) Chalambwiliyi wumi windi hamu neyi muntu wawanina, Yesu wahanini ifutu danyiloña kulonda kukuula, hela kulubula, anyana kaAdama kunshidi nikukufwa.—Mat. 20:28; Rom. 5:6-8.
Kukeña Yuma Yalema yakuSpiritu
(Aroma 6:3-5) Hela, komana himweluka nenu wejima wetu apapatishiliwu mudi Kristu Yesu, atupapatishili mukufwa kwindiku, tahindi? 4 Dichi, atujiikili hamu nindi kuhitila muchipapatishu chetu mukufwa kwindi, kulonda neyi chamusañwiliwu Kristu kufuma mudi afu mukulema kwaTata yindi, ninetu nawa twatela kuhanda chihandilu chachiha. 5 Neyi tunafwi neyi chafwiliyi yena, chakadi nikujina, akatusañula neyi chamusañwiliwu yena nawa kuhitila muniji njila, tunadinuñi hamu nayena.
Yikuma Yamaneni Kufuma Mumukanda waAroma
6:3-5Indi kupapatisha mudi Kristu Yesu nikupapatisha mukufwa kwindi kwatalisha mudihi? Yehova chawayishayi atumbanji twaKristu naspiritu yajila, ekalaña mpanda yimu naYesu nawa ekalaña antu amuchipompelu chawakwaKristu awayishewa, mujimba waKristu, yena diyi Mutu. (1 Akorinda 12:12, 13, 27; Akolose 1:18) Ichi dichalumbuluka kupapatisha mudi Kristu Yesu. Cheñi akwaKristu awayishewa ‘ayipapatisha mukufwa [kwaKristu’] munjila yakwila nshakaminu yawu yekala yakudihana nawa akaana kuchiñeja kwawumi wahaya nyaka heseki. Cheñi, kufwa kwawu kwekala kwakudihana, neyi chadiña kufwa kwaYesu, hela chakwila kufwa kwawu hikwabombelamu ifutu danyiloñaku. Kupapatishewa mukufwa kwaKristu kwamanaña neyi afwa nawa ayisañula nawumi wakwiwulu.
(Aroma 6:7) Muloña muntu wunafwi, nasubuki dehi kunshidi jindi.
Komana Ankakulula Jami Akasañuka?
Neyi antu abula kuloña anayisañuli dehi, komana akayisompesha hanyiloña yawu yakoñeluwu kunyima? Inehi. Aroma 6:7 yahosha nawu: ‘Muntu neyi nafwi nayiñi dehi, nshidi yinamani dehi.’ Antu abula kuloña chafwawu dikwila nawu anayiñi dehi kunshidi jawu. Dichi, akayisompeshela hayuma yikakoñawu neyi anayisañuli dehi, bayi hayuma yeliluwu kunyima henohu kanda eluki chalalaku. Akahetelamu ñahi?
Kutaña Bayibolu
(Aroma 4:1-15) Chineli chidi mwenimu, hanu dinu tukuhosha netu yumanyi yahetelelimu nkakulula yetu Abarahama kumujimba? 2 Chakutalilahu, neyi Abarahama amuteneni nawu waloña muloña wanyidimu yindi, wadi kwikala nahakudisambila, ilaña bayi neyi kumesu aNzambiku. 3 Komana nsona yahosha nawudi? “Abarahama wamukuhweleleli Yehova nawa amuteneni nawu waloña.” 4 Muntu wazataña mudimu, nfwetu yamwinkañawu hiyayitenaña nawu luwi lwaswejaku, ilaña himukudi wuyatela kumufwetawu. 5 Hakwila muntu wabulaña kuzata ilaña wakuhwelela Owu watenaña antu abulaña kumwakama Nzambi nindi aloña, chikuhwelelu chindi dichamuleñelaña amumoneña nawu waloña. 6 Neyi chochahoshayi niDavidi hamuzañalu watiyañayi muntu atenañawu kuloña kudi Nzambi chakadi nyidimu nindi: 7 “Adi namuzañalu wowu antu ananakeniwu yiluwa yawu yakufumpa nshimbi nawa anabutiliwu dehi hanshidi jawu; 8 wudi namuzañalu yowu muntu owu Yehova akabula kwanukilayi nshidi jindi.” 9 Komana antu atiyaña iwu muzañalu chiña aalama hohu tahindi niantu abula kwalama? Muloña twahoshaña netu: “Abarahama amuteneni nawu waloña muloña wachikuhwelelu.” 10 Hanu dinu, munjilanyi mwamuteneneniwu nawu waloña? Hampinji yadiñayi waalama tahindi henohu wuchidi chidima? Hadiña waalamaku, ilaña wadiña chidima. 11 Nzambi wamulejeli Abarahama nindi yaalami. Ichi chadiña chinjikijilu chakumwekesha nawu wadiña waloña muloña wachikuhwelelu chadiñayi nachu hampinji yachidiñayi chidima. Dichi, wekalili tata yawantu ejima abula kwalama akweti chikuhwelelu kulonda ayiteni nawu aloña; 12 kulonda yekali tata yawanyana abula kwalama, bayi neyi kudi owu ovwahilaña hohu nshimbi yakwalamaku, ilaña nikudi antu endaña chaloña nakwimbujola chikuhwelelu chadiña natata yetu Abarahama hampinji yachidiñayi chidima. 13 Muloña Abarahama hela anyanindi hiyayikanini chikaninu chakuswana ituña kuhitila mukulondela nshimbiku, ilaña kuhitila mukuloña kwindi muloña wachikuhwelelu chadiñayi nachu. 14 Muloña neyi antu ovwahilaña nshimbi hiyanswana, dikwila nawu chikuhwelelu chikwikala chamukunkulwayi nawa chikaninu nichena chikwikala chamukunkulwayi. 15 Kuhosha hohu chalala, Nshimbi yaletaña kuzuwa kwaNzambi, ilaña hanabuli nshimbi, hekalaña kuluwañesha wanyi.
FEBRUARY 18-24
YUMA YALEMA YAMWIZU DANZAMBI | AROMA 7-8
“Komana ‘Mwatalilaña Chikupu’?”
(Aroma 8:19) Dichi, yileñaleña yinakutalila chikupu mpinji yikamwekeshawu anyana kaNzambi.
Mwitejenu Yehova Yayilomboli Kulonda Musubuki Chikupu
Hakuhosha hakusubuka kwakanayi Yehova ambuñindi hamaseki, Pawulu wasonekeli nindi: “Kuleña kwejima kwachiñililaña nakudihudika chamba kamwekana anyana kaNzambi.” Wabombeleluhu cheñi nindi: ‘Kuleña kwakweni kufumi muwuduñu wakutoka kwiñili mukusubuka kwalema kwawanyana kaNzambi.’ (Rom. 8:19-21) “Kuleña” kunatalishi kudi antu akweti kuchiñeja kwakushakama hamaseki, akahetela ‘mukumwekesha’ anyana kaNzambi awayishewa naspiritu. Akayimwekesha hampinji yakayisañulawu “anyana” kaNzambi nanyijimba yaspiritu kulonda akazatili hamu naKristu hakufumisha antu atama hamaseki nikwiñija ‘izaza deneni’ mwituña dadiha.—Chim. 7:9, 14.
(Aroma 8:20) Muloña yileñaleña ayibalumwini nakwikala yamukunkulwayi, bayi nankeñelu yayuku, ilaña kuhitila mudi owu wayibalumwini, muloña wakuchiñeja
Twatela Kuzañalala Nakuchiñeja Kwetu
“Kuchiñeja” kwamuchidi wawantu akuheni kudi Yehova hampinji yayikaniniyi nindi wakayipulwisha kudi “kapela mukulu,” Satana Diyabolu, kuhitila ‘mulubutu’ lwachikaninu. (Chim. 12:9; Kutach. 3:15) Yesu Kristu diyi wadiña ‘lubutu’ lwatachi. (Ŋal. 3:16) Kuhitila mukufwa nikusañuka kwindi, Yesu walili chikuku chakola chakuchiñeja kwamuchidi wamuntu nawa wakayikuula kunshidi nikufwa. Iku kuchiñeja kwendelaña hamu ‘nakumwekana kwanyana kaNzambi.’ Awayishewa alemeshawu diwu adi muchibalu chamuchiyedi ‘chalubutu.’ ‘Akayimwekesha’ nawu hiyanyanta hampinji yakamukwashawu Kristu kujilumuna ituña datama daSatana. (Chim. 2:26, 27) Chumichi chakaleñela anyikoku acheñi anafumi mulukadi lweneni kupuluka.—Chim. 7:9, 10, 14.
(Aroma 8:21) kwakwila nawu, yileñaleña niyena akayisubula kuwuduñu wakutoka nakwikala yasubuka mukulema kwawanyana kaNzambi.
Twatela Kuzañalala Nakuchiñeja Kwetu
‘Yileñaleña’ yawantu yakatiya kuwaha Muchiyuulu Chayaaka Ikombakaji chaKristu. Haniyi mpinji, “anyana kaNzambi” alemeshawu akayimwekesha chikupu hampinji yakekalawu naKristu neyi atupristu, nakukwasha antu kulonda akaheteli mwifutu damuloña damulambu waYesu. Chakatachika kuyuula Wanta waNzambi hamaseki, ‘yileñaleña’ yawantu yakakulika kuwuduñu wanshidi nikufwa. Mukuhita kwampinji, antu ovwahila ‘akafuma muwuduñu wakutoka.’ Neyi akatwalekahu kumwovwahila Yehova Muyaaka Ikombakaji nihampinji yakweseka kwakukumisha kwakekala kukumana kwayaaka ikombakaji, majinawu akayisoneka ‘mumukanda wawumi’ haya nyaka. Akeñila “muwaana wawanyana kaNzambi wowu waana walema.” (Chim. 20:7, 8, 11, 12) Eñañi, iku kuchiñeja kwalema nankashi!
Kukeña Yuma Yalema yakuSpiritu
(Aroma 8:6) Muloña kutoñojoka hayuma yakumujimba, kwatwalaña kukufwa, ilaña kutoñojoka hayuma yakuspiritu, kwatwalaña kuwumi nikukuwunda;
Munakwanuka?
Chambwinyi chidi ‘hakutoñojoka yuma yakumujimba’ ‘nakutoñojoka yuma yakuspiritu’? (Rom. 8:6)
Muntu watoñojokaña yuma yakumujimba washa chikupu maana kuyuma yafwilaña mujimba, watoñojokaña hohu nikuhosha yuma yakumujimba. Muntu watoñojokaña yuma yakuspiritu yena washa maana hadi Nzambi nawa yitoñojoka yanowu mukwaKristu ayiyuulaña kudi spiritu yajila. Yuma yakumujimba yatwalaña kukufwa, ilaña yuma yakuspiritu yatwalaña kuwumi nikukuwunda.—w16.12, mafu 15-17.
(Aroma 8:26, 27) Munjila yoyimu, spiritu niyena yatukwashaña mutwazeyazeyaña; muloña kukala kudi kwakwila nawu hitwelukaña chikupu yuma yitwatela kulombaku, ilaña spiritu yatulembelelañaku hampinji yitunakwaaba chakadi kuhosha. 27 Ilaña owu wasandujolaña munyichima weluka mwatalisha spiritu, muloña yinakulembelelaku akwakujila kwesekeja nankeñelu yaNzambi.
Indi Kulomba Kwenu Kwamwekeshañadi haWubwambu Wenu naYehova?
Mpinji jikwawu hitunateli kwiluka yuma yakulomba neyi tunakulomba kankawetuku. Pawulu wahosheli nindi: ‘Muloña hituneluki [kukala] kutwatela kulombaku, ilaña spiritu yajila yayeni yatulembelelaña nakwaba kwakweni kwakukañanya kushimuna. Niyena Nzambi washinshikaña munyichima yawantu, weluka chalumbuluka kulomba kwonenewa naspiritu.’ (Aroma 8:26, 27) Yehova waleñeleli kulomba kwashiyashana akwisoneki muBayibolu. Wetejaña kulomba kweniku kwonenewa wukwila neyi yetu tunakulomba nawa wakwakulaña. Nzambi watwiluka nawa weluka chalumbuluka yuma yasonekeli ansoneki aBayibolu kuhitila mudi spiritu yindi. Yehova wakulaña kulomba kwetu neyi spiritu ‘hiyikutulembelelaku.’ Ilaña neyi twiluka chikupu Izu daNzambi, tunateli kwiluka yuma yitwatela kulombaña.
Kutaña Bayibolu
(Aroma 7:13-25) Hanu dinu, komana chuma chachiwahi dichankojejeli kufwa tahindi? Inehi! Ilaña nshidi diyi kulonda yimwekeshi nawu diyinnakojeji kufwa kuhitila muyuma yayiwahi, kulonda nshidi yisweji chikupu kuhitila munshimbi. 14 Muloña tweluka netu Nshimbi jekala jakuspiritu; ilaña ami nidi muntu wakumujimba, alandishawu dehi kunshidi. 15 Muloña chuma chinakoñaña ami, hinachilukañaku. Muloña chuma chinafwilaña kukoña, hinachikoñañaku, ilaña chuma chinahela, dichinakoñaña. 16 Dichi, neyi nakoñaña chuma chinabulaña kufwila, neteji nami Nshimbi jajiwahi. 17 Ilaña hiyami wunakuchikoñaku, nshidi yashakama mudi ami, diyi yinakuchikoña. 18 Muloña neluka nami mudi ami, dikwila nawu, mumujimba wami, mwekala chuma chachiwahi wanyi; muloña nafwilaña kukoña chuma chachiwahi, ilaña hinikweti ñovu yakuchikoñaku. 19 Muloña hinakoñaña chuma chachiwahi chinafwilaña nami nichikoñiku, ilaña chuma chatama chinabulaña kufwila kukoña, dichinakoñaña. 20 Neyi nakoñaña chuma chinabulaña kufwila kukoña, dikwila nawu, hiyami wunakuchikoñaku, ilaña nshidi yidi mudi ami, diyi yinakuchikoña. 21 Dichi, nawani ilu lushimbi lunankundami lwakwila nawu: Neyi nifwila nami nikoñi chuma chaloña, chuma chatama dichenzaña mudi ami. 22 Mumuchima wami nazañalalaña chikupu nanshimbi jaNzambi, 23 ilaña namoni lushimbi lukwawu mumujimba wami lunakuzuña nalushimbi lwamuyitoñojoka yami nakuntwala muwunkoli walushimbi lwanshidi ludi mumujimba wami. 24 Yayo-o, ami nshona! Hinyi wukuñamwina kuniwu mujimba wunakuntwala kuniku kufwa? 25 Namusakilili Nzambi kuhitila mudi Yesu Kristu Mwanta wetu! Dichi dinu, muyitoñojoka yami, nidi nduñu wanshimbi jaNzambi, ilaña kumujimba wami, nidi muwuduñu walushimbi lwanshidi.
FEBRUARY 25–MARCH 3
YUMA YALEMA YAMWIZU DANZAMBI | AROMA 9-11
“Chishimu Chamutondu wamuOlivi”
(Aroma 11:16) Kubombelahu, neyi kachibalu kakudinkendi kakudayi muntu kajila, dikwila nawu nidinkendi dejima dajila; nawa neyi muji wamutondu wajila, dikwila nawu ninyitayi niyena yajila.
‘Maana aNzambi O Chiyakunama!’
Kapostolu Pawulu watwalekeluhu nakwesekeja antu ekala mulubutu lwaAbarahama kunyitayi yamutondu wamuolive wachifwikija. (Rom. 11:21) Iwu mutondu wamuolive watumbawu wemenañaku kushikijewa kwakutoñola kwaNzambi hachitiyañenu chindi naAbarahama. Muji waniwu mutondu wajila nawa wemenañaku Yehova mukwakuhana wumi kudi aIsarela akuspiritu. (Isa. 10:20; Rom. 11:16) Chishinji chaniwu mutondu chemenañaku Yesu wekala lubutu lwatachi lwaAbarahama. Nyitayi yaniwu mutondu yemenañaku ‘naambala yawanina chikupu’ yachibalu chamuchiyedi chawantu abombelawu mulubutu lwaAbarahama.
(Aroma 11:17) Hela chochu, neyi Nzambi wakunkwiliku kumutondu wamuolivi nyitayi yimu, ilaña eyi hela chakwila wudi mutayi wamutondu wamuolivi wamwisaña anakunuñili kuniwu mutondu nawa wunaheteli kunyiji yindi,
(Aroma 11:20, 21) Omu diimu! Chelili adiña nachikuhwelelu wanyi, ayikunkwiliku, ilaña eyi wunatwalekihu kuhanda muloña wachikuhwelelu cheyi. Bayi wudivwimbaku, ilaña ikalaku nawoma. 21 Muloña neyi Nzambi wakunkwili nyitayi yayeni yameneni kumutondu, dikwila nawu nineyi wakakukunkulaku.
‘Maana aNzambi O Chiyakunama!’
Chumanyi chakoñeliyi Yehova hakushikija kutoñola kwindi? Pawulu walumbulwili nindi nyitayi yamutondu wamuolive wamumpata ayinuñili namutondu wamuolive wakutumba kulonda kuhiñisha hayakunkwiluwu. (Tañenu Aroma 11:17, 18.) Dichi, akwaKristu awayishewa amunyunza, chidi neyi adiña muchipompelu chamuRoma, ayinuñili muchifwikija kuniwu mutondu wamuolive wachifwikija. Muniyi njila ekalili lubutu lwaAbarahama. Hatachi, adiña neyi nyitayi yamutondu wamuolive wamumpata, hiyadiña nakukooleka kwakwikala munichi chitiyañenu chachihaku. Ilaña Yehova wayishinkwilili njila kulonda ekali aYudeya akuspiritu.—Rom. 2:28, 29.
(Aroma 11:25, 26) “Enu anakwami, muloña hinnakukeña nami mubuli kwiluka iyi yuma yajila yakujindaku, kulonda mubuli kudimona nenu mukweti maana: AIsarela amakwawu akutwalekahu nakukaana kushika nimpinji yakavula antu akunyuza, 26 nawa muyoyeniyi njila dimwakayamwininawu aIsarela ejima. Neyi chochasonekawu nawu: “Nkuuli wakafuma muZiyona nawa wakaletesha anyana kaYakoba kuleka yilwilu yawu yatama.
‘Maana aNzambi O Chiyakunama!’
Eñañi, kutoñola kwaYehova kutalisha hadi ‘aIsarela ambala aNzambi’ kunakushikijewa munjila yayiwahi. (Ŋal. 6:16) Kwesekeja nachahosheliyi Pawulu, “aIsarela ejima amba kahanda.” (Rom. 11:26) Hampinji yatoñolayi Yehova, “aIsarela ejima” dikwila nawu, aIsarela ejima akuspiritu, akekala anyanta niatupristu mwiwulu. Kwosi chuma chatela kukañesha kutoñola kwaYehova!
Kukeña Yuma Yalema yakuSpiritu
(Aroma 9:21-23) Komana mukwakuwumba, hakweti wuswa handambu wakuwumbamu chuma chimu chakuzatisha kumudimu walema, chuma chikwawu nawa chakuzatisha kumudimu wabula kulema kuchikanka chandambu chochimuku, tahindi? 22 Hela chakwila Nzambi wakeñeleña kumwekesha kuzuwa kwindi hadi antu atama nikuleñela ñovu jindi ajiluki, wadiwunjikili chikupu nawantu adiña neyi yuma yakeñeleña kuletelayi kuzuwa kwindi nawa yatelela kujilumuka. 23 Nawa chadi kwikala ñahi neyi welili yumiyi kulonda yamwekeshi kuvula kwakulema kwindi kudi yuma yakeñeleña kutiyilayi luwi, oyu yaloñesheleliyi chadimu nindi yakekali yakulema,
Itejenu Kufumba kwaYehova Kuyiwumbi
Indi neyi antu akaana tuhu chikupu kuyiwumba kudi Kañemi Muneni? Indi Yehova wazatishaña ñahi ñovu jindi jawukañemi? Toñojokenu hachuma chamwekanaña neyi chakwila iseki hidinateleli kwesekeja nachuma chiyanakukeña kuwumbawuku. Kañemi nateli kuwumbilamu chuma chacheñi hela kunata iseki. Chumichi chamwekanaña muloña kañemi hanawumbi chuma munjila yayiwahiku. Ilaña Yehova mpinji yejima wawumbaña antu munjila yayiwahi. (Kuhit. 32:4) Neyi muntu yakaana kumuwumba kudi Yehova, muntu wunakaani diyi wamonaña kukala. Yehova wahimpaña njila mwakuwumbila antu kwesekeja nachiyatambwilañawu kufumba kwindi. Antu atambwilaña chachiwahi ayiwumbaña munjila yayiwahi. Chakutalilahu, akwaKristu awayishewa ekala ‘yuma yaluwi’ awumbawu ‘kwikala yuma yalema.’ Ilaña antu akaanaña kufumba kwaNzambi ekalaña ‘yuma yatela kuzuwila, yaloñeshelawu dehi kujilumuka.’—Rom.9:19-23.
(Aroma 10:2) Muloña nidi chinsahu chawu nami akweti iyena dakumuzatila Nzambi, ilaña bayi neyi kwesekeja namwaya kwiluka kwalalaku.
it-1 1260 ¶2
Ichima niKwikala Nechima
Iyena Dakutwamba. Muntu nateli kwikala neyena dakwila chuma chimu henohu chinakumutiyisha Nzambi kutama. Dichuma chelileñawu niaYudeya amavulu adiñaku mumafuku awapostolu. Azatileña nyidimu yawu aweni yashindameneni haNshimbi jaMosi, akeñeleña kulonda ayimoneña nawu aloña. Ilaña Pawulu wahosheli nindi iyena dawu dadiña dakutwamba muloña hiyelukili mwaya kwiluka kwalalaku. Dichi hiyayimweneña kuloña kudi Nzambiku. Hakwila nawu ayimoneña kudi Nzambi nawu aloña nawa ahembaña nshimbi, ateleleli kwiluka nawu anakuluwañesha dinu hiyakubalumuka kuhitila mudi Kristu. (Rom 10:1-10) Sawulu wakuTarusa niyena wadiña hakachi kawu, wadiña neyena chikupu mukwitiya kwawaYudeya, chakwila wadiña “nakukabisha chikupu chipompelu chaNzambi nikuchikisañana.” Wadiña nakulondela chikupu Nshimbi chakwila ‘wamweneña wanyi hakumwinkela muloña.’ (Ñal 1:13, 14; Fwp 3:6) Hela chochu, iyena dadiñayi nadu mukwitiya kwawaYudeya dadiña dakutwamba. Wafwilileña kuhimpa, dichaletesheli Yehova yamumwekesheli luwi lwasweja kuhitila mudi Kristu. Wamukwashili kwiluka njila yayiwahi yakudifukula kwalala.—1 Ti 1:12, 13.
Kutaña Bayibolu
(Aroma 10:1-15) Enu anakwami, chuma chinafwilaña mumuchima wami nikulembelela kunayilembelelañaku aIsarela kudi Nzambi, kudi kwakwila nami ayamwini. 2 Muloña nidi chinsahu chawu nami akweti iyena dakumuzatila Nzambi, ilaña bayi neyi kwesekeja namwaya kwiluka kwalalaku. 3 Muloña wakubula kwiluka kuloña kwaNzambi nakukeña kuloña kwawu aweni, hiyovwahilili kuloña kwaNzambiku, 4 Muloña Kristu diyi kukuma kwaNshimbi, kulonda muntu wejima wakuhwelela yekali waloña. 5 Muloña Mosi wasonekeli hakuloña kwamuNshimbi nindi: “Muntu wahembaña iji Nshimbi, wakekala nawumi muloña wajihembaña.” 6 Ilaña kutalisha hakuloña kwenzaña muloña wakukuhwelela, Nsona yahosha nawu: “Bayi wuhosha mumuchima weyi neyi, ‘Hinyi wukuya mwiwulu?’ dikwila nawu, nakumuleta Kristu hamasekiku, 7 hela bayi wuhosha neyi, ‘Hinyi wukukunkumukila mwikela?’ dikwila nawu, nakumusañula Kristu kufuma mudi afuku.” 8 Hanu dinu, Nsona yahosha nawudi? Yahosha nawu: “Mazu adi kwakwihi naneyi, mwomu kanwa keyi nimumuchima weyi”; dikwila nawu, “mazu” achikuhwelelu itunakushimwina. 9 Muloña neyi wukuhosha hatooka kudi antu nakanwa keyi neyi Yesu diyi Mwanta, nikukuhwelela mumuchima weyi neyi Nzambi wamusañwili kufuma mudi afu, akakwamwina. 10 Muloña namuchima, muntu wakuhwelelaña nakwikala waloña, ilaña nakanwa, muntu washimunaña hatooka chikuhwelelu chindi kulonda yamoni wamwinu. 11 Muloña nsona yahosha nawu: “Kwosi muntu niwumu wamukuhwelela Yesu akatiyishawu nsonyiku.” 12 Muloña hakachi kakaYudeya nikaGiriki hekala chaambu wanyi. Wejima wawu Mwanta wawu yowumu, owu wakiswilaña nkisu jajivulu antu ejima amutambikaña. 13 Muloña “muntu wejima watambikaña hejina daYehova akamwamwina.” 14 Ilaña, akumutambika ñahi neyi wena kumukuhwelela nehi? Nawa, akumukuhwelela ñahi iyabula kutiyahu dehi? Nawa cheñi, akutiya ñahi chakadi muntu wakuyishimwina? 15 Nawa akushimwina ñahi chakadi kuyitemesha? Neyi chochasonekawu nawu: “Olu lubanji lukweti nyendu yanowu ashimwinaña nsañu yayiwahi yayuma yayiwahi!”