Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
MAY 6-12
YUMA YALEMA YAMWIZU DANZAMBI | 2 AKORINDA 4-6
“Hitwazeyañaku”
(2 Akorinda 4:16) Dichi, hitwazeyañaku, ilaña hela chakwila wuntu wetu wahanji wunakuya nakunoña, chakadi nikujina, wuntu wetu wamukachi anakuwubalumuna kwikala wawuha hefuku-hefuku.
w04 8/15 25 ¶16-17
Azeya Ilaña Hiyalekañaku
Kwakamena wuspiritu wetu hichuma chasweja kulema nankashi. Neyi twikala nawubwambu wezala kambuki namunu naYehova Nzambi, tunateli kuzeya kumujimba, ilaña hitunateli kuzeya kudifuukula kudi yenaku. Yehova diyi “Wamwinkaña muntu wazeya wuswa, wabula ñovu wamuvulishilaña ñovu.” (Isaya 40:28, 29) Kapostolu Pawulu, wamweni walala wanawa mazu, wasonekeli nindi: “Hitwazeyañaku, ilaña hela chakwila wuntu wetu wahanji wunakuya nakunoña, chakadi nikujina, wuntu wetu wamukachi anakuwubalumuna kwikala wawuha hefuku-hefuku.”—2 Akorinda 4:16.
Talenu iyi nhoshelu yakwila nawu “hefuku-hefuku.” Yinayi mukwila nawu kuzatisha yuma yatwinkañayi Yehova mafuku ejima. Mishonali washinshika wakalakeli hadi yaaka 43, mpinji yikwawu watiyileña kuzeya kumujimba. Ilaña hazeyeli kuspirituku. Wahosheli nindi: “Mpinji yejima nahindukileña swayi nakulomba kudi Yehova nikutaña Izu dindi henohu kanda nizati mudimu wudi wejima. Kwila mwenimu kunankwashi kuumika kushika nichayinu mpinji.” Tunateli kumona ñovu yaNzambi “hefuku-hefuku,” neyi tulombaña nikutoñojoka hayilwilu yindi yasweja kuwaha nihayikaninu yindi.
(2 Akorinda 4:17) Muloña, hela chakwila lukadi lutwamonaña lwakapinji kantesha nawa lwapepela, ilu lukadi lwatuleñelaña twiikali nakulema kwabadika chikupu nawa kwahaya nyaaka;
it-1 724-725
Kuumika
Cheñi chalema nankashi kubula kuleka kutoñojoka hakuchiñeja kwawakwaKristu, kwakushakama haya nyaaka chakadi nshidi. Hela chakwila akutujaha kudi akwakutukabisha hiyanateli kufumishahu kuchiñeja kwetuku. (Rom 5:4, 5; 1Te 1:3; Chi 2:10) Makabi itunakumona makonu amukunkulwayi neyi tuyesekeja nakuchiñeja kwakuwahi kutukweti. (Rom 8:18-25) Neyi twiluka nsañu yakushakama haya nyaaka, makabi, hela chakwila akusweja ñahi “akapinji kantesha nawa apepela.” (2Ko 4:16-18) Neyi muntu yanuka nindi makabi anakumonanayi akapinji kantesha nawa yakakela kukuchiñeja kwawakwaKristu nateli kuzeya wanyi kuspiritu nawa wukutwalekahu kwikala washinshika kudi Yehova Nzambi.
(2 Akorinda 4:18) hampinji yoyimu, hitwashinshikaña mesu etu hayuma yamwekanañaku, chiña hayuma yabulaña kumwekana. Muloña yuma yamwekanaña, yakapinji kantesha, hakwila yuma yabulaña kumwekana, yahaya nyaaka.
Kukeña Yuma Yalema yakuSpiritu
(2 Akorinda 4:7) Hela chochu, tukweti idi iheta munsaba jamawumba kulonda ñovu yabadika hañovu jawantu yifumi kudi Nzambi, bayi kudi etuku.
“Muzañaleshenuña Yehova”
A David Splane aMwizanvu dalombolaña ahosheluhu haniwu mutu washindamena haNsona. (2 Akorinda 4:7) Indi iheta hichumanyi? Komana himaana hela hikwiluka? Nhoshi wakwili nindi “Inehi.” “Iheta dateneneñayi kapostolu Pawulu ‘himudimu wakumwekesha chalala hatooka.’” (2 Akorinda 4:1, 2, 5) Manakwetu Splane wayanukishili atudizi nindi tukweji tutanu twamanishiliwu nakutaña twadiña twakudiloñesha kuzata mudimu walema wakushimwina. Iwu mudimu wadiña walema nawa wawuwahi.
Nhoshi walumbulwili nindi “nsaba jamawumba” jatalisha kunyijimba yetu yawuntu. Washimwini chambu chekala hansaba yewumba nayawuru. Nsaba jawuru avula kujizatisha wanyi. Ilaña nsaba jamawumba ajizatishaña nankashi. Neyi tusha iheta munsaba yawuru, tukusha nankashi maana kunsaba kubadika iheta ditunashimu. Manakwetu Splane wahosheli nindi: “Enu atudizi bayi mudimwekeshañaku.” “Chineli mudi amishonali kwashenu antu kulonda amwiluki Yehova. Yenu nsaba jamawumba jajiwahi.”
(2 Akorinda 6:13) Dichi, inakuyileja neyi inakuleja anyanami nami, ninenu enzununenu chikupu nyichima yenu.
w09 11/15 21 ¶7
Twalekenuhu Kusweja Kukeña Amana Kwenu
Indi etu? Tunateli ‘kusweja kukeñañana’ ñahi hakumwekesha kukeña amana kwetu? Antu ayaaka yoyimu hela achisemwa chimu chayipelelaña kudikeña wumu namukwawu. Niantu akeña yuma yoyimu yakuhema kakavulu ekalaña hamu. Ilaña neyi yuma yitwakeña nawakwaKristu antesha yituleñela kwambuka nawamakwawu, twatela ‘kusweja kukeñañana.’ Chikuwaha neyi tudihula netu: Komana nashimwinaña kazoku kazoku mumudimu wakushimwina indi kwiji hinavulaña kuhema nawamana kwetu niahela abula kwikala mwizanvu mutwahemenaku? Komana Hetala daWanta, hinavulaña kudikunda nawantu amahaku, muloña natoñojokaña nami twakadiluka neyi munahiti dehi mpinji? Komana nemushaña akulumpi niatwansi muchipompelu?’
Kutaña Bayibolu
(2 Akorinda 4:1-15) Dichi, muloña waniwu mudimu wunatukunjikiwu kwesekeja naluwi lwatutiyililiwu, hitwazeyañaku. 2 Ilaña etu tunakaani yuma yakujinda yaletaña nsonyi, hitwendaña munjila yakudimbana hela kuheñesha izu daNzambiku; ilaña kuhitila mukumwekesha chalala hatooka, tunakudihameka etu aweni kuyinleji yanyichima yawantu ejima kumesu aNzambi. 3 Kafwampi, neyi nsañu yayiwahi yitwashimwinaña ayibuta, dikwila nawu yinabutewi kudi antu anakujilumuka, 4 mudi wena, nzambi wanshakaminu yamakonu naputishi yitoñojoka yawantu abula kwitiya, kulonda chejeji chakulema kwansañu yayiwahi yahosha hadi Kristu, owu wekala chifwanisha chaNzambi, chibuli kuyitoñekela. 5 Muloña hitunakushimwina hadi etu aweniku, ilaña tunakushimwina hadi Yesu Kristu netu diyi Mwanta nawa tunakushimwina hadi etu aweni netu tudi anduñu jenu kukoola Yesu. 6 Muloña Nzambi diyi wahosheli nindi: “Chejeji chitoñeki mumwidima,” nawa yena nakojeji nyichima yetu kutoñeka nakulema kwakumwiluka Nzambi kuhitila kumesu aKristu. 7 Hela chochu, tukweti idi iheta munsaba jamawumba kulonda ñovu yabadika hañovu jawantu yifumi kudi Nzambi, bayi kudi etuku. 8 Anatushintakeshi mumbadi jejima, hela chochu, hitunakañanyi nihakudinyinkeshelaku; tunaluwankani, ilaña hitunakañanyi mwakwililaku; 9 anakutukabisha, ilaña hiyanatushiyi chisayikilaku; anatudimbwishi hamaseki, ilaña hiyanatujilumuniku. 10 Mpinji yonsu twomikaña mumujimba wetu yuma yatama yaletaña kufwa yahitilimu Yesu, kulonda chihandilu chaYesu chimwekeni nimumujimba wetu. 11 Muloña etu tunakuhanda, mpinji yonsu tunakutalañana nakufwa mesu-namesu kukoola Yesu, kulonda chihandilu chaYesu chimwekeni nimumujimba wetu wafwaña. 12 Dichi, kufwa kunakuzata mudi etu, ilaña wumi wudi mudi enu. 13 Ichi dichasonekawu nawu: “Nakuhweleleli, dichakojejeli nihoshi.” Ninetu nawa twamwekeshaña netu tukweti chikuhwelelu chochimu, ichi dichakojejaña tuhosheña, 14 nanochu chituneluki netu Owu wamusañwili Yesu, wakatusañula ninetu neyi chamusañwiliyi Yesu nawa wakatuleta hamu nanenu kumesu indi. 15 Muloña yuma yejimiyi yinamwekani kukoola enu, kulonda kuvula kwaluwi lwasweja kuyeña hohu nakuvulilaku muloña antu amakwawu amavulu anakulomba nakusakilila nakumulemesha Nzambi.
MAY 13-19
YUMA YALEMA YAMWIZU DANZAMBI | 2 AKORINDA 7-10
“Mudimu Wetu Wakukwasha Adi muLukadi”
(2 Akorinda 8:1-3) Enu anakwetu, ichi dinu tunakukeña mwiluki luwi lwaNzambi lwasweja lunatiyiliyi yipompelu yamuMasidoniya. 2 Hampinji yayesekeliwu namakabi asweja, muzañalu wawu wasweja chikupu niwuzweñi wawu wasweja, jayiletesheli kwikala namuchima wakuhana chikupu. 3 Muloña ahanineña kwesekeja nayuma yadiñawu nayu, inakuyileja nami, ahanineña kubadika nihayuma yadiñawu nayu,
w98 11/1 25 ¶1
“Nzambi Wakeña Muntu Wahanaña naMuzañalu”
Chatachi, Pawulu wayilejeli Akorinda yuma yelili akwaMasidoniya, adiña namuchima wakukwasha adi mulukadi. “Hampinji yayesekeliwu namakabi asweja,” Pawulu wasonekeli nindi: “Muzañalu wawu wasweja chikupu niwuzweñi wawu wasweja, jayiletesheli kwikala namuchima wakuhana chikupu.” AkwaMasidoniya ayikanjikijileña wanyi. Kwambukaku, Pawulu wahosheli nindi “adiña nakutulembelela chikupu chakadi kuyikanjikija kulonda ekali nakukooleka kwakuhanaña yawaana yaluwi.” Kuhana namuzañalu kwadiña nawakwaMasidoniya kwalema nankashi sweje-e neyi twanuka netu niwena adiña ‘muwuzweñi wasweja.’—2 Akorinda 8:2-4.
Mudimu Wakukwasha Adi muLukadi
MWADIÑA muchaaka cha 46 C.E., muYudeya mwadiñi nzala yakapwelendendi. Atumbanji twaKristu aYudeya ashakamineña muniwu musumba hiyadiña namali akulanda yakudaku, muloña yakuda yakeheli, wuseya wakandamini chikupu. Antu adiña munzala yayeni. Hela chochu, Yehova wayikwashili awa atumbanji twaKristu munjila yadimena. Chumanyi chikukeña kumwekana?
(2 Akorinda 8:4) nawa adiña nakutulembelela chikupu chakadi kuyikanjikija kulonda ekali nakukooleka kwakuhanaña yawaana yaluwi nikuzataku mudimu wakukwasha akwakujila.
Mudimu Wakukwasha Adi muLukadi
Mumukanda wamuchiyedi wasonekeleliyi Akorinda, Pawulu walumbulwili nindi akwaKristu akweti nyidimu yiyedi. Hela chakwila mukanda wasonekeliyi Pawulu wadiña wawakwaKristu awayishewa, nikulelu mazwindi akwashaña ‘nianyikoku amakwawu’ aKristu. (Yow. 10:16) Mudimu watachi wutukweti ‘himudimu wakukundamisha cheñi antu,’ dikwila nawu kushimwina nikudizisha. (2 Kor. 5:18-20; 1 Tim. 2:3-6) Mudimu wamuchiyedi “wakukwasha” amanakwetu neyi chashimwiniyi Pawulu. (2 Kor. 8:4) Mazu akwila nawu “mudimu” ‘nikukwasha’ himazu abalumunawu kufuma kwizu dachiGriki dakwila nawu diakonia dalumbuluka. Kuwahanyi kudi mukwiluka yumiyi?
Hakuzatisha izu dodimu dachiGriki nakutena nyidimu yejima yiyedi, Pawulu wesekejeli mudimu wakukwasha antu adi mulukadi hamu nanyidimu yikwawu yazatileña chipompelu chawakwaKristu. Wahosheli hakusambila nindi: “Kudi nyidimu yashiyashana, ilaña kwekala Mwanta yowumu; nawa kudi nyidimu yakuzata yashiyashana, . . . Ilaña ayikoñaña naspiritu yoyimu.” (1 Kor. 12:4-6, 11) Pawulu wahosheleña hanyidimu yambokamboka yamuchipompelu nindi ‘himudimu wajila.’ (Rom. 12:1, 6-8) Dichaleñeleli yatoñojoki nindi wateleleli kuzatisha mpinji yindi kulonda ‘yakwashi akwakujila.’—Rom. 15:25, 26.
Pawulu wayikwashili Akorinda kwiluka nawu kukwasha adi mulukadi wadiña mudimu walema mukudifukula kudi Yehova. Talenu chahosheliyi: AkwaKristu akwashaña akwawu adi mulukadi elaña mwenimu muloña ‘ovwahilaña nsañu yayiwahi yahosha hadi Kristu.’ (2 Kor. 9:13) AkwaKristu akwashaña akwawu akwakwitiya muloña afwilaña kwila mwayilejeliyi Kristu. Pawulu wahosheli nindi nyidimu yayiwahi yakoñelañawu amanakwawu yamwekesheleña ‘luwi lwaNzambi lwasweja.’ (2 Kor. 9:14; 1 Pet. 4:10) Kaposhi Kakutalila kaChizungu kaDecember 1, 1975, kashimwini hakukalakela amanakwetu ahutwa kubombelahu nimudimu wakukwasha adi mukukaankila nawu: “Twatela kwiluka netu mudimu wamuchidiwu awulemesha kudi Yehova niMwanindi Yesu Kristu.” Mudimu wakukwasha adi muyihuñu himudimu wajila.—Rom. 12:1, 7; 2 Kor. 8:7; Heb. 13:16.
(2 Akorinda 9:7) Dichi muntu-himuntu yeli kwesekeja nachinafuukuliyi mumuchima windi, bayi nakuneña hela chakumukanjikijaku, muloña Nzambi wakeña muntu wahanaña namuzañalu.
Kwafumaña Mali Akukwasha Nachu Nyidimu yaWanta
Chatachi, twahanaña yawaana muloña twamukeña Yehova nawa twafwilaña kwila “yuma yamutiyishaña kuwaha.” (1 Yow. 3:22) Yehova watiyaña kuwaha neyi mukwakudifukula yahanaña chakufuma hamuchima. Tushinshikenu mazu ahosheli kapostolu Pawulu hadi akwaKristu chiyatela kuhanawu. (Tañenu 2 Akorinda 9:7.) MukwaKristu walala hashintajalaña hela kumukanjikija kuhanaku. Ilaña, wahanaña muloña ‘nafuukuli mumuchima windi’ kwila mwenimu. Dikwila nawu wahanaña hanyima yakutoñojoka yuma yinakukeñeka nimali atela kuhanayi. Muntu wamuchidiwu amukeña kudi Yehova muloña “Nzambi wakeña muntu wahanaña namuzañalu.”
Kukeña Yuma Yalema yakuSpiritu
(2 Akorinda 9:15) Tumusakililenu Nzambi hachawaana chindi chabadika chikupu chakukañanya nimwakuchilumbulwila.
‘Chamukunkulu chaNzambi Chakañanya Kushimunewa’ Chatusañumunaña
Pawulu welukili nindi yikaninu yaNzambi yejima yakashikijewa kuhitila mumulambu waYesu. (Tañenu 2 Akorinda 1:20.) Ichi chinayi mukwila nawu ‘chamukunkulu chaNzambi chakañanya kushimunewa’ chabombelamu mulambu waYesu, yuma yayiwahi nikukeña kwalala kwatumwekeshelañayi Yehova. Ichi chawaana chalema chakala kuchilumbulula munjila yitunateli kutiya. Twatela kutiya ñahi nanichi chamukunkulu chalema? Nawa chatela kutusañumuna kwiladi hampinji yitunakudiloñesha kuya kuChanukishu chakufwa kwaKristu chakekalaku haChisatu, March 23, 2016?
(2 Akorinda 10:17) “Ilaña muntu wadisambaña, yadisambileña mudi Yehova.”
g99 7/8 20-21
Komana Chatama Kudisamba?
MuNsona jawakwaKristu jachiGiriki, izu dakwila nawu kau·khaʹo·mai, damalumunawu nawu “kudinka wanta, kuditumbakesha nikudisamba,” adizatisha hakulumbulula yuma yayiwahi niyatama. Chakutalilahu, Pawulu wahosheli nindi: “Muntu wadisambaña, yadisambileña mudi Yehova.” (2 Akorinda 10:17) Kudisamba kunatalishi mukwila nawu kuditumbakeshela mudi Yehova Nzambi yetu, chilwilu chinateli kutuletesha kudisambila hejina dindi dadiwahi nihayuma yelañayi.
Kutaña Bayibolu
(2 Akorinda 7:1-12) Dichi enu akwetu itwakeña, chineli atukana iyi yikaninu, tuditookeshenu kukutama kwejima kwamujimba nispiritu, kulonda tusweji kwikala ajila hampinji yitunakumutiya Nzambi woma. 2 Tutambwilenu munyichima yenu. Hitunakoñihu muntu hela wumu chatamaku, hitunakatishihu muntu hela wumuku, hitunadimbihu muntu hela wumu kulonda tuhetelimuku. 3 Hinnahoshi mwenimu kulonda niyifwishi namuloñaku. Muloña nahoshahu dehi nami enu mudi munyichima yetu kulonda mufwili hamu nanetu nikuhandila hamu nanetu. 4 Inakuhosha nanenu nakukasunuka chikupu. Nadisambilaña chikupu mudi enu. Ankundejaña chikupu; nidi namuzañalu chikupu mumakabi etu ejima. 5 Kafwampi, chitwashikili muMasidoniya, nyijimba yetu yanookelihu wanyi, ilaña twatwalekelihu kumona makabi mumbadi jejima, hanji hadiña madombu, mukachi mwadiña yuma yakutiyisha woma. 6 Ilaña Nzambi wakundejaña antu anadihombi, watukundejeli kuhitila mukutuhempula kudi Titusa; 7 nawa bayi neyi kutuhempula kwindi hohuku, ilaña nimukutukundeja kwatukundejeliyi muloña wanenu, nanochu chatulejeliyi nsañu yimwamulejeli nenu munakuntalila nankashi, chineñi chenu chimukweti chikupu nimuchima wakufwila kunkwasha; dichi, naswejeli kuzañalala chikupu. 8 Muloña hela chakwila nayineñesheli kuhitila mumukanda wunayisonekeleli enu, hinnakuditoñeshaku. Hela chakwila hatachi naditoñesheli, (namoni nami mukanda wayineñesheli hakapinji kantesha), 9 ichi nazañalali, bayi neyi hamuloña wakuyineñeshaku, ilaña hamuloña wakwila kuneña kumwaneñeli kwayileñeleli mubalumuki munyichima. Muloña kuneña kwenu kunesekani nankeñelu yaNzambi nawa chumichi dichayikwashili enu. Ichi dichuma chinaleteshi mubuli kumona yuma yatama muloña wayuma yitwahosheli kudi enu. 10 Muloña kuneña kwesekeja nankeñelu yaNzambi kwaleteshaña muntu kubalumuka mumuchima, kubalumuka mumuchima kwatwalaña kuwamwinu waleteshaña muntu kubula kuditoñesha; ilaña kuneña kwamukaayi kwaletaña kufwa. 11 Muloña talenu, kuneña kwesekeja nankeñelu yaNzambi chikunayikojeji enu mwiikali adikita, chikunayikwashi kudiyiñisha kuyiluwa, chikunayileteshi kutiya kutama, kutiya woma, kufwila kubalumuka mumuchima, chikunayileteshi kwikala neyena dakufwila kwolola yuma yinaheñi! Muyuma yejima mwadimwekesheli kwikala akadi majilu muniyi nsañu. 12 Hela chakwila nayisonekeleli, hinayisonekeleli muloña wamuntu waluwañesheli hela muloña wamuntu aluwañesheliwuku, ilaña, kulonda kudikita kwenu kumunakutudikitila etu kumwekani mukachi kenu hatooka kumesu aNzambi.
MAY 20-26
YUMA YALEMA YAMWIZU DANZAMBI | 2 AKORINDA 11-13
“‘Mwiña Mumujimba’ waPawulu”
(2 Akorinda 12:7) muloña wayuma yabadika yammwekesheleliwu. Hakwila nibuli kuditohesha chikupu, anshili mwiña mumujimba wami, dikwila nawu kañelu kaSatana kulonda yañeteña jimbañala kuchiina nakenda kaditohesha chikupu.
w08 6/15 3-4
Kwikala Akola Hela Chakwila Twazeyazeyaña
Kambuña aYehova washinshika mukwawu wamulombeli nindi yamufumishi “mwiña mumujimba windi,” dikwila nawu makabisha amweneñayi. Kapostolu Pawulu wamulembeleli Nzambi kapampa kasatu nindi yamwamwini muniku kweseka. Iku kweseka kwadiña neyi mwiña wunakuchonkana, kwadi kumuletesha Pawulu kubula kwikala namuzañalu mumudimu waYehova. Pawulu wakwesekejeli nakumweta jimbañala chakadi kuleka. Yehova wamwakwili nindi: “Luwi lwami lwasweja lunakuteleli eyi, muloña mukuzeyazeya kweyi dimunakulumbulukila ñovu jami.” Yehova hafumishili mwiña wadiña mumujimba windiku. Pawulu walwishili nananiku kukala, nawa wahosheli nindi: “Neyi nazeyi, dihu hinekalaña nañovu.” (2 Kor. 12:7-10) Watalishili mudihi?
(2 Akorinda 12:8, 9) Namulembeleleli Mwanta mapampa kasatu nami, iwu mwiña wunfumi. 9 Ilaña yena wanlejeli nindi: “Luwi lwami lwasweja lunakuteleli eyi, muloña mukuzeyazeya kweyi dimunakulumbulukila ñovu jami.” Dichi, nukuzañalala chikupu kudisambila mukuzeyazeya kwami kulonda ñovu jaKristu jitwalekihu mudi ami neyi itenti.
Yehova Wayinkaña ‘Spiritu Yajila Owu Amulombaña’
Kwesekeja nakulomba kwaPawulu, Nzambi wamwakwili nindi: “Luwi lwami lunakuwanini, muloña ñovu yami yalumbulukaña chikupu hakuzeya.” Pawulu wahosheli nindi: “Dichi hinukutiya kuwaha nankashi, nami komana chuma chachiwahi chochakudisamba nakuzeyazeya kwami, kulonda ñovu yaKristu yakekali hadami.” (2 Akorinda 12:9; Masamu 147:5) Dichi, Pawulu wachimweni neyi kuhitila mudi Kristu, kukiñewa kwaNzambi kwabadika akwalili hadi yena neyi itenti. Makonu, Yehova wakulaña kulomba kwetu munjila yadifwanaku. Wawanishaña kukiñewa kwindi wukwila neyi mwakuswama ambuñindi.
Hela chochu, itenti hidakañeshaña nvula kunoka hela kukunka mpepelaku, ilaña dakwashañaku kujikilila yuma yeniyi. Chochimu, itenti daloñeshewa ‘nañovu yaKristu’ hidalekeshaña kweseka kutumwekena hela kukala kutumwekenaku. Ilaña, hamu neyi akwakudifukula aYehova datwikiñaña kuyuma yatama yekala mukanu kaayi nikukulukukewa kwanyuli yakanu kaayi, Satana. (Chimwekeshu 7:9, 15, 16) Dichi, hela wunakumona kweseka kwabulaña ‘kukwamuka,’ watela kwiluka neyi Yehova weluka kulwisha kweyi nawa natiyi ‘kukaluka kwamutetu weyi.’ (Isaya 30:19; 2 Akorinda 1:3, 4) Pawulu wasonekeli nindi: “Ilaña Nzambi washinshika, hakwiteja kuyeseka chabadika muñovu jenuku; chakuyesekawu wukubuzilaku njila yakupulukila, kulonda mutweshi kukakela [hela kukumika].”—1 Akorinda 10:13; Afwilipi 4:6, 7.
(2 Akorinda 12:10) Dichi, natiyaña kuwaha mukuzeyazeya, mumatuka, mumpinji yakukaankila, mumakabisha nimukukala kukoola Kristu. Muloña neyi nazeyi, dihu hinekalaña nañovu.
“Wamwinkaña Muntu Wazeya Wuswa”
Tañenu Isaya 40:30. Hela chakwila twadiza chikupu, kwila tutwesha kwila yuma yejima muñovu jetu nehi. Dichuma chitwatela kwiluka wejima wetu. Hela chakwila kapostolu Pawulu welukili yuma yayivulu, wadiña wanyi nañovu yakwila yuma yejima yakeñeleñayi kwila. Chamulejelimu Nzambi kwakama kwindi, amulejeli nawu: “Mukuzeyazeya kweyi dimunakulumbulukila ñovu jami.” Pawulu watiyishishili mwamulejeliwu. Wakunkulwili nindi: “Neyi nazeyi, dihu hinekalaña nañovu.” (2 Kor. 12:7-10) Watalishili mudihi chahosheliyi awa mazu?
Pawulu welukili nindi wukutwesha wanyi kuzata nyidimu yayivulu chakadi wukwashu waMukwakuhana ñovu. Spiritu yaNzambi yamwinkeleña Pawulu ñovu yabuliliyi. Bayi neyi yamwinkeleña hohu ñovuku, ilaña Spiritu yaNzambi yamukwashileña kuzata nyidimu yamaneni yadi kukañanyayi kuzata nañovu yindi. Ninetu dichiyatukwashaña. Neyi Yehova yatwinka ñovu, tukwikala akola chikupu!
Kukeña Yuma Yalema yakuSpiritu
(2 Akorinda 12:2-4) Neluka muntu wadikunda naKristu owu ahukwiliwu nakumutwala mwiwulu damuchisatu hadi yaaka 14 yinahitihu, kwiji dinu amuhukwilili kumu namujimba, indi kwiji hiyamuhukwilili kumu namujimbaku, neluki wanyi; Nzambi diyi wuneluki. 3 Mwamweni, namwiluka iwu muntu, kwiji dinu amuhukwilili kumu namujimba, indi kwiji hiyamuhukwilili kumu namujimbaku, neluki wanyi; Nzambi diyi wuneluki, 4 muntu yeniwu amuhukwili nakumutwala muparadisa nawa watiyili mazu akukañanya kuhosha nawa abula kwitejawu munshimbi kuyihosha kudi muntu.
Malwihu Kufuma Kudi Antañi
“Mwiwulu damuchisatu” dashimunawu ha 2 Akorinda 12:2 datalisha kuWanta wawuMesiya wayuulañawu kudi Yesu Kristu nia 144,000, “mawulu amaha.”—2 Pet. 3:13.
‘Hiwulu damuchisatu’ muloña hiWanta wasweja kuwaha nawa hichiyuulu chabadika.
“Paradisa” ‘mwamuhukwililiwu’ Pawulu muchimwenu yatalisha (1) kuParadisa yakekalaku heseki, (2) paradisa yakuspiritu yikekalaku nawa yikatanda kwejima kubadika paradisa yakuspiritu yidiku makonu, (3) ‘niparadisa yaNzambi’ yamwiwulu yikekalaku hampinji yoyimu netuña dadiha.
(2 Akorinda 13:12) “Mudimushi wumu namukwawu nakudifufwa kwajila.”
it-2 177
Kudifufwa
“Kudifufwa Kwajila.” AkwaKristu akusambila adiña nakudimusha ‘nakudifufwa kwajila’ (Rom 16:16; 1Ko 16:20; 2Ko 13:12; 1Te 5:26) hela “kudifufwa kwakukeña” (1Pe 5:14), chumichi achilileña hohu chiña eyala neyala hela mumbanda namumbanda. Iku kudimusha kwawakwaKristu akusambila kunateli kudifwana nakudimusha kwakudifufwa kuyadimushileñawu Aheberu akushankulu. Hela chakwila Nsona hijashimuna jiikaku, “kudifufwa kwajila” hela ‘kudifufwa kwakukeña’ kwamwekesheleña kukeña nikunuñañana kwadiña muchipompelu chawakwaKristu.—Ywn 13:34, 35.
Kutaña Bayibolu
(2 Akorinda 11:1-15) Nateli kutiya kuwaha neyi mukuñiteja mukubula maana kwami kwantesha. Hela chochu, munakuñiteja! 2 Muloña ami nayitiyilaña enu mukawu neyi mukawu watiyañayi Nzambi, chineli nayikanini kuyisumbwisha kudi iyala wumu yowu Kristu nawa inakukeña kuyitwala kudi yena neyi mujiki wadihemba wabulahu dehi kudikaama neyala. 3 Ilaña ami inakutiya woma, nami neyi chochamudimbiliwu Eva kudi kapela namakudi indi, hamwaha yitoñojoka yenu anateli kuyiluwañesha kuhitila mukuyifumisha kukashinshi nikukudihemba jatelela Kristu. 4 Muloña neyi chochichidi, neyi muntu wacheñi yenza nakushimwina nsañu yaYesu waambuka nanowu itwashimwininihu, hela neyi mutambwila spiritu yaambuka nanoyu yimwatambwilili, hela neyi ayishimwina nsañu yayiwahi yaambuka nanoyu yimwatambwilili, owu muntu mwamwitejaña swayi. 5 Muloña ami natoñojoki nami, apostolu enu imwamonaña nenu abadika kulema, hiyambadika muchuma hela chimuku. 6 Hela chakwila hineluka kuhosha chiwahiku, ilaña mukwiluka kwamu, neluka; chakadi nikujina, twayileja enu hatooka mwatalisha iku kwiluka munjila jejima nimuyuma yejima. 7 Hela, komana nakoñeli nshidi hakudizoza ami aweni kulonda enu ayitoheshi nanochu chinayishimwinini enu nsañu yayiwahi yaNzambi chakadi kuyifwetesha tahindi? 8 Natambwili yuma yayipompelu yikwawu kulonda niyikalakeli enu. 9 Ilaña, hampinji yinadiña nanenu nawa hinadiña mukukaankila, hinekalilihu chiteli kudi muntu hela wumuku, muloña anakwetu afumini kuMasidoniya anyinkeli yuma yejima yinakaankilili. Chalala, muyuma yejima hinakeñeleña kwikala chiteli kudi enuku nawa nukutwalekahu kubula kwikala chiteli kudi enu. 10 Chineli chalala chaKristu chidi mudi ami, nakaleka wanyi iku kudisamba kunadisambilaña mumaluña amuAkaya. 11 Muloñadi chinabulilili kukeña kwikala chiteli kudi enu? Komana muloña wakwila nawu nayikeña enu wanyi tahindi? Nzambi weluka nindi nayikeña. 12 Ilaña yuma yinnakukoña, nukutwalekahu kuyikoña kulonda antu adifwikijaña neyi hiyapostolu abuli hakudisambila nihakuhoshela nawu mudimu wutwazataña diwu mudimu wuyazatañawu. 13 Muloña antu amuchidiwu hiyapostolu akutwamba, hiyakwakukalakala akudimbana, adifwikijaña neyi hiyapostolu jaKristu. 14 Chumichi hichakuhayamaku, muloña Satana yomweni wadifwikijaña neyi hikañelu kachejeji. 15 Dichi, chumichi chakuhayamisha wanyi neyi akwakukalakala indi niwena anakutwalekahu nakudifwikija neyi hiyakwakukalakala akuloña. Ilaña kukuma kwawu kwakashindamena hanyidimu yakoñañawu.
MAY 27–JUNE 2
YUMA YALEMA YAMWIZU DANZAMBI | AÑALIJA 1-3
“Namulejelimu Chakadi Kumuhita Mumbadi”
(Añalija 2:11-13) Hela chochu, Kefwasi chenjiliyi kuAntiyoki, namulejelimu chakadi kumuhita mumbadi, muloña welili chuma chatama. 12 Muloña amayala amu afumini kudi Yakoba henohu kanda ashiki, wadiilileña hamu nawantu akunyuza; ilaña chashikiliwu, walekeli kwila chumichi nawa wadaambwili nawu muloña watiyili woma antu adiña aalama. 13 NiaYudeya ejima ashalilihu, niwena adibombeli hamu nindi muniwu wunfwikiji, chakwila niBaranaba niyena wahuñumukili nawunfwikiji wawu.
Komana Mwamonaña Yuma Neyi Chayimonañayi Yehova?
Tañenu Añalija 2:11-14. Petulu wafwili mumuhetu wakutiya antu woma. (Yish. 29:25) Hela chakwila Petulu welukili nindi Yehova hekala nachaambuku, watiyili woma chahosheleña aYudeya alama adiña muchipompelu chamuYerusalema. Kapostolu Pawulu wadiñaku hakuna kubulakana muYerusalema mu 49 C.E., wamulejeli hatooka Petulu muAntiyoki nindi wamwekesheli yilwilu yawunfwikiji. (Yil. 15:12; Ñal. 2:13, tth) AkwaKristu aJentili ateneneñayi Petulu atiyili ñahi nayuma yeliliyi? Komana ateleleli kutuntuka? Komana Petulu adi kumutambula kukooleka kwindi muloña wachiluwa chakoñeliyi?
(Añalija 2:14) Ilaña chinamweni nami hiyanakwenda mwaya chalala chansañu yayiwahiku, namwihwili Kefwasi hamesu awu ejima nami: “Neyi eyi kaYudeya, wunakushakama neyi chelañawu antu akunyuza bayi neyi chelañawu aYudeyaku, wunateli kukanjikija ñahi antu akunyuza kulonda ashakameña kwesekeja namwaya yaaku yawaYudeya?”
Antu Amukeña Yehova, “Hiyakweti Hakudimbukilaku”
Petulu wadiña nawoma wawantu nawa mpinji jikwawu wadimbukileña chatama, ilaña watwalekeluhu kwikala washinshika kudi Yesu nikudi Yehova. Chakutalilahu, wamukaanini Mwanta windi hatooka mapampa kasatu. (Luka 22:54-62) Nkumininaku, Petulu wakañenyi kumwekesha yililu yawakwaKristu, watachikili kusekesha akwawu aJentili akwakwitiya neyi kwiji hiyadiña alema kubadika aYudeya akwaKristu alamishiluwuku. Hela chochu, kapostolu Pawulu washinshikili chikupu haniyi nsañu, hiyateleleli kuleta chaambu muchipompeluku. Yililu yamwekesheliyi Petulu yadiña yaheña. Henohu yililu yaPetulu kanda yihuñumuni amana kwawu, Pawulu wamufumbili chikupu Petulu mesu namesu. (Ñal. 2:11-14) Komana Petulu watiyili kutama nansañu yamufumbiluwu nakuleka kutemuka lufuchi lwakuwumi? Inehi. Washinshikili chikupu hakufumba kwaPawulu, wakuzatishili nawa watwelekeluhu kutemuka lufuchi lwakuwumi.
Kukeña Yuma Yalema yakuSpiritu
(Añalija 2:20) Anampopeli hamutondu hamu naKristu. Hiyami inakuhandaku, ilaña Kristu wadikunda nanami diyi wunakuhanda. Chalala, chihandilu chinahandaña hayinu mpinji mumujimba wawuntu, nahandaña muloña wakukuhwelela mudi Mwana kaNzambi, wankeñeli nawa wadihanini yomweni kukoola ami.
Mukalakelenuña Nzambi naKashinshi Hela Munakumona “Lukadi Lwaluvulu”
Chumanyi chitunateli kwila nakulukuka kwabulaña kumwekana? Chakutalilahu, chumanyi chinateli kutukwasha kulonda tuleki kudishona? Njila yimu yasweja kulema yinateli kutukwasha hikutoñojoka hefutu danyiloña. Chumichi dichi chelili kapostolu Pawulu. Welukili nindi mpinji yikwawu watiyileña neyi hinshona. Ilaña welukili cheñi nindi Kristu hafwilili antu awaninaku, ilaña wafwilili akwanshidi. Pawulu wadiña hakachi kanana akwanshidi. Kafwampi wasonekeli nindi: ‘Nahandaña nakukuhwelela kwaMwana kaNzambi, wankeñeli, wadiheni kukoolami.’ (Ñal. 2:20) Eñañi, Pawulu wetejeli ifutu danyiloña. Welukili nindi ifutu danyiloña damukwashili chikupu.
Neyi twikala nayitoñojoka yoyimu yakumona ifutu danyiloña netu hichawaana chatwinkawu kudi Yehova halwetu, chumichi chikutukwasha hama. Chumichi hichinayi mukwila nawu kudishona kukumana hohenohuku. Etu amakwawu tukatwalekahu kulwisha iku kulukuka kwabulaña kumwekana sampu tuneñili mwituña dadiha. Ilaña anukenu nenu: Antu abulaña kuzeya diwu akatambwila wuloku. Tudi dehi kwakwihi nefuku dalema dikaleta Wanta waNzambi, kuwunda nikuleñela antu ejima ashinshika kwikala awanina cheñi. Fuukulenuhu chikupu kwiñila muWanta hela chakwila twamonaña lukadi lwaluvulu.
(Añalija 3:1) Enu aÑalija abula maana! Hinyi wunayiluwañeshi ñaana henohu enu ayilumbulwilili chiwahi kutalisha hadi Yesu Kristu apopeleliwu hamutondu?
it-1 880
Mukanda Kudi Añalija
Pawulu chasonekeliyi nindi, “Enu aÑalija abula maana!” kwosi wunsahu wamwekeshaña nawu wadiña nakutena antu amu afuma kuchisemwa chafumini kukabeta kaluwunda kaÑalijaku. (Ñal 3:1). Ilaña, Pawulu wadiña nakuzuwila antu amu amuchipompelu etejeli kuyiluwañesha natushidikilu twawaYudeya mukachi kawu, aYudeya akeñeleña kudimikila awenawu nshimbi kufuma mushimbi jaMosi ‘nikudimona neyi aloña kuhitila muchikuhwelelu’ chahaniniwu kwesekeja nachitiyañenu chachiha. (2:15–3:14; 4:9, 10) Hela chochu, “yipompelu yejima yamuÑalija” (1:2) yasonekeleliyi Pawulu mwadiña aYudeya niantu abulili kwikala aYudeya, iwu mukanda awisonekeleli kudi antu alamishiliwu nakwikala aYudeya nianjentili abulili kwalama nawa chakadi nikujina amakwawu adiña antu akunyuuza yacheñi. (Yil 13:14, 43; 16:1; Ñal 5:2) Ejima wawu, wayiteneni nindi akwaKristu Añalija muloña adiña nakushakama mwiluña dateneneñawu nawu Ñalija. Mazu asonekeliyi Pawulu muniwu mukanda wayisonekeleli antu elukiliyi ashakamineña mukabeta kambwela kaRoma, bayi neyi antu antu abulili kwilukayi ashakamineña kuluwundaku, hadaha abuliliyi nikwendelayi.
Kutaña Bayibolu
(Añalija 2:11-21) Hela chochu, Kefwasi chenjiliyi kuAntiyoki, namulejelimu chakadi kumuhita mumbadi, muloña welili chuma chatama. 12 Muloña amayala amu afumini kudi Yakoba henohu kanda ashiki, wadiilileña hamu nawantu akunyuza; ilaña chashikiliwu, walekeli kwila chumichi nawa wadaambwili nawu muloña watiyili woma antu adiña aalama. 13 NiaYudeya ejima ashalilihu, niwena adibombeli hamu nindi muniwu wunfwikiji, chakwila niBaranaba niyena wahuñumukili nawunfwikiji wawu. 14 Ilaña chinamweni nami hiyanakwenda mwaya chalala chansañu yayiwahiku, namwihwili Kefwasi hamesu awu ejima nami: “Neyi eyi kaYudeya, wunakushakama neyi chelañawu antu akunyuza bayi neyi chelañawu aYudeyaku, wunateli kukanjikija ñahi antu akunyuza kulonda ashakameña kwesekeja namwaya yaaku yawaYudeya?” 15 Etu twela kuchisemwa tudi aYudeya, bayi neyi akwanshidi akunyuzaku, 16 tweluka netu muntu hiyamutenaña nawu waloña muloña wanyidimu yanshimbiku, chiña hohu neyi yakuhwelela mudi Yesu Kristu. Dichi tunamukuhweleli Kristu Yesu kulonda atuteni kuloña nanochu chitunamukuhweleli Kristu, bayi nanyidimu yanshimbiku, muloña kwosi muntu hela wumu akatenawu kuloña muloña wanyidimu yanshimbiku. 17 Neyi etu tunakufwila netu atuteni kuloña kuhitila mudi Kristu, ilaña atuwana nawu tudi akwanshidi, komana Kristu diyi mukwakukoña nshidi tahindi? Inehi! 18 Neyi yuma yinahumwini niyituña cheñi, dikwila nawu namwekeshi nami nidi mukwakufumpa nshimbi. 19 Nafwili muloña wakwovwahila nshimbi kulonda niikali wamumi kudi Nzambi. 20 Anampopeli hamutondu hamu naKristu. Hiyami inakuhandaku, ilaña Kristu wadikunda nanami diyi wunakuhanda. Chalala, chihandilu chinahandaña hayinu mpinji mumujimba wawuntu, nahandaña muloña wakukuhwelela mudi Mwana kaNzambi, wankeñeli nawa wadihanini yomweni kukoola ami. 21 Ami hinakaanaña luwi lwaNzambi lwaswejaku, muloña neyi chakwila muntu wekalaña waloña kuhitila munshimbi, dikwila nawu Kristu wafwili chamukunkulwayi.