Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
JUNE 3-9
YUMA YALEMA YAMWIZU DANZAMBI | AÑALIJA 4-6
“‘Chinjikijilu Chayuma Yikamwekana Kumbidi’ Chichinatukundami”
(Añalija 4:24, 25) Iyi yuma yadiña hichinjikijilu chayuma yikamwekana kumbidi; muloña awa ambanda ayedi emenañaku yitiyañenu yiyedi, chimu chakuMpidi yaSinayi, chavwalaña anyana nakuyitwala muwuduñu, nawa diyi Haga. 25 Dichi, Haga hiSinayi, mpidi yamuArabiya nawa makonu wemenañaku Yerusalema, muloña wudi muwuduñu hamu nawanyanindi.
it-1 1018 ¶2
Haga
Kwesekeja nansañu yakapostolu Pawulu, Haga atenayi muchinjikijilu chayuma yikamwekana kumbidi wemenañaku aIsarela akumujimba, adiña muchitiyañenu chaNshimbi naYehova chatiyañeneniwu haMpindi yaSinayi, chitiyañenu chaletesheli ‘anyana kuyitwala muwuduñu.’ Muloña wakwila antu aswejeli kwila nsindi, iwu muza wakañenyi kuhemba nshimbi jejima jachitiyañenu. Hayina mpinji aIsarela hiyadiña asubukaku ilaña adiña akwashidi atelela kufwa; dichayiletesheli kwikala anduñu. (Ywn 8:34; Rom 8:1-3) Yerusalema mukala weneni wamumafuku aPawulu awesekejeli naHaga, wadiña muwuduñu hamu nawanyanindi, wemeneneñaku kuloñesha kwawaIsarela akumujimba. Ilaña akwaKristu akuspiritu atondawu, ekala anyana ‘kaYerusalema wamwiwulu,’ mumbanda waNzambi muchifwikija. Kufwana Sara mumbanda wasubuka, iyi Yerusalema, kanda yikaleñahu dehi muwuduñu. Neyi chochamukabishiliwu Isaka kudi Ishimeli, nianyana ‘kaYerusalema wamwiwulu’ iyasubulawu kudi Mwana niwena ayikabishili kudi anyana kaYerusalema wadiña muwuduñu. Hela chochu, Haga nianyanindi iyahañiliwu, emenañaku muza waIsarela wakumujimba iyakaaniniwu kudi Yehova.—Ñal 4:21-31; talenu cheñi Ywn 8:31-40.
(Añalija 4:26, 27) Ilaña Yerusalema wamwiwulu wasubuka, nawa diyi mama yetu. 27 Muloña chasonekewa nawu: “Zañalalaku eyi mumbanda nshinta wabulaña kuvwala anyana; eyi mumbanda wabulaña kutiya nyisoñu yakuvwala, bulaku nyiñula namuzañalu; muloña anyana kamumbanda anashiyiwu chisayikila kudi nfumwindi, anabadiki kuvula anyana kamumbanda wukweti nfumwindi.”
Ikalenu naChikuhwelelu Chakola muWanta
11 Hela chakwila chitiyañenu chaAbarahama chashikijeweli hampinji yaswaninuwu anyana kaAbarahama Ituña daChikaninu, Nsona yashimunaña nawu anyana kaAbarahama amakwawu akayuula mwiwulu. (Ñal. 4:22-25) Hakushikijewa kwaniwu wuprofwetu walema neyi chalumbulwiliyi kapostolu Pawulu chamonenenuwu naspiritu, mwana watachi wamuchisaka chaAbarahama wadiña Kristu nawa anyana amuchiyedi ateneniyi hiyakwaKristu awayishewa naspiritu a 144,000. (Ñal. 3:16, 29; Chim. 5:9, 10; 14:1, 4) Mumbanda wavwalili mwana diyi ‘Yerusalema wamwiwulu,’ kuloñesha kwaNzambi kwamwiwulu mudi yileñaleña yaNzambi yashinshika yakuspiritu. (Ñal. 4:26, 31) Neyi chakaninuwu muchitiyañenu chaAbarahama, mwana kamumbanda wakaleta nkisu jajivulu kudi antu.
(Añalija 4:28-31) Dichi enu anakwami, mudi anyana achikaninu neyi chadiñayi Isaka. 29 Ilaña neyi chichadiña kunyima, mwana wavwalikili kwesekeja nachisemwa, watachikili kukabisha mwana wavwalikili kwesekeja namwaya spiritu, dichi chichidi nimakonu. 30 Hela chochu, komana nsona yahosha nawudi? Yahosha nawu, “Muhañi iwu ñamba wamumbanda nimwanindi, muloña mwana kaniwu ñamba wamumbanda, chalala, hamba kekala nswana hamu namwana kamumbanda wasubukaku.” 31 Dichi, enu anakwami, tudi anyana bayi kaniwu ñamba wamumbandaku, ilaña tudi anyana kaniwu mumbanda wasubuka.
Kukeña Yuma Yalema yakuSpiritu
(Añalija 4:6) Dichi, chineli mudi anyana, Nzambi natemeshi spiritu yaMwanindi munyichima yetu, nawa yabidikaña nawu: “Aba, Tata!”
Komana Mweluka?
Muloñadi Yesu mukulomba kwindi chamuteneneniyi Yehova nindi “Abba, Tata”?
Izu dachiAramaic da ʼabaʼʹ dinateli kutalisha “kutata” hela “Eyi Tata.” Hadi mapampa ejima asatu awanika awa mazu muNsona, ayizatisha hakulomba nawa hakumutena Tata yetu wekala mwiwulu, Yehova. Muloñadi chadizatishililiyi idi izu?
Bayibolu yaInternational Standard Encyclopedia yashimuna nawu: “Nhoshelu yadiña nakuzatishawu mumpinji yaYesu, ʼizu da abbāʼ adizatishileña hakuhanjeka nawantu alemeshawu nianyana hakulemesha atata jawu.” Yadiña nhoshelu yakavumbi nawa anyana ayidizileña henohu achidi atwansi. Yesu niyena wazatishilieña nhoshelu yoyimu hakulomba kudi Tata yindi. Mwitempa daÑesemani henohu kunashali hohu maora antesha nakufwa, Yesu wamuteneni Yehova mukulomba kwindi namazu akwila nawu “Aba, Tata.”—Maku 14:36.
Bayibolu yaInternational Standard Encyclopedia yabombelelihu nawu izu da “ʼAbbāʼ adizatishili nankashi wanyi hakumutena Nzambi munyikanda yawaYudeya mumpinji yawaGiriki niaRoma, chakadi nikujina chadi kuyikalili kuzatisha ijina diyabulili kwinjilila hakumutena Nzambi.” Hela chochu, “Yesu . . . wazatishiliyi idi izu mukulomba hakulumbulula kukola kwawubwambu Windi naNzambi.” Izu da “Abba” dekala cheñi muNyikanda yiyedi—ejima ayedi awanikaña munyikanda yakapostolu Pawulu—chamwekeshaña nawu akwakristu akusambila niwena adizatishileña mukulomba.—Aroma 8:15; Añalija 4:6.
(Añalija 6:17) Kufuma dalelu, bayi kwikala muntu wukunkabishañaku, muloña ami nidi nayibata hamujimba wami yinakumwekesha nawu nidi nduñu yaYesu.
Komana Mweluka?
Kapostolu Pawulu watalishili mudihi chahosheli nindi: “Nidi nayibata hamujimba wami yinakumwekesha nawu nidi nduñu yaYesu.”?—Añalija 6:17.
▪ Mazu aPawulu atela aleteshela akwaKristu akusambila kutoñojoka yuma yayivulu. Chakutalilahu, kushankulu azatishileña chikuñu chinachinani nakesi hakuyisha nachu ankoli, amakombi nianduñu chinjikijilu. Neyi mutu amusha chinjikijilu kuzatisha ichi chikuñu, mufunda wamwekesheleña nawu owu muntu washinshika wanyi.
Hela chochu, bayi neyi mpinji yejima mufunda wamwekesheleña kubula kashinshiku. Antu amavulu kunyima azatishileña mufunda hakwambula nachu antu amumuchidi wumu hela ansakililu yimu. Chakutalilalu, kwesekeja naTheological Dictionary of the New Testament, “aSiriya adilishili kwikala ajila kudi nzambi aHadadi niAtargatis kuzatisha yeniyi yinjikijilu hamakasa hela hanshiñu yawu . . . Ifu damutondu wa ivy adizatishileña hakulamika nkishi wawu Dionysus.”
Antu amavulu makonu ahoshaña nawu Pawulu wadiña nakutena yibata yadiñayu nayu yatambwililiyi mukukala kwashiyashana muchihandilu chindi hampinji yazatileñayi wumishonali. (2 Akorinda 11:23-27) Hadaha Pawulu wateneneña chihandilu chindi, bayi neyi yibata yahamujimbaku, ilaña yakumwilukilaku nawu himukwaKristu.
Kutaña Bayibolu
(Añalija 4:1-20) Dichi inakuhosha nami nswana neyi wuchidi mwana wanyanya, haambukaña nanduñu hela hantiku, hela chakwila diyi mwanta wayuma yejima, 2 ilaña amuyuulaña kudi atupitawu nikudi atulama kushika tuhu niifuku datoñwelawu chadimu kudi tata yindi. 3 Chochimu ninetu nawa, hampinji yitwachidiña anyana anyanya, twadiña muwuduñu wayuma yawansi yamukaayi. 4 Ilaña mpinji chiyashikili chikupu, Nzambi watemesheli Mwanindi, owu wavwalikili kudi mumbanda nawa wadiña munshimbi, 5 kulonda yafweti wufwetu wakukuula nachu antu adi munshimbi hakwila nawu atwiteji kwikala anyana. 6 Dichi, chineli mudi anyana, Nzambi natemeshi spiritu yaMwanindi munyichima yetu, nawa yabidikaña nawu: “Aba, Tata!” 7 Dichi, himudi cheñi anduñuku, ilaña mudi anyana; nawa neyi mudi anyana, dikwila nawu Nzambi nayilishi cheñi kwikala answana. 8 Hela chochu, hampinji yimwabulili kumwiluka Nzambi, mwadiña anduñu kudi anzambi akutwamba. 9 Ilaña ichi, chineli munamwiluki dehi Nzambi, hela netu chinayilukiwu dehi kudi Nzambi, muloñadi chimunakufuntila cheñi kuyuma yabula kukola nikuyuma yawansi yamukunkulwayi nakukeña kwikala anduñu ayumiyi cheñi? 10 Munakuhemba chikupu mafuku nitukweji niyilaaka niyaaka. 11 Inakuyakamena enu nami, hadaha nakisañani hohu ñovu jami hadi enu chamukunkulwayi. 12 Enu anakwami, nayilembeleli, ikalenu neyi chinidi ami, muloña ninami nadiña neyi chimudi enu. Himwankoñelihu katamaku. 13 Ilaña mweluka nenu chikatu chami dichanletesheli niyishimwini enu nsañu yayiwahi katachi. 14 Hela chakwila chikatu chami chadiña hikweseka kudi enu, himwansawili hela kummona neyi chuma chawuzonduku; ilaña mwantambwilili neyi kañelu kaNzambi, hela neyi Kristu Yesu. 15 Indi muzañalu wumwadiña nawu wudi kudihi? Muloña ami inakuyileja chalala nami, neyi chatweshekeli, mutenowu mwadi kufumisha mesu enu nakuyinyinkawu ami. 16 Dichi, komana nekali chilumbu chenu muloña nayilejaña chalala tahindi? 17 Antu amu anakufwila chikupu kuyikokola enu, ilaña dinu bayi neyi nankeñelu yayiwahiku; anakukeña kuyifumisha kudi ami kulonda mufwileña chikupu kuyilondela wena. 18 Hela chochu, chachiwahi mpinji yejima neyi muntu nakufwila chikupu kuyikokola enu nankeñelu yayiwahi nawa bayi neyi hampinji yinidi hamu nanenu hohuku, 19 enu anyanami inakeña, enu innakutiyila cheñi nyisoñu yakuvwala sampu munamwekeshi yilwilu yaKristu. 20 Inakutoña nami kachi nadiña hamu nanenu katatakichi kulonda nihoshi nenu munjila yaambukaku, muloña neluki wanyi chinatela kuyila enu.
JUNE 10-16
YUMA YALEMA YAMWIZU DANZAMBI | AEFWESESA 1-3
“Wunlomboli waYehova niMudimu Wuwazataña”
(Aefwesesa 1:8, 9) Watuvulishilili ilu luwi lwasweja nikutwinka maana ejima nikwiluka kwejima, 9 kuhitila mukutuleja yuma yajila yakujinda yankeñelu yindi. Kwesekeja nanomu mwatiyililiyi kuwaha, wafuukwilili chadimu
it-2 837 ¶4
Yuma Yajila Yakujinda
Wanta wawuMesiya. Munyikanda yasonekeliyi Pawulu washimwini hakumwekesha kwayuma yajila yakujinda yaKristu. HaAefwesesa 1:9-11 wahosha chatulejeliyi Nzambi “yuma yajila yakujinda” yankeñelu yindi, nawa wahosheli nindi: “Kwesekeja nanomu mwatiyililiyi kuwaha, wafuukwilili chadimu njila yakuyuulilamu yuma yikashika hampinji yatoñolawu, yakupompesha yuma yejima mudi Kristu, yuma yamwiwulu niyuma yahamaseki. Dikwila nawu mudi yena owu itwadikunda nindi nawa mwatutondelawu kwikala answana, nanochu chatutondeleliwu chadimu kwesekeja nakufuukula kwanowu wazataña yuma yejima kwesekeja namwaya nkeñelu yindi.” Iyi “yuma yajila yakujinda” munabombeli nfulumendi yaWanta waNzambi wawuMesiya. “Yuma yamwiwulu,” yateneneñayi Pawulu hiyanswana akayuuula naKristu muWanta wamwiwulu. ‘Yuma yahamaseki’ hiyantu akayuulañawu heseki. Yesu wayilejeli atumbanji twindi nindi yuma yajila yakujinda yatalisha kuWanta chahosheliyi nindi: “Enu anayinki kashinshi kakwiluka yuma yajila yakujinda yaWanta waNzambi.”—Mak 4:11.
(Aefwesesa 1:10) njila yakuyuulilamu yuma yikashika hampinji yatoñolawu, yakupompesha yuma yejima mudi Kristu, yuma yamwiwulu niyuma yahamaseki. Dikwila nawu mudi yena
“Yehova” Wapompeshaña Chisaka Chindi
3 Mosi walejeli aIsarela nindi: “Enu aIsarela; Yehova Nzambi yetu hiYehova wumu hohu.” (Kuhit. 6:4) Yuma yejima yakoñañayi Yehova yamwekeshaña nawu kufuukula kwindi kwalala. Dichi, ‘hampinji yakawanina nyaka yatoñolayi,’ Nzambi wakaloñesha ‘wunlomboli,’ dikwila nawu, ntanjikilu yindi yakunuñañeshelamu yileñaleña yindi yejima yikweti maana. (Tañenu Aefwesesa 1:8-10.) Muniwu wunlomboli mudi yibalu yiyedi. Chibalu chatachi chapompeshaña chipompelu chawawayishewa chakaya mwiwulu nawa chakekala mumakasa aYesu Kristu Mutu wawu wakuspiritu. Ichi chibalu chatachikili haPentekosta 33 C.E. hatachikiliyi Yehova kupompesha antu akayuula chimu naKristu mwiwulu. (Yil. 2:1-4) Chineli awayishewa ayitena kuloña kwakutambwila wumi kushindamena hefutu danyiloña damulambu waKristu, eluka chikupu nawu ‘hiyanyana kaNzambi’ atondewa.—Rom. 3:23, 24; 5:1; 8:15-17.
4 Chibalu chamuchiyedi chapompeshaña antu ejima akashakamaña muParadisa hamaseki akayuulewaña naWanta waKristu wawuMesiya. “Izaza deneni” didekala muchibalu chatachi chanidi izanvu. (Chim. 7:9, 13-17; 21:1-5) Muchiyuulu Chekombakaji Dimu Dayaaka, izaza deneni dakadibomba hamu nawantu amavulu akasañulawu. (Chim. 20:12, 13) Toñojokenu hakukooleka kutwakadiluñisha hakudimona nawantu akasañuka! Kunsa yayaaka ikombakaji, ‘yuma yahamaseki’ akayeseka kakukumishaku. Antu akamwekesha kashinshi diwu akekala ‘anyana kaNzambi’ hamaseki.—Rom. 8:21; Chim. 20:7, 8.
Kukeña Yuma Yalema yakuSpiritu
(Aefwesesa 3:13) Dichi, nayilembeleli nami bayi muzeya muloña wamakabi inamonaña kukoola enuku, muloña yumiyi diyinateli kuyiletela enu kulema.
Bayi Mwiteja Chuma Chidi Chejima Chiyikañeshi Kutambwila Kulemaku
15 Neyi tutwalekahu kwila nkeñelu yaYehova chakwashaña antu amakwawu kutambwila kulema. Pawulu wasonekeleli chipompelu chakuEfwesesa nindi: “Nalembi nami bayi muzeya nayihuñu yami yinamonaña hansañu yenuku; hichuma chenu chakudisamba nachu.” (Efwes. 3:13) Indi yihuñu yamweniyi Pawulu yaleñeleli akwaEfwesesa ‘kudisamba’ munjilanyi? Chineli Pawulu watwalekeluhu kuyikalakela hela chakwila wamweni yihuñu, chamwekesheli kudi Aefwesesa nawu kukooleka kwadiñawu naku kwakwikala akwaKristu kwaswejeli kubadika nawa kwadiña kwalema chikupu. Neyi chakwila Pawulu wazeyeli hamuloña wayihuñu yamweneñayi, chadi kumwekesha nawu wubwambu wawu naYehova, mudimu wawu wakushimwina nikuchiñeja hijadiña jalemaku. Kuumika kwaPawulu kwaleñeleli wuKristu kwikala walema nawa kwamwekesheli nawu kwikala kambanji kwabadika mulambu wudi wejima.
(Aefwesesa 3:19) nikwiluka kukeña kwaKristu, oku kwabadika kwiluka kulonda mwiikali chikupu nayilwilu yaNzambi yahanañayi.
cl 299 ¶21
‘Kwiluka Kukeña kwaKristu’
21 Izu dachiGiriki diyabalumunawu nawu ‘kwiluka’ datalisha “mukwiluka chikupu kuhitila mukwilahu chuma.” Neyi tumwekesha kukeña neyi cheliliyi Yesu, kudihana kukoola akwetu, kuyikwasha neyi anakankili, kuyanakena chakufuma hamuchima, dihu dinu hitukwikala nayilwilu yekala naYesu. Kuhitila mukwilahu chuma tukwiluka “kukeña kwaKristu, oku kwabadika kwiluka.” Twanukeña netu neyi tumwimbujola Kristu tukuswina kwakwihi namuntu wembujoliliyi chikupu, Nzambi yetu wukweti kukeña, Yehova.
Kutaña Bayibolu
(Aefwesesa 1:1-14) Ami Pawulu, kapostolu kaKristu Yesu atondeliwu kwesekeja nankeñelu yaNzambi, kudi enu akwakujila adi muEfwesesa nawa ashinshika adikunda naKristu Yesu: 2 Luwi lwasweja nikuwunda jafumaña kudi Tata yetu Nzambi nikudi Mwanta Yesu Kristu jiikali nanenu. 3 Kulema kwiikali kudi Nzambi, Tata yaMwanta wetu Yesu Kristu, muloña natukiswili nkisu jakuspiritu jejima mumaluña amwiwulu muloña wakudikunda naKristu, 4 neyi chatutondeliyi kulonda tudikundeña nindi henohu kanda aali chikuku chakaayi, kulonda twiikali ajila nawa akadi ihuji kumesu indi mukukeña. 5 Muloña yena watutondeleli chadimu nakutwiteja kwikala anyanindi kuhitila mudi Yesu Kristu, kwesekeja nanomu mwatiyililiyi kuwaha ninanomu mwaya nkeñelu yindi, 6 kulonda amuhameki muloña wakulema kwaluwi lwindi lwasweja lwatutiyililiyi chawaana kuhitila mudi mwanindi akeñayi. 7 Kuhitila mudi yena, atukuula nefutu danyiloña damashi indi, dikwila nawu kutwanakena nshidi jetu kwesekeja nakuvula kwaluwi lwindi lwasweja. 8 Watuvulishilili ilu luwi lwasweja nikutwinka maana ejima nikwiluka kwejima, 9 kuhitila mukutuleja yuma yajila yakujinda yankeñelu yindi. Kwesekeja nanomu mwatiyililiyi kuwaha, wafuukwilili chadimu 10 njila yakuyuulilamu yuma yikashika hampinji yatoñolawu, yakupompesha yuma yejima mudi Kristu, yuma yamwiwulu niyuma yahamaseki. Dikwila nawu mudi yena 11 owu itwadikunda nindi nawa mwatutondelawu kwikala answana, nanochu chatutondeleliwu chadimu kwesekeja nakufuukula kwanowu wazataña yuma yejima kwesekeja namwaya nkeñelu yindi, 12 kulonda Nzambi amuhameki nikumulemesha kuhitila mudi etu twasambilili kukuhwelela mudi Kristu. 13 Ilaña ninenu mwamukuhweleleli chelili mutiyi mazu achalala, nsañu yayiwahi yawamwinu wenu. Chimwakuhweleleli, ayilamikili kuhitila mudi yena naspiritu yajila yakaniniwu, 14 oyu yekala chinjikijilu chawuswana wetu wakumbidi, kulonda Nzambi yakakuuli antu jindi kuhitila mwifutu danyiloña kulonda akamuhameki nikumulemesha.
JUNE 17-23
YUMA YALEMA YAMWIZU DANZAMBI | AEFWESESA 4-6
“Dimanyekenu Yitwa Yanjita Yejima Yafuma Kudi Nzambi”
(Aefwesesa 6:11-13) Dimanyekenu yitwa yanjita yejima yafuma kudi Nzambi kulonda mutweshi kwimana akola mbe-e kutufuta twaDiyabolu; 12 muloña tunakulwisha, bayi nawantu akweti nyisunyi nimashiku, ilaña tunakulwisha najinfulumendi, nawakwawuswa, nawanyuuli akaayi kaniwu mwidima, namazaza awandemoni adi mumaluña amwiwulu. 13 Dichi muloña wachumichi, dimanyekenu yitwa yanjita yejima yafuma kudi Nzambi, kulonda mutweshi kwimika mushindu mwifuku datama, nawa neyi munamanishi dehi yuma yejimiyi, mwimani akola mbe-e.
Enu Atwansi Dikañenu naDiyabolu
KAPOSTOLU PAWULU wesekejeli chihandilu chanetu akwaKristu namushidika wunadimanyeki chikupu kuzuña njita mukamwihi nayitwa yakumakasa. Hela chochu, njita yitwazuñaña yakuspiritu, bayi yakumujimbaku. Ilaña, ayilumbu jetu ekala kwoku. Satana niandemoni himashidika akuluka yitembi mukwasa njita. Hakusambila, tunateli kufwa mutentu. Sweje-e atwansi akwaKristu anateli kutiya woma. Anateli kukuhwelela ñahi nawu akushinda yileñaleña yatama yakuspiritu? Walala wudi wakwila nawu, atwansi anateli kushinda nawa anakushinda! Muloñadi? Muloña atambulaña “ñovu kufuma kudi Mwanta.” Hiyashindamenaña hohu hakutambula ñovu kudi Nzambiku, ilaña kudi yuma yikwawu yelañawu. Adiloñeshaña kwasa njita. Neyi chelañawu mashidika adiza chikupu, niwena adimanyekaña “yitwa yanjita yejima yafuma kudi Nzambi.”—Tañenu Aefwesesa 6:10-12.
(Aefwesesa 6:14, 15) Dichi, imanenu akola mbe-e, iku munakasi mushipi wachalala mumbunda yenu nawa vwalenu chuma chakujika hantulu chakuloña, 15 nikuvwala nkwabilu kunyendu yenu yinakumwekesha nawu munadiloñeshi kushimwina nsañu yayiwahi yakuwunda.
Enu Atwansi Dikañenu naDiyabolu
4 Munjila yoyimu, chalala chitwadizaña Mwizu daNzambi chatukiñaña kuwubanji wakuspiritu wunakutandishawu kudi nsakililu yakutwamba. (Yow. 8:31, 32; 1 Yow. 4:1) Neyi tukeña chalala chaNzambi, chikutukwasha kusenda “chuma chakujika hantulu,” dikwila nawu tukwovwahilaña nshimbi jaNzambi jaloña. (Mas. 111:7, 8; 1 Yow. 5:3) Kubombelahu, neyi twiluka chikupu chalala chaMwizu daNzambi, chikutukwasha kwimana chakola nikudikiña nachu kudi ayilumbu jetu.—1 Pet. 3:15.
7 Ichi chakutalilahu chachiwahi chinakumwekesha nshimbi jaYehova jaloña chijinateli kukiña muchima wetu wachifwikija! (Yish. 4:23) Neyi chabulañayi mushidika kuhimpa chuma chakujika hantulu chakutuña nachikuñu nachakutuña nachifoyu, ninetu hitwatela kuhimpa nshimbi jaYehova jaloña nayuma yitunamoni netu yayiwahiku. Chuma chikubula kutukiña. (Yish. 3:5, 6) Ilaña, twatela kudishinshikaña mpinji yejima nakumona netu ‘chikuñu chakujika hantulu’ chatwinkayi Yehova chakukasa chakola.
10 Chineli nkwabilu javwalileñawu mashidika awaRoma jayikwashileña munjita, munjila yoyimu nkwabilu jachifwikija javwalaña akwaKristu jayikwashaña kushimwina nsañu yakuwunda. (Isa. 52:7; Rom. 10:15) Hela chochu, twatela kwikala ahamuka hakwila nawu tushimwini neyi tunawani antu. Bo wudi nayaaka 20, wahosheli nindi: “Natiyileña woma kuyishimwina akwetu akashikola”. Ilaña wahosheli cheñi nindi: “Natiyili nsonyi. Chinanuka, nakañanyaña kwiluka chuma chaletesheleña. Ichi natiyaña kuwaha kuyishimwina akwetu.”
(Aefwesesa 6:16, 17) Kubombela hayuma yejimiyi, nonenu nkebu yeneni yachikuhwelelu, yimukutwesha kujima nachu nyivu yakesi yanowu watama. 17 Cheñi, vwalenu kumutu wenu itepa dawamwinu, nawa sendenu mpoku yakabali yaspiritu muchikasa chenu, dikwila nawu mazu aNzambi,
Enu Atwansi Dikañenu naDiyabolu
13 “Nyivu yakesi” yikwawu yinateli kuyasayi Satana hinsañu yakutwamba yahoshañayi hadi Yehova, yakwila nawu hayakamenañaku nawa wayikeña wanyi. Ida wudi nayaaka 19 wadimweneña nindi washikilamu wanyi, wahosheli nindi: “Natoñojokeleña nami Yehova hekala kwakwihi nanamiku nawa hakeñaña kwikala Ibwambu damiku.” Wamanishili ñahi iku kukala? Ida wahosheli nindi: “Kupompa dikwankwashili kukolesha chikuhwelelu chami. Neyi tunakupompa nakwileñahu wanyi muloña natoñojokeleña nami kwosi wukutiya chinukuhosha. Ilaña chayinu mpinji nadiloñeshaña nawa nakulañahu kapampa kayedi hela kasatu hakupompa. Chankalilaña, ilaña natiyaña kuwaha neyi nakulahu. Amanakwetu niahela ankoleshaña chikupu. Mpinji yejima chinafuma kukupompa, natiyaña muzañalu hakwiluka nami Yehova wankeña.”
16 Neyi chochakiñaña itepa woñu wamushidika, “itepa dakuchiñeja dawamwinu” dakiñaña yitoñojoka yetu. (1 Tesa. 5:8; Yish. 3:21) Kuchiñeja kwatukwashaña kukuhwelela muyikaninu yaNzambi nawa kwatukwashaña kumanisha kukala munjila yayiwahi. (Mas. 27:1, 14; Yil. 24:15) Dichi neyi tunakukeña netu “itepa” detu ditukiñeña, twatela kudivwala mpinji yejima kumutu, chatela tudisendeña kumakasa.
20 Pawulu wesekejeli mpoku yakabali Nezu daNzambi datwinkayi Yehova. Twatela kwiluka chakudizatisha chiwahi hakuhakwilaku yuma yitwakuhwelela hela neyi tunakukeña kuhimpa yilwilu yetu. (2 Kor. 10:4, 5; 2 Tim. 2:15) Munateli kuzatisha ñahi chiwahi Izu daNzambi? Sebastian wudi nayaaka 21 wahosheli nindi: “Nasonekaña vasi yimu mukapetulu kinnatañi muBayibolu. Mavasi ejima inakeña nayibombaña nakuyisha mumukanda wumu. Kwila mwenimu kwankwashaña kwiluka yitoñojoka yaYehova.” Daniel itwatena hakusambila wahosheli nindi: “Neyi inakutaña Bayibolu, nasonekaña mavasi innamoni nami anateli kukwasha antu mumudimu wakushimwina. Antu atiyaña kuwaha neyi akumona nawu walemesha Bayibolu nawa wunakufwila kuyikwasha.”
Kukeña Yuma Yalema yakuSpiritu
(Aefwesesa 4:30) Cheñi, bayi muneñeshaña spiritu yajila yaNzambiku, muloña diyi yinayilamikiwu nachu kushika nikwifuku dakayikuulawu nefutu danyiloña.
it-1 1128 ¶3
Kujila
Spiritu Yajila. Mpinji yejima Yehova wazatishaña ñovu yindi hela spiritu, hakushikija nkeñelu yindi. Yakadi majilu, yawunyonji, yakujinda nawa ayizatishaña hohu kudi Nzambi. Dichayitenenañawu nawu “spiritu yajila” nawa nawu ‘spiritu yakujila.’ (Ms 51:11; Luk 11:13; Rom 1:4; Efw 1:13) Spiritu yajila yazatikaña mudi muntu hiñovu yaspiritu yakujila hela yawunyonji. Yilwilu yejima yawuzondu hela yuma yatama ‘yaneñeshaña’ spiritu yajila. (Efw 4:30) Hela chakwila spiritu yajila himuntuku, yemenañaku Nzambi wajila dichi yinateli ‘kuneña.’ Kwila yuma yejima yatama kunateli ‘kujima kesi kaspiritu.’ (1Te 5:19) Neyi muntu yatwalekehu kwila yuma yatama, ‘wukuneñesha’ spiritu yajila yaNzambi, chumichi chikuletesha Nzambi kwikala chilumbu chanowu muntu wunadikañi. (Isa 63:10) Muntu wunakuneñesha spiritu yajila nateli kutachika kuyisawula, Yesu Kristu wahosheli nindi nshidi yamuchidiwu akayanakena wanyi munshakaminu yamakonu nikumbidi.—Mat 12:31, 32; Mak 3:28-30; talenu SPIRITU.
(Aefwesesa 5:5) Muloña enu aweni mweluka chikupu chumichi nenu, kwosi chivumbi, hela muntu wakoñaña yuma yamajilu, hela mukwalwisu, dikwila nawu mukwakupesha, wakaswana Wanta waKristu niwaNzambiku.
it-1 1006 ¶2
Lwisu
Lwamwekenaña Muyilwilu. Lwisu lwamwekanaña hatooka muyilwilu yatama yamwekeshañayi muntu nimukufwila tuyuma twanyanya. Yakoba watuleja nindi kufwila kwatama neyi kusweja, kwaleñelaña muntu kukoña nshidi. (Yak 1:14, 15)
Muntu wudi nalwisu anateli kumwilukila kuyilwilu yindi. Kapostolu Pawulu wahosheli nindi kwikala nalwisu kwatalisha mukwikala mukwakupesha. (Efw 5:5) Lwisu lwaniwu muntu lwamuleñelaña kwilisha chuma chinakufwilayi kwikala nzambi yindi, nakuchilemesha kubadika kudifukula kudi Nleñi.—Rom 1:24, 25.
Kutaña Bayibolu
(Aefwesesa 4:17-32) Dichi, inakuyileja enu chumichi nikuyilembelela mwijina daMwanta nami, bayi mwendeña cheñi neyi chendañawu akwanyuza muyitoñojoka yawu yamukunkulwayiku. 18 Wena adi mumwidima muyitoñojoka nawa anadaambuli kuwumi waNzambi, muloña hiyakeñaña kumwilukaku, muloña wakuchinchika kwanyichima yawu. 19 Chalekeliwu kutiya nsonyi, adihanini awenawu kuyilwilu yawukapwa nsonyi nikwila yuma yawuzondu yejima nalwisu. 20 Ilaña enu mwadizili nikwiluka nenu Kristu dichekalayi wanyi, 21 neyi chalala mwamutiyili nawa ayidizishili kuhitila mudi yena, neyi chochidi chalala mudi Yesu. 22 Ayilejeli kuvuula wuntu wawukulu wesekana nayilwilu yenu yimwadiña nayu kunyima, wunakudimbewa nakufwila kwatama kwayiluwañeshaña. 23 Nawa mwatela kutwalekahu kubalumuka nakwikala amaha muyitoñojoka nimuyilwilu yenu, 24 nikuvwala wuntu wawuha waleñeliwu kwesekeja nankeñelu yaNzambi mukuloña kwalala nimukashinshi.25 Dichi, chineli munaleki dehi kudimbana, muntu-himuntu yahosheña chalala namukwawu, muloña tudi yiidi yamujimba wumu. 26 Zuwenu, ilaña bayi muvulumunaku; bayi muhumisha itena iku saña mwahililaku; 27 bayi mumushila Diyabolu hakwiñililaku. 28 Muntu weyaña yaleki kwiya, ilaña yazati nañovu, yakalakali mudimu wawuwahi namakasa indi kulonda yekali nayuma yakwinkahu muntu wunakaankili. 29 Mukanwa kenu bayi mwidika mazu atokaku, chiña amawahi hohu, anateli kutuña akwenu hampinji yinakukeñawu kuyikwasha kulonda atweshi kuhetesha antiyilili. 30 Cheñi, bayi muneñeshaña spiritu yajila yaNzambiku, muloña diyi yinayilamikiwu nachu kushika nikwifuku dakayikuulawu nefutu danyiloña.31 Lekenu nkunyi yejima, kuhila, kuzuwa, kuzazoka, nhoshelu yakasawuntu niyuma yejima yatama. 32 Ilaña, ditiyilenuña luwi wumu namukwawu, wushona nikudanakena wumu namukwawu neyi chayanakeneniyi Nzambi kuhitila mudi Kristu.
JUNE 24-30
YUMA YALEMA YAMWIZU DANZAMBI | AFWILIPI 1-4
“Bayi Mwakama Chuma Hela Chimuku”
(Afwilipi 4:6) Bayi mwakama chuma hela chimuku, ilaña muyuma yejima, mukulomba nimukulomba kwakulembelela nimukusakilila, mulejenuña Nzambi yuma yonsu yimunakukeña;
“Kuwunda KwaNzambi . . . Kwabadika Kwiluka Kwejima”
10 Chumanyi chinateli kutukwasha kubula kusweja kwaakama nikwikala ‘nakuwunda kwaNzambi’? Mumazu ayisonekeleliyi Pawulu akwaFwilipi anakumwekesha nawu kulomba dikunateli kuyikwasha kubula kwaakama. Dichi neyi tunakwakama, twatela kulomba. (Tañenu 1 Petulu 5:6, 7.) Mulombenu Yehova nachikuhwelelu nawa ilukenu nenu wayakamenaña. Lombenu kudi yena “nakusakilila” hayuma yayiwahi yinakuyililayi. Tukusweja kumukuhwelela neyi twiluka netu “nateli kukoña yuma yabadika chikupu yuma yitwamulombaña hela yitwatoñojokaña.”—Efwes. 3:20.
(Afwilipi 4:7) nawa kuwunda kwaNzambi kwabadika kwiluka kwejima kwakahemba nyichima yenu niyitoñojoka yenu kuhitila mudi Kristu Yesu.
“Kuwunda KwaNzambi . . . Kwabadika Kwiluka Kwejima”
7 Chakadi nikujina amanakwetu muFwilipi chatañiliwu mukanda wayisonekeleliyi Pawulu anukili yuma yamumwekeneni. Nawa kwosi wumu hakachi kawu wakuhweleleli nindi Yehova wukumupulwisha muyina njila. Muloñadi Pawulu chayisonekeleliyi? Wayilejeleña kubula kwaakama. Lombenu kulonda mwikali nakuwunda kwaNzambi. Ilaña ilukenu nenu “kuwunda kwaNzambi kwabadika kwiluka kwejima.” Chumichi chinatalishi mudihi? Akwakubalumuna amakwawu abalumuna awa mazu nawu “kwabadika yafwilañayi muntu” hela “kwabadika yuma yejima yafuukulañayi muntu.” Dichi Pawulu watalishili mukwila nindi “kuwunda kwaNzambi” kwasweja kubadika yuma yidi yejima yitunateli kufwikija. Etu antu tukutwesha wanyi kumona njila yakumanishilamu kukala. Ilaña Yehova yena weluka nawa nateli kwila yuma yitunabuli kukuhwelela.—Tañenu 2 Petulu 2:9.
“Kuwunda KwaNzambi . . . Kwabadika Kwiluka Kwejima”
16 Yumanyi yafumañamu neyi twikala ‘nakuwunda kwaNzambi kwabadika kwiluka kwejima’? Nsona yakula chiyahosha nawu ‘kwakahemba nyichima yetu niyitoñojoka yetu kuhitila mudi Kristu Yesu.’ (Fwi. 4:7) Izu dadeni dachiGiriki dabalumunawu nawu “kuhemba,” adizatishileña muwushidika. Adizatishileña kutalisha kudi mashidika enkeliwu kuhemba mpwembu yamusumba kushankulu. Musumba waFwilipi wadiña hakachi kanyisumba yahembeleñawu. Antu ashakamineña mumusumba waFwilipi akaamineña chiwahi, muloña elukili nawu mashidika anakuhemba yiisu yamusumba. Munjila yoyimu, neyi tukweti “kuwunda kwaNzambi,” nyichima niyitoñojoka yetu yikwikala mukuwunda. Tuneluki netu Yehova watwakamenaña nawa nakukeña nindi tushakameña chiwahi. (1 Pet 5:10) Chitweluka netu watwakamenaña, chikutukwasha kukubula kwakama hela kuneña.
Kukeña Yuma Yalema yakuSpiritu
(Afwilipi 2:17) Dichi, hela chakwila anakunhuñununa neyi mulambu wavinyu hamulambu wamudimu wajila wumunakuzata muloña wachikuhwelelu chenu, natiyi kuwaha nikuzañalela hamu nanenu wejima wenu.
it-2 528 ¶5
Nyilambu
Nyilambu yakuhuñununa. Nyilambu yakuhuñununa ayilambwileña hamu nanyilambu yikwawu, sweje-e heñililiwu aIsarela Mwituña daChikaninu. (Kuc 15:2, 5, 8-10) Mwabombeleli vinyu (“walwa washetana”) nawa ayihuñunwinineña hakameña. (Kuc 28:7, 14; esekejenu Kwi 30:9; Kuc 15:10.) Kapostolu Pawulu wayisonekeleli akwaKristu amuFwilipi nindi: “Hela chakwila anakunhuñununa neyi mulambu wavinyu hamulambu wamudimu wajila wumunakuzata muloña wachikuhwelelu chenu, natiyi kuwaha.” Wazatishili mulambu wakuhuñununa muchifwikija, hakumwekesha kudihana kwadihaniniyi hakuyikalakela akwawu akwaKristu. (Fwi 2:17) Hashimbwili wanyi henohu kanda yafwi, wamusonekeleli Timotewu nindi: “Muloña ami anatachiki dehi kunhuñununa neyi mulambu wavinyu, nawa mpinji yami yakukasunuka yinashiki dehi mukamwihi.”—2 Ti 4:6.
(Afwilipi 3:11) kulonda nimoni neyi chakwila nateli kwikala hakusañuka kwatachi kufuma mudi afu.
“Kusañuka Kwakusambila”—Kunakumwekana Makonu!
5 Chamuchiyedi izanvu dawawayishewa ‘dawaIsarela ambala aNzambi’ akamuwana Mwanta Yesu Kristu muwanta wamwiwulu, muyakekalawu “naMwanta haya nyaka.” (Añalija 6:16; 1 Atesalonika 4:17) Iyi nsañu ayitenaña nawu “kusañuka kwakusambila”. (Chimwekeshu 20:6) Kusañuka kweniku chikwakakuma, mpinji yakusañula yihita yawantu hamaseki nachikuhwelelu chakwikala nawumi wahaya nyaka muParadisa yakashika. Dichi, hela chakwila chikuhwelelu chetu chakushakama mwiwulu hela hamaseki, wejima wetu tunakufwila kwiluka chikupu “kusañuka kwakusambila.” Komana hikusañuka kwamuchidinyi? Kwakekalaku mpinjinyi?
Kutaña Bayibolu
(Afwilipi 4:10-23) Nazañalali chikupu mudi Mwanta hakwiluka nami ichi munatachiki cheñi kuñakamena. Hela chakwila mwadiña nakuñakamena, ilaña hakapinji kantesha mwakañenyi kwikala nampinji yakwila mwenimu. 11 Bayi neyi inakuhosha mwenimu muloña wakukaankilaku, muloña nadidizishi kuzañalela muyuma yinukweti, hichikweti muloña nanochu chidi chihandilu chamiku. 12 Neluka chikupu chakuhanda nayuma yantesha nichakuhanda nayuma yayivulu. Muyuma yejima nimukuhanda kwejima, nadidizishi dehi chakwikuta nichakwikala nanzala, chakwikala nayuma yayivulu nichakubula kwikala nayuma. 13 Nikweti ñovu yakuhita muyuma yejima muloña wanowu wanyinkaña ñovu. 14 Hela chochu, mwelili chiwahi himwankwashili mulukadi lwami. 15 Kafwampi, enu aFwilipi mweluka cheñi nenu, chelili munadizi dehi nsañu yayiwahi hampinji yinafuminiku kuMasidoniya, kwosi chipompelu hela chimu chazatilili hamu nanami kutalisha kunsañu yakuhana hela kutambwilaku, chiña enu hohu; 16 muloña hampinji yinadiña muTesalonika, mwantemesheleli yuma yinakaankilili, bayi kamu hohuku, ilaña kayedi. 17 Bayi neyi inakukeña nami munyinki chawaanaku, ilaña inakukeña nami mukoñeña nyidimu yayiwahi yinateli kuyihetesha nankashi. 18 Hela chochu, nikweti yuma yejima yinnakukeña, nawa yayivulu. Hinnakukaankila chuma hela chimuku, muloña natambwili yuma kudi Epafwaditu yimwatemesheli, yikweti ivumba dadiwahi, wowu mulambu wetejewa, watiyañayi Nzambi kuwaha. 19 Kuhitila mudi Kristu Yesu, Nzambi yami wakayinka yuma yejima yimunakukaankila kwesekeja nakuvula kwakulema kwindi. 20 Ichi dinu kudi Nzambi yetu nawa Tata, kwiikali kulema haya nyaaka nanyaaka. Ameni. 21 Muñimushiliku akwakujila ejima adikunda naKristu Yesu. Anakwetu inidi nawu hamu anayimushi. 22 Akwakujila ejima anayimushi, sweje-e dinu amwitala daKesari. 23 Luwi lwasweja lwaMwanta Yesu Kristu lwiikali nanenu muloña waspiritu yimwamwekeshaña.